 |
ສະຫາຍ ບໍ່ແສງຄຳ ວົງດາລາ ມອບຫລຽນໄຊອິດສະຫລະຊັ້ນ II ໃຫ້ສະຫາຍ ຫງວຽນ ດຶກ ເລີ້ຍ
ລັດຖະບານແຫ່ງ ສປປ ລາວ ປະດັບຫລຽນໄຊໃຫ້ບຸກຄົນ ແລະ ກົມກອງລວມໝູ່ຂອງສຳນັກຂ່າວສານຫວຽດນາມໃນໂອກາດສະເຫລີມສະຫລອງ ຂ່າວສານປະເທດລາວຄົບຮອບ 50 ປີ (06/01/1968-06/01/2018) ທີ່ໄດ້ທຸ້ມເທທາງດ້ານເຫື່ອແຮງສະຕິປັນຍາຂອງຕົນປະກອບສ່ວນເຂົ້າໃນ ການພັດທະນາຂ່າວສານປະເທດລາວດ້ວຍການໃຫ້ຄວາມຮ່ວມມື ແລະ ຊ່ວຍເຫລືອທາງດ້ານວິຊາການດ້ານຂ່າວ, ເຕັກນິກ ແລະ ວັດຖຸອຸປະກອນ ຮັບໃຊ້ລະບົບສື່ສານ, ຂໍ້ມູນຂ່າວສານ ແລະ ອື່ນໆ ໃຫ້ສຳນັກຂ່າວສານປະເທດລາວຕະຫລອດມາ. ພິທີມອບ-ຮັບຫລຽນດັ່ງກ່າວ, ໄດ້ຈັດຂຶ້ນໃນວັນທີ 15 ມັງກອນ 2019 ນີ້ທີ່ ສສ.ຫວຽດນາມ ໂດຍຕາງໜ້າພັກ-ລັດຖະບານແຫ່ງ ສປປ ລາວ, ສະຫາຍ ບໍ່ແສງຄຳ ວົງດາລາ ກໍາມະການສູນກາງພັກ, ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ກຽດມອບຫລຽນໄຊອິດສະຫລະຊັ້ນ II ໃຫ້ ສະຫາຍ ຫງວຽນ ດຶກ ເລີ້ຍ ກຳມະການສູນກາງພັກກອມມູນິດ ຫວຽດນາມ, ຜູ້ອຳນວຍການໃຫຍ່ສຳນັກຂ່າວສານຫວຽດນາມ, ກົມກອງລວມໝູ່ 1 ໜ່ວຍ ແລະ ໄດ້ຍ້ອງຍໍຂັ້ນຫລຽນໄຊແຮງງານຊັ້ນ III ຈຳນວນ 8 ໜ່ວຍ, ພ້ອມສະຫາຍ ສູນທອນ ຄັນທະວົງ ຜູ້ອໍານວຍການໃຫຍ່ສໍານັກຂ່າວສານປະເທດລາວ ແລະ ຄະນະນໍາກ່ຽວຂ້ອງທັງສອງຝ່າຍເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວນີ້, ສະຫາຍ ສູນທອນ ຄັນທະວົງ ຜູ້ອໍານວຍການໃຫຍ່ສໍານັກຂ່າວສານປະເທດລາວກໍໄດ້ກ່າວສະແດງຄວາມຂອບໃຈ, ຊົມເຊີຍ ແລະ ຕີລາຄາສູງຕໍໍ່ການຮ່ວມມື ລະຫວ່າງ ສຳນັກຂ່າວສານປະເທດລາວ ແລະ ສຳນັກຂ່າວສານຫວຽດນາມຕະຫລອດໄລຍະ 50 ປີ ຜ່ານມາຖືວ່າສອງສຳນັກໄດ້ໃຫ້ການຮ່ວມມືຊ່ວຍເຫລືອເຊິ່ງກັນ ແລະ ກັນຕະຫລອດມາ, ໂດຍນັບແຕ່ຊຸມປີ 1960 ສຳນັກຂ່າວສານຫວຽດນາມໄດ້ສົ່ງພະນັກງານນັກຂ່າວ, ເຕັກນິກ ແລະ ວັດຖຸອຸປະກອນຮັບໃຊ້ມາຊ່ວຍເຫລືອວຽກງານ ຂ່າວສານຂອງພວກເຮົາ, ຊ່ວຍສ້າງບຸກຄະລາກອນ ແລະ ເຮັດໃຫ້ສຳນັກຂ່າວສານປະເທດລາວຖືກສ້າງຕັ້ງຂຶ້ນໃນວັນທີ 6 ມັງກອນ 1968, ໄດ້ເປັນບາດກ້າວໃໝ່ໃນການຮ່ວມມືລະຫວ່າງສຳນັກຂ່າວສານປະເທດລາວ ແລະ ສຳນັກຂ່າວສານຫວຽດນາມ, ໂດຍສະເພາະແມ່ນການນຳເອົາຂ່າວ, ໝາກຜົນຂອງການຕໍ່ສູ້ກູ້ຊາດ, ການເຄື່ອນໄຫວຂອງຜູ້ນຳ, ກອງທັບກໍຄື ພໍ່ແມ່ປະຊາຊົນລາວເພື່ອກະຈາຍສູ່ໂລກພາຍນອກໂດຍຜ່ານສຳນັກຂ່າວສານຫວຽດນາມ, ນັ້ນເປັນຈຸດເດັ່ນທີ່ພວກເຮົາບໍ່ສາມາດຫລົງລືມໄດ້.
ນອກຈາກນີ້, ຍັງມີຮູບພາບທີ່ໄດ້ຖ່າຍຈາກເຫດການຕ່າງໆໃນສະໜາມຮົບ ແລະ ການເຄື່ອນໄຫວຂອງການນຳພັກ-ລັດກໍຄືການຕໍ່ສູ້ຂອງປະຊາຊົນໃນແຕ່ລະບັ້ນຮົບ ແລະ ໃນແຕ່ລະສະໜາມຮົບທີ່ເປັນມູນມໍລະດົກອັນລ້ຳຄ່າທີ່ນັກຂ່າວຈາກສຳນັກຂ່າວສານຫວຽດນາມໄດ້ໃຫ້ການຊ່ວຍເຫລືອ ແລະ ໄດ້ບັນທຶກໄວ້, ຊຶ່ງມາຮອດປັດຈຸບັນໄດ້ມອບໃຫ້ແກ່ຂ່າວສານປະເທດລາວຈໍານວນໜຶ່ງ ແລະ ພວກເຮົາກໍ່ໄດ້ນຳໃຊ້ ຢ່າງມີຄຸນປະໂຫຍດ ໃນການໂຄສະນາເຜີຍແຜ່ ຂໍ້ມູນຂ່າວສານ, ປະຫວັດການເຄື່ອນໄຫວຕ່າງໆ ໃນສະໄໜສົງຄາມໃຫ້ແກ່ຄົນຮຸ່ນຫລັງໄດ້ສຶກສາຮຽນຮູ້. ໃນມື້ດຽວກັນນີ້, ກໍໄດ້ມີການພົບປະສອງຝ່າຍ ລະຫວ່າງ ສໍານັກຂ່າວສານປະເທດລາວ ແລະ ສໍານັກຂ່າວສານຫວຽດນາມເຊິ່ງທັງສອງຝ່າຍໄດ້ເຫັນດີ ເປັນເອກະພາບກັນ ຈະສືບຍົກສູງຄຸນນະພາບດ້ານແລກປ່ຽນຂໍ້ມູນຂ່າວສານ, ຊຸກຍູ້ບັນດາກິດຈະກໍາໂຄສະນາເຜີຍແຜ່ກ່ຽວກັບສາຍພົວພັນຮ່ວມມືແບບພິເສດ ລະຫວ່າງ ລາວ-ຫວຽດນາມ ກໍຄືປະເທດຊາດ ແລະ ປະຊາຊົນຂອງແຕ່ລະປະເທດໃຫ້ເຂັ້ມແຂງຂຶ້ນກວ່າເກົ່າ; ຂ່າວສານປະເທດລາວສືບຕໍ່ຊ່ວຍເຫລືອ ຂ່າວສານຫວຽດນາມຈໍາໜ່າຍໜັງສືພິມຮູບພາບຫວຽດນາມ (ເປັນພາສາລາວ) ຢູ່ລາວເພື່ອຍົກປະສິດທິຜົນໃນການໂຄສະນາການທູດ; ຂ່າວສານຫວຽດນາມໃຫ້ຄໍາໝັ້ນສັນຍາວ່າດ້ວຍຄວາມສາມາດຂອງຕົນເອງຈະສືບຕໍ່ຈັດຕັ້ງປະຕິບັດບັນດາໂຄງການກໍ່ສ້າງ, ຝຶກອົບຮົມແຕ່ລະໄລຍະໃຫ້ເໝາະສົມກັບສະພາບ. ການນໍາທັງສອງສໍານັກຂ່າວລາວ-ຫວຽດນາມມອບໃຫ້ພາກສ່ວນກ່ຽວຂ້ອງຂອງສອງສໍານັກຂ່າວສານສືບຕໍ່ປະສານສົບສົມທົບ ແລະ ເຮັດວຽກນໍາກັນເພື່ອເອກະພາບບັນດາເນື້ອໃນການຮ່ວມມືຢ່າງລະອຽດ ແລະ ອື່ນໆ.
ພາຍຫລັງສໍາເລັດການພົບປະສອງຝ່າຍ, ຄະນະນໍາສໍານັກຂ່າວສານປະເທດລາວນໍາໂດຍ ສະຫາຍ ສູນທອນ ຄັນທະວົງ ຜູ້ອໍານວຍການໃຫຍ່ສໍານັກຂ່າວສານປະເທດລາວໄດ້ເຂົ້າຢ້ຽມຂໍ່ານັບ ສະຫາຍ ນາງ ຕອງ ທິ ຟອງ ກໍາມະການກົມການເມືອງສູນກາງພັກ, ຮອງປະທານຜູ້ປະຈໍາການສະພາແຫ່ງຊາດຫວຽດນາມ.
（ແຫຼ່ງຂໍ້ມູນ： ຂປລ）
