| ຫວຽດນາມ - ອາເມລິກາ: ສືບຕໍ່ຍູ້ແຮງບັນດາການເຄື່ອນໄຫວພົບປະແລກປ່ຽນປະຊາຊົນ | |
| ໂອກາດເພື່ອໂຮງຮຽນ ຫວຽດນາມ ໄດ້ຮັບເອົາຜູ້ຊ່ວຍການສອນພາສາອັງກິດຂອງ ອາເມລິກາ |
ຕາມຂໍ້ມູນຈາກກະຊວງການຕ່າງປະເທດ ຫວຽດນາມ, ທີ່ການພົບປະ, ທ່ານລັດຖະມົນຕີ ຫວຽດນາມ ບຸຍແທງເຊີນ ແລະ ທ່ານລັດຖະມົນຕີການຕ່າງປະເທດ ອາເມລິກາ Antony Blinken ໄດ້ທົບທວນຄືນບັນດາກ້າວໜ້າໃນການພົວພັນລະຫວ່າງ 2 ປະເທດ, ກວດກາຄືນບັນດາເນື້ອໃນການຮ່ວມມືທີ່ໄດ້ຮັບການຜັນຂະຫຍາຍນັບແຕ່ການພົວພັນຄູ່ຮ່ວມມືຍຸດທະສາດຮອບດ້ານໄດ້ຮັບການສ້າງຕັ້ງແຕ່ເດືອນ ກັນຍາ 2023.
ການພົວພັນທາງການເມືອງການຕ່າງປະເທດນັບມື້ນັບໄດ້ຮັບການປັບປຸງ, ບັນດາການເຄື່ອນໄຫວພົບປະ ແລະ ແລກປ່ຽນຄະນະຜູ້ແທນຂັ້ນສູງພວມດຳເນີນໄປຢ່າງຟົດຟື້ນ. ການຮ່ວມມືດ້ານເສດຖະກິດ - ການຄ້າ - ການລົງທຶນ ສືບຕໍ່ແມ່ນກຳລັງຜັກດັນທີ່ສຳຄັນຂອງການພົວພັນສອງຝ່າຍ. ການຮ່ວມມືໃນບັນດາຂົງເຂດການປ້ອງກັນຊາດ - ປ້ອງກັນຄວາມສະຫງົບ, ການສຶກສາ - ບຳລຸງສ້າງ, ສາທາລະນະສຸກ, ວິທະຍາສາດ - ເຕັກໂນໂລຢີ... ມີບາດກ້າວທີ່ຕັ້ງໜ້າ, ການຮ່ວມມືແກ້ໄຂຜົນຮ້າຍຢ້ອນຫຼັງຈາກສົງຄາມຍັງຄົງເປັນຈຸດພົ້ນເດັ່ນ, ຕົວຢ່າງແມ່ນໂຄງການລ້າງທາດພິດຢູ່ສະໜາມບິນ ບຽນຮວ່າ. ຈຳນວນນັກສຶກສາຕ່າງປະເທດຫວຽດນາມ ຢູ່ ອາເມລິກາ ນັບມື້ນັບເພີ່ມຂຶ້ນ...
 |
| ທ່ານລັດຖະມົນຕີການຕ່າງປະເທດ ຫວຽດນາມ ບຸຍແທງເຊີນ ແລະ ທ່ານລັດຖະມົນຕີການຕ່າງປະເທດ ອາເມລິກາ Antony Blinken |
ບັນດາຂົງເຂດຮ່ວມມືໃໝ່ຄື ການຮັບມືກັບການປ່ຽນແປງຂອງດິນຟ້າອາກາດ, ການຫັນປ່ຽນພະລັງງານ, ວິທະຍາສາດ - ເຕັກໂນໂລຢີ, ນະວັດຕະກຳ, ການຖ່າຍທອດເຕັກໂນໂລຢີ ແລະ ບຳລຸງສ້າງແຫຼ່ງຊັບພະຍາກອນມະນຸດໃນຂະແໜງອຸດສະຫະກຳເຄິ່ງຊັກນຳໄຟຟ້າ ໄດ້ຮັບຄວາມສົນໃຈຈາກສອງຝ່າຍ.
ລັດຖະມົນຕີ 2 ທ່ານກໍ່ໄດ້ປຶກສາຫາລືບັນດາມາດຕະການ ເພື່ອເຮັດໃຫ້ການພົວພັນລະຫວ່າງ 2 ປະເທດເລິກເຊິ່ງກ່ວາອີກ. ລັດຖະມົນຕີ 2 ທ່ານໄດ້ເຫັນດີເປັນເອກະພາບກ່ຽວກັບເສີມຂະຫຍາຍກົນໄກສົນທະນາຂັ້ນລັດຖະມົນຕີການຕ່າງປະເທດ ເພື່ອເພີ່ມທະວີການຮ່ວມມືຢ່າງແໜ້ນແຟ້ນລະຫວ່າງສອງກະຊວງການຕ່າງປະເທດໃນການຜັນຂະຫຍາຍບັນດາຂໍ້ຕົກລົງຂັ້ນສູງ. ປະຕິບັດບັນດາກົນໄກຮ່ວມມືສອງຝ່າຍທີ່ມີຢູ່ແລ້ວຢ່າງມີປະສິດທິຜົນ, ໃນນັ້ນ ມີກົນໄກສົນທະນາດ້ານການເມືອງ - ການປ້ອງກັນຊາດ - ປ້ອງກັນຄວາມສະຫງົບ, ການສົນທະນາດ້ານນະໂຍບາຍປ້ອງກັນປະເທດ, ການສົນທະນາດ້ານສິດທິມະນຸດ; ເຫັນດີເປັນເອກະພາບ ຈະສົມທົບກັນຢ່າງຕັ້ງໜ້າ ເພື່ອຈັດຕັ້ງບັນດາການເຄື່ອນໄຫວສະເຫຼີມສະຫຼອງ 30 ປີແຫ່ງວັນຫັນການພົວພັນສອງປະເທດເປັນປົກກະຕິ ໃນປີ 2025.
2 ຝ່າຍກໍ່ໄດ້ປຶກສາຫາລືກ່ຽວກັບບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ. ທ່ານລັດຖະມົນຕີ ຫວຽດນາມ ບຸຍແທງເຊີນ ສະເໜີ ອາເມລິກາ ສືບຕໍ່ສວມບົດບາດທີ່ຕັ້ງໜ້າ, ປະກອບສ່ວນຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ ອາຊີ - ປາຊີຟິກ ແລະ ມະຫາສະຫມຸດອິນເດຍ ກໍ່ຄືໃນໂລກ.
ທ່ານລັດຖະມົນຕີການຕ່າງປະເທດ ອາເມລິກາ Antony Blinken ຢືນຢັນວ່າ ອາເມລິກາ ສະໜັບສະໜູນບົດບາດໃຈກາງຂອງ ອາຊຽນ ຢູ່ພາກພື້ນ ແລະ ສືບຕໍ່ຊຸກຍູ້ການຮ່ວມມືໃນຂອບເຂດຄູ່ການພົວພັນຮ່ວມມືຍຸດທະສາດຮອບດ້ານ ອາຊຽນ - ອາເມລິກາ, ພ້ອມກັນນັ້ນ ກໍ່ຢືນຢັນວ່າ ອາເມລິກາ ສະໜັບສະໜູນການຮ່ວມມືແມ່ນ້ຳຂອງ - ອາເມລິກາ, ການຮັບມືກັບການປ່ຽນແປງຂອງດິນຟ້າອາກາດ ແລະ ການເຄື່ອນໄຫວຮັກສາສັນຕິພາບ (PKO) ຂອງສະຫະປະຊາຊາດ.
2 ຝ່າຍກໍ່ປຶກສາຫາລືກ່ຽວກັບບັນຫາທະເລຕາເວັນອອກ ແລະ ເຫັນດີເປັນເອກະພາບກ່ຽວກັບຄວາມສຳຄັນຂອງສັນຕິພາບ, ຄວາມໝັ້ນຄົງ, ສະຖຽນລະພາບ, ຄວາມເສລີພາບໃນການເດີນທະເລ, ການບິນຢູ່ທະເລຕາເວັນອອກ, ແກ້ໄຂການແກ້ງແຍ້ງໂດຍຜ່ານບັນດາມາດຕະການສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນ ມີສົນທິສັນຍາສະຫະປະຊາຊາດກ່ຽວກັບກົດໝາຍທະເລ (UNCLOS) ປີ 1982, ປະຕິບັດ DOC ຢ່າງຄົບຖ້ວນ ແລະ ມຸ່ງໄປເຖິງ COC ຢ່າງມີປະສິດທິຜົນ, ແທດຈິງ.
ມິງດຶກ
