| ແຈ້ງການພິເສດກ່ຽວກັບພິທີໄວ້ອາໄລ່ລະດັບຊາດ ສະຫາຍ ຄຳໄຕ ສີພັນດອນ | |
| ສານສະແດງຄວາມເສົ້າສະຫຼົດໃຈຕໍ່ການມໍລະນະກໍາຂອງ ສະຫາຍ ພົນເອກ ຄໍາໄຕ ສີພັນດອນ |
ການຈາກໄປຂອງທ່ານໄດ້ສ້າງຄວາມໂສກເສົ້າເສຍດາຍໃຫ້ແກ່ການນຳ, ພະນັກງານລາວ ແລະຫວຽດນາມລຸ້ນຕ່າງໆ ຜູ້ທີ່ໄດ້ສະໜິດຕິດພັນກັບທ່ານໃນການປະຕິບັດງານ ກໍ່ຄືໃນຊີວິດປະຈຳວັນ.
ສະຫາຍ ຄຳພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ໃຫ້ຮູ້ວ່າ, ພ້ອມກັບປະທານໂຮ່ຈີມິນ, ປະທານ ໄກສອນ ພົມວິຫານ, ປະທານ ສຸພານຸວົງ, ປະທານ ຄຳໄຕ ສີພັນດອນ ແລະບັນດາການນຳຂອງສອງປະເທດ ໄດ້ສ້າງພື້ນຖານອັນໜັກແໜ້ນ, ເພີ່ມພູນຄູນສ້າງໃຫ້ນ້ຳໃຈສາມັກຄີແບບພິເສດ ຫວຽດນາມ-ລາວ ກາຍເປັນສາຍພົວພັນທີ່ເປັນແບບຢ່າງ, ສັດຊື່ບໍລິສຸດຜຸດຜ່ອງ, ຈິງໃຈຫາຍາກໃນໂລກ.
 |
| ສະຫາຍ ເລຂາຟຽວ ອະດີດເລຂາທິການໃຫຍ່ ຕ້ອນຮັບສະຫາຍ ຄໍາໄຕ ສີພັນດອນ ອະດີດປະທານພັກ, ອະດີດປະທານປະເທດລາວ ໃນການຢ້ຽມຢາມຫວຽດນາມ ຢ່າງເປັນທາງການ (1999). ພາບ: ສໍານັກຂ່າວສານຫວຽດນາມ |
ສະຫາຍ ຄຳພັນ ເຜີຍຍະວົງ ໃຫ້ຮູ້ວ່າ: “ປະທານ ຄໍາໄຕ ສີພັນດອນ ແມ່ນໜຶ່ງໃນບັນດາຜູ້ທີ່ມີການປະກອບສ່ວນອັນຕັ້ງໜ້າໃນການກໍ່ສ້າງ, ເພີ່ມພູນຄູນສ້າງສາຍພົວພັນສາມັກຄີແບບພິເສດລະຫວ່າງສອງພັກ, ສອງລັດ ຫວຽດນາມ-ລາວ ເວົ້າລວມ, ສະຫາຍໄດ້ກາຍເປັນສັນຍາລັກຂອງການຮ່ວມສໍາພັນສູ້ຮົບພິເສດຂອງກອງທັບສອງປະເທດ ຫວຽດນາມ-ລາວ. ສະຫາຍ ພົນເອກ ຄຳໄຕ ສີພັນດອນ ຍາມໃດກໍ່ຖືເປັນສໍາຄັນສາຍພົວພັນມິດຕະພາບ, ຄວາມສາມັກຄີແບບພິເສດກັບຫວຽດນາມ, ຖືວ່ານີ້ແມ່ນປັດໄຈເປັນຕາຍສໍາລັບສອງປະເທດ”.
ທ່ານປະທານ ຄໍາໄຕ ສີພັນດອນ ແມ່ນຜູ້ທຳອິດທີ່ຕາງໜ້າໃຫ້ລັດຖະບານລາວ ຕໍ່ຕ້ານພົບປະກັບທ່ານ ຟ້າມວັນດົ່ງ ຜູ້ແທນລັດຖະບານ ສາທາລະນະລັດ ປະຊາທິປະໄຕ ຫວຽດນາມ ຢູ່ພາກໃຕ້ຫວຽດນາມ ຢູ່ແຂວງກວາງຫງ້າຍ (ປີ 1947) ເພື່ອແລກປ່ຽນກ່ຽວກັບການສົມທົບກັນຮ່ວມສຳພັນສູ້ຮົບລະຫວ່າງລາວ ແລະຫວຽດນາມ, ພິເສດແມ່ນການສົ່ງທະຫານອາສາສະໝັກຫວຽດນາມ ໄປປະເທດລາວ ເພື່ອສົມທົບກັບທະຫານຕໍ່ຕ້ານລາວ ໃນການເຄື່ອນໄຫວ, ສ້າງກຳລັງ, ຊ່ວຍທະຫານຕໍ່ຕ້ານລາວ, ເຊິ່ງປະຈຸບັນແມ່ນກອງທັບປະຊາຊົນລາວ ນັບມື້ນັບເຕີບໃຫຍ່, ພັດທະນາ ແລະໝັ້ນຄົງເຂັ້ມແຂງ. ອາດເວົ້າໄດ້ວ່າ, ນີ້ແມ່ນຂີດໝາຍທີ່ມີຄວາມໝາຍສຳຄັນ, ປະກອບສ່ວນສ້າງການຮ່ວມສໍາພັນສູ້ຮົບ ລາວ-ຫວຽດນາມ.
ໃນໄລຍະຕໍ່ຕ້ານ, ກູ້ຊາດ, ທ່ານປະທານ ຄຳໄຕ ສີພັນດອນ ໄດ້ແບ່ງທຸກແບ່ງສຸກ, ຄຽງບ່າຄຽງໄຫຼ່ພ້ອມກັບນັກຊ່ຽວຊານການທະຫານ ແລະທະຫານອາສາສະໝັກຫວຽດນາມ ໃນຫຼາຍບັ້ນຕໍ່ສູ້ຢູ່ຫຼາຍສະໜາມຮົບທີ່ແຕກຕ່າງກັນ, ປະກອບສ່ວນສ້າງໄຊຊະນະອັນສະຫງ່າລາສີຂອງສອງຊາດໃນການຕໍ່ຕ້ານສັດຕູໂຕດຽວກັນ.
 |
| ສະຫາຍ ຄໍາໄຕ ສີພັນດອນ ອະດີດປະທານພັກ, ອະດີດປະທານປະເທດລາວ ພົບປະກັບສະຫາຍພົນເອກ ຫວໍງວຽນຢາບ ໃນການຢ້ຽມຢາມຫວຽດນາມ ຢ່າງເປັນທາງການ (2002). ພາບເອກະສານ: ສໍານັກຂ່າວສານຫວຽດນາມ |
ທ່ານພົນຕີ ຫງວຽນຕ໊ຽນລອງ, ຮອງປະທານສູນກາງສະມາຄົມມິດຕະພາບ ຫວຽດນາມ-ລາວ, ຮອງປະທານສະມາຄົມມິດຕະພາບ ຫວຽດນາມ-ລາວ, ກະຊວງປ້ອງກັນປະເທດ ຫວຽດນາມ ໃຫ້ຮູ້ວ່າ: “ບັນດາສະຫາຍການນໍາພັກ ແລະລັດລາວ ລ້ວນແຕ່ສະໜິດຕິດພັນ ກັບການປະຕິວັດຫວຽດນາມ, ລ້ວນແຕ່ໄດ້ສືບທອດແນວຄວາມຄິດຂອງປະທານໂຮ່ຈີມິນ. ບັນດາສະຫາຍໄດ້ທຸ້ມເທເຫື່ອແຮງເຂົ້າໃນການກໍ່ສ້າງ, ເພີ່ມພູນຄູນສ້າງສາຍພົວພັນສອງປະເທດໃນນັ້ນ, ພວກຂ້າພະເຈົ້າ ມີຄວາມປະທັບໃຈເປັນພິເສດຕໍ່ສະຫາຍ ຄໍາໄຕ ສີພັນດອນ. ສະຫາຍໄດ້ປະກອບສ່ວນຄຸນງາມຄວາມດີຫຼາຍຢ່າງເຂົ້າໃນການໂຄສະນາແນວຄິດປະທານໂຮ່ຈີມິນ ຢ່າງກວ້າງຂວາງ, ຊ່ວຍໃຫ້ປະຊາຊົນລາວ ສາມັກຄີ, ສະໜິດຕິດພັນກັບປະຊາຊົນຫວຽດນາມ ຢ່າງແໜ້ນແຟ້ນໃນຂະບວນການຕໍ່ສູ້ກູ້ຊາດ. ພວກຂ້າພະເຈົ້າຂໍສະແດງຄວາມຮູ້ບຸນຄຸນຢ່າງສຸດຊຶ້ງຕໍ່ສະຫາຍ ຄໍາໄຕ ສີພັນດອນ ກໍ່ຄືບັນດາການນຳຂອງພັກ, ລັດລາວ ທີ່ໄດ້ສະໜິດຕິດພັນພ້ອມກັບປະຊາຊົນຫວຽດນາມ ປະຕິບັດແນວຄິດໂຮ່ຈີມິນ, ປົດປ່ອຍຊາດ ແລະສ້າງສາປະເທດຊາດຢ່າງວັດທະນາຖາວອນ. ພວກຂ້າພະເຈົ້າ ຖືວ່າ ສະຫາຍເປັນເພື່ອນຜູ້ຍິ່ງໃຫຍ່ຂອງປະຊາຊົນຫວຽດນາມ”.
ໃນຂະບວນການປົກປັກຮັກສາ, ສ້າງສາ ແລະພັດທະນາປະເທດຊາດ, ທ່ານປະທານ ຄໍາໄຕ ສີພັນດອນ ຍາມໃດກໍ່ຮ່ວມມືກັບຫວຽດນາມ ຢ່າງແໜ້ນແຟ້ນເພື່ອແລກປ່ຽນ, ແບ່ງປັນບົດຮຽນ, ໜູນຊ່ວຍ ແລະຊ່ວຍເຫຼືອເຊິ່ງກັນ ແລະກັນ. ທ່ານກໍ່ແມ່ນໜຶ່ງໃນບັນດາການນຳລາວ ທີ່ມີສາຍພົວພັນໃກ້ຊິດຕິດແທດ, ສະໜິດຕິດພັນກັບການນຳຫວຽດນາມໃນທຸກຍຸກສະໄໝ, ເອົາໃຈໃສ່ເພີ່ມພູນຄູນສ້າງ, ຊຸກຍູ້ ແລະປະກອບສ່ວນເຮັດໃຫ້ການພົວພັນລະຫວ່າງສອງປະເທດເລິກເຊິ່ງຂຶ້ນກວ່າເກົ່າ, ຊ່ວຍໃຫ້ສາຍພົວພັນລະຫວ່າງສອງປະເທດນັບມື້ນັບເກີດດອກອອກຜົນ ແລະໝັ້ນຄົງຂະນົງແກ່ນໄປຊົ່ວກາລະນານ. ນັບແຕ່ເວລາພັກຮັບບຳນານເມື່ອປີ 2006 ມາຮອດປັດຈຸບັນ, ຍາມໃດທ່ານກໍ່ຍັງເອົາໃຈໃສ່, ຕິດຕາມ, ສືບຕໍ່ປະກອບສ່ວນໃຫ້ພາລະກິດສ້າງສາ ແລະພັດທະນາຂອງປະເທດລາວ ກໍຄືການພົວພັນສາມັກຄີແບບພິເສດ ລາວ-ຫວຽດນາມ.
ເມື່ອແບ່ງປັນກ່ຽວກັບຄວາມສຸດຈິດສຸດໃຈຂອງສະຫາຍໃນການເພີ່ມພູນຄູນສ້າງສາຍພົວພັນສອງປະເທດ, ທ່ານ ວິໄລວັນ ພົມເຂ ອະດີດເອກອັກຄະລັດຖະທູດລາວ ປະຈໍາ ຫວຽດນາມ ໃຫ້ຮູ້ວ່າ: “ເມື່ອຂ້າພະເຈົ້າ ຍັງເປັນເອກອັກຄະລັດຖະທູດ ປະຈໍາ ຫວຽດນາມ, ທຸກໆຄັ້ງທີ່ ສະຫາຍ ຄໍາໄຕ ສີພັນດອນ ມາຢ້ຽມຢາມ ສສ ຫວຽດນາມ, ໄປຢ້ຽມຢາມພະນັກງານ, ພາລະກອນຢູ່ສະຖານທູດ, ສະຫາຍ ຍາມໃດກໍ່ຕັກເຕືອນພວກຂ້າພະເຈົ້າຢູ່ສະເໝີວ່າ ຕ້ອງເຮັດແນວໃດເພື່ອຮັກສາ ແລະເພີ່ມພູນຄູນສ້າງສາຍພົວພັນ ຫວຽດນາມ-ລາວ, ເຮັດແນວໃດເພື່ອໃຫ້ປະຊາຊົນສອງປະເທດເຂົ້າໃຈກັນດີກວ່າອີກ, ແນໃສ່ເພີ່ມພູນຄູນສ້າງສາຍພົວພັນແບບພິເສດນີ້”.
ອາດຢັ້ງຢືນໄດ້ວ່າ ບັນດາການປະກອບສ່ວນສຳຄັນຢ່າງບໍ່ຮູ້ອິດບໍ່ຮູ້ເມື່ອຍຂອງທ່ານປະທານ ຄໍາໄຕ ສີພັນດອນ ໃນພາລະກິດປົກປັກຮັກສາ, ສ້າງສາ ແລະພັດທະນາປະເທດລາວ ໄດ້ປະກອບສ່ວນບໍ່ແມ່ນໜ້ອຍເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ນໍ້າໃຈສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ. ດ້ວຍນ້ຳໃຈຮັກຊາດອັນສູງສົ່ງ, ການອຸທິດສ່ວນເພື່ອປະເທດຊາດຂອງການນຳລຸ້ນກ່ອນຂອງສອງປະເທດ, ໃນນັ້ນມີ ທ່ານປະທານ ຄໍາໄຕ ສີພັນດອນ ໄດ້ຮ່ວມແຮງຮ່ວມໃຈຮັກສາ ແລະເພີ່ມພູນຄູນສ້າງສາຍພົວພັນມິດຕະພາບແບບພິເສດ ລາວ-ຫວຽດນາມ, ຫວຽດນາມ-ລາວ "ໃຫ້ຂຽວສົດງົດງາມ, ໝັ້ນຄົງ ຂະໜົງແກ່ນໄປຊົ່ວກາລະນານ".
| ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ ເຖິງແກ່ມໍລະນະກຳ | |
| ພົນເອກ ຟານວັນຢາງ ສະແດງຄວາມຮູ້ບຸນຄຸນຕໍ່ອະດີດການນໍາພັກ, ລັດ ແລະກອງທັບ |
