 |
| ທ່ານນາງ ຫງວຽນທິບິກຖາວ ເອກອັກຄະລັດຖະທູດຫວຽດນາມ ປະຈຳ ຮົງກາຣີ ທັງຮັບຜິດຊອບ ໂຄຣເອເຊຍ (ພາບ: ສໍານັກຂ່າວສານຫວຽດນາມ) |
ນັກຂ່າວ: ຮຽນທ່ານນາງເອກອັກຄະລັດຖະທູດ, ການພົວພັນຫວຽດນາມ - ໂຄຣເອເຊຍ ສືບຕໍ່ພັດທະນາຢ່າງເຂັ້ມແຂງ, ເລິກເຊິ່ງ ແລະ ແທ້ຈິງໃນທຸກຂົງເຂດ. ຂໍຮຽນທ່ານເອກອັກຄະລັດຖະທູດທົບທວນຄືນບາງຜົນງານທີ່ພົ້ນເດັ່ນຂອງການພົວພັນຮ່ວມມື ໃນໄລຍະ 30 ປີຜ່ານມາ ແລະ ບັນດາທ່າແຮງທີ່ຕ້ອງໄດ້ຮັບການເສີມຂະຫຍາຍ?
ທ່ານນາງ ຫງວຽນທິບິກຖາວ ເອກອັກຄະລັດຖະທູດ: ຫວຽດນາມ ຍາມໃດກໍ່ຖືເປັນສຳຄັນການປັບປຸງ ແລະ ພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືທີ່ດີຫຼາຍດ້ານກັບບັນດາປະເທດເພື່ອນມິດທີ່ເປັນມູນເຊື້ອໃນເຂດ Balkan, ໃນນັ້ນມີ ໂຄຣເອເຊຍ ແມ່ນໜຶຶ່ງໃນບຸລິມະສິດ.
ໃນຕະຫຼອດ 3 ທົດສະວັດຜ່ານມາ, ການພົວພັນຫວຽດນາມ - ໂຄຣເອເຊຍ ໄດ້ຮັບການພັດທະນາຢ່າງຕັ້ງໜ້າ, ໄດ້ເປີດກວ້າງໃນຫລາຍຂົງເຂດ, ປະທັບໃຈທີ່ສຸດແມ່ນການເມືອງ - ການທູດ, ເສດຖະກິດ, ການຄ້າ ແລະ ຍັງຄົງມີຄວາມສາມາດບົ່ມຊ້ອນ ແລະ ພື້ນທີ່ທີ່ຕ້ອງເສີມຂະຫຍາຍທ່າແຮງຫລາຍຢ່າງ.
ໃນດ້ານການເມືອງ ແລະ ການທູດ, 2 ຝ່າຍຮັກສາການແລກປ່ຽນຄະນະຜູ້ແທນທຸກຂັ້ນ. ທ່ານ Croatia Stjepan Mesic ປະທານາທິບໍດີ ໄດ້ມາຢ້ຽມຢາມ ຫວຽດນາມ ໃນປີ 2008, ຫວ່າງມໍ່ໆມານີ້ ແມ່ນການຢ້ຽມຢາມຢ່າງເປັນທາງການຂອງ ທ່ານນາງ ຫວໍທິແອັງຊວນ ຮອງປະທານປະເທດ ຫວຽດນາມ ໄປຍັງ ໂຄຣເອເຊຍ (ເດືອນ ຕຸລາ 2022).
ການພົບປະຂອງການນໍາຂັ້ນສູງຂອງສອງປະເທດຢູ່ນອກເວທີປາໄສຫຼາຍຝ່າຍໄດ້ດຳເນີນໄປເປັນປະຈຳ.
ຫວ່າງມໍ່ໆນີ້, ທ່ານ ຟ້າມມິ່ງຈິງ ນາຍົກລັດຖະມົນຕີ ຫວຽດນາມ ກໍ່ໄດ້ມີການພົບປະກັບ ທ່ານນາຍົກລັດຖະມົນຕີ ໂຄຣເອເຊຍ ຢູ່ນອກກອງປະຊຸມສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນ ອາຊຽນ - EU ຢູ່ Brussels (ເດືອນ ທັນວາ 2022); ທ່ານ ບຸ່ຍແທງເຊີນ ລັດຖະມົນຕີກະຊວງການຕ່າງປະເທດ ກໍ່ໄດ້ມີການພົບປະກັບ ລັດຖະມົນຕີວ່າການກະຊວງການຕ່າງປະເທດ ແລະ ບັນດາບັນຫາເອີລົບ Croatian Gordan Grlic Radman ຢູ່ນອກກອງປະຊຸມ OECD ຢູ່ ຝລັ່ງ (ເດືອນພຶດສະພາ 2024), 2 ຝ່າຍໄດ້ດຳເນີນການປຶກສາຫາລືດ້ານການເມືອງຂັ້ນຮອງລັດຖະມົນຕີການຕ່າງປະເທດຢູ່ Zagreb (ເດືອນມີນາ 2024). .
ສອງປະເທດໄດ້ສົມທົບກັນຢ່າງຕັ້ງໜ້າກ່ຽວກັບບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ລ້ວນແຕ່ໃຫ້ການສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍເຊັ່ນ: ສະຫະປະຊາຊາດ ແລະ ຮ່ວມກັນຊຸກຍູ້ການພົວພັນຄູ່ຮ່ວມມືຍຸດທະສາດ ອາຊຽນ - ອີຢູ ຢ່າງແຮງ.
ຫວຽດນາມ ແລະ ໂຄຣເອເຊຍ ໄດ້ລົງນາມສັນຍາສຳຄັນຫຼາຍສະບັບໃນສ້າງກອບນິຕິກຳໃຫ້ແກ່ການຮ່ວມມື ແລະ ພັດທະນາການພົວພັນລະຫວ່າງ 2 ປະເທດ, ພິເສດແມ່ນໃນຂົງເຂດການທູດ, ເສດຖະກິດ ແລະ ການຄ້າ.
ນັກຂ່າວ: ທ່ານນາງເອກອັກຄະລັດຖະທູດ ຕີລາຄາຄວາມສາມາດບົ່ມຊ້ອນການຮ່ວມມືລະຫວ່າງສອງປະເທດໃນໄລຍະຈະມາເຖິງນີ້ຄືແນວໃດ, ທັງໃນການພົວພັນສອງຝ່າຍ ກໍ່ຄືການປະສານງານໃນເວທີສາກົນ ແລະ ເວທີປາໄສຫຼາຍຝ່າຍ, ຮຽນທ່ານ?
ທ່ານນາງ ຫງວຽນທິບິກຖາວ ເອກອັກຄະລັດຖະທູດ: ຄວາມສາມາດບົ່ມຊ້ອນການຮ່ວມມືລະຫວ່າງ 2 ປະເທດຍັງມີຫຼາຍຢ່າງ, ບົນພື້ນຖານການເສີມຂະຫຍາຍທ່າແຮງທີ່ມີການຊ່ວຍຊູກັນ ແລະ ທ່າໄດ້ປຽບໃນການແກ່ງແຍ້ງຂອງແຕ່ລະປະເທດ, ຜ່ານບັນດາຊ່ອງທາງສອງຝ່າຍ ແລະ ຫຼາຍຝ່າຍ.
ດ້ວຍທັດສະນີຍະພາບທີ່ມີຊື່ສຽງລະດັບໂລກຫຼາຍແຫ່ງ ແລະ ຝັ່ງທະເລທີ່ຍາວຢຽດ, 2 ຝ່າຍມີຄວາມສາມາດບົ່ມຊ້ອນອັນໃຫຍ່ຫຼວງໃນການຮ່ວມມືດ້ານການທ່ອງທ່ຽວ, ເສດຖະກິດທາງທະເລ, ການຂົນສົ່ງ, ການພົບປະແລກປ່ຽນປະຊາຊົນ... ຫວຽດນາມ ພ້ອມແລ້ວທີ່ຈະຮັບບົດບາດເປັນປະຕູໃຫ້ ໂຄຣເອເຊຍ ເຂົ້າສູ່ຕະຫຼາດຫວຽດນາມ ແລະ ອາຊຽນ.
ທີ່ເວທີປາໄສຫຼາຍຝ່າຍ, ສອງປະເທດຈະເພີ່ມທະວີການຮ່ວມມືໃນຂອບອາຊຽນ - EU, ASEM ກໍ່ຄືໃນຂົງເຂດຮັກສາສັນຕິພາບ, ການຮັບມືກັບການປ່ຽນແປງຂອງດິນຟ້າອາກາດ, ການຊ່ວຍເຫຼືອດ້ານມະນຸດສະທຳ...
ນັກຂ່າວ: ຂໍຮຽນທ່ານເອກອັກຄະລັດຖະທູດ ຂໍໃຫ້ທ່ານແບ່ງປັນກ່ຽວກັບແຜນການຂອງສະຖານທູດໃນການປະສານສົມທົບກັບບັນດາອົງການທີ່ກ່ຽວຂ້ອງຂອງ ໂຄຣເອເຊຍ ເພື່ອຈັດຕັ້ງບັນດາການເຄື່ອນໄຫວສະເຫຼີມສະຫຼອງວັນສ້າງຕັ້ງພົວພັນທາງການທູດຂອງ 2 ປະເທດຄົບຮອບ 30 ປີ?
ທ່ານນາງ ຫງວຽນທິບິກຖາວ ເອກອັກຄະລັດຖະທູດ: ເນື່ອງໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ, ທ່ານນາງ ເລຖິທູຮັ່ງ ຮອງລັດຖະມົນຕີການຕ່າງປະເທດ ໄດ້ມາຢ້ຽມຢາມ ໂຄຣເອເຊຍ ເພື່ອປຶກສາຄວາມຄິດເຫັນດ້ານການເມືອງກັບລັດຖະມົນການຕ່າງປະເທດ ແລະ ບັນຫາຕ່າງໆຂອງເອີຣົບ Frano Matusic (ເດືອນມີນາ 2024).
ຫວ່າງມໍ່ໆມານີ້, ທ່ານ ບຸ່ຍແທງເຊີນ ລັດຖະມົນຕີວ່າການຕ່າງປະເທດ ກໍ່ໄດ້ແລກປ່ຽນຈົດໝາຍອວຍພອນກັບທ່ານລັດຖະມົນຕີກະຊວງການຕ່າງປະເທດ ແລະ ບັນດາບັນຫາເອີລົບ Gordan Grlic Radman ໃນວັນຄົບຮອບນີ້.
ພິເສດ, ວັນທີ 7 ກໍລະກົດ ນີ້, ສະຖານທູດ ໄດ້ນຳໜ້າຄະນະຜູ້ແທນວິສາຫະກິດ ແລະ ສະມາຄົມຊາວ ຫວຽດນາມກ່ວາ 70 ຄົນໄປທີ່ ໂຄຣເອເຊຍ ເພື່ອສົມທົບກັບອຳນາດການປົກຄອງປະເທດປະຈໍາທ້ອງຖິ່ນ, ກະຊວງການຕ່າງປະເທດ ແລະ ບັນດາບັນຫາເອີຣົບ ຂອງໂຄຣເອເຊຍ ຈັດຕັ້ງ “ວັນວັດທະນະທຳ ຫວຽດນາມ” ທີ່ ໂຄຣເອເຊຍ ເນື່ອງໃນໂອກາດສະເຫຼີມສະຫຼອງຄົບຮອບ 30 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ ແລະ ໂຄຣເອເຊຍ. ຄາດວ່າເຫດການນີ້ຈະດຶງດູດປະຊາຊົນໃນທ້ອງຖິ່ນ ແລະ ຄະນະການທູດຢູ່ ໂຄຣເອເຊຍ ນັບພັນຄົນ ດ້ວຍບັນດາການເຄື່ອນໄຫວໂຄສະນາວັດທະນະທຳ ຫວຽດນາມ ຜ່ານບັນດາລາຍການພິເສດຄື: ການສະແດງສິລະປະດົນຕີ, ງານວາງສະແດງຮູບພາບ ແລະ ການສາຍຄຣິບວີດີໂອກ່ຽວກັບຫວຽດນາມ, ແນະນຳອາຫານການກິນຂອງຫວຽດນາມ, ຂຽນອັກສອນຈີນ, ແນະນຳຜະລິດຕະພັນເຄື່ອງຫັດຖະກຳຫວຽດນາມ. ສິລະປະກໍາ, ຜະລິດຕະພັນກະສິກຳຫວຽດນາມ, ອອກແບບເຂດບ່ອນຫຼິ້ນ, ແນະນຳໃຫ້ເດັກນ້ອຍ ໂຄຣເອເຊຍ ກ່ຽວກັບການລະບາຍສີພາບແຕ້ມ, ວາດພາບທິວທັດທຳມະຊາດ ແລະ ບ້ານເກີດເມືອງນອນປະເທດຊາດ ຫວຽດນາມ....
ຂ້າພະເຈົ້າຫວັງວ່າເຫດການນີ້ຈະບັນລຸຜົນສຳເລັດຢ່າງໃຫຍ່ຫຼວງ, ເຜີຍແຜ່ພາບພົດຂອງຄົນ ຫວຽດນາມ ທີ່ເປັນມິດໃນໃຈຂອງຄົນ ໂຄຣເອເຊຍ.
ນັກຂ່າວ: ຕາມທ່ານນາງເອກອັກຄະລັດຖະທູດແລ້ວ, 2 ປະເທດຕ້ອງເຮັດແນວໃດເພື່ອໃຫ້ການພົວພັນສອງຝ່າຍສືບຕໍ່ພັດທະນາໃນໄລຍະຈະມາເຖິງ, ຂໍຮຽນທ່ານ?
ທ່ານນາງ ຫງວຽນທິບິກຖາວ ເອກອັກຄະລັດຖະທູດ: ຫວຽດນາມ ແລະ ໂຄຣເອເຊຍ ຕ້ອງໄດ້ສືບຕໍ່ເພີ່ມທະວີການແລກປ່ຽນຄະນະບັນດາຜູ້ແທນທຸກຂັ້ນໃນທຸກຊ່ອງທາງຂອງລັດ, ສະພາແຫ່ງຊາດ, ລະຫວ່າງບັນດາກະຊວງ, ຂະແໜງການ, ທ້ອງຖິ່ນເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະ ຄວາມເຂົ້າໃຈເຊິ່ງກັນແລະກັນ, ເປັນພື້ນຖານຊຸກຍູ້ການຮ່ວມມື.
ສອງປະເທດຕ້ອງກຳນົດການພົວພັນຮ່ວມມືດ້ານເສດຖະກິດ - ການຄ້າ - ການລົງທຶນ ເປັນເສົາຄ້ຳສຳຄັນຂອງການພົວພັນສອງຝ່າຍໃນໄລຍະຈະມາເຖິງ, ເປີດກວ້າງການລົງນາມໃນບັນດາຂໍ້ຕົກລົງໃນຂົງເຂດອື່ນຄື: ວັດທະນະທຳ, ກິລາ, ການສຶກສາ, ການທ່ອງທ່ຽວ, ແຮງງານ...; ຊຸກຍູ້ການສ້າງຕັ້ງຄະນະກຳມະການລະຫວ່າງລັດຖະບານລະຫວ່າງສອງປະເທດກ່ຽວກັບການຮ່ວມມືດ້ານເສດຖະກິດ; ສຸມໃສ່ຜັນຂະຫຍາຍສັນຍາການຄ້າເສລີ ຫວຽດນາມ - ສະຫະພັນ ເອີລົບ (EVFTA) ຢ່າງມີປະສິດທິຜົນ ແລະ ຄົບຖ້ວນ, ໃນໄລຍະທີ່ຈະມາເຖິງນີ້ແມ່ນສັນຍາອາລັກຂາການລົງທຶນລະຫວ່າງ EU ແລະ ຫວຽດນາມ (EVIPA).
ໃນເວລາດຽວກັນ, ສອງຝ່າຍຍັງຕ້ອງສຸມໃສ່ສະໜອງຂໍ້ມູນຂ່າວສານ ແລະ ສ້າງບັນດາໂຄງການສົ່ງເສີມການຄ້າ ແລະ ການລົງທຶນ ເພື່ອສ້າງເງື່ອນໄຂໃຫ້ປະຊາຄົມວິສາຫະກິດຂອງ 2 ປະເທດມີຄວາມເຂົ້າໃຈຕື່ມກ່ຽວກັບສະພາບແວດລ້ອມແຫ່ງການດຳເນີນທຸລະກິດ ແລະ ການລົງທຶນຂອງກັນ ແລະ ກັນ.
ນັກຂ່າວ: ຮຽນທ່ານນາງເອກອັກຄະລັດຖະທູດ ຂໍໃຫ້ຮູ້ເຖິງຈຸດສຸມຂອງການຮ່ວມມືລະຫວ່າງ ຫວຽດນາມ ແລະ ໂຄຮເອເຊຍ ໃນປີ 2024 ກໍ່ຄືບັນດາປີຕໍ່ໄປ?
ທ່ານນາງ ຫງວຽນທິບິກຖາວ ເອກອັກຄະລັດຖະທູດ: ບົນພື້ນຖານການຮ່ວມມືອັນດີງາມລະຫວ່າງສອງປະເທດ, ໃນປີນີ້ກໍຄືໃນໄລຍະຈະມາເຖິງ, ຫວຽດນາມ ແລະ ໂຄຣເອເຊຍ ໃຫ້ຄວາມສໍາຄັນໃນການຊຸກຍູ້, ເພີ່ມທະວີການແລກປ່ຽນຄະນະຜູ້ແທນຂັ້ນສູງ; ສ້າງກົນໄກການຮ່ວມມືໃໝ່; ເປີດກວ້າງການຮ່ວມມືຂອງລັດຖະສະພາ.
ນອກນີ້, ສອງປະເທດຍັງສືບຕໍ່ຂຸດຄົ້ນ ແລະ ເປີດກວ້າງການພົວພັນໃນຂົງເຂດທີ່ມີຄວາມສາມາດບົ່ມຊ້ອນແລະ ສາມາດເປັນທ່າແຮງຊ່ວຍຊູກັນຄື: ການປຸງແຕ່ງອາຫານ, ການຂົນສົ່ງ, ການຫັນປ່ຽນພະລັງງານສະອາດ, ເຕັກໂນໂລຊີສູງ, ເສດຖະກິດດີຈີຕອນ, ການຢາ...
ໃນໄລຍະຈະມາເຖິງ, ຫວຽດນາມ ຄາດວ່າຈະແຕ່ງຕັ້ງກົງສຸນກິຕິມະສັກ ປະຈຳນະຄອນ Zagreb ເພື່ອຊຸກຍູ້ການພົວພັນລະຫວ່າງສອງປະເທດ, ພິເສດແມ່ນໃນຂົງເຂດເສດຖະກິດ, ການຄ້າ, ຊ່ວຍເຫຼືອພົນລະເມືອງຫວຽດນາມ ຢູ່ ໂຄຣເອເຊຍ.
ຂໍຂອບໃຈທ່ານນາງເອກອັກຄະລັດຖະທູດເປັນຢ່າງສູງ!
ທອງມີ ສີຫາວົງ
