| ຫວຽດນາມ ເໝືອນດັ່ງສະຫະປະຊາຊາດດ້ວຍຄວາມສຸດຈິດສຸດໃຈ | |
| ເຊື່ອໝັ້ນວ່າ ສະຫາຍເລຂາທິການໃຫຍ່ ໂຕເລີມ ຈະສືບຕໍ່ນຳພາການພັດທະນາຂອງປະເທດຊາດ ແລະເສີມຂະຫຍາຍຈິດໃຈສາມັກຄີສາກົນ |
ນີ້ແມ່ນການປະກອບຄໍາເຫັນຂອງ ທ່ານ ຮ່າກິມງັອກ ຮອງລັດຖະມົນຕີກະຊວງການຕ່າງປະເທດຫວຽດນາມ ໃນພິທີສະເຫຼີມສະຫຼອງວັນຊາດສາທາລະນະລັດ ເປຣູ ຄົບຮອບ 203 ປີ ແລະ 30 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ເປຣູ ເມື່ອວັນທີ 31 ກໍລະກົດ ຢູ່ຮ່າໂນ້ຍ. ພິທີນີ້ຈັດຂຶ້ນໂດຍສະຖານທູດເປຣູ ປະຈຳ ຫວຽດນາມ.
ທ່ານ ຮ່າກິມງັອກ ກ່າວວ່າ: ເມື່ອກ່າວເຖິງ ເປຣູ, ປະຊາຊົນຫວຽດນາມ ຄິດເຖິງປະເທດທີ່ສວຍງາມມີທຳມະຊາດທີ່ອຸດົມສົມບູນ, ຫຼາກຫຼາຍຢູ່ເຂດອາເມລິກາໃຕ້ ກັບທົ່ງພຽງແຄມຝັ່ງມະຫາສະໝຸດປາຊີຟິກ, ເຂດພູສູງທີ່ຂຶ້ນກັບເທືອກເຂົາ Andes ແລະ ເຂດປ່າເຂດຮ້ອນ Amazon. ໂດຍເປັນໜຶ່ງປະເທດທີ່ມີຂີດໝາຍຂອງພື້ນຖານອະລະຍະທໍາ Inca ທີ່ຮຸ່ງເຮືອງເຫຼືອງເຫຼື້ອມ, ບັນດາມໍລະດົກທາງດ້ານວັດທະນະທໍາ, ສະຖາປັດຕະຍະກໍາທີ່ເປັນເອກະລັກເຊັ່ນ: ບູຮານສະຖານ Machu Picchu, ເມືອງສີຂາວຂອງ Arequipa ບ່ອນທີ່ຮັກສາຄຸນຄ່າປະຫວັດສາດ ແລະ ວັດທະນະທໍາຂອງເປຣູ, ເຊິ່ງກາຍເປັນຈຸດໝາຍປາຍທາງຂອງນັກທ່ອງທ່ຽວສາກົນຫຼາຍລ້ານຄົນໃນແຕ່ລະປີ, ໃນນັ້ນມີນັກທ່ອງທ່ຽວຫວຽດນາມນັບມື້ນັບຫຼາຍຂຶ້ນ.
ທ່ານຢືນຢັນວ່າ, ໃນພາລະກິດແຫ່ງການສ້າງສາ ແລະ ພັດທະນາປະເທດຊາດໃນປະຈຸບັນ, ຫວຽດນາມ ຍາມໃດກໍ່ໄດ້ຮັບຄວາມເອົາໃຈໃສ່, ການແບ່ງປັນ, ຄວາມສາມັກຄີ ແລະ ການສະໜັບສະໜູນຂອງປະຊາຊົນທົ່ວໂລກ ແລະ ປະຊາຊົນບັນດາປະເທດອາເມລິກາລາຕິນ, ໃນນັ້ນມີປະຊາຊົນເປຣູ. ຫວຽດນາມ ຍາມໃດກໍຈົດຈໍາ ແລະ ນັບຖືນ້ຳໃຈອັນລ້ຳຄ່ານັ້ນເປັນຢ່າງສູງ.
ການນຳຂັ້ນສູງຂອງ 2 ປະເທດມີການພົບປະ ແລະ ການຕິດຕໍ່ພົວພັນສອງຝ່າຍເປັນປະຈຳ. 2 ປະເທດໄດ້ສ້າງຕັ້ງກົນໄກການຮ່ວມມືທີ່ຈໍາເປັນ ແລະ ແທດຈິງຄື: ຄະນະກຳມະການລະຫວ່າງລັດຖະບານຫວຽດນາມ - ເປຣູ ກ່ຽວກັບການຮ່ວມມືດ້ານເສດຖະກິດ ແລະ ເຕັກນິກ, ການປຶກສາຫາລືດ້ານການເມືອງລະຫວ່າງກະຊວງການຕ່າງປະເທດ, ລົງນາມໃນຫຼາຍສັນຍາ ແລະ ບົດບັນທຶກຊ່ວຍຈຳກ່ຽວກັບການຮ່ວມມື.
“ຫວຽດນາມ ຢາກເພີ່ມທະວີການຮ່ວມມືຢ່າງເປັນຮູບປະທໍາ ແລະ ມີປະສິດທິຜົນໃນທຸກຂົງເຂດກັບເປຣູ, ຊຸກຍູ້ການຄ້າ, ການລົງທຶນ ແລະ ການແລກປ່ຽນປະຊາຊົນ ເປົ້າໝາຍລວມຂອງພວກເຮົາແມ່ນສ້າງສາ ແລະ ພັດທະນາທັງ 2 ປະເທດ, ພ້ອມກັນນັ້ນກໍ່ຮັກສາສັນຕິພາບ ແລະ ຄວາມສະຖຽນລະພາບຢູ່ໃນພາກພື້ນ ແລະ ໃນໂລກ”, ທ່ານ ຮ່າກິມງັອກ ຮອງລັດຖະມົນຕີ ຢືນຢັນ.
 |
| ແຂກທ່ອງທ່ຽວໄປຢ້ຽມຢາມງານວາງສະແດງຮູບພາບ “ຄົ້ນຫາ ເປຣູ: ການທ່ອງທ່ຽວໂດຍການສໍາຜັດດ້ວຍຕາຈາກທະເລໄປເຖິງພູສູງ ແລະ ປ່າຕຶບ” ໂດຍສະຖານທູດເປຣູ ປະຈຳຫວຽດນາມ ຈັດຕັ້ງໃນເດືອນ ກໍລະກົດ 2024. (ພາບ: ໜັງສືພິມປະຊາຊົນ) |
ການປະກອບຄຳເຫັນໃນພິທີ, ທ່ານນາງ Patricia Yolanda Raez Portocarrrero ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ ເປຣູ ປະຈຳ ຫວຽດນາມ ກ່າວວ່າ: ໃນ 30 ປີທີ່ຜ່ານມາ, 2 ປະເທດໄດ້ສ້າງຕັ້ງບັນດາກົນໄກສົນທະນາລະຫວ່າງ 2 ຝ່າຍ, ນັບແຕ່ຂົງເຂດການເມືອງ, ການທູດຕະຫຼອດເສດຖະກິດ ແລະ ການຄ້າ. ໃນຂົງເຂດການຄ້າ, Lima ແມ່ນຄູ່ຮ່ວມມືການຄ້າອັນດັບທີ 6 ຂອງຫວຽດນາມ ຢູ່ອາເມລິກາລາຕິນ ດ້ວຍວົງເງິນການຄ້າກວ່າ 700 ລ້ານ USD ໃນປີ 2023. ຫວຽດນາມ ແມ່ນນັກລົງທຶນອາຊີຕາເວັນອອກສ່ຽງໃຕ້ຕົ້ນຕໍຢູ່ເປຣູ ດ້ວຍວົງເງິນລົງທຶນບັນລຸ 1,3 ຕື້ USD ເຊິ່ງມາຈາກສອງບໍລິສັດ Viettel ແລະ Petrovietnam, ສຸມໃສ່ຂະແໜງໂທລະຄົມມະນາຄົມ ແລະ ພະລັງງານ.
ທັງ 2 ປະເທດລ້ວນແຕ່ແມ່ນສະມາຊິກຂອງສັນຍາຄູ່ຮ່ວມມືຮອບດ້ານ ແລະ ຄວາມກ້າວໜ້າຂ້າມພາກພື້ນປາຊີຟິກ (CPTPP), ສະນັ້ນ ຍັງມີທ່າແຮງບົ່ມຊ້ອນຫຼາຍຢ່າງເພື່ອພັດທະນາການຮ່ວມມື, ໂດຍສະເພາະເມື່ອມີຜະລິດຕະພັນຈໍານວນຫຼາຍທີ່ໄດ້ຮັບສິດທິພິເສດຍົກເວັ້ນການເສຍພາສີອາກອນລະຫວ່າງ 2 ປະເທດ. ຫນຶ່ງໃນເປົ້າໝາຍຕົ້ນຕໍຂອງເປຣູ ໃນປະຈຸບັນແມ່ນເພີ່ມທະວີການສົ່ງອອກໄປທີ່ຫວຽດນາມ ແນໃສ່ຄວາມດຸ່ນດ່ຽງການພົວພັນດ້ານການຄ້າ. ດ້ວຍການເປີດທ່າກໍ່າປັ່ນ Chancay ຂະຫນາດໃຫຍ່ຢູ່ປະເທດເປຣູ ໃນເດືອນພະຈິກ 2024, ໄລຍະເວລາການຂົນສົ່ງທາງທະເລລະຫວ່າງ2 ປະເທດຈະສັ້ນລົງຈາກ 40 ມື້ເປັນ 25 ມື້, ຊ່ວຍຍົກສູງປະສິດທິພາບຂອງການແລກປ່ຽນສິນຄ້າ ແລະ ເປີດກວ້າງໂອກາດຫຼາຍດ້ານໃນຂົງເຂດການຂົນສົ່ງ .
| ທ່ານ ໂຕເລີມ ປະທານປະເທດ ຫວຽດນາມ ໄດ້ສົ່ງສານອວຍພອນເຖິງ ທ່ານ Dina Boluarte Zegarra ປະທານາທິບໍດີ ເນື່ອງໃນໂອກາດສະເຫຼີມສະຫຼອງ ວັນຊາດສາທາລະນະລັດ ເປຣູ ຄົບຮອບ 203 ປີ. |
ເນື່ອງໃນໂອກາດນີ້, ທ່ານ ບຸ່ຍແທງເຊີນ ລັດຖະມົນຕີກະຊວງການຕ່າງປະເທດ ຫວຽດນາມ ກໍ່ໄດ້ສົ່ງສານອວຍພອນເຖິງລັດຖະມົນຕີວ່າການກະຊວງການຕ່າງປະເທດ ສາທາລະນະລັດ ເປຣູ Javier González Olaechea.
ທອງມີ ສີຫາວົງ
