 |
ປກສ ແຂວງເຊກອງ -ກອງບັນຊາການທະຫານ ສສ ຫວຽດນາມ ແລກປ່ຽນບົດຮຽນວຽກງານປ້ອງກັນຊາດ-ປ້ອງກັນຄວາມສະຫງົບ.
ກອງບັນຊາການ ປກສ ແຂວງເຊກອງ ສປປ ລາວ ແລະ ກອງບັນຊາການທະຫານຊາຍແດນ ແຂວງກອນຕູມ ສສ ຫວຽດນາມ ໄດ້ຈັດກອງປະຊຸມພົບປະແລກປ່ຽນບົດຮຽນວຽກງານປ້ອງກັນຊາດ-ປ້ອງກັນຄວາມສະຫງົບໃນທ້າຍເດືອນພຶດສະພາປີ 2018 ຜ່ານມານີ້, ຢູ່ທີ່ກອງບັນຊາການ ປກສ ແຂວງເຊກອງ, ຝ່າຍແຂວງເຊກອງ ນຳໂດຍທ່ານ ພັອ ສົມໄຊ ພູລະຄຳມະນິ ຫົວໜ້າກອງບັນຊາການ ປກສ ແຂວງ ພ້ອມດ້ວຍຄະນະ, ຝ່າຍແຂວງ ກອນຕູມ ນໍາໂດຍ ພັອ ຟ້າມ-ງອກ-ພູ ຫົວໜ້າກອງບັນຊາການທະຫານຊາຍແດນ ແຂວງ ກອນຕູມ ສສ ຫວຽດນາມ ພ້ອມດ້ວຍຜູ້ແທນທັງສອງຝ່າຍເຂົ້າຮ່ວມ.
 |
 |
ປກສ ແຂວງເຊກອງ -ກອງບັນຊາການທະຫານ ສສ ຫວຽດນາມ ແລກປ່ຽນບົດຮຽນວຽກງານປ້ອງກັນຊາດ-ປ້ອງກັນຄວາມສະຫງົບ
ໃນກອງປະຊຸມຄະນະຜູ້ແທນທັງສອງຝ່າຍ ໄດ້ຜັດປ່ຽນກັນຂື້ນລາຍງານສະພາບການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ຢູ່ໃນແຂວງຂອງຕົນ ໄລຍະຜ່ານມາໃຫ້ກັນ ແລະ ກັນໄດ້ຮັບຮູ້, ເຊິ່ງຄະນະຜູ້ແທນທັງສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມື ສາມາດປົກປັກຮັກສາ ຄວາມສະຫງົບ-ຄວາມເປັນລະບຽບຮຽບຮ້ອຍ, ກຳລັງທັງສອງຝ່າຍໄດ້ປະສານສົມທົບຢ່າງໜັກ ແໜ້ນໃນວຽກງານຄຸ້ມຄອງດ່ານ, ກວດກາລາດຕະເວນຄົນເຂົ້າ-ອອກເມືອງ, ເຂົ້າອອກຜ່ານປະຕູດ່ານ, ກວດກາຄົນເຂົ້າ-ອອກເມືອງຢ່າງເຂັ້ມງວດ ບົນພື້ນຖານສາຍພົວພັນສາມັກຄີມິດຕະພາບພິເສດ.
ຈາກນັ້ນ ຄະນະຜູ້ແທນທັງສອງຝ່າຍກໍ່ໄດ້ປຶກສາຫາລື ເພື່ອສືບຕໍ່ພົວພັນຮ່ວມມືວຽກງານປົກປັກຮັກສາຄວາມສະຫງົບ ໂດຍໄດ້ມີຄວາມເປັນເອກະພາບກັນ ເພີ່ມທະວິຮັດແໜ້ນສາຍພົວພັນແລກປ່ຽນບົດຮຽນປະສານສົມທົບຂໍ້ມູນ-ຂ່າວສານ ເພື່ອຈັດຕັ້ງຜັນຂະຫຍາຍສາຍພົວພັນແບບພິເສດຂອງສອງພັກ-ສອງລັດເຂົ້າໃນການຮ່ວມມື ເພື່ອປ້ອງກັນ ແລະ ສະກັດກັ້ນສະພາບຕ່າງໆທີ່ອາດຈະເກີດຂືຶ້ນໃນຂອບເຂດຊາຍແດນຂອງສອງປະເທດ, ເພີ່ມທະວິວຽກງານໂຄສະນາສຶກສາອົບຮົມໃຫ້ພົນລະເມືອງຂອງສອງປະເທດທີ່ຢູ່ລຽບຕາມຊາຍແດນໃຫ້ເຄົາລົບປະຕິບັດລະບຽບກົດໝາຍ ແລະ ຮິດຄອງປະເພນີຂອງແຕ່ລະປະເທດໃຫ້ເລິກເຊິ່ງ ໂດຍສະເພາະປະຕິບັດການເຂົ້າ-ອອກເມືອງໃຫ້ຖຶກຕ້ອງຕາມລະບຽບກົດໝາຍຂອງສອງປະເທດທີ່ໄດ້ກຳນົດໄວ້ຢ່າງເຂັ້ມງວດ ເພື່ອຮັບປະກັນໃຫ້ທັງສອງປະເທດມີຄວາມສະຫງົບ ຄວາມເປັນລະບຽບຮຽບຮ້ອຍຢູ່ລຽບຕາມຊາຍແດນເພື່ອເຮັດໃຫ້ແຂວງເຊກອງ ແລະ ແຂວງ ກອນຕູມ ສສ ຫວຽດນາມ ກາຍເປັນຊາຍແດນສັນຕິພາບ-ມິດຕະພາບໝັ້ນຄົງຕະຫຼອດໄປ.
（ແຫຼ່ງຂໍ້ມູນ： tonamchanews.com）
