 |
ພາບປະກອບ
ໃນການໃຫ້ສຳພາດກັບ NZZ ຂອງສະວິດເຊີແລນ, ເຈົ້າໜ້າທີ່ຮັບຜິດຊອບໂຄງການລີບຣາຂອງເຟສບຸກ ທ່ານເດວິດ ມາຄັສ ໃຫ້ຮູ້ວ່າ ເຄືອຂ່າຍທາງສັງຄົມອອນລາຍນີ້ຍັງຄົງຮັກສາເປົ້າໝາຍເພື່ອແນະນຳຕົວຢ່າງເງິນດີຈີຕອນໃນປີໜ້າ. ທ່ານເດວິດ ມາຄັສ ຍັງໃຫ້ຮູ້ອີກວ່າ ໃນອານາຄົດອັນໃກ້ນີ້ເຟດບຸກຈະໄດ້ສຸມໃສ່ການແກ້ໄຂບັນດາບັນຫາທີ່ກ່ຽວຂ້ອງກັບ Libra ໂດຍຫວັງວ່າຈະສາມາດຈະສ້າງສະພາບແວດລ້ອມທາງດ້ານລະບຽບການທີ່ໝັ້ນຄົງໃຫ້ແກ່ເງິນດີຈີຕອນຊະນິດນີ້.
ທ່ານຍັງໄດ້ກ່າວຕື່ມອີກວ່າ: ຍາກທີ່ຈະເປັນໄປໄດ້ທີ່ Libra ຈະກາຍ່ປັນພາຫະນະການສຳລະເງິນໃຫ້ແກ່ບັນດາການພົວພັນຊື້ຂາຍປົກກະຕິໃນໂລກຂອງຄວາມເປັນຈິງ ເປັນຕົ້ນແມ່ນຢູ່ບັນດາປະເທດ: ສະວິດເຊີແລນ, ເຢຍລະມັນຫຼືອັງກິດ ແຕ່ສະກຸນເງິນປະເພດນີ້ຈະສາມາດນຳໃຊ້ເຂົ້າໃນການຊື້-ຂາຍຂະໜາດນ້ອຍໂດຍຜ່ານຂອບເຂດຊາຍແດນລະຫວ່າງປະເທດ. ນອກນັ້ນ ທ່ານເດວິດ ມາຄັສ ຍັງຢັ້ງຢືນວ່າໂຄງການໂຄງການເງິນດີຈີຕອນ Libra ຂອງເຟສບຸກຈະບໍ່ເປັນໄພຂົ່ມຂູ່ຕໍ່ລະບົບການເງິນຂອງໂລກກໍ່ຄືຜົນສະທ້ອນຕ່າງໆທີ່ຈະເກີດຕໍ່ອັດຕາແລກປ່ຽນທົ່ວໂລກ.
ໃນກອງປະຊຸມສຸດຍອດຂອງກຸ່ມ 7 ປະເທດອຸດສາຫະກຳ ຫຼື G7 ໄດ້ເປີດຂຶ້ນເມື່ອເດືອນກໍລະກົດທີ່ຜ່ານມາຢູ່ທີ່ປະເທດຝຣັ່ງ, ບັນດາລັດຖະມົນຕີກະຊວງການເງິນ ແລະຜູ່ວ່າການທະນະຄານກາງໄດ້ສະແດງຄວາມວິຕົກກັງວົນເປັນຢ່າງຍິ່ງ ແລະ ຈະດຳເນີນການຢ່າງເລັ່ງດ່ວນເພື່ອສາມາດຄວບຄຸມກວດກາເງິນ Libra ໄດ້. ໄດ້ເດືອນມິຖຸນາທີ່ຜ່ານມາ ເຟສບຸກຖະແຫຼງວ່າກຳລັງເຄື່ອນໄຫວດຳເນີນການເງິນດີຈີຕອນທີ່ມີຊື່ວ່າ Libra ເພື່ອແນໃສ່ຈຸດປະສົງການສຳລະເງິນນທົ່ວໂລກດ້ວຍຄ່າສິ້ນເປືອງທີ່ຕໍ່າ ລະ ສາມາດດຳເນີນການໄດ້ໂດຍຜ່ານອຸປະກອນອີເລັກໂທຣນິກຕ່າງໆ.
Libra ຈະຖືກນຳໃຊ້ເຂົ້າໃນກະເປົາເງິນດີຈີຕອນຂອງເຟສບຸກເອງ ໂດຍມີຊື້່ວ່າ ຄາລີບຣາ (Calibra) ແລະ ຈະຖືກເຊືື່ອມຕໍ່ຜ່ານລະບົບຂໍ້ຄວາມຂອງເຟສບຸກ, ເມັດເຊນເຈີ ແລະ ວອສແອບ. ເຟສບຸກຫວັງຢ່າງຍິ່ງວ່າສະກຸນເງິນດີຈີຕອນ Libra ຈະປະກອບສ່ວນໃນການຊຸກຍູ້ຜັກດັນການພົວພັນຊື້ຂາຍລະຫວ່າງລູກຄ້າ ແລະ ພາກສ່ວນທຸລະກິດຕ່າງໆໃນທົ່ວໂລກ, ພ້ອມດຽວກັນນັ້ນມັນກໍ່ຍັງຈະຊ່ວຍບັນດາລູກຄ້າທີ່ບໍ່ໄດ້ໃຊ້ບໍລິການຂອງທະນາຄານ ສາມາດເຂົ້າເຖິງການເຮັດທຸລະກຳທາງການເງິນເປັນຄັ້ງທຳອິດຂອງຕົນ. ຕາມແຜນການ ເງິນດີຈີຕອນ Libra ຈະຖືກທົດລອງນຳໃຊ້ໃນທ້າຍປີນີ້ ແລະ ຈະນຳໃຊ້ຕົວຈິງໃນຕົ້ນປີ2020.
（ໄຊພອນ）
