ສະຫາຍ ຫງວຽນບ໋າ ຮຸ່ງ ເອກອັກຄະ ລັດຖະທູດ ວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ສປປ ລາວ (ຊ້າຍ).
ກ່ອນໜ້ານີ້ 73 ປີ, ປະຊາຊົນຫວຽດນາມພາຍໃຕ້ການນຳພາ ຂອງພັກກອມມູນິດຫວຽດນາມ ໄດ້ດຳເນີນການປະຕິວັດເດືອນສິງຫາ ຢ່າງມີໄຊ, ວັນທີ 02 ກັນຍາ 1945, ປະທານໂຮ່ຈິມິນ, ຜູ້ນຳທີ່ແສນເຄົາລົບຮັກ ຂອງປະຊາຊົນຫວຽດນາມ, ຕາງໜ້າລັດຖະບານຊົ່ວຄາວ ໄດ້ອ່ານບົດຖະແຫລງປະກາດເອກະລາດ, ຊຶ່ງໄດ້ປະກາດໃຫ້ພໍ່ແມ່ປະຊາຊົນທັງຊາດ ແລະ ທົ່ວໂລກຊາບກ່ຽວກັບ ຄວາມເປັນເອກະລາດຂອງປະເທດຊາດ ແລະ ການສະຖາປະນາປະເທດ ສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນປະເທດ ສາທາລະນະລັດ ສັງຄົມນິຍົມຫວຽດນາມ. ນີ້ແມ່ນນິມິດໝາຍທີ່ຮຸ່ງເຮືອງເຫຼືອງເຫຼື້ອມ ໃນປະຫວັດສາດແຫ່ງຊາດຫວຽດນາມ ໄດ້ນຳເອົາປະເທດ ແລະ ຊາດຫວຽດນາມກ້າວເຂົ້າສູ່ສັງກາດໃໝ່ ຊຶ່ງແມ່ນສັງກາດແຫ່ງເອກະລາດ, ອິດສະຫລະພາບ ແລະ ສັງຄົມນິຍົມ.
ນັບແຕ່ນັ້ນເປັນຕົ້ນມາ, ພາຍໃຕ້ການນຳພາອັນຖືກຕ້ອງ ແລະ ສະຫລາດສ່ອງໃສຂອງພັກກອມມູນິດຫວຽດນາມ, ປະຊາຊົນຫວຽດນາມໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍ ແລະ ການທົດສອບນາໆປະການ ຍາດໄດ້ບັນດາໄຊຊະນະອັນໃຫຍ່ຫລວງ ຊຶ່ງມີຄວາມໝາຍປະຫວັດສາດເຊັ່ນ: ດຳເນີນການຕໍ່ຕ້ານຕີເອົາຊະນະສັດຕູ ຕ່າງດ້າວຜູ້ຮຸກຮານ, ທ້ອນໂຮມປະເທດຊາດເປັນເອກະພາບ, ປົກປັກຮັກສາປະເທດຊາດ, ເຮັດລ້ອນພັນທະສາກົນ, ປະຕິບັດຢ່າງສຳເລັດຜົນພາລະກິດປ່ຽນແປງໃໝ່, ບັນລຸໄດ້ຜົນງານຫລາຍຢ່າງສຳຄັນທີ່ສຸດ.ພັກ, ລັດ ແລະ ປະຊາຊົນຫວຽດນາມຍາມໃດ ກໍຮັບຮູ້ຢ່າງເລິກເຊິ່ງວ່າ, ໃນພາລະກິດສ້າງສາ ແລະ ປົກ ປັກຮັກສາປະເທດຊາດຫວຽດນາມ, ຄຽງຄູ່ຄວາມມານະພະຍາຍາມຂອງຕົນເອງ, ພວກຂ້າພະເຈົ້າຍາມໃດ ກໍໄດ້ຮັບການສະໜັບສະໜູນ, ການຊ່ວຍເຫລືອອັນລ້ຳຄ່າ ຂອງເພື່ອນມິດສາກົນ, ໂດຍສະເພາະ ແມ່ນຄວາມສາມັກຄີ ແລະ ການຊ່ວຍເຫລືອອັນໃຫຍ່ຫລວງ, ໝົດຈິດໝົດໃຈຈາກພັກ, ລັດ ແລະ ປະຊາຊົນລາວອ້າຍນ້ອງ. ໃນໂອກາດການສະເຫລີມສະຫລອງ ອັນສຳຄັນນີ້ຂອງປະເທດຊາດຫວຽດນາມ, ຕາງໜ້າພັກ, ລັດ ແລະ ປະຊາຊົນຫວຽດນາມ, ຂ້າພະເຈົ້າຂໍສະແດງຄວາມຂອບອົກຂອບໃຈ ຢ່າງເລິກເຊິ່ງມາຍັງພັກ, ລັດ ແລະ ປະຊາຊົນລາວອ້າຍນ້ອງ ທີ່ຍາມໃດກໍໃຫ້ຄວາມສາມັກຄີ, ສະໜັບສະໜູນ ແລະ ຊ່ວຍເຫລືອແກ່ຫວຽດນາມ. ຂ້າພະເຈົ້າກໍຂໍສະແດງຄວາມຂອບອົກຂອບໃຈ ຢ່າງຈິງໃຈມາຍັງອົງຄະນະພັກແຕ່ລະຂັ້ນ, ອຳນາດການປົກຄອງ ແລະ ປະຊາຊົນລາວ ໄດ້ໃຫ້ຄວາມເອົາໃຈໃສ່ອຳນວຍຄວາມສະດວກ ໃຫ້ແກ່ວົງຄະນະຍາດຊາວຫວຽນາມ ອາໄສຢູ່ລາວມີການດຳລົງຊີວິດຖາວອນ, ປະກອບສ່ວນ ເຂົ້າໃນພາລະກິດສ້າງສາປະເທດລາວ ໃຫ້ວັດທະນະຖາວອນ ແລະ ເປັນຂົວຕໍ່ຢ່າງໜັກແໜ້ນ ໃຫ້ແກ່ສາຍພົວພັນແບບພິເສດ ລະຫວ່າງສອງປະເທດ.
ພວກເຮົາສຸດທີ່ດີອົກດີໃຈ ແລະ ເອກອ້າງທະນົງໃຈທີ່ເຫັນວ່າ ໃນຫລາຍປີຜ່ານມາ, ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງຫວຽດນາມ -ລາວໄດ້ມີການຂະຫຍາຍຕົວ ຢ່າງຕໍ່ເນື່ອງ, ນັບມື້ກວ້້າງຂວາງ ແລະ ເລິກເຊິ່ງ, ແທດກັບຕົວຈິງ ແລະ ມີປະສິດທິຜົນ, ນຳເອົາຜົນປະໂຫຍດທີ່ແທ້ຈິງ ແລະ ໃຫຍ່ຫລວງມາສູ່ສອງປະເທດ. ໂດຍສະເພາະ, ໃນປີ 2017, ສອງຝ່າຍ ໄດ້ປະສານສົມທົບການຈັດຕັ້ງ ສຳເລັດຜົນເປັນຢ່າງດີທີ່ສຸດ ປີສາມັກຄີມິດຕະພາບ ເພື່ອສະເຫລີມສະຫລອງ ວັນສ້າງຕັ້ງສາຍພົວພັນການທູດຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 40 ປີ ໂດຍມີຫລາຍຮ້ອຍກິດຈະກຳສະເຫລີມສະຫລອງ ດ້ວຍຫລາຍຮູບການ, ສະຫງ່າຜ່າເຜີຍ, ແທດເໝາະກັບຕົວຈິງ ຊຶ່ງບໍ່ພຽງແຕ່ໄດ້ຈັດຢູ່ແຕ່ລະປະເທດເທົ່ານັ້ນ ຫາກຍັງໄດ້ຈັດການສະເຫລີມສະຫລອງ ຢູ່ບັນດາອົງການຜູ້ຕາງໜ້າຂອງຫວຽດນາມ ແລະ ລາວ ຢູ່ຕ່າງປະເທດອີກດ້ວຍ. ການຮ່ວມມືທາງດ້ານເສດຖະກິດ ມີບາດກ້າວບຸກທະລຸ, ຫວຽດນາມສືບຕໍ່ເປັນໜື່ງໃນບັນດາປະເທດນຳໜ້າ ກ່ຽວກັບການລົງທຶນ ແລະ ຄູ່ຄ້າລາຍໃຫຍ່ຂອງລາວ. ການເຊື່ອມຈອດສອງພື້ນຖານເສດຖະກິດ, ເປັນຕົ້ນແມ່ນການເຊື່ອມຈອດ ທາງດ້ານພື້ນຖານໂຄງຮ່າງ, ຄົມມະນາຄົມ ແລະ ຂົນສົ່ງກຳລັງໄດ້ຮັບການຊຸກຍູ້ຢ່າງແຂງແຮງ. ຂ້າພະເຈົ້າເຊື່ອໝັ້ນວ່າ ໃນອະນາຄົດອັນໃກ້ໆນີ້, ປະເທດລາວຈະກາຍເປັນສູນການເຊື່ອມຈອດ ແລະ ຜ່ານແດນທີ່ສໍາຄັນຢູ່ ໃນອາຊີຕາເວັນອອກສ່ຽງໃຕ້ດ້ວຍ ການຮ່ວມມືຂອງຫວຽດນາມ ແລະ ບັນດາປະເທດຕ່າງໆໃນພາກພື້ນ. ການຮ່ວມມືໃນບັນດາຂົງເຂດຕ່າງໆ ກໍ່ໄດ້ຮັບການເພີ່ມທະວີແທດກັບຕົວຈິງ ແລະ ເລິກເຊິ່ງກວ່າເກົ່າ.
ຫວນຄືນເສັ້ນທາງປະຫວັດສາດ ທີ່ສະຫງ່າອົງອາດເຊິ່ງສອງຊາດລາວ ແລະ ຫວຽດນາມໄດ້ຜ່ານໄປນັ້ນ, ພວກເຮົາສຸດທີມີຄວາມເອກອ້າງທະນົງໃຈ ກ່ຽວກັບຄວາມເປັນມາ ແລະ ການເຕີບໃຫຍ່ຂະຫຍາຍຕົວ ຂອງສາຍພົວພັນພິເສດ, ຫາຍາກລະຫວ່າງສອງຊາດ. ນັ້ນແມ່ນສາຍພົວພັນທີ່ໄດ້ພັດທະນາຢ່າງບໍ່ຢຸດຢັ້ງ ຈາກສາຍພົວພັນອັນເປັນມູນເຊື້ອ ສະໜິດສະໜົມກາຍເປັນສາຍພົວພັນພິເສດ ໂດຍປະທານໂຮ່ຈິມີນຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານສຸພານຸວົງ ທີ່ແສນເຄົາລົບຮັກ ເປັນຜູ້ກໍ່ຕັ້ງໂດຍກົງ, ໄດ້ການນຳຮຸ່ນຕ່າງໆ ສືບທອດ ແລະ ປະຊາຊົນສອງປະເທດ ເພີ່ມພູນ ຄູນສ້າງ, ຜ່ານຜ່າຄວາມຫຍຸ້ງຍາກ, ການທ້າທາຍນາໆປະການ, ສາຍພົວພັນດັ່ງກ່າວ ໄດ້ສະຫລຸບສັງລວມວ່າ ເປັນສາຍພົວພັນເປັນຕາຍ, ເປັນແບບຢ່າງ, ສັດຊື່ບໍລິສຸດທີ່ຫາຍາກ ໃນການພົວພັນສາກົນ, ເປັນສາຍພົວພັນທີ່ມີລັກສະນະກົດເກນ, ເປັນປັດໄຈຮັບປະກັນໄຊຊະນະ ໃຫ້ແກ່ພາລະກິດການປະຕິວັດ ຂອງແຕ່ລະປະເທດ ແລະ ເປັນມໍລະດົກອັນລ້ຳຄ່າຂອງສອງຊາດ ແລະ ເປັນແຫລ່ງກຳລັງແຮງອັນໃຫຍ່ຫລວງ ໃຫ້ແກ່ພາລະກິດສ້າງສາ ແລະ ປົກປັກຮັກສາປະເທດຊາດ ຂອງແຕ່ລະປະເທດຂອງພວກເຮົາ.
ພິເສດ, ໃນໄລຍະຜ່ານມາ, ສາຍໃຈຫວຽດ-ລາວ ຍັງໄດ້ສະແດງໃຫ້ເຫັນຢ່າງເລິກເຊິ່ງ ເຂັ້ມຂົ້ນ ໃນຊວ່ງເວລາ ທີ່ສອງປະເທດ ຮ່ວມກັນຜ່ານຜ່າຄວາມຫຍຸ້ງຍາກ ໂດຍໄພທຳມະຊາດກໍ່ຂຶ້ນ. ໃນປີ 2017 ກໍຄືໃນ 8 ເດືອນຕົ້ນປີ 2018, ພັກ, ລັດລາວໄດ້ມີການສະໜັບສະໜູນ, ຊ່ວຍເຫລືອດ້ວຍຫລາຍຮູບການ, ໃນນັ້ນມີການລະດົມທົ່ວສັງຄົມບໍລິຈາກເງິນ, ວັດຖຸຊ່ວຍເຫລືອຜູ້ປະສົບໄພນ້ຳຖ້ວມ ຢູ່ຫວຽດນາມ. ພວກຂ້າພະເຈົ້າສຸດທີຕື້ນຕັນໃຈ ເມື່ອໄດ້ຮັບເຂົ້າສານແຕ່ລະເມັດ ທີ່ເຕັມໄປດ້ວຍນໍ້າຈິດນໍ້າໃຈຂອງການນຳ ແລະ ປະຊາຊົນລາວ ເຖິງວ່າຍັງປະສົບກັບຄວາມຫຍຸ້ງຍາກຫລາຍກໍຕາມ ແຕ່ກໍຍັງແບ່ງປັນ, ໃຫ້ການຊ່ວຍເຫລືອແກ່ປະຊາຊົນຫວຽດນາມ. ໃນໂອກາດນີ້, ພວກຂ້າພະເຈົ້າກໍຂໍສະແດງ ຄວາມຮູ້ບຸນຄຸນຢ່າງຈິງໃຈມາຍັງປະຊາຊົນໂລກ, ບັນດາປະເທດອາຊຽນ ແລະ ວົງຄະນາຍາດສາກົນ ໄດ້ຊ່ວຍເຫລືອປະຊາຊົນຫວຽດນາມ ຢ່າງທັນການ. ກົງກັນຂ້າມ, ເມື່ອປະຊາຊົນລາວຢູ່ບັນດາເຂດທີ່ຖືກໄພທຳມະຊາດ ເຖິງວ່າຫາກໍຖືກຜົນກະທົບອັນໜັກໜ່ວງ ຈາກພະຍຸເຊີນຕີງກໍ່ຂື້ນ, ແຕ່ບັນດາກະຊວງ, ຂະແໜງການ, ອຳນາດການປົກຄອງ ແລະປະຊາຊົນໃນທົ່ວປະເທດຫວຽດນາມ, ຈົນຮອດບັນດາອົງການຜູ້ຕາງໜ້າຫວຽດນາມ ຢູ່ຕ່າງປະເທດລ້ວນແຕ່ໄດ້ອວ່າຍໜ້າ ມາສູ່ປະເທດລາວອ້າຍນ້ອງ, ປະກອບສ່ວນທັງດ້ານກຳລັງຄົນ, ທັງວັດຖຸ ແລະຈິດໃຈ ເພື່ອຊ່ວຍເຫຼືອປະຊາຊົນລາວ ທີ່ຖືກກະທົບຈາກໄພພິບັດດັ່ງກ່າວ. ຕໍ່ໜ້າການປ່ຽນແປງຍາກທີ່ຈະຄາດຄະເນໄດ້ ຂອງດິນຟ້າອາກາດແລະ ສິ່ງແວດລ້ອມ ຍິ່ງກວ່າເວລາໃດໝົດ, ປະຊາຊົນລາວ ແລະ ປະຊາຊົນຫວຽດນາມ ພ້ອມກັບວົງຄະນາຍາດສາດກົນ ຈະຈັບມືກັນຢ່າງແໜ້ນແຟ້ນ ໃນການຕໍ່ສູ້ກັບໄພທຳມະຊາດ. ການພົວພັນພິເສດຫວຽດນາມ-ລາວ, ລາວ-ຫວຽດນາມຈະຖືກທົດສອບ, ຝຶກຝຜົນຫລໍ່ຫລອມໃນການຕໍ່ສູ້ລວມນີ້.
ປັດຈຸບັນ, ສອງປະເທດພວກເຮົາກໍາລັງ ຢູ່ຕໍ່ໜ້າຫຼາຍກາລະໂອກາດ ໃນການພັດທະນາ ແຕ່ກໍຕ້ອງປະເຊີນໜ້າກັບຄວາມຫຍຸ້ງຍາກ, ການທະທາຍບໍ່ແມ່ນໜ້ອຍ, ຍິ່ງກວ່າເວລາໃດໝົດ ພວກເຮົາຈຳເປັນຕ້ອງເພີ່ມທະວີ ແລະ ເສີມຂະຫຍາຍສາຍພົວພັນ ຄວາມສາມັກຄີພິເສດຫວຽດນາມ-ລາວ ໃຫ້ຍິ່ງໆຂຶ້ນ. ປະຫວັດສາດແຫ່ງການພັດທະນາ ຢູ່ສອງປະເທດໄດ້ສະແດງໃຫ້ເຫັນວ່າ, ຖ້າບໍ່ມີສາຍພົວພັນພິເສດດັ່ງກ່າວນັ້ນ ເຊີ່ງພາລະກິດຕໍ່ສູ້ປົດປ່ອຍຊາດ ໃນເມື່ອກ່ອນກໍຄືພາລະກິດສ້າງສາ ແລະ ປົກປັກຮັກສາປະເທດຊາດ ຂອງສອງປະເທດໃນປັດຈຸບັນ ຈະບໍ່ສາມາດຍາດມາບັນດາຜົນງານອັນໃຫຍ່ຫລວງໄດ້. ພັກ, ລັດ ແລະ ປະຊາຊົນຫວຽດນາມ ສັນຍາວ່າຈະຮ່ວມກັບພັກ, ລັດ ແລະ ປະຊາຊົນລາວອ້າຍນ້ອງ ປົກປັກຮັກສາ, ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດຫວຽດນາມ-ລາວ ໃຫ້ໝັ້ນຄົງຕະຫລອດການ ແລະ ພັດທະນາຢ່າງບໍ່ຢຸດຢັ້ງ, ເກີດດອກອອກຜົນ ເພື່ອນຳສອງປະເທດຂອງພວກເຮົາ ກ້າວຂື້ນຢ່າງໜັກແໜ້ນ, ເພື່ອຜົນປະໂຫຍດຂອງປະຊາຊົນສອງປະເທດ, ທັງເປັນການປະກອບສຳຄັນສ່ວນ ເຂົ້າພາລະກິດສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາ ຢູ່ໃນພາກພື້ນ ແລະ ໃນໂລກ.
（ຫັດທະບູນ）
