 |
ທ່ານປະທານເທດ ບຸນຍັງ ວໍລະຈິດ ຕ້ອນຮັບການເຂົ້າພົບຂອງ ສະຫາຍ ຫວໍ ວັນ ເຖືອງກໍາມະການກົມການເມືອງສູນກາງພັກ ຫວຽດນາມ. (ພາບ: ຂປລ)
ໃນການພົບປະຄັ້ງນີ້, ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ ສະຫາຍ ຫວໍ ວັນ ເຖືອງ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມສໍາມະນາທິດສະດີ ລະຫວ່າງ ພັກ ປປ ລາວ ແລະ ພັກກອມມູນິດຫວຽດນາມ ຄັ້ງທີ 6, ເຊິ່ງເປັນການຈັດຕັ້ງຜັນຂະຫຍາຍ ຜົນຂອງການພົບປະ ລະຫວ່າງ ການນໍາສູງສຸດຂອງສອງພັກ ລາວ-ຫວຽດນາມ ທີ່ໄດ້ເປັນເອກະພາບກັນ ໃນໄລຍະທີ່ຜ່ານມາ. ກ່ຽວກັບການຮັກສາການພົບປະແລກປ່ຽນ ການຢ້ຽມຢາມ ລະຫວ່າງ ການນໍາຂັ້ນສູງ ຂອງສອງພັກ ຢ່າງເປັນປົກກະຕິ ແລະ ການຜັດປ່ຽນ ກັນເປັນເຈົ້າພາບ ຈັດກອງປະຊຸມ ສໍາມະນາທິດສະດີ ລະຫວ່າງ ສອງພັກໃນທຸກໆປີ. ການມາຢ້ຽມຢາມ ແລະ ເຂົ້າຮ່ວມ ກອງປະຊຸມສໍາມະນາທິດສະດີ ລະຫວ່າງ ສອງພັກ ຂອງ ສະຫາຍ ຫວໍ ວັນ ເຖືອງ ໃນຄັ້ງນີ້, ໄດ້ປະກອບສ່ວນອັນສໍາຄັນ ເຂົ້າໃນການເພີ່ມທະວີສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃຫ້ນັບມື້ແໜ້ນແຟ້ນເລິກເຊິ່ງ ແລະ ເກີດດອກອອກຜົນຍິ່ງໆຂຶ້ນ.
ກອງປະຊຸມສໍາມະນາທິດສະດີ ລະຫວ່າງ 2 ພັກ ລາວ-ຫວຽດນາມ ພາຍໃຕ້ຫົວຂໍ້ “ວຽກງານແນວຄິດ ໃນເງື່ອນໄຂປັດຈຸບັນ, ສະພາບຄວາມເປັນຈິງ, ບັນຫາຕັ້ງຂຶ້ນ ແລະ ວິທີແກ້ໄຂ” ເປັນຫົວຂໍ້ທີ່ສໍາຄັນຫລາຍ ເຊິ່ງທັງສອງຝ່າຍໄດ້ພ້ອມກັນຄົ້ນຄວ້າ ແລະ ແລກປ່ຽນບົນຮຽນເຊິ່ງກັນ ແລະ ກັນ ເພື່ອຮັບໃຊ້ ໃຫ້ແກ່ວຽກງານກໍາອໍານາດ ຂອງທັງສອງປະເທດລາວ-ຫວຽດນາມ ບົນເສັ້ນທາງສ້າງສາພັດທະນາປະເທດຊາດ ໄປສູ່ຈຸດໝາຍສັງຄົມນິຍົມ, ພ້ອມທັງເປັນການປະກອບສ່ວນ ເຮັດໃຫ້ຄັງສ້າງທິດສະດີ ລະຫວ່າງ ສອງພັກ ໃຫ້ນັບມື້ມີເນື້ອໃນ ທີ່ອຸດົມສົມບູນຂຶ້ນ.
ໃນໂອກາດດຽວກັນ, ສະຫາຍ ຫວໍ ວັນ ເຖືອງ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງສະຫາຍ ບຸນຍັງ ວໍລະຈິດ ພ້ອມທັງຕີລາຄາຜົນສໍາເລັດ ທີ່ປະຊາຊົນລາວບັນດາເຜົ່າຍາດມາໄດ້ ພາຍໃຕ້ການນໍາພາຂອງພັກ ປະຊາຊົນປະຕິວັດລາວ, ຕີລາຄາສູງຕໍ່ຜົນສໍາເລັດອັນຈົບງາມ ໃນການຢ້ຽມ ຢາມ ສສ.ຫວຽດນາມ ຂອງສະຫາຍ ເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ໃນຕົ້ນເດືອນກໍລະກົດ ທີ່ຜ່ານມາ.
（ແຫຼ່ງຂໍ້ມູນ： ຂປລ）
