ຕອນເຊົ້າວັນທີ 19 ມັງກອນ 2024, ຢູ່ສຳນັກງານຄະນະພົວພັນຕ່າງປະເທດສູນກາງ, ສະຫາຍ ຫງວຽນຈ້ອງເຫງ້ຍ, ເລຂາທິການສູນກາງພັກ, ຫົວໜ້າຄະນະໂຄສະນາສຶກສາສູນກາງ ໄດ້ມີການພົບປະ ແລະເຮັດວຽກກັບສະຫາຍນາງ ຄໍາເພົາ ເອີນທະວັນ ເອກອັກຄະລັດຖະທູດລາວ ປະຈໍາ ຫວຽດນາມ.
 |
| ສະຫາຍ ຫງວຽນຈ້ອງເຫງ້ຍ ແລະສະຫາຍນາງ ຄໍາເພົາ ເອີນທະວັນ.ພາບ: dangcongsan.vn |
ທີ່ການຕ້ອນຮັບ, ສະຫາຍ ຫງວຽນຈ້ອງເຫງ້ຍ ໄດ້ສະແດງຄວາມປິຕິຊົມຊື່ນເມື່ອພັກ, ລັດ ແລະປະຊາຊົນສອງປະເທດຍາມໃດກໍ່ພ້ອມກັນປົກປັກຮັກສາ ແລະເພີ່ມພູນຄູນສ້າງສາຍພົວພັນສາມັກຄີແບບພິເສດຫວຽດນາມ - ລາວ ໃຫ້ນັບມື້ນັບພັດທະນາເຂົ້າສູ່ລວງເລິກ, ແທດຈິງ ແລະມີປະສິດທິຜົນໃນທຸກຂົງເຂດຢ່າງບໍ່ຢຸດຢັ້ງ. ພັກ, ລັດ ແລະປະຊາຊົນຫວຽດນາມ ຍາມໃດກໍ່ຖືເປັນສຳຄັນການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ - ລາວ, ເຊິ່ງແມ່ນໜ້າທີ່ຍຸດທະສາດ, ມີຄວາມໝາຍເປັນຕາຍຕໍ່ຄວາມໝັ້ນຄົງ ແລະການພັດທະນາຂອງແຕ່ລະປະເທດ.
 |
| ບັນຍາກາດທີ່ການຕ້ອນຮັບ. ພາບ: tuyengiao.vn |
ໃນໄລຍະຈະມາເຖິງ, ຄະນະໂຄສະນາສຶກສາສູນກາງພັກກອມມູນິດຫວຽດນາມ ຈະສືບຕໍ່ສົມທົບກັນຢ່າງແໜ້ນແຟ້ນກັບຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ປະຕິບັດຂໍ້ຕົກລົງລະຫວ່າງການນຳຂັ້ນສູງສອງພັກ, ສອງປະເທດ, ກໍ່ຄືຂໍ້ຕົກລົງການຮ່ວມມືລະຫວ່າງສອງຄະນະ ໄລຍະ 2022 – 2026 ຢ່າງມີປະສິດທິຜົນ; ສືບຕໍ່ແລກປ່ຽນຂໍ້ມູນຂ່າວສານ, ປະສົບການ ແລະບຳລຸງສ້າງພະນັກງານ, ໂດຍສະເພາະແມ່ນວຽກງານໂຄສະນາເຜີຍແຜ່ກ່ຽວກັບການຜັນຂະຫຍາຍນະໂຍບາຍ, ແນວທາງຂອງແຕ່ລະພັກ; ...
ສະຫາຍນາງ ຄໍາເພົາ ເອີນທະວັນ ຢືນຢັນວ່າ ການພົວພັນສາມັກຄີລະຫວ່າງ ລາວ-ຫວຽດນາມ ແມ່ນການພົວພັນມີໜຶຶ່ງບໍ່ມີສອງໃນປະຫວັດສາດໂລກ; ພ້ອມກັນນັ້ນ, ກໍ່ຂໍຂອບໃຈບັນດາການນຳພັກ, ລັດ ແລະປະຊາຊົນຫວຽດນາມ ທີ່ຍາມໃດກໍ່ສະໜັບສະໜູນ, ຊ່ວຍເຫຼືອ ແລະຄຽງບ່າຄຽງໄຫຼ່ພ້ອມກັບປະເທດລາວ ນັບແຕ່ຊຸມປີແຫ່ງການຕໍ່ສູ້ປົດປ່ອຍຊາດທີ່ຫຍຸ້ງຍາກລຳບາກ ຕະຫຼອດເຖິງໄລຍະສ້າງສາ ແລະພັດທະນາປະເທດຊາດໃນປະຈຸບັນ.
ສະຫາຍນາງ ຄໍາເພົາ ເອີນທະວັນ ປາດຖະໜາຈະສືບຕໍ່ໄດ້ຮັບການຊ່ວຍເຫຼືອ, ສົມທົບກັນຈາກຄະນະໂຄສະນາສຶກສາສູນກາງ ຫວຽດນາມ ເພື່ອປະຕິບັດສຳເລັດໜ້າທີ່ທີ່ພັກ ແລະລັດ ລາວ ມອບໝາຍໃຫ້, ປະກອບສ່ວນປັບປຸງ ແລະເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ - ລາວ ໃຫ້ພັດທະນາເຂົ້າສູ່ລວງເລິກ, ແທດຈິງ ແລະມີປະສິດທິຜົນໃນທຸກຂົງເຂດ, ເພື່ອຄວາມຈະເລີນຮຸ່ງເຮືອງຂອງແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ພາກພື້ນ ແລະໃນໂລກ.
ບູນມີ
