| ເພີ່ມຂຶ້ນກາລະໂອກາດຊຸກຍູ້ການຮ່ວມມືດ້ານກະສິກຳ ຫວຽດນາມ - ຈີເລ | |
| ການຮ່ວມມືທ້ອງຖິ່ນແມ່ນຈຸດທີ່ປະກາຍແຈ້ງໃນການພົວພັນ ຫວຽດນາມ - ຝຣັ່ງ |
ນະໂຍບາຍມະນຸດສາດ
ໄຊຍະຈັກ ເມັດມະນີ (ຈາກແຂວງສະຫວັນນະເຂດ, ປະເທດລາວ) ເປັນນັກສຶກສາຕ່າງປະເທດທີ່ຮຽນພາສາຫວຽດນາມ ເພື່ອກຽມເຂົ້າຮຽນວິຊາສະເພາະຢູ່ວິທະຍາໄລ ທ້າຍຫງວ່ຽນ. ໄຊຍະຈັກ ເມັດມະນີ ກ່າວວ່າ, ຢູ່ຫວຽດນາມ, ລາວໄດ້ຮັບຄວາມເອົາໃຈໃສ່ຈາກຄູອາຈານ ແລະ ນັກສຶກສາຫວຽດນາມ ເພື່ອເຮັດໃຫ້ວຽກງານການສືກສາຮ່ຳຮຽນຂອງຕົນສຳເລັດເປັນຢ່າງດີ. ການໄດ້ຮັບທຶນ ໄດ້ຊ່ວຍໃຫ້ຄອບຄົວຂອງຂ້າພະເຈົ້າ ແລະ ນັກສຶກສາຕ່າງປະເທດມີຄວາມອຸ່ນໃຈໃນການຮ່ຳຮຽນ ແລະ ສຳເລັດຫຼັກສູດເພື່ອໃຫ້ເຂົາເຈົ້າໄດ້ກັບຄືນປະເທດ ແລະ ປະກອບສ່ວນໃຫ້ປະເທດຊາດຂອງຕົນ.
ໄຊຍະຈັກ ເມັດມະນີ ເປັນໜຶ່ງນັກສຶກສາລາວໃນ 241 ຄົນ ທີ່ຮຽນຢູ່ວິທະຍາໄລທ້າຍຫງວ່ຽນ. ໂດຍມີຄວາມເຂົ້າໃຈສະພາບການຂອງນັກສຶກສາຕ່າງປະເທດ ແລະ ນັກສຶກສາລາວທີ່ຮຽນຢູ່ຫ່າງໄກ, ໂຮງຮຽນຍາມໃດກໍ່ສ້າງເງື່ອນໄຂສະດວກໃຫ້ເຂົາເຈົ້າໃນການດຳລົງຊີວິດ ແລະ ການຮ່ຳຮຽນ, ຈັດຕັ້ງການສຶກສາວິຊາສະເພາະຕາມຄວາມມຸ່ງຫວັງໃນການລົງທະບຽນຮຽນ, ຈັດແຈງການດໍາລົງຊີວີິດນັກສຶກສາຢູ່ຫໍພັກ, ຈັດຫ້ອງຄົວລວມ, ລະດົມໃຈ ແລະ ຍ້ອງຍໍຢ່າງທັນການ.
 |
| ວິທະຍາໄລ ທ້າຍຫງວ່ຽນ ຈັດບຸນປີໃໝ່ລາວ ພສ 2567 - ລາວ ແລະ ບຸນປີໃໝ່ 2568 - ກຳປູເຈຍ ໃຫ້ແກ່ນັກສຶກສາລາວ ແລະ ກຳປູເຈຍ ທີ່ຮຽນຢູ່ໂຮງຮຽນ ໃນເດືອນເມສາ 2024. (ພາບ: tnc.edu.vn) |
ໃນຊຸມປີຜ່ານມາ, ແຂວງທ້າຍຫງວ່ຽນ ໄດ້ບຳລຸງສ້າງນັກຮຽນ, ນັກສຶກສາ ປະມານ 1.100 ຄົນທີ່ມາຈາກ 2 ປະເທດບ້ານໃກ້ເຮືອນຄຽງຄື ລາວ ແລະ ກຳປູເຈຍ. ທີ່ກອງປະຊຸມຄັ້ງທີ 19, ສະພາປະຊາຊົນແຂວງ ທ້າຍຫງວ່ຽນ ຊຸດທີ 14, ອາຍຸການ 2021-2026 ໄດ້ອອກມະຕິກຳນົດການຊ່ວຍເຫຼືອດ້ານການເງິນໃຫ້ແກ່ນັກສຶກສາທີ່ມາຈາກ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລາຊະອານາຈັກ ກຳປູເຈຍ. ມະຕິໄດ້ກຳນົດລະອຽດແມ່ນລະບອບການຊ່ວຍເຫຼືອດ້ານການເງິນໃຫ້ແກ່ນັກສຶກສາລາວ ແລະ ກຳປູເຈຍ ທີ່ເຂົ້າຮ່ວມຫຼັກສູດບຳລຸງສ້າງໄລຍະຍາວເພື່ອເສັງເຂົ້າ ຫຼື ເຂົ້າຮຽນໃນລະບົບຊັ້ນສູງຢູ່ບັນດາວິທະຍາໄລຕ່າງໆ ທີ່ຂື້ນກັບຄະນະກຳມະການປະຊາຊົນແຂວງທ້າຍຫງວ່ຽນ, ມີສາຂາອາຊີບ ແລະ ບຳລຸງສ້າງທີ່ເໝາະສົມກັບຄວາມຕ້ອງການດ້ານການບຳລຸງສ້າງ ແລະ ການຮໍ່າຮຽນຂອງນັກສຶກສາຕ່າງປະເທດຂອງສອງປະເທດ.
ນະໂຍບາຍດັ່ງກ່າວໄດ້ຮັບການປະຕິບັດເປັນເວລາຫຼາຍປີ, ມີນັກສຶກສາຕ່າງປະເທດຫຼາຍກວ່າ 100 ຄົນໄດ້ຮັບການຊ່ວຍເຫຼືອໃນແຕ່ລະປີ. ສະເພາະໃນປີ 2024 ມີນັກສຶກສາຕ່າງປະເທດ 144 ຄົນຈະໄດ້ຮັບການຊ່ວຍເຫຼືອ (ໃນນັ້ນນັກສຶກສາ ລາວ 70 ຄົນ ແລະ ນັກສຶກກໍາປູເຈຍ 74 ຄົນ).
ຕາມນັ້ນແລ້ວ, ນັກສຶກສາຕ່າງປະເທດແຕ່ລະຄົນທີ່ມາຈາກລາວ ແລະ ກຳປູເຈຍ ສຶກສາບັນດາຫຼັກສູດໄລຍະຍາວຂອງລະບົບຊັ້ນສູງ (ລວມທັງຫຼັກສູດກຽມພາສາຫວຽດນາມ ເພື່ອເສັງເຂົ້າ ຫຼື ເສັງເຂົ້າລະບົບນີ້) ຢູ່ບັນດາຮາກຖານບຳລຸງສ້າງທີ່ຂຶ້ນກັບຄະນະກຳມະການປະຊາຊົນແຂວງ ທ້າຍຫງວ່ຽນ (ທີ່ຍັງບໍ່ທັນໄດ້ຮັບນະໂຍບາຍ ການບຳລຸງສ້າງ ແລະ ຊຸກຍູ້ບັນດານະໂຍບາຍຊ່ວຍເຫຼືອຂອງລັດຖະບານ ຫວຽດນາມ, ທ້ອງຖິ່ນ ແລະ ບັນດາອົງການ, ອົງການຈັດຕັ້ງຂອງຫວຽດນາມ ຈາກງົບປະມານແຫ່ງລັດ), ໄດ້ຮັບການຊ່ວຍເຫຼືອດ້ານການໃຊ້ຈ່າຍຈາກງົບປະມານແຫ່ງລັດ 1 ຊຸດຮຽນ.
ລະດັບການຊ່ວຍເຫຼືອຄ່າໃຊ້ຈ່າຍໃນການບຳລຸງສ້າງໃຫ້ບັນດາຮາກຖານສາຂາ: 3,1 ລ້ານດົ່ງ/ຄົນ/ເດືອນ, ໂດຍຮາກຖານການບຳລຸງສ້າງເປັນຜູ້ຂື້ນແຜນຕາມລະບຽບການທີ່ກໍານົດໄວ້; ໄລຍະເວລາການຊ່ວຍເຫຼືອແມ່ນອີງໃສ່ເດືອນຕົວຈິງຂອງການສຶກສາ, ບໍ່ເກີນເວລາຫລັກສູດບຳລຸງສ້າງທີ່ໄດ້ຮັບການອະນຸມັດຂອງຮາກຖານບຳລຸງສ້າງ.
ນອກນັ້ນ, ນັກສຶກສາຕ່າງປະເທດແຕ່ລະຄົນກໍ່ໄດ້ຮັບການຊ່ວຍດ້ານການໃຊ້ຈ່າຍໃນການດຳລົງຊີວິດ, ລະດັບໜູນຊ່ວຍ: 3,7 ລ້ານດົ່ງ/ຄົນ/ເດືອນ; ກຳນົດເວລາແມ່ນຄິດໄລ່ໂດຍອີງໃສ່ເດືອນຮຽນຕົວຈິງ ແລະ ບໍ່ເກີນກຳນົດເວລາຫລັກສູດບຳລຸງສ້າງທີ່ໄດ້ຮັບການອະນຸມັດຂອງຮາກຖານບຳລຸງສ້າງ; ໄດ້ຮັບການຊ່ວຍເຫຼືອດ້ານເຄື່ອງໃຊ້ສ່ວນຕົວໃນເບື້ອງຕົ້ນ, ບ້ວງນີ້ໂດຍມອບຜ່ານຮາກຖານບຳລຸງສ້າງເພື່ອໜູນຊ່ວຍນັກສຶກສາຕ່າງປະເທດ, ສະຫນອງຫນຶ່ງຄັ້ງສໍາລັບທັງຫມົດຊຸດຫຼັກສູດ (ລວມມີ ເຄື່ອງນຸ່ງ, ກະເປົາ, ຜ້າຫົ່ມ, ຊາມ ແລະ ເຄື່ອງໃຊ້ອື່ນໆທີ່ຈໍາເປັນ); ລະດັບການໜຸນຊ່ວຍ 5,38 ລ້ານດົ່ງ/ຄົນ/ຊຸດຫຼັກສູດ ແລະ ຊ່ວຍຄ່າເດີນທາງ, ລະດັບຊ່ວຍ 4 ລ້ານດົ່ງ/ຄົນ/ຊຸດຫຼັກສູດ… ຍອດຈຳນວນທຶນຊ່ວຍໃນປີ 2024 ແມ່ນປະມານ 22 ຕື້ດົ່ງ, ເພີ່ມຂຶ້ນ 2 ຕື້ດົ່ງເມື່ອທຽບໃສ່ກັບປີກ່ອນ.
ມີຄຳເຫັນຕໍ່ກັບນັກຂ່າວໜັງສືພິມລາຍວັນ ທ້າຍຫງວ່ຽນ, ທ່ານ ຫງວ້ຽນນັງດັກ, ຮອງປະທານຜູ້ປະຈໍາການສະມາຄົມມິດຕະພາບ ຫວຽດນາມ - ລາວ ແຂວງ ທ້າຍຫງວ່ຽນ ໃຫ້ຮູ້ວ່າ: ມະຕິດັ່ງກ່າວໄດ້ປະກອບສ່ວນຊຸກຍູ້ ແລະ ສ້າງເງື່ອນໄຂໃຫ້ບັນດານັກສຶກສາ ລາວ ແລະ ກຳປູເຈຍ ມີຄວາມຫ້າວຫັນໃນການສຶກສາຮໍ່າຮຽນ ນີ້ແມ່ນເນື້ອໃນສຳຄັນເພື່ອສ້າງພື້ນຖານການປະຕິບັດລະບອບການຊ່ວຍເຫຼືອການບຳລຸງສ້າງ ຈາກງົບປະມານຂອງແຂວງໃຫ້ແກ່ນັກສຶກສາ ລາວ ແລະ ກຳປູເຈຍ. ພ້ອມກັນນັ້ນ, ກໍ່ປະກອບສ່ວນເພີ່ມທະວີການຮ່ວມມືດ້ານການບຳລຸງສ້າງ ແລະ ເພີ່ມທະວີການຮ່ວມມືມິດຕະພາບ, ຮັດແໜ້ນສາຍພົວພັນມິດຕະພາບອັນເປັນມູນເຊື້ອອັນຍາວນານ ລະຫວ່າງຫວຽດນາມ - ລາວ, ກຳປູເຈຍ ເປັນຕົ້ນແມ່ນການພົວພັນລະຫວ່າງແຂວງທ້າຍຫງວ່ຽນ ແລະ ບັນດາປະເທດເພື່ອນ.
ສ້າງເງື່ອນໄຂສະດວກໃຫ້ແກ່ນັກສຶກສາລາວໃນການຮ່ຳຮຽນ
ພ້ອມກັບບັນດາມະຫາວິທະຍາໄລ, ວິທະຍາໄລຢູ່ທ້າຍຫງວ່ຽນ, ບັນດາສະຖານການສຶກສາອື່ນ ທີ່ບຳລຸງສ້າງນັກສຶກສາລາວຢູ່ ຫວຽດນາມ ຍາມໃດກໍ່ເອົາໃຈໃສ່ ແລະ ສ້າງເງື່ອນໄຂດີທີ່ສຸດໃຫ້ບັນດານັກສຶກສາລາວ ໃນໄລຍະມາສຶກສາຢູ່ ຫວຽດນາມ ຊ່ວຍໃຫ້ລາວ ກໍ່ສ້າງແຫລ່ງຊັບພະຍາກອນມະນຸດ ຮັບໃຊ້ໃຫ້ແກ່ການພັດທະນາສັງຄົມ.
 |
| ນັກສຶກສາລາວຊອກຮູ້ ສວນໝາກລີນຈີ່ຢູ່ເມືອງລູກງ້ານ ແຂວງ ບັກຢາງ (ພາບ: ແທງລວນ). |
ອີງຕາມຂໍ້ມູນຈາກກະຊວງສຶກສາທິການ ແລະ ກິລາຂອງລາວ, ຫວຽດນາມ ກໍາລັງກໍ່ສ້າງຊັບພະຍາກອນມະນຸດໃຫ້ລາວຫຼາຍທີ່ສຸດເມື່ອທຽບໃສ່ກັບປະເທດອື່ນໆໃນໂລກທີ່ມີນັກສຶກສາລາວຫຼາຍກວ່າ 10.000 ຄົນ ທີ່ຮຽນຢູ່ບັນດາມະຫາວິທະຍາໄລ ແລະ ວິທະຍາໄລ ຢູ່ 54 ແຂວງ ແລະ ນະຄອນ.
ກ່າວຄຳເຫັນທີ່ກອງປະຊຸມສະຫຼຸບການບຳລຸງສ້າງ ແລະ ຄຸ້ມຄອງນັກສຶກສາລາວ ທີ່ຮຽນຢູ່ຫວຽດນາມ ໄລຍະ 2023 - 2024 ແລະ ຜັນຂະຫຍາຍທິດທາງ ແລະ ໜ້າທີ່ການບຳລຸງສ້າງ ສົກຮຽນ 2024 - 2025 ໃນວັນທີ 12 ກໍລະກົດ, ທ່ານ ຄຳຕັນ ສົມວົງ, ທີ່ປຶກສາຝ່າຍສຶກສາ-ວັດທະນະທຳ ສະຖານທູດລາວ ປະຈຳຫວຽດນາມ ໃຫ້ຮູ້ວ່າ: ໃນໄລຍະຜ່ານມາ, ອຳນາດການປົກຄອງ, ບັນດາກະຊວງ, ຄະນະ, ຂະແໜງການ, ໂຮງຮຽນຂອງຫວຽດນາມ ຍາມໃດກໍ່ມີຄວາມ ເອົາໃຈໃສ່ຊ່ວຍເຫຼືອທາງດ້ານວັດຖຸ ແລະ ຈິດໃຈ, ສ້າງເງື່ອນໄຂສະດວກໃຫ້ແກ່ນັກສຶກສາລາວໃນການສຶກສາຄົ້ນຄວ້າ. ນັກສຶກສາລາວ ມີຄວາມກະຕືລືລົ້ນໃນການຮຽນ, ຝຶກຝົນຫຼໍ່ຫຼອມ ແລະ ມີຄວາມຕັ້ງໃຈໃນການຮຽນຮູ້ ແລະ ຜ່ານຜ່າອຸປະສັກຕ່າງໆ.
ທ່ານສະເໜີໃຫ້ບັນດາສະຖາບັນການສຶກສາຫວຽດນາມ ເພີ່ມທະວີການເສັງເຂົ້າຮຽນ, ຕີລາຄາຄືນຄວາມຮູ້ ແລະ ພິຈາລະນາບັນດານັກສຶກສາລາວຄືກັບນັກສຶກສາ ຫວຽດນາມ. ນອກຈາກນັ້ນ, ກໍ່ຄັດເລືອກເອົາຜູ້ທີ່ມີຄວາມຮູ້ຄວາມສາມາດຕົວຈິງ, ມີຈັນຍາບັນ ແລະ ຄຸນສົມບັດ. ກະຊວງສຶກສາຂອງສອງປະເທດໄດ້ຮ່ວມກັນ ຍົກສູງການສອນພາສາຫວຽດນາມຂັ້ນພື້ນຖານໃຫ້ນັກສຶກສາຕ່າງປະເທດກ່ອນມາຫວຽດນາມ.
ທ່ານຮອງລັດຖະມົນຕີກະຊວງສຶກສາ ແລະ ບຳລຸງສ້າງ ຫວຽດນາມ ຫງວ້ຽນວັນຟຸກ ໄດ້ຮັບຮູ້ວ່າ: ການບຳລຸງສ້າງຂອງນັກສຶກສາ ລາວ ສືບຕໍ່ບັນລຸໄດ້ບັນດາໝາກຜົນທີ່ຕັ້ງໜ້າ, ຄຸນນະພາບນັບມື້ນັບດີຂຶ້ນ. ນັກສຶກສາຕ່າງປະເທດໄດ້ມີຄວາມມານະອົດທົນ ແລະ ຝຶກຝົນຫຼໍ່ຫຼອມ, ມີຫລາຍນ້ອງໄດ້ຮັບລາງວັນ ແລະ ຈຳນວນນັກສຶກສາທີ່ຮຽນຈົບກໍ່ສູງ. ທ່ານຮຽກຮ້ອງບັນດາໂຮງຮຽນສະໜອງທຶນການສຶກສາແກ່ນັກສຶກສາລາວຫຼາຍຂຶ້ນ ແລະ ເຊື່ອໝັ້ນວ່າ: ການກໍ່ສ້າງຊັບພະຍາກອນມະນຸດຂອງປະເທດລາວໃນໄລຍະຈະມາເຖິງ ຈະມີການປ່ຽນແປງຫຼາຍຢ່າງ ແລະ ບັນລຸໄດ້ໝາກຜົນດີເພີ່ມຂຶ້ນ, ຕອບສະໜອງຄວາມຄາດຫວັງຂອງສອງປະເທດ.
ຊ ສະຫວັດ
