 |
ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນສານປະຊາຊົນສູງສຸດ ແຫ່ງ ສສ.ຫວຽດນາມ.
ໃນໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຕີລາສູງ ຕໍ່ທ່ານ ຫງ໋ວຽນ ຮວາ ບິງ ພ້ອມດ້ວຍຄະນະ ໃນການເດີນທາງມາຢ້ຽມຢາມ ສປປ ລາວ ໃນຄັ້ງນີ້, ເຊິ່ງເປັນການປະ ກອບສ່ວນອັນສຳຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ຮອບດ້ານແບບພິເສດ ລະຫວ່າງ 2 ພັກ, 2 ລັດ ກໍຄື ປະຊາຊົນ 2 ປະເທດລາວ-ຫວຽດນາມ, ໂດຍສະເພາະໃນຂົງເຂດວຽກງານນິຕິກໍາ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ພ້ອມນີ້, ທ່ານ ຫງ໋ວຽນ ຮວາ ບິງ ກໍໄດ້ສະແດງຄວາມຂອບໃຈຕໍ່ທ່ານ ນາງ ປານີ ຢາທໍ່ຕູ້ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງສະພາບການເດີນທາງມາຄັ້ງນີ້ ເພື່ອເຮັດວຽກຮ່ວມກັບສານ ປະຊາຊົນ ສູງສຸດ ສປປ ລາວ. ພ້ອມສະແດງຄວາມຢືນຢັນວ່າ ຈະສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ 2 ປະເທດ ລາວ-ຫວຽດນາມ, ຫວຽດນາມ-ລາວ ໃຫ້ແຕກດອກອອກຜົນ ແລະ ແໜ້ນແຟ້ນຍິ່ງຂຶ້ນ.
（ຫັດທະບູນ）
