ໃນການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະແບບໃໝ່, ບັນດາຄະນະນັກຊ່ຽວຊານ, ກົມກອງທະຫານທ້ອງຖິ່ນແຂວງເຊີນລາ ແລະແຂວງລາຍເຈົາ: ກອງພົນ 316, ກອງພົນນ້ອຍ 335, ກອງພັນໃຫຍ່ 82... ຂອງທະຫານເຂດໄດ້ຄຽງບ່າຄຽງໄຫຼ່ພ້ອມກັບທະຫານ ແລະປະຊາຊົນປະເທດເພື່ອນມິດສູ້ຮົບຢູ່ສະໜາມຮົບພາກເໜືອລາວ, ສ້າງວິລະກຳອັນເລີດລ້ຳຫຼາຍຢ່າງ. ນັກຮົບອາສາສະໝັກທາງທິດຕາເວັນຕົກສ່ຽງເໜືອທີ່ເປັນແບບຢ່າງໃນການຕໍ່ສູ້ອັນພິລະອາດຫານຫຼາຍຄົນໄດ້ຮັບລາງວັນອັນສູງສົ່ງຈາກພັກ, ລັດລາວ ແລະຫວຽດນາມ.
ໃນພາລະກິດສ້າງສາ ແລະປົກປັກຮັກສາປະເທດຊາດ, ໃນຊຸມປີຜ່ານມາ, ບັນດາກົມກອງ, ທ້ອງຖິ່ນໃນບໍລິເວນທະຫານເຂດ 2 ໄດ້ສົມທົບກັບບັນດາກົມກອງ, ທ້ອງຖິ່ນຂອງປະເທດເພື່ອນມິດລາວ ຢ່າງເປັນປະຈຳ ເພື່ອຍູ້ແຮງການພັດທະນາເສດຖະກິດ-ສັງຄົມ, ປົກປັກຮັກສາອະທິປະໄຕເຂດຊາຍແດນຜືນແຜ່ນດິນໄວ້ຢ່າງໝັ້ນຄົງ; ຮັກສາສັນຕິພາບ, ສະຖຽນລະພາບ ເພື່ອຮັບປະກັນໃຫ້ຊີວິດຂອງປະຊາຊົນແຕ່ລະປະເທດມີຄວາມສະຫງົບສຸກ.
| ||
| ກອງປະຊຸມແລກປ່ຽນວຽກງານປະຈໍາໄລຍະລະຫວ່າງກອງບັນຊາການທະຫານແຂວງເຊີນລາ (ຫວຽດນາມ) ແລະກອງບັນຊາການທະຫານແຂວງອຸດົມໄຊ (ລາວ) ຢູ່ແຂວງເຊີນລາ, ປີ 2017. ພາບ: ຫງວຽນຮົ່ງສ໋າງ. |
ຕາມທ່ານພົນຈັດຕະວາ ເຈິ່ນຫງອັກຕ໋ວນ, ຮອງຫົວໜ້າການເມືອງທະຫານເຂດ 2 ແລ້ວ, ໃນຊຸມປີມໍ່ໆມານີ້, ກອງບັນຊາການທະຫານເຂດ ໄດ້ເອົາໃຈໃສ່ເປັນພິເສດເຖິງການເຄື່ອນໄຫວແຮກສ່ຽວ ແລະການຮ່ວມມືພັດທະນາເສດຖະກິດ-ສັງຄົມກັບປະເທດເພື່ອນມິດລາວ, ປະກອບສ່ວນເພີ່ມທະວີຄວາມເຂົ້າອົກເຂົ້າໃຈ, ຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ຮັດແໜ້ນສາຍພົວພັນສາມັກຄີມິດຕະພາບລະຫວ່າງສອງຊາດກວ່າອີກ. ການເຄື່ອນໄຫວຮ່ວມມື, ແຮກສ່ຽວນີ້ບໍ່ພຽງແຕ່ຢູ່ຂັ້ນກອງບັນຊາການທະຫານເຂດ ແລະກອງບັນຊາການທະຫານບັນດາແຂວງຊາຍແດນຕິດກັບປະເທດເພື່ອນມິດເທົ່ານັ້ນ, ຫາກຍັງແຜ່ຂະຫຍາຍຢ່າງກວ້າງຂວາງເຖິງຫຼາຍທ້ອງຖິ່ນໃນບໍລິເວນທະຫານເຂດອີກດ້ວຍ.
ມາຮອດປະຈຸບັນ, ກອງບັນຊາການທະຫານເຂດ 2 ໄດ້ຊີ້ນໍາກອງບັນຊາການທະຫານບັນດາແຂວງໃນບໍລິເວນ ແລະບັນດາກົມກອງ: ໂຮງຮຽນການທະຫານເຂດ, ກອງພົນ 316, ກອງພັນໃຫຍ່ 82... ຈັດຕັ້ງການແຮກສ່ຽວກັບ 11 ກົມກອງ, ທ້ອງຖິ່ນຂອງປະເທດເພື່ອນມິດລາວ. ທະຫານເຂດ ຍັງຊີ້ນໍາກອງບັນຊາການທະຫານບັນດາແຂວງຊາຍແດນສົມທົບກັບທະຫານຊາຍແດນຢ່າງແໜ້ນແຟ້ນ ເພື່ອຊ່ວຍຄະນະພັກ, ອໍານາດການປົກຄອງທ້ອງຖິ່ນປະຕິບັດວຽກງານການທູດປະຊາຊົນຜ່ານບັນດາກິດຈະກໍາແຮກສ່ຽວເປັນຢ່າງດີ; ມາຮອດປະຈຸບັນໄດ້ມີ 44 ຄູ່ບ້ານ, ໝູ່ບ້ານ, ຕາແສງ, ເມືອງຢູ່ສອງຟາກຊາຍແດນສອງປະເທດຈັດຈັ້ງການແຮກສ່ຽວ.
ໂດຍໄດ້ຮູ້ວ່າ, ໃນຊຸມປີຜ່ານມາ, ທະຫານເຂດ 2 ໄດ້ຊີ້ນໍາບັນດາກົມກອງຜັນຂະຫຍາຍການເຄື່ອນໄຫວຮ່ວມມືຊ່ວຍປະເທດເພື່ອນມິດລາວກໍ່ສ້າງບັນດາກິດຈະກໍາຮັບໃຊ້ຊີວິດການເປັນຢູ່ຂອງປະຊາຊົນ, ຄື: ໄຟຟ້າ, ເສັ້ນທາງ, ໂຮງຮຽນ... ໄລຍະ 2015-2019, ທະຫານເຂດ 2 ໄດ້ກໍ່ສ້າງເຮືອນແຫ່ງສາຍຈິດມິດໃຈຈໍານວນ 28 ຫຼັງ ມອບໃຫ້ຄອບຄົວນະໂຍບາຍທີ່ປະສົບກັບຄວາມຫຍຸ້ງຍາກເປັນພິເສດຢູ່ບັນດາແຂວງພາກເໜືອລາວ; ຕັ້ງໜ້າແນະນໍາປະຊາຊົນພັດທະນາເສດຖະກິດ, ຫຼຸດຜ່ອນຄວາມທຸກຍາກ, ລົບລ້າງຄວາມອຶດຫິວ. ບັນດາໝາກຜົນໃນການເຄື່ອນໄຫວສົມທົບ, ແຮກສ່ຽວລະຫວ່າງກໍາລັງປະກອບອາວຸດທະຫານເຂດ 2 ກັບບັນດາແຂວງພາກເໜືອລາວ ປະກອບສ່ວນຢ່າງແທດຈິງເຂົ້າໃນການຮັດແໜ້ນຄວາມສະໜິດຕິດພັນ, ເພີ່ມທະວີນ້ຳໃຈມິດຕະພາບລະຫວ່າງບັນດາທ້ອງຖິ່ນຕິດກັບຊາຍແດນສອງປະເທດເວົ້າສະເພາະ, ຄວາມສາມັກຄີມິດຕະພາບແບບພິເສດຫວຽດນາມ-ລາວ ເວົ້າລວມ.（ແຫຼ່ງຂໍ້ມູນ： la.qdnd.vn）
