ນັກສຶກສາລາວ ແລະກຳປູເຈຍ ຢູ່ນະຄອນໂຮ່ຈີມິນ ໄດ້ຮັບການໜູນຊ່ວຍດ້ວຍວິທີການຮຽນຢູ່ມະຫາວິທະຍາໄລ

ໂຄງການດັ່ງກ່າວໄດ້ຈັດໃຫ້ນັກສຶກສາລາວ ແລະກຳປູເຈຍ ທີ່ຫາກໍ່ຮຽນຈົບຈາກການຮຽນພາສາຫວຽດ, ວິທີການຮຽນທີ່ມີປະສິດທິຜົນ ແລະຄວາມຮູ້ທີ່ຈຳເປັນເພື່ອຊ່ວຍໃຫ້ບັນດານັກສຶກສາເຊື່ອມໂຍງເຂົ້າກັບສະພາບແວດລ້ອມຂອງໂຮງຮຽນຢູ່ຫວຽດນາມ ຢ່າງວ່ອງໄວ. ພ້ອມທັງສ້າງເງື່ອນໄຂໃຫ້ນັກສຶກສາໄດ້ພົບປະແລກປ່ຽນ, ເຊື່ອມຕໍ່ກັບນັກສຶກສາຫວຽດນາມ. ໃນຂອບເຂດຂອງໂຄງການ, ນັກສຶກສາໄດ້ເຂົ້າຮ່ວມການປຶກສາຫາລື, ແບ່ງປັນປະສົບການຈາກ “ນັກຮຽນເກັ່ງ 5 ຄົນ” ຂັ້ນນະຄອນ ແລະນັກສຶກສາລາວ, ກຳປູເຈຍ ທີ່ພວມຮ່ຳຮຽນຢູ່ນະຄອນໂຮ່ຈີມິນ. ບັນດາແຂກຮັບເຊີນໄດ້ສົ່ງແຮງບັນດານໃຈກ່ຽວກັບການເຄື່ອນໄຫວຮ່ຳຮຽນ, ຝຶກຝົນຫຼໍ່ຫຼອມ ແລະຄວາມມຸ່ງມາດປາດຖະໜາຢາກປະກອບສ່ວນເຂົ້າໃນການພັດທະນາບ້ານເກີດເມືອງນອນ, ພ້ອມທັງຊຸກຍູ້ຄວາມສາມັກຄີ, ຄວາມເຂົ້າໃຈລະຫວ່າງສາມປະເທດ. ກ່ອນໜ້ານັ້ນ, ຫຼາຍຂໍ້ລິເລີ່ມໜູນຊ່ວຍນັກສຶກສາລາວ ແລະກຳປູເຈຍ ໄດ້ຮັບການປະຕິບັດຢູ່ນະຄອນໂຮ່ຈີມິນ. ພົ້ນເດັ່ນແມ່ນໂຄງການ “ກຸ່ມເພື່ອນສຶກສາຮ່ຳຮຽນ” ໂດຍມະຫາວິທະຍາໄລແພດສາດ ຟ້າມຫງອກແທກ ເປັນຜູ້ລິເລີ່ມໃນປີ 2021, ໄດ້ສ້າງກຸ່ມສຶກສາຮ່ຳຮຽນປະມານ 50 ກຸ່ມ, ແຕ່ລະກຸ່ມປະກອບມີນັກສຶກສາຫວຽດ 2 ຄົນ ແລະນັກສຶກສາລາວ ຫຼື ກຳປູເຈຍ 2 ຄົນ. ໂຄງການໄດ້ຊ່ວຍໃຫ້ນັກສຶກສາລາວ ແລະກຳປູເຈຍ ຝຶກຫັດພາສາຫວຽດ ຜ່ານການສື່ສານປະຈຳວັນ ແລະເຂົ້າຮ່ວມການເຄື່ອນໄຫວເປັນກຸ່ມ, ປະກອບສ່ວນຍົກສູງຄຸນນະພາບການຮໍ່າຮຽນ ແລະຮຽນຮູ້ວັດທະນະທຳຂອງ 3 ປະເທດ. ພາບ: ຫໍພັກນັກສຶກສາລາວ ນະຄອນໂຮ່ຈີມິນ