ທ່ານເອກອັກຄະລັດຖະທູດ Gennady Stepanovich Bezdetko ຖືວ່າ ງານວາງສະແດງປ້ອງກັນຊາດສາກົນຫວຽດນາມ ປີ 2024 ແມ່ນມີຄວາມໝາຍສຳຄັນທີ່ສຸດ ເພາະຖືກຈັດຂຶ້ນເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ.
ງານວາງສະແດງດຳເນີນໄປໃນສະພາບທີ່ຫວຽດນາມ ພວມກະກຽມທຸກດ້ານເພື່ອກ້າວເຂົ້າສູ່ສັງກາດໃໝ່ - ສັງກາດພັດທະນາປະເທດຊາດ, ໃນນັ້ນ ຫວຽດນາມ ຖືເປັນສຳຄັນການສືບຕໍ່ເພີ່ມທະວີ ແລະເປີດກວ້າງການພົວພັນຮ່ວມມືສາກົນເພື່ອແນໃສ່ພັດທະນາພື້ນຖານອຸດສາຫະກໍາປ້ອງກັນຊາດທັນສະໄໝ, ມີປະໂຫຍດສອງຢ່າງ, ຜ່ານນັ້ນປະກອບສ່ວນປະຕິບັດນະໂຍບາຍປ້ອງກັນຊາດສັນຕິພາບ ແລະປ້ອງກັນຕົນເອງ, ປະກອບສ່ວນເຂົ້າໃນພາລະກິດຫັນເປັນປະເທດທັນສະໄໝ.
 |
| ທ່ານ Gennady Stepanovich Bezdetko ເອກອັກຄະລັດຖະທູດລັດເຊຍ ປະຈຳ ຫວຽດນາມ. ພາບ: ຫງວຽນລຽນ |
ທ່ານເອກອັກຄະລັດຖະທູດ Gennady Stepanovich Bezdetko ຢືນຢັນວ່າ: “ການຈັດຕັ້ງງານວາງສະແດງເພື່ອໃຫ້ໂລກເຫັນໄດ້ພາລະບົດບາດຂອງກອງທັບປະຊາຊົນຫວຽດນາມ ແມ່ນກອງທັບສູ້ຮົບ, ກອງທັບປະຕິບັດງານ, ກອງທັບອອກແຮງງານຜະລິດ”.
ຕາມທ່ານເອກອັກຄະລັດຖະທູດສະຫະພັນລັດເຊຍ ປະຈຳ ຫວຽດນາມ ແລ້ວ, ງານວາງສະແດງປ້ອງກັນຊາດສາກົນຫວຽດນາມ ດຳເນີນ 2 ປີ ເທື່ອໜຶ່ງ, ສ້າງກາລະໂອກາດເພື່ອໃຫ້ບັນດາວິສາຫະກິດຜະລິດ, ວິສາຫະກິດສະໜອງຜະລິດຕະພັນ ແລະມາດຕະການປ້ອງກັນຊາດ-ປ້ອງກັນຄວາມສະຫງົບ ທີ່ມາຈາກທົ່ວໂລກພົບປະແລກປ່ຽນ, ແລກປ່ຽນປະສົບການ ແລະເພີ່ມທະວີການຮ່ວມມື.
ການຈັດຕັ້ງງານວາງສະແດງໄດ້ສະແດງໃຫ້ເຫັນແຜນນະໂຍບາຍຂອງຫວຽດນາມ ແມ່ນເປັນເພື່ອນມິດຂອງທຸກປະເທດ, ປະກອບສ່ວນສ້າງສະພາບແວດລ້ອມແຫ່ງສັນທິພາບ, ຮ່ວມມື ແລະພ້ອມກັນພັດທະນາ. ພ້ອມທັງໂຄສະນາບັນດາຜະລິດຕະພັນປ້ອງກັນຊາດໂດຍຫວຽດນາມ ຜະລິດ ແລະຊຸກຍູ້ການຮ່ວມມືປະກອບສ່ວນພັດທະນາຂະແໜງອຸດສາຫພກຳປ້ອງກັນຊາດພາຍໃນປະເທດ, ການແນະນຳວັດທະນະທຳ, ປະເທດ ແລະປະຊາຊົນຫວຽດນາມ ຜ່ານງານວາງສະແດງ ໄດ້ສ້າງຈຸດພິເສດສະເພາະໃຫ້ແກ່ເຫດການນີ້.
ທ່ານເອກອັກຄະລັດຖະທູດ Gennady Stepanovich Bezdetko ຊີ້ແຈ້ງວ່າ: “ພວກຂ້າພະເຈົ້າເຫັນວ່າ ຫວຽດນາມ ໄດ້ລົງທຶນຫຼາຍທັງປັນຍາ, ກຳລັງແຮງ ແລະວັດຖຸອຸປະກອນເພື່ອກະກຽມຈັດຕັ້ງງານວາງສະແດງປ້ອງກັນຊາດສາກົນຫວຽດນາມ ປີ 2024 ດ້ວຍຂອບເຂດໃຫຍ່ກວ່າເມື່ອທຽບໃສ່ປີ 2022. ເນື້ອໃນຂອງງານວາງສະແດງແມ່ນມີຫຼາຍຮູບຫຼາຍແບບ, ຈາກການວາງສະແດງ ແລະແນະນຳອຸປະກອນເຕັກໂນໂລຊີຫຼ້າສຸດຂອງທະຫານອາກາດ, ທະຫານເຮືອ, ທະຫານບົກ, ການຕິດຕໍ່ສື່ສານ...; ເຫດການດັ່ງກ່າວມີການເຂົ້າຮ່ວມຂອງວິສາຫະກິດນັບຮ້ອຍແຫ່ງ, ແຂກສາກົນນັບສິບຄະນະ ແລະກອງປະຊຸມສຳມະນາດ້ານເຕັກນິກ, ເຊື່ອມຕໍ່ວິສາຫະກິດ. ເນື້ອໃນ ແລະວິທີການຈັດຕັ້ງຂອງງານວາງສະແດງ, ເປັນຕົ້ນແມ່ນການເຂົ້າຮ່ວມຂອງຄະນະຜູ້ແທນສາກົນທີ່ມາຈາກຫຼາຍປະເທດ, ໄດ້ສະແດງໃຫ້ເຫັນຢ່າງຈະແຈ້ງກ່ຽວກັບນະໂຍບາຍປ້ອງກັນຊາດ “4 ບໍ່” ຂອງຫວຽດນາມ: ບໍ່ເຂົ້າຮ່ວມພັນທະມິດການທະຫານ; ບໍ່ຮ່ວມກັບປະເທດນີ້ເພື່ອຕ້ານປະເທດອື່ນ; ບໍ່ອະນຸຍາດໃຫ້ຕ່າງປະເທດຕັ້ງຖານທັບ ຫຼືນຳໃຊ້ຜືນແຜ່ນດິນເພື່ອຕ້ານປະເທດອື່ນ; ບໍ່ນຳໃຊ້ກຳລັງອາວຸດ ຫຼື ຂົ່ມຂູ່ນຳໃຊ້ກຳລັງໃນການພົວພັນສາກົນ”.
 |
| ບໍລິສັດ Rosoboronexport ວາງສະແດງອາວຸດທີ່ງານວາງສະແດງ. ພາບ: ຈູງແທັ່ງ |
ທີ່ການແລກປ່ຽນ, ທ່ານເອກອັກຄະລັດຖະທູດສະຫະພັນລັດເຊຍ ປະຈຳ ຫວຽດນາມ ຕີລາຄາສູງຄວາມສາມາດຂອງຂະແໜງອຸດສາຫະກຳປ້ອງກັນຊາດຫວຽດນາມ ໃນການນຳໃຊ້ເຕັກໂນໂລຢີທີ່ທັນສະໄໝ ຜ່ານການຮ່ວມມືກັບບັນດາຄູ່ຮ່ວມມືຕ່າງປະເທດ, ພ້ອມທັງຄົ້ນຄວ້າ ແລະພັດທະນາບັນດາອາວຸດ, ຍຸດໂທປະກອນດ້ວຍຕົນເອງ ເພື່ອຕອບສະໜອງເປົ້າໝາຍກໍ່ສ້າງກອງທັບປະຊາຊົນຫວຽດນາມ ປະຕິວັດ, ເປັນກອງທັບຫຼວງ, ຍອດຢ້ຽມ, ທັນສະໄໝໃນປີ 2030. ທ່ານເອກອັກຄະລັດຖະທູດ Gennady Stepanovich Bezdetko ເນັ້ນໜັກວ່າ: ຂະແໜງອຸດສາຫະກຳປ້ອງກັນຊາດຫວຽດນາມ ພວມໄດ້ຮັບການພັດທະນາຕາມທິດທັນສະໄໝ, ມີປະໂຫຍດສອງຢ່າງ, ກາຍເປັນປາຍແຫຼມຂອງພື້ນຖານອຸດສາຫະກຳແຫ່ງຊາດ, ຜ່ານນັ້ນ ປະກອບສ່ວນສຳຄັນເຂົ້າໃນການປະຕິບັດເປົ້າໝາຍຮອດປີ 2030, ຫວຽດນາມ ຈະເປັນປະເທດພັດທະນາທີ່ມີອຸດສາຫະກຳທັນສະໄໝ, ມີລາຍຮັບສະເລ່ຍສູງ.
ທ່ານເອກອັກຄະລັດຖະທູດ Gennady Stepanovich Bezdetko ຊີ້ແຈ້ງວ່າ: ສະຫະພັນລັດເຊຍ ແລະຫວຽດນາມ ມີການພົວພັນຄູ່ຮ່ວມມືຍຸດທະສາດຮອບດ້ານ ແລະກອງທັບ 2 ປະເທດມີການພົວພັນຮ່ວມມືທີ່ເປັນມູນເຊື້ອສະໜິດຕິດພັນ. ກະຊວງປ້ອງກັນປະເທດສະຫະພັນລັດເຊຍ ໄດ້ຕັ້ງໜ້າເຂົ້າຮ່ວມງານວາງສະແດງປ້ອງກັນຊາດສາກົນໂດຍ ຫວຽດນາມ ໄດ້ຈັດຕັ້ງຄັ້ງທໍາອິດໃນປີ 2022. ໃນປີນີ້, ມີວິສະຫະກິດແຖວໜ້າຂອງຂະແໜງອຸດສາຫະກໍາປ້ອງກັນຊາດສະຫະພັນລັດເຊຍ ຫຼາຍແຫ່ງເຂົ້າຮ່ວມງານວາງສະແດງປ້ອງກັນຊາດສາກົນ ຫວຽດນາມ ປີ 2024, ເຊັ່ນ: Almaz-Antey, Concern Granit-Electron, High Precision Weapons, Concern Sozvezdie, Typhoon, Rosoboronexport, Concern Kalashnikov… ດ້ວຍບັນດາຜະລິດຕະພັນຄື ລູກສອນໄຟ Rubezh-ME, Kornet-E, X-35UE, ລົດຫຸ້ມເກາະທະຫານບົກ BMP-3...
 |
| ຮູບປະກອບ. |
 |
| ຮູບປະກອບ. |
 |
| ຮູບປະກອບ. |
ແສງເດືອນ
