ຫວ່າງແລ້ວນີ້, ທ່ານ ຫງວຽນຈຸ່ງແຄ໋ງ ຫົວໜ້າກົມທ່ອງທ່ຽວແຫ່ງຊາດຫວຽດນາມ ໄດ້ນຳໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມການທ່ອງທ່ຽວ ຫວຽດນາມ - ອົດສະຕາລີ ຢູ່ Melbourne (ອົດສະຕາລີ). ເຂົ້າຮ່ວມກອງປະຊຸມມີການນຳຂອງໜ່ວຍງານຈໍານວນໜຶ່ງຂຶ້ນກັບອົງການທ່ອງທ່ຽວແຫ່ງຊາດຫວຽດນາມ; ການນຳ Austrade ແລະ ຜູ້ຕາງໜ້າບັນດາສະມາຄົມ, ວິສາຫະກິດການທ່ອງທ່ຽວ, ທີ່ພັກ ແລະ ການບິນ... ຂອງ 2 ປະເທດ.
 |
| ກອງປະຊຸມການທ່ອງທ່ຽວຫວຽດນາມ - ອົດສະຕາລີ. (ພາບ: ສໍານັກຂ່າວສານຫວຽດນາມ) |
ທ່ານ ຫງຽມຊວນຮ່ວາ, ອັກຄະລັດຖະທູດຂອງສະຖານທູດຫວຽດນາມ ປະຈຳ ອົດສະຕາລີ ມີຄຳເຫັນທີ່ກອງປະຊຸມວ່າ: ຫວຽດນາມ - ອົດສະຕາລີ ຫາກໍ່ສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານໃນເດືອນ ມີນາ 2024. ໃນນັ້ນ, ຂົງເຂດການທ່ອງທ່ຽວໄດ້ຮັບການເຕື້ອງເຖິງລະອຽດໃນຖະແຫຼງການຮ່ວມຂອງບັນດາການນຳຂອງ 2 ປະເທດ, ນັ້ນແມ່ນການຊົມເຊີຍ ແລະ ຊອກຫາກາລະໂອກາດເພື່ອຊ່ວຍເຫຼືອການພັດທະນາການທ່ອງທ່ຽວສອງຝ່າຍ.
ຕາມ ທ່ານ ຫງຽມຊວນຮ່ວາ ແລ້ວ, ປະຈຸບັນມີໂອກາດຂອງຄວາມສາມາດບົ່ມຊ້ອນຕ່າງໆ ທີ່ສາມາດນໍາໄປຂຸດຄົ້ນເພື່ອແນໃສ່ຊຸກຍູ້ການຮ່ວມມືດ້ານການທ່ອງທ່ຽວລະຫວ່າງ ຫວຽດນາມ ແລະ ອົດສະຕາລີ, ລວມທັງເງື່ອນໄຂສະດວກຕ່າງໆຍ້ອນການພົວພັນລະຫວ່າງ 2 ປະເທດນັບມື້ນັບພັດທະນາ; ຄວາມສົນໃຈຂອງນັກທ່ອງທ່ຽວອົດສະຕາລີ ຕໍ່ກັບຫວຽດນາມ ກໍ່ມີຫຼາຍຂຶ້ນ ແລະ ກົງກັນຂ້າມ; ບັນດາອົງການ, ການຈັດຕັ້ງຂອງພາກລັດທີ່ກ່ຽວຂ້ອງ ແລະ ທຸລະກິດຂອງສອງປະເທດ ກໍ່ກໍາລັງມານະພະຍາຍາມກະຕຸກຊຸກຍູ້ພັດທະນາການທ່ອງທ່ຽວສອງຝ່າຍ. ບົນພື້ນຖານດັ່ງກ່າວ, ທ່ານເຊື່ອໝັ້ນວ່າ ຫວຽດນາມ ແລະ ອົດສະຕາລີ ຈະສາມາດຮ່ວມມືກັນເພື່ອປະຕິບັດການຫັນກາລະໂອກາດໃຫ້ປະກົດຜົນເປັນຈິງ ແລະ ນຳມາເຊິ່ງໝາກຜົນທີ່ເປັນຮູບປະທໍາ.
 |
| ທ່ານ ຫງວຽນຈຸ່ງແຄ໋ງ ຫົວໜ້າກົມທ່ອງທ່ຽວແຫ່ງຊາດຫວຽດນາມ.(ພາບ: ສໍານັກຂ່າວສານຫວຽດນາມ) |
ທ່ານ ຫງວຽນຈຸ່ງແຄ໋ງ ຫົວໜ້າກົມທ່ອງທ່ຽວແຫ່ງຊາດຫວຽດນາມ ໄດ້ມີຄໍາເຫັນແລກປ່ຽນທີ່ກອງປະຊຸມວ່າ: ລັດຖະບານ ຫວຽດນາມ ກໍາລັງພະຍາຍາມພັດທະນາຂະແໜງການທ່ອງທ່ຽວໃຫ້ກາຍເປັນຂະແໜງເສດຖະກິດປາຍແຫຼມ. ກວ່າ 2 ປີຫຼັງຈາກເປີດປະຕູຄືນໃໝ່ພາຍຫຼັງການແຜ່ລະບາດພະຍາດ Covid – 19, ຂະແໜງການທ່ອງທ່ຽວຂອງຫວຽດນາມ ກໍາລັງໄດ້ຢູ່ໃນທ່ວງທ່າຟື້ນຕົວຄືນໃໝ່ ດ້ວຍຜົນງານທີ່ພົ້ນເດັ່ນຫຼາຍຢ່າງ. ຂະແໜງທ່ອງທ່ຽວ ແລະ ສະຖານທີ່ທ່ອງທ່ຽວຫຼາຍແຫ່ງຂອງຫວຽດນາມ ໄດ້ຮັບເປັນກຽດດ້ວຍລາງວັນອັນຊົງກຽດລະດັບສາກົນ, ຖືກຮັບຮອງເຂົ້າໃນກຸ່ມສະຖານທີ່ທ່ອງທ່ຽວແຖວໜ້າຂອງໂລກ, ສິ່ງເຫຼົ່ານັ້ນໄດ້ຢັ້ງຢືນເຖິງເຄື່ອງໝາຍການຄ້າ, ກຳລັງແຮງດຶງດູດ ແລະ ຄຸນນະພາບຂອງການທ່ອງທ່ຽວ ຫວຽດນາມ.
ໃນ 5 ເດືອນຕົ້ນປີ 2024, ຈະມີນັກທ່ອງທ່ຽວອົດສະຕາລີ ມາຫວຽດນາມ 213.000 ເທື່ອຄົນ, ເພີ່ມຂຶ້ນ 35% ເມື່ອທຽບໃສ່ໄລຍະດຽວກັນຂອງປີ 2023, ເຮັດໃຫ້ອົດສະຕາລີ ຂຶ້ນສູ່ອັນດັບເປັນແຫຼ່ງລູກຄ້າໃຫຍ່ອັນດັບ 7 ຂອງ ຫວຽດນາມ.
 |
| ນັກທ່ອງທ່ຽວອົດສະຕາລີ ຢູ່ອ່າວຮະລອງ, ຫວຽດນາມ |
ທ່ານ ຫງວຽນຈຸ່ງແຄ໋ງ ເຊື່ອໝັ້ນວ່າ ຄວາມເອົາໃຈໃສ່ແບບພິເສດຂອງການນຳຂັ້ນສູງ 2 ປະເທດ ແລະ ບັນດາການເຄື່ອນໄຫວຮ່ວມມື, ການສົ່ງເສີມການທ່ອງທ່ຽວສອງຝ່າຍທີ່ຕັ້ງໜ້າຂອງບັນດາອົງການທີ່ກ່ຽວຂ້ອງຄື: ກົມທ່ອງທ່ຽວແຫ່ງຊາດ ຫວຽດນາມ, ກົມທ່ອງທ່ຽວອົດສະຕາລີ ແລະ ອຳນາດການປົກຄອງທ້ອງຖິ່ນ... ການຮ່ວມມືດ້ານການທ່ອງທ່ຽວລະຫວ່າງ 2 ປະເທດຈະພັດທະນາໄປຢ່າງຈົບງາມ, ບັນລຸໄດ້ບັນດາຂີດໝາຍສຳຄັນໃໝ່ໃນອະນາຄົດອັນໃກ້ໆນີ້.
ນອກຈາກນີ້ ທ່ານ ຍັງສະແດງຄວາມປາດຖະໜາວ່າ ກອງປະຊຸມຄັ້ງນີ້ຈະເຊື່ອມຕໍ່ບັນດາວິສາຫະກິດຫວຽດນາມ ແລະ ອົດສະຕາລີ ຢ່າງມີປະສິດທິຜົນ ເພື່ອສ້າງເຄືອຂ່າຍການທ່ອງທ່ຽວ ແລະ ຍົກສູງປະສິດທິຜົນໃນການພັດທະນາຕະຫຼາດລູກຄ້າທີ່ມີທ່າແຮງບົ່ມຊ້ອນ.
 |
| ທ່ານ Raff Ciccone, ສະມາຊິກສະພາສູງອົດສະຕາລີ. (ພາບ: ສໍານັກຂ່າວສານຫວຽດນາມ) |
ຕາມທ່ານ Raff Ciccone, ສະມາຊິກສະພາສູງຂອງອົດສະຕາລີ ແລ້ວ, ຫວຽດນາມ ແມ່ນຕະຫຼາດຫຼັກແຫຼ່ງທີ່ສໍາຄັນໃນຂະບວນຫັນຕະຫຼາດເສດຖະກິດທ່ອງທ່ຽວເປັນຫຼາຍຮູບຫຼາຍແບບຂອງອົດສະຕາລີ. ເພື່ອຊ່ວຍໃຫ້ຂະແໜງການທ່ອງທ່ຽວ ອົດສະຕາລີ ໄດ້ເຂົ້າໃຈຕະຫຼາດຂອງປະເທດອາຊີຕາເວັນອອກສ່ຽງໃຕ້ນີ້ ແລະ ຮັບໃຊ້ນັກທ່ອງທ່ຽວຈາກ ຫວຽດນາມ ໄດ້ດີກວ່າເກົ່າ, ທ່ານ Raff ກ່າວວ່າ Austrade ໄດ້ສົມທົບກັບສະພາສົ່ງອອກ-ທ່ອງທ່ຽວ ອົດສະຕາລີ (ATEC) ຈັດຕັ້ງລາຍການທີ່ເອີ້ນວ່າ “Vietnam Host” ໂດຍຄາດວ່າຈະດຳເນີນໃນສອງສາມເດືອນຂ້າງໜ້າ, ນຳຫວຽດນາມເຂົ້າໃນບັນຊີລາຍຊື່ຕະຫຼາດທ່ອງທ່ຽວທີ່ສຳຄັນຂອງອົດສະຕາລີ, ໃນນັ້ນ ລວມມີ ຈີນ, ອິນເດຍ, ຍີ່ປຸ່ນ, ສ.ເກົາຫຼີ ແລະ ອິນໂດເນເຊຍ.
ທ່ານ ນາງ Phillippa King, ຮອງຜູ້ອຳນວຍການໃຫຍ່ Austrade ຢືນຢັນວ່າ: ການທ່ອງທ່ຽວແມ່ນຂົງເຂດ “ສົ່ງອອກ” ທີ່ສຳຄັນຂອງທັງ 2 ປະເທດ ແລະ ຍັງໄດ້ກ່າວອີກວ່າ, ປະຈຸບັນຂະແໜງການທ່ອງທ່ຽວເຮັດໜ້າທີ່ເປັນໜຶ່ງໃນຂົວຕໍ່ການພົວພັນລະຫວ່າງ 2 ປະເທດ, ຍົກສູງຄວາມເຂົ້າໃຈຂອງປະຊາຊົນ 2 ປະເທດກ່ຽວກັບປະເທດຊາດ, ວັດທະນະທໍາ, ການສຶກສາຂອງກັນແລະກັນ.
ຍ້ອນມີປະຊາຄົມຊາວຫວຽດນາມ ຢູ່ ອົດສະຕາລີ ເປັນຈຳນວນຫຼວງຫຼາຍ, ທ່ານຈິ່ງຫວັງວ່າ ຂະແໜງການທ່ອງທ່ຽວ ອົດສະຕາລີ ຈະນຳເອົາປະສົບການຕົວຈິງອັນຍອດຍິ່ງມາໃຫ້ໝູ່ເພື່ອນ ແລະ ຄອບຄົວຂອງພວກເຂົາເມື່ອພວກເຂົາມາຮອດທີ່ “ດິນແດນຈິງໂຈ້” ຢ້ຽມຢາມຍາດຕິພີ່ນ້ອງ. ທ່ານຫວັງເປັນຢ່າງຍິ່ງວ່າ ຈະມີນັກທ່ອງທ່ຽວຫວຽດນາມ ມາຍັງອົດສະຕາລີ ນັບມື້ນັບຫຼາຍກວ່າອີກ ແລະ ໃນທາງກັບກັນ, ຂະນະດຽວກັນກໍ່ເຊື່ອໝັ້ນວ່າກອງປະຊຸມຈະສ້າງໂອກາດໃຫ້ບັນດາວິສາຫະກິດ ແລະ ອົງການລັດຖະບານຂອງ 2 ປະເທດຮ່ວມກັນປຶກສາຫາລື, ແລກປ່ຽນຂໍ້ມູນຂ່າວສານກ່ຽວກັບວິທີການຂອງຂະແໜງນີ້ຈະສາມາດຊ່ວຍເຫຼືອເປົ້າໝາຍຂອງລັດຖະບານ 2 ປະເທດໄດ້ຢ່າງແທ້ຈິງ ເພື່ອແນໃສ່ເພີ່ມກະແສນັກທ່ອງທ່ຽວຂອງ 2 ປະເທດ.
ພາຍຫຼັງກອງປະຊຸມ ກໍ່ດຳເນີນລາຍການພົບປະກັບວິສາຫະກິດທ່ອງທ່ຽວ ຫວຽດນາມ - ອົດສະຕາລີ ດ້ວຍການເຂົ້າຮ່ວມຂອງ 8 ວິສາຫະກິດການບິນ, ການທ່ອງທ່ຽວ ແລະ ທີ່ພັກຂອງ ຫວຽດນາມ; 28 ອົງການທ່ອງທ່ຽວອົດສະຕາລີ ແລະ ວິສາຫະກິດ; ຄຽງຄູ່ກັນນັ້ນແມ່ນ 2 ກອງປະຊຸມປຶກສາຫາລືໃນຫົວຂໍ້ “ສົ່ງເສີມນັກທ່ອງທ່ຽວຫວຽດນາມ ໄປ ອົດສະຕາລີ” ແລະ “ການສົ່ງເສີມນັກທ່ອງທ່ຽວ ອົດສະຕາລີ ໄປ ຫວຽດນາມ”. ຂໍ້ມູນຕ່າງໆທີ່ຜູ້ຕາງໜ້າຫວຽດນາມ ແບ່ງປັນໄດ້ນຳມາເຊິ່ງມູມມອງທີ່ລະອຽດກວ່າເກົ່າໃຫ້ກັບບັນດາແຂກທີ່ເຂົ້າຮ່ວມ. ສ່ວນໃຫຍ່ລ້ວນແຕ່ສະແດງຄວາມພໍໃຈກັບການພັດທະນາອີກຄັ້ງຂອງການທ່ອງທ່ຽວສາກົນ ພາຍຫຼັງການລະບາດຂອງພະຍາດໂຄວິດ-19.
ຜູ້ແທນຫຼາຍທ່ານໄດ້ມີຄວາມເຫັນເປັນເອກະພາບກັນວ່າ: ຫວຽດນາມ ມີທ່າແຮງບົ່ມຊ້ອນທາງດ້ານການທ່ອງທ່ຽວໃຫ່ຍຫຼວງທີ່ສຸດ, ຕະຫຼາດທ່ອງທ່ຽວ ຫວຽດນາມ ພວມຂະຫຍາຍຕົວ ແລະ ຕີລາຄາວ່າ ນີ້ລ້ວນແຕ່ແມ່ນຕະຫຼາດທີ່ນັກທ່ອງທ່ຽວ ອົດສະຕາລີ ຈໍານວນຫຼາຍເລືອກເຟັ້ນ, ພິເສດແມ່ນສະຖານທີ່ທີ່ມີຊື່ສຽງຄື: ຮ່າໂນ້ຍ, ອ່າວຮ່ະລອງ, ເຫ້ວ, ໂຮ້ຍອານ... ຢູ່ ຫວຽດນາມ, ນັກທ່ອງທ່ຽວມີໂອກາດພົບປະກັບປະຊາຊົນທ້ອງຖິ່ນ ແລະ ມີປະສົບການພິເສດ. ສິ່ງນີ້ເຮັດໃຫ້ຫວຽດນາມກາຍເປັນຈຸດໝາຍປາຍທາງທີ່ແຕກຕ່າງກັນເມື່ອທຽບໃສ່ກັບບ່ອນອື່ນໆ. ຍ້ອນແນວນັ້ນ ນັກທ່ອງທ່ຽວຈິ່ງມີຄວາມພໍອົກພໍໃຈເມື່ອໄປທ່ອງທ່ຽວໄລຍະຫຼາຍວັນຢູ່ຫວຽດນາມ.
ທອງມີ ສີຫາວົງ
