 |
ທ່ານ ເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ ຫງວຽນ ບ໋າ ຮຸ່ງ
ນັກຂ່າວ: ທ່ານ ເອກອັກຄະລັດຖະທູດ ຈົ່ງໃຫ້ຮູ້ຄວາມໝາຍຕໍ່ເລື່ອງຫວຽດນາມ ໄດ້ຖືກເລືອກຕັ້ງເປັນກຳມະການບໍ່ຖາວອນສະພາຄວາມໝັ້ນຄົງ ສະຫະປະຊາຊາດອາຍຸການ 2020-2021?
ທ່ານ ເອກອັກຄະລັດຖະທູດ: ໃນວັນທີ 7 ມິຖຸນາ 2019 ຜ່ານມາ, ຢູ່ກອງປະຊຸມຄັ້ງທີ່ 73 ຂອງສະມັດຊາໃຫຍ່ ສະຫະປະຊາຊາດ, ເປັນຄັ້ງທີ່ສອງທີ່ຫວຽດນາມໄດ້ຮັບການເລືອກຕັ້ງເປັນກໍາມະການບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ ອາຍຸການ 2020-2021 ດ້ວຍຄະແນນສຽງ 192/193. ນີ້ແມ່ນຄະແນນສຽງທີ່ສູງທີ່ສຸດ ໃນການເລືອກຕັ້ງປະເທດໜຶ່ງເປັນກຳມະການ ສະພາຄວາມໝັ້ນຄົງສະຫະປະຊາຊາດ ໃນປະຫວັດສາດ 75 ປີ ແຫ່ງການຂະຫຍາຍຕົວຂອງສະຫະປະຊາຊາດ.
ຄືດັ່ງທີ່ບັນດາສະຫາຍໄດ້ຊາບ, ຢູ່ສະຫະປະຊາຊາດ, ສະພາຄວາມໝັ້ນຄົງ ແມ່ນອົງການທີ່ມີບົດບາດສຳຄັນເປັນອັນດັບໜຶ່ງ ໃນການຮັກສາສັນຕິພາບ ແລະ ຄວາມໝັ້ນຄົງຂອງໂລກ. ເລື່ອງເປັນກຳມະການສະພາຄວາມໝັ້ນຄົງ ແມ່ນຈຸດໝາຍສູ້ຊົນຂອງຫລາຍປະເທດ ຊຶ່ງມີລັກສະນະແຂ່ງຂັນກັນສູງທີ່ສຸດ.
ເລື່ອງຫວຽດນາມ ໄດ້ຮັບການເລືອກຕັ້ງເປັນກຳມະການບໍ່ຖາວອນ ຂອງສະພາຄວາມໝັ້ນຄົງສະຫະປະຊາຊາດ ດ້ວຍຄະແນນສຽງສູງທີ່ສຸດນັ້ນ ສະແດງໃຫ້ເຫັນວ່າ ບັນດາປະເທດ ໄດ້ຖືເປັນສຳຄັນຖານະ ບົດບາດ, ອິດທິພົນຊື່ສຽງຂອງຫວຽດນາມທີ່ສຸດ, ພິເສດແມ່ນຄວາມສາມາດໃນການປະກອບສ່ວນເຂົ້າໃນການແກ້ໄຂວຽກງານລວມຂອງໂລກ, ພ້ອມທັງແມ່ນຜົນສຳເລັດອັນໃຫຍ່ຫລວງທາງດ້ານວຽກງານການຕ່າງປະເທດຂອງຫວຽດນາມ ອັນໄດ້ຢືນຢັນລັກສະນະຖືກຕ້ອງຂອງແຜນນະໂຍບາຍ ເຊື່ອມໂຍງເຂົ້າກັບສາກົນ, ເປັນເຈົ້າການ, ເຂົ້າຮ່ວມຢ່າງຕັ້ງໜ້າ ແລະ ມີຄວາມຮັບຜິດຊອບສູງຂອງຫວຽດນາມ ຢູ່ໃນບັນດາກົນໄກ ຫລາຍຝ່າຍ, ສະແດງໃຫ້ເຫັນເຖິງຖານະບົດບາດໃໝ່ຂອງຫວຽດນາມ ຢູ່ໃນສາກົນ ບົນພື້ນຖານຜົນງານຂອງຂະບວນວິວັດແຫ່ງການປ່ຽນແປງໃໝ່ຢ່າງຮອບດ້ານຂອງຫວຽດນາມ. ຄວາມໄວ້ວາງໃຈດັ່ງກ່າວ ໄດ້ມີມາຈາດອິດທິພົນຂອງຫວຽດນາມ ໃນໄລຍະເປັນກຳມະການບໍ່ຖາວອນ ສະພາຄວາມໝັ້ນຄົງສະຫະປະຊາຊາດ ອາຍຸການ 2008-2009 ກໍຄື ການປະກອບສ່ວນຕ່າງໆທີ່ສຳຄັນຂອງຫວຽດນາມ ໃຫ້ແກ່ວຽກງານລວມຂອງວົງຄະນາຍາດສາກົນ ເຊັ່ນການເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ, ການເປັນປະເທດເຈົ້າພາບ ຈັດຕັ້ງສຳເລັດຜົນກອງປະຊຸມຂັ້ນສຸດຍອດ ລະຫວ່າງ ສ.ເກົາຫລີ - ອາເມລິກາ ເມື່ອເດືອນກຸມພາ 2019 ທີ່ຜ່ານມາ…
ນີ້ແມ່ນໝາກຜົນຂອງຂະບວນວິວັດ ແຫ່ງການຂົນຂວາຍໃນເກືອບ 10 ປີທີ່ຜ່ານມາ ໂດຍໄດ້ຮັບຄວາມເອົາໃຈໃສ່ຊີ້ນຳ ແລະ ເຂົ້າຮ່ວມໂດຍກົງຂອງການນຳຂັ້ນສູງຂອງພັກ-ລັດ, ການສະໜັບສະໜູນຂອງປະຊາຊົນຫວຽດນາມ. ຫວຽດນາມໄດ້ມານະພະຍາຍາມຈົນສຸດຄວາມສາມາດ ດ້ວຍຄວາມຕັດສິນໃຈສູງ, ຕັ້ງໜ້າຂົນຂວາຍເພື່ອໃຫ້ກາຍເປັນປະເທດດຽວ ຂອງພາກພື້ນອາຊີ-ປາຊີຟິກ ທີ່ໄດ້ອອກສະໝັກຮັບເລືອກຕັ້ງເປັນກຳມະການບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ ແລະ ໄດ້ຮັບການເລືອກຕັ້ງດ້ວຍຄະແນນສຽງສູງທີ່ສຸດ.
ນັກຂ່າວ: ສະຫາຍເອກອັກຄະລັດຖະທູດ ຈົ່ງຕີລາຄາຄວາມໝາຍຕໍ່ເລື່ອງຫວຽດນາມເປັນກຳມະການບໍ່ຖາວອນຂອງສະພາຄວາມໝັ້ນຄົງ ສະຫະປະຊາຊາດໄລຍະ 2020-2021?
ທ່ານ ເອກອັກຄະລັດຖະທູດ: ຄືດັ່ງບັນດາສະຫາຍ ແລະ ເພື່ອນມິດໄດ້ເຫັນ ສະພາບການໂລກໃນປະຈຸບັນພວມມີການຜັນແປໄປຢ່າງສັບສົນທີ່ສຸດ, ຍາກທີ່ຈະຄາດຄະເນລ່ວງໜ້າໄດ້ ແລະ ມີການກະທົບໂກຍກົງເຖິງການເຄື່ອນໄຫວຂອງສະພາຄວາມໝັ້ນຄົງ, ພິເສດແມ່ນໄດ້ປະກົດມີການທ້າທາຍໃໝ່ຫລາຍຢ່າງ ກ່ຽວກັບສັນຕິພາບ, ຄວາມໝັ້ນຄົງ ແລະ ການພັດທະນາ ຊຶ່ງບໍ່ມີປະເທດໃດໜຶ່ງຈະສາມາດແກ້ໄຂໂດຍຝ່າຍດຽວໄດ້, ການຊ່ວງເສັງ, ການທົດສອບດ້ານຍຸດທະສາດທີ່ນັບມື້ເຄັ່ງຕຶງຂຶ້ນ ລະຫວ່າງບັນດາປະເທດໃຫຍ່, ການເມືອງແບບມະຫາອຳນາດ, ທ່າອ່ຽງຝ່າຍດຽວກໍເພີ່ມຂຶ້ນ… ໃນສະຖານະການດັ່ງກ່າວ, ບັນດາປະເທດທີ່ເປັນສະມາຊິກຂອງສະຫະປະຊາຊາດ ສ່ວນຫລາຍມີຄວາມຕ້ອງການຢ່າງແຮງໃນການເພີ່ມທະວີການຮ່ວມມືສາກົນ, ລັດທິຫລາຍຝ່າຍ ແລະ ກົດໝາຍສາກົນເພື່ອປົກປ້ອງ ແລະ ຊຸກຍູ້ຜົນປະໂຫຍດແຫ່ງຊາດຂອງຕົນ ກໍຄືຜົນປະໂຫຍດລວມຂອງປະຊາຊາດ. ນີ້ແມ່ນທ່າອ່ຽງທີ່ແນ່ນອນ.
ສຳລັບຫວຽດນາມ, ເລື່ອງເຂົ້າຮ່ວມສະພາຄວາມໝັ້ນຄົງ ກ່ອນອື່ນໝົດແມ່ນເພື່ອປະກອບສ່ວນເພີ່ມທະວີການຮ່ວມມືສາກົນ, ເພີ່ມພູນຄູນສ້າງ ແລະ ປົກປັກຮັກສາສະພາບແວດລ້ອມແຫ່ງສັນຕິພາບໂລກຢ່າງໜັກແໜ້ນ, ຄວາມໝັ້ນຄົງມີສະຖຽນລະພາບ, ຈາກນັ້ນ ສ້າງເງື່ອນໄຂອຳນວຍຄວາມສະດວກໃຫ້ແກ່ການພັດທະນາຂອງປະເທດຊາດ. ເລື່ອງເຂົ້າຮ່ວມສະພາຄວາມໝັ້ນຄົງແມ່ນການສືບຕໍ່ປະຕິບັດແນວທາງການຕ່າງປະເທດຂອງພັກກອມມູນິດຫວຽດນາມວ່າ “ເປັນເຈົ້າການເຂົ້າຮ່ວມ ແລະ ເສີມຂະຫຍາຍບົດບາດຢູ່ໃນບັນດາກົນໄກຫລາຍຝ່າຍ, ພິເສດແມ່ນຢູ່ອາຊຽນ ແລະ ສະຫະປະຊາຊາດ”, ໃນນັ້ນ ຫວຽດນາມ ສູ້ຊົນສວມບົດບາດເປັນຂົວຕໍ່, ໄກ່ເກ່ຍຢູ່ໃນບັນດາເວທີຫລາຍຝ່າຍ, ພ້ອມທັງສະແດງຄວາມຮັບຜິດຊອບຂອງຫວຽດນາມ ໃນຖານະເປັນສະມາຊິກຂອງສະຫະປະຊາຊາດ ພ້ອມແລ້ວມທີ່ຈະເຂົ້າຮ່ວມການແກ້ໄຂ, ນຳພາ ແລະ ເປັນກາງໃນການໄກ່ເກ່ຍໃນບັນດາບັນຫາທີ່ສຳຄັນຂອງສາກົນ ແລະ ພາກພື້ນ.
ພ້ອມກັນນັ້ນ, ຫວຽດນາມ ກໍມີເງື່ອນໄຂປະກອບສ່ວນເຂົ້າໃນການແກ້ໄຂບັນດາບັນຫາທີ່ກ່ຽວຂ້ອງເຖິງສັນຕິພາບ, ຄວາມໝັ້ນຄົງຢູ່ໃນພາກພື້ນຕ່າງໆ, ປະກອບສ່ວນເຮັດໃຫ້ການພົວພັນສອງຝ່າຍກັບບັນດາປະເທດ, ບັນດາຄູ່ຮ່ວມມືຢູ່ໃນໂລກເລິກເຊິ່ງຕື່ມອີກ, ເພີ່ມທະວີຖານະບົດບາດຂອງຫວຽດນາມບົນເວທີສາກົນ. ນີ້ກໍແມ່ນກາລະໂອກາດເພື່ອໃຫ້ຫວຽດນາມ ສະແດງໃຫ້ເຫັນເຖິງການເຕີບໃຫຍ່ກ່ຽວກັບຄວາມສາມາດໃນການເຊື່ອມໂຍງດ້ານການເມືອງ, ຄວາມໝັ້ນຄົງສາກົນ, ພິເສດແມ່ນເມື່ອຫວຽດນາມຮັບຕຳແໜ່ງເປັນປະທານອາຊຽນໃນປີ 2020.
ນັກຂ່າວ: ສະຫາຍເອກອັກຄະລັດຖະທູດ ຈົ່ງໃຫ້ຮູ້ແຜນການດຳເນີນງານຕົ້ນຕໍ ແລະ ບັນດາບູລິມະສິດຂອງຫວຽດນາມໃນເມື່ອເຂົ້າຮ່ວມສະພາຄວາມໝັ້ນຄົງ?
ທ່ານ ເອກອັກຄະລັດຖະທູດ: ແຜນການດຳເນີນງານຕົ້ນຕໍຂອງຫວຽດນາມແມ່ນ “ເປັນຄູ່ຮ່ວມມືທີ່ໄວ້ເນື້ອເຊື່ອໃຈເພື່ອສັນຕິພາບທີ່ຍືນຍົງ” ດ້ວຍຄວາມມຸ້ງຫວັງໃນການປັບປຸງ ແລະ ເພີ່ມທະວີບັນດາການພົວພັນຮ່ວມມືຕ່າງໆ, ຊຸກຍູ້ຄວາມເຫັນດີເປັນເອກະພາບລວມເພື່ອຈຸດໝາຍລວມ ຄືສັນຕິພາບແລະການພັດທະນາແບບຍືນຍົງ.
ຫວຽດນາມ ຈະປະກອບສ່ວນເຂົ້າໃນການຊຸກຍູ້ລັດທິຫລາຍຝ່າຍ ແລະ ການຮ່ວມມືສາກົນຢ່າງຕັ້ງໜ້າ, ຖືສຳຄັນກົດບັດສະຫະປະຊາຊາດ ແລະ ກົດໝາຍສາກົນ, ເຂົ້າຮ່ວມໃນການແກ້ໄຂບັນດາຂໍ້ຂັດແຍ້ງຂອງສາກົນໂດຍສັນຕິວິທີ, ປະກອບສ່ວນໃນການຊອກຫາມາດຕະການແກ້ໄຂຍາວນານ, ໝັ້ນຄົງ ໃຫ້ ແກ່ບັນດາການປະທະກັນຢູ່ໃນໂລກ.
ຫວຽດນາມຈະໃຫ້ບູລິມະສິດເຂົ້າຮ່ວມໃນບາງຂົງເຂດ, ບັນຫາລະອຽດທີ່ຫວຽດນາມມີທ່າແຮງ ແລະໄດ້ຮັບຄວາມສົນໃຈຂອງສະຫະປະຊາຊາດ ແລະ ບັນດາປະເທດພາຄີ ຄື: ເພີ່ມທະວີການຮ່ວມມືລະຫວ່າງສະພາຄວາມໝັ້ນຄົງກັບບັນດາອົງການຈັດຕັ້ງພາກພື້ນ; ຟື້ນຟູຄືນໃໝ່ພາຍຫລັງເກີດການປະທະກັນ, ໃນນັ້ນມີການແກ້ໄຂຜົນຮ້າຍຈາກລະເບີດຍັງບໍ່ທັນແຕກຫລັງສົງຄາມ; ສະກັດກັ້ນການປະທະກັນ, ຖືສຳຄັນບັນດາມາດຕະການທີ່ເປັນກາງ, ໄກ່ເກ່ຍ; ແມ່ຍິງ, ສັນຕິພາບ ແລະ ຄວາມໝັ້ນຄົງ; ເດັກນ້ອຍໃນການປະທະກັນດ້ວຍກຳລັງອາວຸດ; ປົກປ້ອງສາມັນຊົນ ແລະ ບັນດາພື້ນຖານໂຄງລ່າງທີ່ຈຳເປັນຕໍ່ກັບການດຳລົງຊີວິດຂອງປະຊາຊົນຢູ່ບັດດາຈຸດທີ່ເກີດການປະທະກັນ.
ໃນໂອກາດນີ້, ຕາງໜ້າໃຫ້ລັດຖະບານແຫ່ງ ສສ ຫວຽດນາມ, ຂ້າພະເຈົ້າຂໍແດງຄວາມຂອບອົກຂອບໃຈຢ່າງຈິງໃຈມາຍັງລັດ ແລະ ປະຊາຊົນລາວອ້າຍນ້ອງ ທີ່ຍາມໃດກໍ່ໃຫ້ການສະໜັບສະໜູນແກ່ ຫວຽດນາມ ໃນການເຂົ້າຮ່ວມສະພາຄວາມໝັ້ນຄົງສະຫະປະຊາຊາດ. ສປປ ລາວ ພ້ອມກັບບັນດາປະເທດອາຊຽນ ແລະ ປະເທດອື່ນໆ ໄດ້ສະໜັບສະໜູນຢ່າງຕັ້ງໜ້າ ເພື່ອໃຫ້ຫວຽດນາມເປັນປະເທດໜຶ່ງດຽວຂອງພາກພື້ນອາຊີ-ປາຊີຟິກ ອອກສະໝັກ ແລະ ໄດ້ປ່ອນບັດເລືອກຕັ້ງໃຫ້ຫວຽດນາມ ເປັນກຳມະການບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດອາຍຸການ 2020-2021 ຢູ່ໃນກອງປະຊຸມຂອງສະມັດຊາດໃຫຍ່ສະຫະປະຊາຊາດໃນວັນທີ 07 ມີຖຸນາ 2019 ທີ່ຜ່ານມາ. ສິ່ງເຫລົ່ານັ້ນໄດ້ສະແດງໃຫ້ເຫັນຢ່າງມີຊີວິດຊີວາ ເຖິງສາຍພົວພັນແບບພິເສດຫວຽດນາມ-ລາວ.
ໃນເວລາປະຕິບັດໜ້າທີ່ສາກົນອັນສູງສົ່ງນີ້, ຄຽງຄູ່ກັບຄວາມພະຍາຍາມຢ່າງສຸດຂີດຂອງຕົນ, ຫວຽດນາມ ຈະສືບຕໍ່ປະສານສົມທົບຢ່າງແໜ້ນແຟ້ນ ກັບບັນດາສະຫາຍລາວ ແລະ ບັນດາປະເທດພາຄີຂອງສະຫະປະຊາຊາດ ເພື່ອຮ່ວມກັນປັບປຸງໂລກແຫ່ງສັນຕິພາບ, ສະຖຽນລະພາບ, ພັດທະນາແລະວັດທະນາຖາວອນ. ຂ້າພະເຈົ້າຫວັງວ່າ ບັນດາສະຫາຍລາວ ຈະສືບຕໍ່ໃຫ້ການປະສານສົມທົບ ແລະ ຮ່ວມມືຢ່າງມີປະສິດທິຜົນກັບຫວຽດນາມໃນຂະບວນການດັ່ງກ່າວ.
（ແຫຼ່ງຂໍ້ມູນ： ຂປລ）
