ນີ້ແມ່ນຄັ້ງທີ 4 ທີ່ກະຊວງປ້ອງກັນປະເທດ ແລະ ກະຊວງອຸດສາຫະກຳ - ການຄ້າ ສອງປະເທດສົມທົບກັນຈັດຕັ້ງງານວາງສະແດງສິນຄ້າຫວຽດນາມຢູ່ລາວ.
 |
ພິທີຕັດແຖບຜ້າ ໄຂງານວາງສະແດງສິນຄ້າຫວຽດນາມ - ລາວ ປີ 2018.
ເຂົ້າຮ່ວມພິທີໄຂມີ ທ່ານພົນໂທ ເຈິ່ນເດີນ, ກໍາມະການສູນກາງພັກ, ຄະນະປະຈໍາຄະນະພັກການທະຫານສູນກາງ, ຮອງລັດຖະມົນຕີກະຊວງປ້ອງກັນປະເທດຫວຽດນາມ; ທ່ານພົນຕີ ພູວົງ ວົງພົມ ຮອງລັດຖະມົນຕີກະຊວງປ້ອງກັນປະເທດລາວ...
 |
ທ່ານພົນໂທ ເຈິ່ນເດີນ, ກໍາມະການສູນກາງພັກ, ຄະນະປະຈໍາຄະນະພັກການທະຫານສູນກາງ ຢ້ຽມຊົມສິນຄ້າທີ່ງານ.
ທ່ານ ສົມຈິດ ອິນທະມິດ ກ່າວວ່າ: ການຈັດງານວາງສະແດງຄັ້ງນີ້ເປັນຄັ້ງທີ 11 ແລະ ເປັນຄັ້ງທີ 4 ທີ່ກະຊວງອຸດສາຫະກຳ ແລະ ການຄ້າ ແລະ ກະຊວງປ້ອງກັນປະເທດ ສປປ ລາວ ຈັດຮ່ວມກັບກະຊວງອຸດສະຫະກຳ ແລະ ການຄ້າ ແລະ ກະຊວງປ້ອງກັນປະເທດ ສສ ຫວຽດນາມ ມີຫົວຂໍ້ວ່າ ມິດຕະພາບການຮ່ວມມື ແລະ ການພັດທະນາ ເຊິ່ງເປັນງານທີ່ມີຄວາມໝາຍຄວາມສຳຄັນ ເປັນການປະກອບສ່ວນອັນສຳຄັນເຂົ້າໃນການເພີ່ມທະວີ ເສີມຂະຫຍາຍມູນເຊື້ອອັນດີງາມແຫ່ງສາຍພົວພັນມິດຕະພາບທີ່ຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກສອງລັດກໍ່ຄືປະຊາຊົນສອງຊາດລາວ-ຫວຽດນາມທີ່ມີມາແຕ່ດົນນານໃຫ້ມີຄວາມແໜ້ນແຟ້ນຈະເລີນງອກງາມຍິ່ງໆຂຶ້ນ ພ້ອມນັ້ນຍັງເປັນການຜັນຂະຫຍາຍການຮ່ວມມືດ້ານທີ່ລົງເລິກໃນຂົງເຂດເສດຖະກິດ ແລະ ທຸລະກິດໃຫ້ໄປສູ່ລວງເລິກ ອັນໄດ້ພິສູດໃຫ້ເຫັນວ່າມູນຄ່າການຄ້າລາວ-ຫວຽດນາມປີ 2017 ເພີ່ມຂຶ້ນ 13,7% ທຽບໃສ່ປີ 2016 ແລະ ການລົງທຶນຂອງວິສາຫະກິດຫວຽດນາມຢູ່ລາວກໍ່ມີຫຼາຍກວ່າ 400 ໂຄງການ ດ້ວຍມູນຄ່າຈົດທະບຽນປະມານ 3,7 ຕື້ໂດລາສະຫະລັດຈັດຢູ່ໃນອັນດັບທີ 3 ຕໍ່ຈາກ ສປ ຈີນ ແລະ ໄທ.
ງານວາງສະແດງດັ່ງກ່າວດຳເນີນມາແຕ່ວັນທີ 28 ມິຖຸນາ ຫາ 2 ກໍລະກົດ 2018 ມີຫ້ອງວາງສະແດງທັງໝົດ 200 ກວ່າຫ້ອງ ໃນນັ້ນມີທຸລະກິດຈາກ ສສ ຫວຽດນາມ ພາຍໃຕ້ການປະຕິບັດຂອງສູນການສົ່ງເສີມການຄ້າ ກະຊວງປ້ອງກັນປະເທດ ສສ ຫວຽດນາມຈຳນວນ 120 ຫ້ອງ ແລະ ພາກທຸລະກິດຂອງ ສປປ ລາວ 70 ກວ່າຫ້ອງຈາກທົ່ວປະເທດ ປະກອບມີຫຼາຍປະເພດສິນຄ້າທີ່ພົ້ນເດັ່ນຈາກສອງປະເທດເປັນຕົ້ນແມ່ນ ເຄື່ອງອຸປະໂພກ ແລະ ບໍລິໂພກເຊັ່ນ: ເຄື່ອງໃຊ້ຄົວເຮືອນ ອາຫານ ເຄື່ອງດື່ມ ອຸປະກອນເຄື່ອງມືການຜະລິດ ຝຸ່ນຊີວະພາບ ແລະ ເຕັກໂນໂລຊີທັນສະໄໝ ປະເພດສິນຄ້າກະສິກຳປຸງແຕ່ງ ເຄື່ອງຕັດຫຍິບ ເຟີນີເຈີ ເຄື່ອງຫັດຖະກຳໄມ້ ສິນຄ້າໂອດ໋ອບ ພ້ອມນັ້ນຍັງມີສິນຄ້າຂອງລັດວິສາຫະກິດຈາກກະຊວງປ້ອງກັນປະເທດລາວຈຳນວນ 10 ຫົວໜ່ວຍ ທີ່ເປັນນະວັດຕະກຳໃໝ່ໆ ແລະ ມີຫ້ອງວາງສະແດງການເມືອງຂອງສອງຊາດລາວ-ຫວຽດນາມ ເພື່ອນຳສະ ເໜີຜົນງານດ້ານເສດຖະກິດ-ສັງຄົມ ແລະ ການຄ້າ ມີກອງປະຊຸມພົບປະນັກທຸລະກິດລະຫວ່າງສະມາຄົມນັກທຸລະກິດຍິງນະຄອນຫຼວງວຽງຈັນ ແລະ ສະມາຄົມນັກທຸລະກິດຍິງນະຄອນຫຼວງຮ່າໂນ້ຍ ສສ ຫວຽດນາມ ການສະແດງສິລະປະ ການແຂ່ງຂັນຮ້ອງເພງຂອງນ້ອງນັກຮຽນໄວໜຸ່ມຕະຫຼອດການຈັດງານ ພ້ອມນີ້ຄະນະຈັດຕັ້ງງານວາງສະແດງສິນຄ້າຮ່ວມກັບບັນດາວິສາຫະກິດຈາກ ສສ ຫວຽດນາມ ໄດ້ມອບຂອງຂວັນໃຫ້ແກ່ຄອບຄົວນັກປະຕິວັດລາວຈຳນວນ 20 ຄອບຄົວທີ່ມີຜົນງານເດັ່ນໃນການປະຕິວັດ.
 |
ພິທີລົງນາມໃນຂໍ້ຕົກລົງຮ່ວມມືລະຫວ່າງວິສາຫະກິດສອງປະເທດ. (ພາບ: ສໍານັກຂ່າວສານຫວຽດນາມ)
ງານຕະຫຼາດນັດການຄ້າ ຫວຽດນາມ - ລາວ 2018 ໄດ້ດຶງດູດກວ່າ 140 ຫົວໜ່ວຍ, ວິສາຫະກິດຂອງສອງປະເທດ ເຂົ້າຮ່ວມຫຼາຍກວ່າ 200 ຮ້ານ ວາງຂາຍສິນຄ້າໃນເນື້ອທີ່ປະມານ 6.000 m2. ເຂດງານຕະຫຼາດນັດຂອງບັນດາ ວິສາຫະກິດ ຫວຽດນາມ ມີຮ້ານວາງຂາຍສິນຄ້າ 120 ຮ້ານ, ດ້ວຍເກືອບ 90 ຫົວໜ່ວຍວິສາຫະກິດເຂົ້າຮ່ວມ, ຮ້ານດັ່ງກ່າວໄດ້ວາງຂາຍບັນດາປະເພດສິນຄ້າ, ຜະລິດຕະພັນມີຄຸນນະພາບ, ມີອິດທິພົນຊື່ສຽງຢູ່ພາຍໃນປະເທດ ແລະສົ່ງອອກ ຄື: ເຄື່ອງຕໍ່າແຜ່ນຕັດຫຍິບ, ເກີບໜັງ, ສິນໃນນ້ຳ, ເຄື່ອງສິລະປະຫັດຖະກໍາ, ເຄື່ອງກໍ່ສ້າງ, ວັດສະດຸກໍ່ສ້າງ... ເຂດງານຕະຫຼາດນັດຂອງບັນດາວິສາຫະກິດລາວ ມີປະມານ 80 ຮ້ານວາງຂາຍສິນຄ້າ, ຈາກວິສາຫະກິດກວ່າ 50 ຫົວໜ່ວຍເຂົ້າຮ່ວມ.ກ່າວຄຳເຫັນທີ່ພິທີໄຂ, ທ່ານພົນໂທ ເຈິ່ນເດີນ, ຮອງລັດຖະມົນຕີກະຊວງປ້ອງກັນປະເທດຫວຽດນາມຢັ້ງຢືນວ່າ:
“ງານວາງສະແດງສິນຄ້າ ແມ່ນເຫດການດ້ານການເມືອງ, ເສດຖະກິດ, ສັງຄົມ ທີ່ມີຄວາມໝາຍສຳຄັນ ທັງປະກອບສ່ວນເຂົ້າໃນການຊຸກຍູ້ການພົວພັນມິດຕະພາບ ແລະ ການຮ່ວມມືລະຫວ່າງປະຊາຊົນສອງປະເທດຫວຽດນາມ - ລາວ. ນອກນັ້ນ, ຍັງເປັນໂອກາດເພື່ອໃຫ້ບັນດາວິສາຫະກິດຫວຽດນາມເວົ້າລວມ ແລະ ວິສາຫະກິດຂອງກອງທັບເວົ້າສະເພາະ ມີໂອກາດພົບປະແລກປ່ຽນ, ຊອກຫາລູກຄ້າທີ່ມີຄວາມສາມາດບົ່ມຊ້ອນ ແລະ ຄູ່ຮ່ວມມືການຄ້າ, ເປີດກວ້າງການພົວພັນການຄ້າກັບບັນດາວິສາຫະກິດລາວ, ຍູ້ແຮງການສົ່ງອອກຜະລິດຕະພັນ, ການບໍລິການ, ການທ່ອງທ່ຽວ ໄປຍັງຕະຫຼາດຂອງລາວ ແລະ ບັນດາປະເທດອາຊຽນອີກດ້ວຍ”.
 |
ສະມາຄົມນັກທຸລະກິດຍິງຫວຽດນາມ ໄດ້ສົມທົບກັບສະມາຄົມນັກທຸລະກິດຍິງນະຄອນຫຼວງວຽງຈັນ ຈັດຕັ້ງກອງປະຊຸມແລກປ່ຽນການຄ້າເຊື່ອມຕໍ່ການສະໜອງ ແລະ ຄວາມຕ້ອງການລະຫວ່າງວິສາຫະກິດຫວຽດນາມ ແລະ ວິສາຫະກິດນະຄອນຫຼວງວຽງຈັນ. ກ່າວຄຳເຫັນໄຂກອງປະຊຸມ, ທ່ານນາງ ມາຍທິຖຸຍ, ປະທານສະມາຄົມວິສາຫະກິດຂະໜາດກາງ ແລະ ນ້ອຍຮ່າໂນ້ຍ ໃຫ້ຮູ້ວ່າ, ນີ້ແມ່ນຄັ້ງທີ 5 ທີ່ສະມາຄົມນັກທຸລະກິດຍິງຫວຽດນາມ ເຂົ້າຮ່ວມງານຕະຫຼາດນັດການຄ້າຫວຽດນາມ - ລາວ ແລະ ຈັດຕັ້ງກອງປະຊຸມແລກປ່ຽນການຄ້າ, ເຊື່ອມຕໍ່ການດຳເນີນທຸລະກິດລະຫວ່າງບັນດາວິສາຫະກິດຂອງ 2 ປະເທດ.
ໃນການເຂົ້າຮ່ວມງານຕະຫຼາດນັດ 4 ຄັ້ງກ່ອນນັ້ນ, ມີວິສາຫະກິດເຂົ້າຮ່ວມວາງສະແດງຢູ່ລາວ ປະມານ 40% ຊອກໄດ້ຄູ່ຮ່ວມມື ຫຼື ຮັບໃບສັ່ງຊື້ສິນຄ້າຈາກຄູ່ຮ່ວມມືລາວ, ໃນນັ້ນຕົ້ນຕໍແມ່ນບັນດາປະເພດສິນຄ້າທີ່ມີຄຸນນະພາບສູງຂອງຫວຽດນາມ.
ພາຍຫຼັງກອງປະຊຸມດັ່ງກ່າວ ໄດ້ດຳເນີນພິທີລົງນາມໃນຂໍ້ຕົກລົງຮ່ວມມື 6 ສະບັບ ລະຫວ່າງບັນດາວິສາຫະກິດຂອງ 2 ປະເທດ, ໃນນັ້ນສຸມໃສ່ຕົ້ນຕໍແມ່ນໃນບັນດາຂົງເຂດຄື: ຈຳໜ່າຍບັນດາສິນຄ້າບໍລິໂພກ, ຮ່ວມມືດຳເນີນການທ່ອງທ່ຽວ, ໂຮງແຮມ ແລະ ການບໍລິການ…
 |
ພິທີຖະແຫຼງຂ່າວງານວາງສະແດງສິນຄ້າຫວຽດນາມ - ລາວ ປີ 2018.
ກ່ອນໜ້ານັ້ນ, ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ຮ່ວມກັບ ກົມເສດຖະກິດ ກະຊວງປ້ອງກັນປະເທດ ແຫ່ງ ສສ ຫວຽດນາມ ສົມທົບກັບ ກະຊວງປ້ອງກັນປະເທດ ແຫ່ງ ສປປ ລາວ ແລະ ກະຊວງອຸດສາຫະກຳ ແລະ ການຄ້າ ສສ ຫວຽດນາມ ຈະຈັດງານວາງສະແດງສິນຄ້າ ລາວ-ຫວຽດນາມ ໃນລະຫວ່າງ ວັນທີ 28 ມິຖຸນາ ຫາ ວັນທີ 2 ກໍລະກົດ 2018 ນີ້, ຢູ່ສູນການຄ້າ ລາວ-ໄອເຕັກ (ຕຶກເກົ່າ) ນະຄອນຫລວງວຽງຈັນ, ເຊິ່ງຈະນຳເອົາສິນຄ້າເຄື່ອງອຸປະໂພກ-ບໍລິໂພກ, ເຄື່ອງເອເລັກໂທນິກ ແລະ ອື່ນໆ ມາວາງສະແດງ ຫລາຍກວ່າ 320 ຫ້ອງ.
ທ່ານ ໄຊສົມເພັດ ນໍຣະສິງ ຮັກສາການຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ໄດ້ລາຍງານໃຫ້ຮູ້ ໃນພິທີຖະແຫລງຂ່າວ ໃນວັນທີ 25 ມິຖຸນາ 2018 ນີ້ວ່າ: ງານວາງສະແດງສິນຄ້າໃນຄັ້ງນີ້, ມີຫ້ອງວາງສະແດງທັງໝົດ 320 ຫ້ອງ ໃນນັ້ນ ມີນັກທຸລະກິດ ຈາກ ສສ ຫວຽດນາມ ນຳເອົາສິນຄ້າມາວາງສະແດງ 120 ຫ້ອງ ແລະ ພາກທຸລະກິດຂອງລາວ 200 ຫ້ອງຈາກທົ່ວປະເທດ. ພິເສດ ນອກຈາກສິນຄ້າຈາກຫົວໜ່ວຍທຸລະກິດຂອງພາກເອກະຊົນ ຂອງສອງປະເທດ ທີ່ມາວາງສະແດງພາຍໃນງານແລ້ວ ຍັງຈະມີສິນຄ້າຂອງລັດວິສາຫະກິດ ຈາກກະຊວງປ້ອງກັນປະເທດລາວ ຈຳນວນ 10 ຫົວໜ່ວຍ ຈະນຳເອົາຜົນງານ ແລະ ສິນຄ້າ ທີ່ເປັນນະວັດຕະກຳໃໝ່ໆ ມາວາງສະແດງ ແລະ ໂຄສະນາເຜີຍແຜ່ ໃຫ້ສັງຄົມໄດ້ຮັບຮູ້ຕື່ມອີກ. ພ້ອມນັ້ນ, ຍັງມີຫ້ອງວາງສະແດງການເມືອງ ຂອງສອງຊາດ ລາວ-ຫວຽດນາມ ເພື່ອນຳສະເໜີຜົນງານ ແລະ ການເຄື່ອນໄຫວທາງດ້ານການເມືອງຂອງການນຳພັກ-ລັດ ລວມທັງຜົນງານດ້ານເສດຖະກິດ-ສັງຄົມ ແລະ ການຄ້າ. ນອກນັ້ນ ຍັງຈະມີການສະແດງສິລະປະຂອງສອງຊາດ ລາວ-ຫວຽດນາມ ແລະ ການແຂ່ງຂັນຮ້ອງເພັງ ລາວ-ຫວຽດນາມ ຂອງນ້ອງນັກຮຽນ ແລະ ໄວໜຸ່ມ ຕະຫລອດການຈັດງານ.
ພ້ອມດຽວກັນນັ້ນ ຄະນະຈັດຕັ້ງງານວາງສະແດງສິນຄ້າ ຮ່ວມກັບບັນດາວິສາຫະກິດ ຈາກ ສສ ຫວຽດນາມ ຈະໄດ້ມອບຂອງຂວັນ ໃຫ້ແກ່ຄອບຄົວຂອງນັກປະຕິວັດວລາວ ຈຳນວນ 20 ຄອບ ຄົວ ທີ່ມີຜົນງານດີເດັ່ນໃນການປະຕິວັດ. ໃນລະຫວ່າງຈັດງານວາງສະແດງ ສະມາຄົມນັກທຸລະກິດຍິງ ນະຄອນຫລວງວຽງຈັນ ແລະ ສະມາຄົມນັກທຸລະກິດຍິງ ນະຄອນຫລວງຮ່າໂນ່ຍ ຈະຈັດກອງປະຊຸມກ່ຽວກັບການແລກປ່ຽນການຄ້າຂອງບັນດາວິສາຫະກິດ ລາວ-ຫວຽດນາມ ຕື່ມອີກ.
ທ່ານ ໄຊສົມເພັດ ນໍຣະສິງ ໃຫ້ຮູ້ອີກວ່າ: ຈຸດປະສົງຂອງການຈັດງານໃນຄັ້ງນີ້, ແນໃສ່ເປີດໂອກາດໃຫ້ນັກທຸລະກິດ, ຜູ້ປະກອບການຄ້າຂາຍ ຂອງ 2 ປະເທດ ໄດ້ມີໂອກາດແລກປ່ຽນບົດຮຽນ ແນະນຳຄຸນນະພາບສິນຄ້າ ເຊິ່ງກັນ ແລະ ກັນ ເພື່ອກ້າວໄປເຖິງການຂະຫຍາຍການຊື້ສິນຄ້າໃຫ້ຫລາຍຂຶ້ນກວ່າເກົ່າ ແລະ ຍັງເປັນການສ້າງຂະບວນການຕ້ອນຮັບປີທ່ອງທ່ຽວລາວ 2018 ໃຫ້ມີບັນ ຍາກາດອັນຄຶກຄື້ນມ່ວນຊື່ນ ທັງເປັນການກະຕຸ້ນການຄ້າສອງຝ່າຍ ໃນແຕ່ລະໄລຍະ ເພື່ອຜັນຂະ ຫຍາຍສົນທິສັນຍາການຄ້າຂອງສອງລັດຖະບານ ໄດ້ກຳນົດມູນຄ່າການຄ້າຂອງສອງປະເທດ ໃຫ້ບັນລຸ 5 ຕື້ໂດລາສະຫະລັດ ໃນປີ 2020.
（ຫັດທະບູນ）
