 | ວັນວັດທະນະທໍາ UAE 2024: ເພີ່ມທະວີການພົວພັນແລກປ່ຽນປະຊາຊົນລະຫວ່າງສອງປະເທດ |
| ສືບຕໍ່ຮັກສາ, ເພີ່ມພູນຄູນສ້າງ ແລະເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ຫວຽດນາມ-ລາວ |
ຫຼາຍບາດກ້າວໃນການຮ່ວມມືດ້ານພະລັງງານ ຫວຽດນາມ - ລາວ
ໂດຍໄດ້ເລີ່ມງານແຕ່ເດືອນ ທັນວາ ປີ 2021, ໂຄງການສາຍສົ່ງໄຟຟ້າ 220kV ນ້ຳຊຳ-ນົງກົງ ປະຈຸບັນໄດ້ສຳເລັດໂດຍພື້ນຖານແລ້ວ. ໂຄງການດັ່ງກ່າວມີຍອດຈຳນວນເງິນລົງທຶນກວ່າ 1.000 ຕື້ດົ່ງ, ຈຸດໝາຍການກໍ່ສ້າງແມ່ນນຳເຂົ້າໄຟຟ້າຈາກກຸ່ມເຂື່ອນໄຟຟ້ານ້ຳຕົກ ນ້ຳຊຳ (ລາວ) ໄປ ຫວຽດນາມ ເພື່ອຕອບສະໜອງຄວາມຕ້ອງການການເຕີບໂຕການໂຫຼດໄຟຟ້າຂອງລະບົບໄຟຟ້າພາກເໜືອ. ພ້ອມກັນນັ້ນ, ກໍ່ຫັນເປັນລະອຽດຄຳໝັ້ນສັນຍາລະຫວ່າງພັກ ແລະ ລັດຖະບານສອງປະເທດ ຫວຽດນາມ - ລາວ ໃນການເພີ່ມທະວີການຮ່ວມມືດ້ານພະລັງງານ.
ໂຄງການດັ່ງກ່າວ ມີຂອບຂະໜາດ 2 ວົງຈອນ, ຍາວເກືອບ 130 ກິໂລແມັດ, ດ້ວຍ 299 ເສົາ, ເສົາດຶງ 99 ເສົາ, ຈາກຈຸດເຊື່ອມຕໍ່ G1 (ຊາຍແດນ ຫວຽດນາມ-ລາວ) ຫາສະຖານີໝໍ້ແປງໄຟຟ້າ 220 kV ນົງກົງ. ໂຄງການດັ່ງກ່າວຜ່ານເມືອງ ເກວຟອງ, ເມືອງ ກຸຍເຈົາ (ແຂວງ ເງ້ອານ), ເມືອງ ຍືຊວນ, ເມືອງ ຍືແທງ, ນົງກົງ (ແຂວງ ແທງຮວ໋າ). ໃນນັ້ນ, ເສັ້ນທາງຜ່ານແຂວງ ເງ້ອານ ມີຄວາມຍາວ 77,31 ກິໂລແມັດ, ມີ 174 ທີ່ຕັ້ງພື້ນເສົາ. ເສັ້ນທາງຜ່ານແຂວງ ແທງຮວ໋າ ມີຄວາມຍາວ 52,64 ກິໂລແມັດ, ໃນນັ້ນມີ 125 ທີ່ຕັ້ງພື້ນເສົາ.
ວັນທີ 27 ພະຈິກ, ຢູ່ແຂວງ ແທງຮວ໋າ, ສະພາກວດກາເພື່ອມອບຮັບ ຂັ້ນຜູ້ລົງທຶນ - ກຸ່ມບໍລິສັດສາຍສົ່ງໄຟຟ້າແຫ່ງຊາດ (EVNNPT) ໄດ້ຈັດກອງປະຊຸມສະພາກ່ຽວກັບຄວາມຄືບໜ້າຂອງການຜັນຂະຫຍາຍໂຄງການ. ຂໍ້ມູນຈາກກອງປະຊຸມສະແດງໃຫ້ເຫັນວ່າ ໂຄງການໄດ້ຮັບການກໍ່ສ້າງຕາມການອອກແບບ, ຮັບປະກັນບັນດາຄວາມຕ້ອງການດ້ານເຕັກນິກ ແລະ ມີເງື່ອນໄຂອັນຄົບຖ້ວນເພື່ອນຳເຂົ້າສູ່ການເຄື່ອນໄຫວ. ສະພາກວດກາເພື່ອມອບຮັບ ຂັ້ນຜູ້ລົງທຶນ ໄດ້ຍອມຮັບການກວດກາເພື່ອມອບຮັບສໍາເລັດບັນດາລາຍການທີ່ກ່ຽວຂ້ອງກັບສາຍສົ່ງ. ສະພາກວດກາເພື່ອມອບຮັບ ຂັ້ນຜູ້ລົງທຶນ ໄດ້ມອບໝາຍໃຫ້ສະພາກວດກາເພື່ອມອບຮັບ ຂັ້ນຮາກຖານກວດກາຄືນບັນດາເນື້ອໃນທີ່ຍັງເຫຼືອ ແລະ ດຳເນີນບັນດາຂັ້ນຕອນທີ່ກ່ຽວຂ້ອງເພື່ອດຳເນີນການຜັນຂະຫຍາຍຕາມລະບຽບການ.
ທ່ານ ຫງວຽນຫງອກເຕິນ, ຮອງຜູ້ອໍານວຍການໃຫຍ່ EVNNPT, ປະທານ ສະພາກວດກາເພື່ອມອບຮັບ ຂັ້ນຜູ້ລົງທຶນ, ໃຫ້ຮູ້ວ່າ: ພາຍຫຼັງໄດ້ຜັນຂະຫຍາຍ, ໂຄງການສາຍສົ່ງໄຟຟ້າ 220 kV ນ້ຳຊຳ-ນົງກົງ ຈະປະກອບສ່ວນສຳຄັນເຂົ້າໃນການຮັບປະກັນຄວາມໝັ້ນຄົງດ້ານພະລັງງານ, ຫຼຸດຜ່ອນຄວາມກົດດັນກ່ຽວກັບລະບົບໄຟຟ້າ, ສະໜອງໄຟຟ້າໃຫ້ເຂດພາກເໜືອຢ່າງໝັ້ນຄົງ, ຕອບສະໜອງຄວາມຕ້ອງການຂອງການເຕີບໂຕການໂຫຼດໄຟຟ້າ. ນີ້ແມ່ນຫຼັກຖານພະຍານໃຫ້ແກ່ການພົວພັນຮ່ວມມືດ້ານພະລັງງານຢ່າງແໜ້ນແກ່ນລະຫວ່າງ ຫວຽດນາມ - ລາວ, ພ້ອມກັນນັ້ນ ກໍ່ປະກອບສ່ວນຊຸກຍູ້ຈຸດໝາຍພັດທະນາຂຽວ ແລະ ຍືນຍົງຂອງ ຫວຽດນາມ.
 |
| ໂຄງການສາຍສົ່ງໄຟຟ້າ ນ້ຳຊຳ-ນົງກົງ 220kV. |
ກ່ອນໜ້ານັ້ນ, ໂດຍເລີ່ມຈາກຄວາມຕ້ອງການຮ່ວມມືລະຫວ່າງສອງຝ່າຍ, ລັດຖະບານ ຫວຽດນາມ ແລະ ລັດຖະບານ ລາວ ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືພັດທະນາບັນດາໂຄງການເຂື່ອນໄຟຟ້ານ້ຳຕົກ, ເຊື່ອມຕໍ່ລະບົບໄຟຟ້າ ແລະ ນຳເຂົ້າໄຟຟ້າຈາກ ລາວ ໃນປີ 2016 ແລະ ສັນຍາວ່າດ້ວຍການຮ່ວມມືພັດທະນາບັນດາກິດຈະກຳພະລັງງານ, ໄຟຟ້າ ແລະ ບໍ່ແຮ່ ປີ 2019.
ສອງຝ່າຍຍັງໄດ້ລົງນາມໃນສັນຍາຮ່ວມມືຜັນຂະຫຍາຍຫຼາຍໂຄງການລົງທຶນ ແລະ ບັນດາການເຄື່ອນໄຫວຮ່ວມມືດ້ານພະລັງງານເຊັ່ນ: ບົດບັນທຶກຊ່ວຍຈຳລະຫວ່າງລັດຖະບານ ຫວຽດນາມ ແລະ ລັດຖະບານ ລາວ ກ່ຽວກັບການຮ່ວມມືພັດທະນາບັນດາໂຄງການເຂື່ອນໄຟຟ້ານ້ຳຕົກ ເຊື່ອມຕໍ່ລະບົບໄຟຟ້າ ແລະ ການນຳເຂົ້າໄຟຟ້າຈາກ ລາວ; ຍູ້ແຮງການຮ່ວມມືໃນການຊື້-ຂາຍໄຟຟ້າ; ໜູນຊ່ວຍການພັດທະນາບັນດາໂຄງການໄຟຟ້ານ້ຳຕົກຢູ່ ລາວ... ບັນດາບົດບັນທຶກຊ່ວຍຈຳທີ່ໄດ້ລົງນາມລະຫວ່າງ ຫວຽດນາມ - ລາວ ໄດ້ເປັນຂີດໝາຍທີ່ດີໃຫ້ແກ່ສາຍພົວພັນມິດຕະພາບລະຫວ່າງສອງປະເທດ, ພິເສດແມ່ນການຮ່ວມມືໃນຂົງເຂດພະລັງງານ.
ບົດລາຍງານໄດ້ນຳສະເໜີໃນກອງປະຊຸມຄັ້ງທີ 46 ຂອງຄະນະກຳມະການລະຫວ່າງລັດຖະບານ ກ່ຽວກັບການຮ່ວມມືສອງຝ່າຍ ຫວຽດນາມ - ລາວ ທີ່ໄຂຂຶ້ນໃນເດືອນ ມັງກອນ ປີ 2024 ໄດ້ສະແດງໃຫ້ເຫັນວ່າ ການຮ່ວມມືດ້ານການຊື້-ຂາຍໄຟຟ້າສືບຕໍ່ໄດ້ຮັບການຊຸກຍູ້, ດ້ວຍເລື່ອງ ຫວຽດນາມ ນຳເຂົ້າໄຟຟ້າຈາກ ລາວ ບັນລຸເປົ້າໝາຍທີ່ໄດ້ວາງອອກໃນໄລຍະ 2021 – 2025 ໂດຍພື້ນຖານ. ບັນດາຄວາມຫຍຸ້ງຍາກ ແລະ ອຸປະສັກຕ່າງໆທີ່ມີມາເປັນເວລາຫຼາຍປີໃນຫຼາຍໂຄງການຈຸດສຸມໄດ້ຮັບການແກ້ໄຂຢ່າງທັນການ. ມາຮອດປະຈຸບັນ, ກຸ່ມບໍລິສັດໄຟຟ້າ ຫວຽດນາມ (EVN) ໄດ້ລົງນາມໃນສັນຍາຊື້ໄຟຟ້າ 19 ສະບັບຈາກໂຮງງານເຂື່ອນໄຟຟ້ານ້ຳຕົກ ລາວ 26 ແຫ່ງ ດ້ວຍຍອດສະມັດຖະພາບ 2.689 MW.
ຄວາມສາມາດບົ່ມຊ້ອນຫຼາຍດ້ານສໍາລັບການຮ່ວມມືໃນອະນາຄົດ
ການຮ່ວມມືດ້ານພະລັງງານລະຫວ່າງ ຫວຽດນາມ ແລະ ລາວ ແມ່ນເລີ່ມຈາກບັນດາຄວາມຕ້ອງການທີ່ຈຳເປັນຂອງທັງສອງປະເທດ ແລະ ນັບມື້ນັບຢືນຢັນບົດບາດສຳຄັນໃນຍຸດທະສາດພັດທະນາລວມ. ຫວຽດນາມ, ດ້ວຍປະຊາກອນຂອບຂະໜາດໃຫຍ່ ແລະ ເສດຖະກິດທີ່ເຕີບໂຕຢ່າງເປັນປົກກະຕິ, ພວມປະເຊີນໜ້າກັບຄວາມຕ້ອງການໄຟຟ້ານັບມື້ນັບເພີ່ມຂຶ້ນ. ເພື່ອຕອບສະໜອງຄວາມຕ້ອງການດັ່ງກ່າວ, ຫວຽດນາມ ບໍ່ພຽງແຕ່ມານະພະຍາຍາມຮັບປະກັນການສະໜອງໄຟຟ້າໃຫ້ພຽງພໍເພື່ອຮັບໃຊ້ການພັດທະນາເສດຖະກິດ - ສັງຄົມເທົ່ານັ້ນ ຫາກຍັງຫັນເປັນລະບົບພະລັງງານສະອາດ ແລະ ຍືນຍົງ. ໂດຍໃຫ້ຄຳໝັ້ນສັນຍາບັນລຸເປົ້າໝາຍການປ່ອຍອາຍພິດລົງເປັນ 0 ໃນປີ 2050 ເຮັດໃຫ້ການຮ່ວມມືດ້ານພະລັງງານມີຄວາມສຳຄັນຫຼາຍກວ່າທີ່ເຄີຍມີມາ.
ສຳລັບປະເທດ ລາວ, ພະລັງງານ ໂດຍສະເພາະ ແມ່ນໄຟຟ້ານ້ຳຕົກ ໄດ້ກາຍເປັນແຫຼ່ງລາຍຮັບທີ່ສຳຄັນ, ບໍ່ພຽງແຕ່ຕອບສະໜອງຄວາມຕ້ອງການພາຍໃນປະເທດເທົ່ານັ້ນ ແຕ່ຍັງສົ່ງອອກໄປຍັງບັນດາປະເທດໃນພາກພື້ນອາຊີຕາເວັນອອກສ່ຽງໃຕ້ອີກດ້ວຍ. ປະເທດ ລາວ ກຳລັງຍູ້ແຮງຍຸດທະສາດການພັດທະນາພະລັງງານທົດແທນ ແລະ ມຸ່ງໄປເຖິງເປົ້າໝາຍກາຍເປັນ “ໝໍ້ໄຟສີຂຽວ” ຂອງພາກພື້ນອາຊີຕາເວັນອອກສຽງໃຕ້, ກໍ່ສ້າງພື້ນຖານໂຄງລ່າງດ້ານພະລັງງານ ເພື່ອຂຸດຄົ້ນຄວາມສາມາດບົ່ມຊ້ອນດັ່ງກ່າວໃຫ້ໄດ້ສູງທີ່ສຸດ.
ການຮ່ວມມືດ້ານພະລັງງານລະຫວ່າງ ຫວຽດນາມ ແລະ ລາວ ຕາມນັ້ນແລ້ວ ບໍ່ພຽງແຕ່ນຳມາເຊິ່ງຜົນປະໂຫຍດດ້ານເສດຖະກິດເທົ່ານັ້ນ, ຫາກຍັງປະກອບສ່ວນເຂົ້າໃນການພັດທະນາແບບຍືນຍົງຂອງທັງ 2 ປະເທດນຳອີກ. ການຂຸດຄົ້ນຄວາມສາມາດບົ່ມຊ້ອນດ້ານພະລັງງານຂອງ ລາວ ຊ່ວຍໃຫ້ ຫວຽດນາມ ຫຼຸດຜ່ອນຄວາມກົດດັນຕໍ່ຄວາມຕ້ອງການໄຟຟ້າພາຍໃນປະເທດ, ໃນຂະນະທີ່ ລາວ ສາມາດໝູນໃຊ້ລາຍຮັບຈາກການສົ່ງອອກໄຟຟ້າ ເພື່ອຊຸກຍູ້ການພັດທະນາເສດຖະກິດ.
ທີ່ກອງປະຊຸມໃນເດືອນ ຕຸລາ ປີ 2024, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ຫງວຽນຮົ່ງຢ່ຽນ ແລະ ລັດຖະມົນຕີກະຊວງພະລັງງານ ແລະ ບໍ່ແຮ່ ລາວ ທ່ານ ໂພໄຊ ໄຊຍະສອນ ໄດ້ຕີລາຄາສູງບັນດາໝາກຜົນແຫ່ງການຮ່ວມມືດ້ານພະລັງງານລະຫວ່າງ 2 ປະເທດ. ສອງຝ່າຍຢືນຢັນຄວາມສຳຄັນຂອງການຮ່ວມມືດ້ານພະລັງງານ, ພິເສດແມ່ນໄຟຟ້າ ແລະ ຖືວ່າ ນີ້ແມ່ນເສົາຄ້ຳໃນຍຸດທະສາດພັດທະນາການຮ່ວມມືລະຫວ່າງສອງປະເທດໃນໄລຍະຈະມາເຖິງ. ດ້ວຍຄວາມຕັດສິນໃຈຂອງລັດຖະບານສອງປະເທດ, ການຮ່ວມມືດ້ານພະລັງງານຈະຂະຫຍາຍຕົວຢ່າງບໍ່ຢຸດຢັ້ງ, ສ້າງກາລະໂອກາດໃໝ່ຫຼາຍຢ່າງ, ພ້ອມທັງຊຸກຍູ້ການພົວພັນມິດຕະພາບ ແລະ ການຮ່ວມມືຮອບດ້ານ ຫວຽດນາມ - ລາວ ອີກດ້ວຍ.
 | ອົງການຊ່ວຍເຫຼືອເດັກນ້ອຍ ແລະ ການເດີນທາງ 10 ປີ ຂອງການຮ່ວມມືປ່ຽນແປງຊີວິດຂອງເດັກນ້ອຍ ລາວກາຍ ຍສໝ - ຫຼາຍກວ່າທົດສະວັດຕິດພັນກັນກັບເຂດພູດອຍ ລາວກາຍ, ອົງການຊ່ວຍເຫຼືອເດັກນ້ອຍ ໄດ້ຊ່ວຍປັບປຸງຄຸນນະພາບຊີວິດຂອງເດັກນ້ອຍ ແລະ ຄອບຄົວນັບສິບພັນຄົນ. ບັນດາຄວາມກ້າວໜ້າດ້ານການສຶກສາ ແລະ ການແພດທີ່ອົງການນຳມານັ້ນ ໄດ້ ແລະ ພວມສ້າງການປ່ຽນແປງແບບຍືນຍົງໃຫ້ປະຊາຊົນຢູ່ທີ່ນີ້. |
 | ເພີ່ມທະວີການຮ່ວມມືດ້ານປ້ອງກັນຊາດຫວຽດນາມ-ລາວ-ກໍາປູເຈຍ: ສັນຍາລັກແຫ່ງຄວາມສາມັກຄີພາກພື້ນ ຍສໝ - ທ່ານພົນເອກ ຟານວັນຢາງ ເນັ້ນໜັກວ່າ ຫວຽດນາມ, ລາວ ແລະກໍາປູເຈຍ ແມ່ນປະເທດບ້ານໃກ້ເຮືອນຄຽງທີ່ສະໜິດສະໜົມ. |
ມິງດຶກ
