ຫວ່າງແລ້ວນີ້, ຄະນະປະຕິບັດງານກະຊວງກະສິກຳ ຟີລິບປິນ ໂດຍ ທ່ານ Francisco P. Tiu Laurel Jr. ລັດຖະມົນຕີ ໄດ້ນຳໜ້າ, ຢ້ຽມຢາມໂຮງງານເຂົ້າສານ ແຮ້ງຟຸກ (ຂຶ້ນກັບກຸ່ມບໍລິສັດ ເຕີນລອງ, ຕັ້ງຢູ່ຕາແສງ ເລືອງອານຈາ, ເມືອງ ຈີໂຕນ) ແລະ ເຮັດວຽກກັບແຂວງ ອານຢາງ ກ່ຽວກັບສະພາບການຜະລິດ, ດຳເນີນທຸລະກິດ ແລະ ສົ່ງອອກເຂົ້າສານ.
ນອກຈາກນີ້ ເຂົ້າຮ່ວມພ້ອມຄະນະມີຜູ້ຕາງໜ້າກະຊວງກະສິກຳ ແລະ ພັດທະນາຊົນນະບົດ ຫວຽດນາມ; ບັນດາພະແນກ, ຂະແໜງການຂອງແຂວງ ອານຢາງ ແລະ ຄະນະກຳມະການປະຊາຊົນເມືອງ ຈີໂຕນ.
ໄປທັດສະນະສຶກສາ ແລະ ເຮັດວຽກຢູ່ໂຮງງານ ເຂົ້າສານ ແຮ້ງຟຸກ (ໂຮງສີ, ປຸງແຕ່ງ ແລະ ສາງເກັບຮັກສາເຂົ້າສານ), ທ່ານ Francisco P. Tiu Laurel, Jr. ລັດຖະມົນຕີກະຊວງກະສິກໍາ ຟີລິບປິນ ມີຄວາມປະທັບໃຈຕໍ່ກັບຂອບຂະໜາດທີ່ທັນສະໄໝຂອງໂຮງງານ, ກໍ່ຄືອຸດສາຫະກໍາເຂົ້າສານຂອງແຂວງ ອານຢາງ.
 |
| ທ່ານລັດຖະມົນຕີກະຊວງກະສິກໍາ ຟີລິບປິນ Francisco P. Tiu Laurel, Jr. ປຶກສາຫາລືຢູ່ທີ່ກອງປະຊຸມ. ພາບ: ໜັງສືພິມ ອານຢາງ. |
ທ່ານ Francisco P. Tiu Laurel, Jr. ລັດຖະມົນຕີກະຊວງກະສິກໍາ ຟີລິບປິນ ໄດ້ກ່າວວ່າ ດ້ວຍອັດຕາການເຕີບໂຕຂອງປະຊາກອນຫຼາຍກວ່າ 1,5%/ປີ, ປະຊາກອນຟີລິບປິນເພີ່ມຂຶ້ນແຕ່ລະປີ ປະມານ 1,2 ລ້ານຄົນ, ເຮັດໃຫ້ຄວາມຕ້ອງການຂອງການບໍລິໂພກເຂົ້າສານເປັນຈຳນວນຫຼວງຫຼາຍ, ໃນຂະນະທີ່ກຳລັງການຜະລິດພາຍໃນປະເທດບໍ່ສາມາດຕອບສະໜອງທັນ, ຕ້ອງໄດ້ເພີ່ມການນຳເຂົ້າ.
ເມື່ອແລກປ່ຽນກັບຄະນະ, ທ່ານ ໂຮ່ແທງບິ່ງ ຮອງຫົວໜ້າພະແນກກະສິກຳ ແລະ ພັດທະນາຊົນນະບົດ ແຂວງ ອານຢາງ ໄດ້ກ່າວວ່າ: ໂດຍເປັນແຂວງແຫຼ່ງຕົ້ນໆເຂດທົ່ງພຽງແມ່ນ້ຳຂອງ, ອານຢາງ ມີທ່າໄດ້ປຽບຫຼາຍຢ່າງໃນການພັດທະນາກະສິກຳ. ດ້ວຍເນື້ອທີ່ກະສິກຳ 297.000 ເຮັກຕາ, ແຕ່ລະປີແຂວງສາມາດຜະລິດເຂົ້າໄດ້ປະມານ 4 ລ້ານໂຕນ, ປາປຶ່ງ 530.000 ກວ່າໂຕນ, ຜັກເກືອບ 1 ລ້ານໂຕນ ແລະ ໝາກໄມ້ຊະນິດຕ່າງໆເກືອບ 270.000 ໂຕນ (ໝາກມ່ວງ, ລຳໄຍ, ໝາກກ້ຽງ, ໝາກມີ້, ໝາກທູລຽນ ແລະ ໝາກກ້ວຍ)
ສະເພາະໃນຂົງເຂດອຸດສາຫະກຳເຂົ້າ, ອານຢາງ ໄດ້ຜະລິດຕະຫຼອດປີ, ດ້ວຍເນື້ອທີ່ປູກເຂົ້າທັງໝົດ 616.000 ເຮັກຕາ/ປີ, ສະເລ່ຍໃຫ້ຜົນຜະລິດເຂົ້າປະມານ 6,6 ໂຕນ/ເຮັກຕາ, ໃນນັ້ນ 80 – 90% ແມ່ນເຂົ້າທີ່ມີຄຸນນະພາບສູງ. ແຂວງພວມຫັນການຜະລິດເຂົ້າເປັນທັນສະໄໝ, ມີຄຸນນະພາບສູງ ແລະ ເປັນມິດກັບສິ່ງແວດລ້ອມ; ໄດ້ອອກລະຫັດພື້ນທີ່ປູກເຂົ້າ 163 ສະບັບ, ມີເນື້ອທີ່ 9,623,37 ເຮັກຕາ. ປີ 2023, ອານຢາງ ສົ່ງອອກເຂົ້າສານເກືອບ 580.000 ໂຕນ, ທຽບເທົ່າກັບ 339 ລ້ານ USD, ໃນນັ້ນ ສົ່ງອອກໄປຕະຫຼາດ ຟີລິບປິນ ປະມານ 13,3 ລ້ານ USD.
ຄຽງຄູ່ກັນນັ້ນ, ແຂວງ ອານຢາງ ກໍ່ພວມສຸມໃສ່ຜັນຂະຫຍາຍໂຄງການ “ພັດທະນາແບບຍືນຍົງ 1 ລ້ານເຮັກຕາ ໂດຍປູກສະເພາະເຂົ້າຄຸນນະພາບສູງ ແລະ ການປ່ອຍອາຍພິດຕໍ່າ ຕິດພັນກັບການເຕີບໂຕສີຂຽວຢູ່ເຂດທົ່ງພຽງແມ່ນ້ຳຂອງ ຮອດປີ 2030”, ປະກອບສ່ວນຍົກສູງລາຄາເຂົ້າ, ຫຼຸດຜ່ອນຜົນກະທົບຕໍ່ສິ່ງແວດລ້ອມ, ປະຕິບັດຄຳໝັ້ນສັນຍາສາກົນຂອງຫວຽດນາມ ກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ຮັບປະກັນຄວາມໝັ້ນຄົງດ້ານສະບຽງອາຫານ. ຄາດວ່າເນື້ອທີ່ເຂົ້າຮ່ວມໂຄງການຂອງແຂວງ ອານຢາງ ຮອດປີ 2030 ຈະບັນລຸ 152.198 ເຮັກຕາ.
 |
| ຟີລິບປິນນຳເຂົ້າເຂົ້າສານຈາກຫວຽດນາມ ເຖິງ 80%. ຮູບພາບປະກອບ. |
ກ່ອນໜ້ານີ້, ທ່ານ Francisco P. Tiu Laurel, Jr. ລັດຖະມົນຕີກະຊວງກະສິກໍາ ຟີລິບປິນ ໄດ້ກ່າວວ່າ ຟີລິບປິນ ຖືຫວຽດນາມ ແມ່ນຄູ່ຮ່ວມມືສຳຄັນເພື່ອຮັບປະກັນຄວາມໝັ້ນຄົງດ້ານສະບຽງອາຫານພາຍໃນປະເທດ, ດ້ວຍ 80% ຂອງເຂົ້າສານທີ່ນໍາເຂົ້າຂອງພວກຂ້າພະເຈົ້າແມ່ນເຂົ້າຈາກ ຫວຽດນາມ. ພວກເຮົາຫວັງວ່າຈະໄດ້ຮຽນຮູ້ເພີ່ມເຕີມກ່ຽວກັບວິທີການທີ່ປະເທດຂອງເພື່ອນພັດທະນາແນວພັນເຂົ້າທີ່ມີຄຸນນະພາບສູງ, ສາມາດປັບຕົວ ແລະ ທົນທານຕໍ່ສະພາບອາກາດທີ່ບໍ່ເອື້ອອໍານວຍເຊັ່ນໄພແຫ້ງແລ້ງ, ນ້ຳເຄັມຊຶມເຂົ້າ, ນໍ້າຖ້ວມ ແລະ ສັດຕູພືດ".
ທອງມີ ສີຫາວົງ
