ທີ່ການເຮັດວຽກ, ການນຳສະຫະພັນບັນດາອົງການຈັດຕັ້ງມິດຕະພາບ ນະຄອນ ດ່າໜັງ ໄດ້ແຈ້ງຂ່າວສະພາບການເສດຖະກິດ, ສັງຄົມຂອງນະຄອນ. ພິເສດແມ່ນບັນດາການເຄື່ອນໄຫວສັນຕິພາບ, ຄວາມສາມັກຄີ, ມິດຕະພາບ ແລະ ການຮ່ວມມື ລະຫວ່າງ ປະຊາຊົນນະຄອນ ດ່າໜັງ ເວົ້າສະເພາະ, ປະຊາຊົນ ຫວຽດນາມ ເວົ້າລວມ ຕໍ່ກັບປະຊາຊົນ ອາເມລິກາ ໃນຊຸມປີມໍ່ໆມານີ້.
 |
| ສະຫະພັນບັນດາອົງການຈັດຕັ້ງມິດຕະພາບ ນະຄອນ ດ່າໜັງ ໄດ້ຕ້ອນຮັບຄະນະນັກຮົບເກົ່າ ອາເມລິກາ. (ພາບ: danangtv.vn) |
ສະຫະພັນບັນດາອົງການຈັດຕັ້ງມິດຕະພາບ ນະຄອນ, ສະມາຄົມມິດຕະພາບ ຫວຽດນາມ - ອາເມລິກາ ນະຄອນ ດ່າໜັງ ຕີລາຄາສູງການເຄື່ອນໄຫວຂອງ ຄະນະນັກຮົບເກົ່າ ອາເມລິກາ. ບັນດາການເຄື່ອນໄຫວດັ່ງກ່າວໄດ້ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການປິ່ນປົວຮໍາບາດແຜສົງຄາມ, ການຊ່ວຍເຫຼືອດ້ານມະນຸດສະທຳ ແລະ ຕໍ່ສູ້ເພື່ອທວງຄວາມຍຸຕິທຳໃຫ້ແກ່ບັນດາຜູ້ປະສົບເຄາະຮ້າຍຈາກທາດພິດສີສົ້ມ.
ຝ່າຍນະຄອນ ດ່າໜັງ ຫວັງວ່າ ໃນໄລຍະຈະມາເຖິງ, 2 ຝ່າຍຈະປະສານສົມທົບພ້ອມກັນຜັນຂະຫຍາຍການເຄື່ອນໄຫວມະນຸດສະທຳ ແລະ ການກຸສົນ ກໍ່ຄືບັນດາການເຄື່ອນໄຫວສາມັກຄີ, ມິດຕະພາບລະຫວ່າງບັນດາອົງການຈັດຕັ້ງປະຊາຊົນ ອາເມລິກາ ມາຍັງນະຄອນ ດ່າໜັງ.
ພ້ອມກັນນີ້, ສະມາຄົມນັກຮົບເກົ່າ ນະຄອນ ດ່າໜັງ ກໍ່ໄດ້ຈັດຕັ້ງການແລກປ່ຽນ ແລະ ພົບປະລະຫວ່າງຄະນະນັກຮົບເກົ່າ ກັບບັນດາຍາດຕິພີ່ນ້ອງ ທະຫານເຮືອສູ້ຮົບເທິງບົກ ອາເມລິກາ ແລະ ອະດີດທະຫານບົກ, ຍາດພີ່ນ້ອງຄອບຄົວນັກຮົບເສຍສະຫຼະຊີວິດເພື່ອຊາດ, ຜູ້ປະສົບເຄາະຮ້າຍຈາກທາດພິດສີສົ້ມຢູ່ເຂດນະຄອນ.
ທີ່ການພົບປະ, ການນຳສະມາຄົມນັກຮົບເກົ່າ ນະຄອນ ດ່າໜັງ ໄດ້ປະກາດໝາກຜົນຈຳນວນໜຶ່ງໃນການຊຳລະລ້າງທາດເບື່ອ ຢູ່ສະໜາມບິນສາກົນ ດ່າໜັງ, ເບິ່ງແຍງຜູ້ປະສົບເຄາະຮ້າຍຈາກທາດພິດສີສົ້ມ, ຈັດການກັບລູກລະເບີດຝັງດິນ, ວັດຖຸລະເບີດຫຼັງສົງຄາມ, ຄົ້ນຫາອັດຖິຂອງຜູ້ເສຍສະຫຼະຊີວິດເພື່ອຊາດຢູ່ນະຄອນ ດ່າໜັງ ໃນຫຼາຍປີທີ່ຜ່ານມາ. ສະມາຄົມນັກຮົບເກົ່າ ນະຄອນດ່າໜັງ ກໍ່ໄດ້ຕີລາຄາສູງການພົວພັນແລກປ່ຽນ ລະຫວ່າງ ປະຊາຊົນ 2 ປະເທດໃນຫຼາຍຂົງເຂດຄື: ເບິ່ງແຍງສຸຂະພາບ; ໜູນຊ່ວຍຊີວິດການເປັນຢູ່ ແລະ ຜ່ານຜ່າຜົນຮ້າຍຈາກສົງຄາມ.
ຕາງໜ້າຄະນະນັກຮົບເກົ່າ ອາເມລິກາ ໄດ້ຂອບໃຈການຕ້ອນຮັບຂອງສະມາຄົມນັກຮົບເກົ່ານະຄອນ ດ່າໜັງ. ຜ່ານການພົບປະເຮັດວຽກ, ຄະນະໄດ້ຮັບຂໍ້ມູນເພີ່ມເຕີມກ່ຽວກັບການບຸກບືນປະກອບສ່ວນ, ການບືນຕົວຂຶ້ນຂອງນັກຮົບເກົ່າ, ຍາດພີ່ນ້ອງຄອບຄົວນັກຮົບເສຍສະຫຼະຊີວິດເພື່ອຊາດ ແລະ ຜູ້ປະສົບເຄາະຮ້າຍຈາກທາດພິດສີສົ້ມ.
ຕ້ອນຮັບຄະນະນັກຮົບເກົ່າ ແລະ ຍາດຕິພີ່ນ້ອງທະຫານເຮືອສູ້ຮົບເທິງບົກ ອາເມລິກາ ໃນວັນທີ 3 ກັນຍາ ທ່ານ ຫງວຽນງັອກຮຸ່ງ ຮອງປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ໄດ້ແບ່ງປັນຂໍ້ມູນຂ່າວສານ ກ່ຽວກັບສະພາບການພັດທະນາ ເສດຖະກິດ - ສັງຄົມ, ນະໂຍບາຍການຕ່າງປະເທດຂອງ ຫວຽດນາມ ແລະ ການພົວພັນ ຫວຽດນາມ - ອາເມລິກາ ທາງຊ່ອງປະຊາຊົນ.
ຢູ່ທີ່ນີ້, ບັນດາຜູ້ແທນໃນຄະນະນັກຮົບເກົ່າ ຍາດຕິພີ່ນ້ອງທະຫານເຮືອສູ້ຮົບເທິງບົກ ອາເມລິກາ ເນັ້ນໜັກວ່າ: ການຢ້ຽມຢາມ ຫວຽດນາມ ຄັ້ງນີ້ ແມ່ນເພື່ອແນໃສ່ຮໍາບາດແຜຈາກສົງຄາມ ແລະ ໄກ່ເກ່ຍໂດຍຜ່ານບັນດາກິດຈະກໍາຄື: ພົບປະ, ແລກປ່ຽນກັບນັກຮົບເກົ່າ ແລະ ຍາດຕິພີ່ນ້ອງນັກຮົບຜູ້ເສຍສະຫຼະຊີວິດເພື່ອຊາດ ຫວຽດນາມ ຢູ່ນະຄອນ ດ່າໜັງ, ຢ້ຽມຢາມສູນຜູ້ປະສົບເຄາະຮ້າຍຈາກທາດພິດສີສົ້ມທີ່ຂຶ້ນກັບສະມາຄົມຜູ້ປະສົບເຄາະຮ້າຍຈາກທາດພິດສີສົ້ມຢູ່ ນະຄອນ ດ່າໜັງ, ຢ້ຽມຢາມສະໜາມຮົບເກົ່າຢູ່ແຂວງ ກວ໋າງນາມ.
ທອງມີ ສີຫາວົງ
