 |
ການສ່ອງແສງ ງວດ 3 ລະຫວ່າງ ຫ້ອງການທະຫານຊາຍແດນ ເຊີນລາ ແລະ ກອງບັນຊາການທະຫານແຂວງ ຫົວພັນ.
ໃນງວດ 3 ປີ 2018 ສິດອະທິປະໄຕ, ຄວາມສະຫງົບ ຂອງທັງສອງຟາກຊາຍແດນ ໄດ້ຮັບການປົກປັກຮັກສາ, ສະພາບຄວາມສະຫງົບ ດ້ານການເມືອງ ແລະ ຄວາມເປັນລະບຽບຮຽບຮ້ອຍ ປອດໄພໃນສັງຄົມ ລຽບຕາມຊາຍແດນ. ບັນດາກົມກອງ ຕື່ນຕົວປະສານສົມທົບກັນຈັດຕັ້ງປະຕິບັດເປັນຢ່າງດີ ກົດລະບຽບ ປະສານສົມທົບໃນວຽກງານການຄຸ້ມຄອງ, ປ້ອງກັນຄວາມສະຫງົບ ແລະ ອະທິປະໄຕ ຊາຍແດນ, ແກ້ໄຂບັນຫາທີ່ເກີດຂື້ນກ່ຽວຂ້ອງກັບຊາຍແດນຂອງສອງຝ່າຍ. ອຳນາດການປົກຄອງ ແລະ ບັນດາອົງການຄຸ້ມຄອງທັງສອງຝ່າຍ ຍາມໃດກໍ່ຕ້ອງໄດ້ເອົາໃຈໃສ່ ສ້າງເງື່ອນໄຂໃຫ້ແກ່ປະຊາຊົນ ໄປມາເພື່ອຢ້ຽມຢາມຍາດຕິພີ່ນ້ອງ, ແລກປ່ຽນສິນຄ້າ, ປະກອບສ່ວນປົກປັກຮັກສານຳ້ໃຈສາມັກຄີ, ມິດຕະພາບ ລະຫວ່າງພະນັກງານ ແລະ ປະຊາຊົນທັງສອງຟາກຂອງຊາຍແດນ.
ໃນແຕ່ລະງວດ ບັນດາກົມກອງໄດ້ປະສານສົມທົບກັນລາດຕະເວນ ສອງຝ່າຍ ແລະ ຝ່າຍດຽວ ໄດ້ 10ຄັ້ງ ເຊິ່ງມີພະນັກງານ, ທະຫານ ແລະ ປະຊາຊົນ ຈຳນວນ 108 ສະຫາຍ ເຂົ້າຮ່ວມ; ເຮັດເອກກະສານເຂົ້າ-ອອກ ດ່ານ ໄດ້ ຈຳນວນ 5.546 ເທື່ອຄົນ ແລະ ພາຫະນະ ໃນການໄປມາ ຢ້ຽມຢາມຍາດຕິພີ່ນ້ອງ, ແລກປ່ຽນສິນຄ້າ ຜ່ານດ່ານກວດກາທະຫານຊາຍແດນ ແລະ ກອງພັນ.
ທີ່ກອງປະຊຸມ ບັນດາຄຳເຫັນລ້ວນແລ້ວແຕ່ເຫັນດີເປັນເອກກະພາບ ຕ້ອງໄດ້ສືບຕໍ່ຮັກສາຄົງໄວ້ ວຽກງານການຄຸ້ມຄອງ, ປ້ອງກັນ ອະທິປະໄຕຂອງພົມແດນ, ຄວາມສະຫງົບກໍ່ຄືຄວາມມີສະຖຽນລະພາບລຽບຕາມແນວຊາຍແດນທີ່ຕົນຮັບຜິດຊອບ, ເພີ່ມທະວີວຽກງານການຕໍ່ສູ້ , ສະກັດກັ້ນ ອາດສະຍາກອນ, ໂດຍສະເພາະແມ່ນການເຄື່ອນໄຫວຂອງອາສະຍາກອນ ກ່ຽວກັບຢາເສບຕິດ; ປະສານສົມທົບກັນໂຄສະນາເຜີຍແຜ່, ຂົນຂວາຍປະຊາຊົນ ທັງສອງຝ່າຍ ເຄົາລົບສົນທິສັນຍາ ກ່ຽວກັບກົດລະບຽບໃນການຄຸ້ມຄອງຊາຍແດນ ຢ່າງເຂັ້ມງວດ, ສັນຍາທີ່ລັດຖະບານທັງຝ່າຍໄດ້ເຊັນລົງນາມນຳກັນ.
（ຫັດທະບູນ）
