 |
ບັນຍາກາດກອງປະຊຸມພົບປະ ລະຫວ່າງ ຄະນະປະຕິບັດງານພິເສດ ຮ່າຕິ໋ງ-ນະຄອນຫຼວງວຽງຈັນ.
ທີ່ການພົບປະເຈລະຈາຄັ້ງນີ້ ສອງຝ່າຍໄດ້ຮ່ວມກັນຕີລາຄາໝາກຜົນທີ່ບັນລຸໄດ້, ແລກປ່ຽນ ແລະ ຖອດຖອນບົດຮຽນ ໃນວຽກງານການປະສານສົມທົບ ກັນຊີ້ນຳການເຄື່ອນໄຫວສຳຫຼວດ, ຊອກຫາອັດຖິວິລະຊົນ ທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະ ໃນສະໄໝການຕໍ່ສູ້ ໃນຂອບເຂດນະຄອນຫຼວງວຽງຈັນ ແຕ່ອາດີດຮອດປະຈຸບັນ.
ມາຮອດປະຈຸບັນ, ແຂວງຮ່າຕິ໋ງ ແລະ ນະຄອນຫຼວງວຽງຈັນ ໄດ້ປະສານສົມທົບ ກັນຊອກຫາານ ແລະ ຂຸດຄົ້ນອັດຖິທະຫານວິລະຊົນ ໄດ້ 118 ອັດຖິ. ໃນລະດູແລ້ງ 2018-2019, ໄດ້ຊອກຫາ ແລະ ຂຸດຄົ້ນໄດ້ ຈຳນວນ 2 ອັດຖິ ຂອງທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະ ຢູ່ ປະເທດ ລາວ.
ກ່າວຄຳເຫັນໃນການພົບປະເຈລະຈາ, ທ່ານ ຟານ ກາວ ແທັງ ຫົວໜ້າຄະນະຂົນຂວາຍແຂວງ-ຫົວໜ້າຄະນະປະຕິບັດງານພິເສດແຂວງຮ່າຕິ໋ງ ໄດ້ຝາກຄຳຂອບໃຈຢ່າງເລິກເຊິ່ງ ຕໍ່ກັບການຊ່ວຍເຫຼືອຢ່າງສຸດອົກສຸດໃຈ, ເຕັມໄປດ້ວຍມິດຕະພາບ ຂອງ ຄະນະປະຕິບັດງານພິເສດຂອງນະຄອນຫຼວງວຽງຈັນ.
ພ້ອມກັນນັ້ນກຳນົດຢ່າງຈະແຈ້ງວ່າການຊອກຫາ ແລະ ຂຸດຄົ້ນ ອັດຖິໃນອານາຄົດຈະພົບກັບຄວາມຫຍຸ້ງຍາກ ຍ້ອນພູມສັນຖານອັນຫຍຸ້ງຍາກສັບສົນ, ທຸລະກັນດານ, ການໄປມາຍັງຫຍຸ້ງຍາກ, ແຫຼ່ງຂໍ້ມູນຍັງໜ້ອຍ. ຍ້ອນແນວນັ້ນ ແຂວງຮ່າຕິ໋ງ ຫວັງເປັນຢ່າງຍິ່ງວ່າ ພັກ ແລະ ລັດຖະບານລາວ ເວົ້າລວມ, ນະຄອນຫຼວງວຽງຈັນເວົ້າສະເພາະ ສືບຕໍ່ສ້າງເງື່ອນໄຂ, ເອົາໃຈໃສ່ຊ່ວຍເຫຼືອ ຄະນະຊອກຫາ-ຂຸດຄົ້ນ ເຮັດສຳເລັດໜ້າທີ່.
ຕ່າງໜ້າກອງບັນຊາການທະຫານ ນະຄອນຫຼວງວຽງຈັນ, ພົນຈັດຕະວາ ສີພອນ ຈັນສົມວົງ ກຳມະການພັກແຂວງ ຫົວໜ້າກອງບັນຊາການທະຫານຄະຫຼວງວຽງຈັນ ໄດ້ສົ່ງຄຳຂອບໃຈຢ່າງເລິກເຊິ່ງ ເຖິງນ້ຳໃຈ, ຄວາມເອົາໃຈໃສ່ຂອງພັກ, ອຳນາດການປົກຄອງ ແລະ ປະຊາຊົນ ແຂວງຮ່າຕິ໋ງ ທີ່ມອບໃຫ້ກັບ ກອງບັນຊາການທະຫານນະຄອນຫຼວງວຽງຈັນ.
ກອງບັນຊາການທະຫານນະຄອນຫຼວງວຽງຈັນ ຈະສືບຕໍ່ປະສານສົມທົບຢ່າງສະໜິດແໜ້ນກັບພັກ, ລັດຖະບານຫວຽດນາມ ເວົ້າລວມ , ແຂວງຮ່າຕິ໋ງເວົ້າສະເພາະ ໃນວຽກງານການຊອກຫາ ແລະ ຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະຫຼະ ຢູ່ ປະເທດລາວ.
 |
ໂອກາດນີ້, ແຂວງຮ່າຕິ໋ງ ໄດ້ມອບເງິນສົດຈຳນວນ 70 ລ້ານດົ່ງ ແລະ ຂອງຂວັນອີກຈຳນວນໜຶ່ງ ເພື່ອສະແດງຄຳຂອບໃຈ ໃນການຊ່ວຍເຫຼືອ ຂອງຄະນະປະຕິບັດງານພິເສດນະຄອນຫຼວງວຽງຈັນໃນໄລຍະຜ່ານມາ.
ຕອນບ່າຍຂອງວັນທີ 7 ພຶດສະພານີ້, ຄະນະປະຕິບັດງານພິເສດ ສອງແຂວງ ຈະຈັດຕັ້ງພິທີໄຫວ້ອາໄລ, ສູດ ແລະ ມອບຮັບອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ເສຍສະຫຼະຢູ່ ລາວ ກັບຄືນປະເທດ.
（ຫັດທະບູນ）
