 |
ທ່ານ ພັນຄຳ ວິພາວັນ ຮອງປະທານປະເທດ ຕ້ອນຮັບ ທ່ານ ເລວີ້ງເຕີນ ກໍາມະການສູນ ກາງພັກ ຄອມມູນິດຫວຽດນາມ. (ພາບ: ຂປລ)
ໃນວັນທີ 4 ກໍລະກົດ 2018, ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ໃຫ້ກຽດ ຕ້ອນຮັບການເຂົ້າຢ້ຽມຂ່ຳນັບ ທ່ານ ເລວີ້ງເຕີນ ກໍາມະການສູນ ກາງພັກ ຄອມມູນິດຫວຽດນາມ, ລັດຖະມົນຕີກະຊວງພາຍໃນ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຮ່ວມກັບ ກະຊວງ ພາຍໃນ ຂອງ ສປປ ລາວ.
ໃນໂອກາດດັ່ງກ່າວ, ທ່ານ ພັນຄຳ ວິພາວັນ ໄດ້ກ່າວສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ທ່ານ ເລວີ້ງເຕີນ ທີ່ໄດ້ນຳພາຄະນະ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມທະວີສາຍພົວພັນ ມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນນານແລ້ວນັ້ນ ໃຫ້ແຕກດອກອອກຜົນຍິ່ງໆຂຶ້ນ, ໂດຍສະເພາະ ແມ່ນການສືບຕໍ່ ເສີມຂະຫຍາຍການພົວພັນ-ຮ່ວມມື ແລະ ການຊ່ວຍເຫລືອ ໃນຂົງເຂດວຽກງານຂອງສອງກະຊວງ ພາຍໃນລາວ-ຫວຽດນາມ ໃຫ້ນັບມື້ ນັບເພີ່ມທະວີ ແລະ ມີຜົນສໍາເລັດຢ່າງຕໍ່ເນື່ອງ ໃນທຸກຂົງເຂດວຽກງານ.
ໃນໂອກາດດຽວກັນນີ້, ທ່ານ ເລ ວີ້ງເຕີນ ໄດ້ຕາງໜ້າໃຫ້ ພັກ-ລັດຖະບານ ກໍຄື ກະຊວງພາຍໃນ ສສ.ຫວຽດນາມ ສະແດງຄວາມຂອບໃຈຢ່າງຈິງໃຈຕໍ່ ທ່ານ ພັນຄຳ ວິພາວັນ ທີ່ໄດ້ ສະຫລະເວລາ ອັນມີຄ່າໃຫ້ຕ້ອນຮັບຢ່າງອົບອຸ່ນໃນຄັ້ງນີ້, ຖານອ້າຍນ້ອງເພື່ອນມິດ ທີ່ສະໜິດແໜ້ນ. ພ້ອມນີ້, ຍັງຈະສືບຕໍ່ໃຫ້ ການຮ່ວມມື ແລະ ຊ່ວຍເຫລືອໃນດ້ານຕ່າງໆແກ່ ສປປ ລາວ ໂດຍສະເພາະແມ່ນ ກະຊວງພາຍໃນ ຂອງ ສປປ ລາວ ເປັນຕົ້ນ ແມ່ນການຍົກລະດັບດ້ານວິຊາສະເພາະ ແລະ ດ້ານເຕັກນິກວິຊາການອື່ນໆ ໃຫ້ມີຄວາມເຂັ້ມແຂງ. ພ້ອມທັງແຈ້ງຈຸດປະສົງ ຂອງການເດີນທາງ ມາຢ້ຽມຢາມ ສປປ ລາວ ໃນຄັ້ງນີ້ ໃຫ້ທ່ານຮອງປະທານປະເທດຮັບຊາບຕື່ມອີກ.
（ແຫຼ່ງຂໍ້ມູນ： ຂປລ）
