| ຫວຽດນາມ ແລະ UNESCO ສົມທົບກັນເຮັດໃຫ້ວັດທະນະທຳກາຍເປັນເປົ້າໝາຍພັດທະນາແບບຍືນຍົງຂອງສະຫະປະຊາຊາດ | |
| ເສີມຂະຫຍາຍບັນດາຄຸນຄ່ານາມມະຍົດ UNESCO ຢູ່ ຫວຽດນາມ |
ທີ່ການພົບປະ, ທ່ານຮອງລັດຖະມົນຕີ ຮ່າກິ່ມຫງອກ ໄດ້ສະແດງຄວາມຊົມເຊີຍທ່ານ Jonathan Wallace Baker ທີ່ໄດ້ຮັບການແຕ່ງຕັ້ງເປັນຫົວໜ້າຜູ້ຕາງໜ້າ UNESCO ປະຈຳ ຫວຽດນາມ; ເນັ້ນໜັກເຖິງບົດບາດນຳພາອັນສຳຄັນຂອງອົງການ UNESCO, ແມ່ນອົງການປັນຍາຊົນຂອງມວນມະນຸດ, ດ້ວຍພາລະກິດອັນສູງສົ່ງແມ່ນ “ສ້າງສັນຕິພາບຈາກພາຍໃນຈິດໃຈມະນຸດ”, ພິເສດແມ່ນໃນສະພາບການສາກົນທີ່ຜັນແປ ແລະ ບັນດາສິ່ງທ້າທາຍຄືປະຈຸບັນ.
ທ່ານຮອງລັດຖະມົນຕີ ຮ່າກິ່ມຫງອກ ໄດ້ຢ້ຳຄືນຄວາມໝາຍສຳຄັນຂອງການຢ້ຽມຢາມ 2 ຝ່າຍໃນໄລຍະບໍ່ດົນມານີ້ເຊັ່ນ: ການຢ້ຽມຢາມສຳນັກງານ UNESCO (ເດືອນພະຈິກ 2021) ຄັ້ງປະຫວັດສາດຂອງທ່ານນາຍົກລັດຖະມົນຕີ ຟ້າມມິງຈິງ, ທ່ານ Audrey Azoulay ຜູ້ອຳນວຍການໃຫຍ່ UNESCO ໄດ້ມີການຢ້ຽມຢາມຫວຽດນາມ (ເດືອນກັນຍາ 2022), ທ່ານລັດຖະມົນຕີກະຊວງການຕ່າງປະເທດ ບຸ່ຍແທງເຊີນ ໄດ້ໄປຢ້ຽມຢາມສຳນັກງານໃຫຍ່ UNESCO (ເດືອນມິຖຸນາ 2023) ແລະ ຫວ່າງມໍ່ໆມານີ້, ທ່ານລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ຫງວຽນວັນຮຸ່ງ ກໍ່ໄດ້ໄປຢ້ຽມຢາມສຳນັກງານໃຫຍ່ UNESCO (ເດືອນພະຈິກ 2023). ການຢ້ຽມຢາມຄັ້ງນີ້ໄດ້ປະກອບສ່ວນຍົກການພົວພັນ ຫວຽດນາມ - UNESCO ຂຶ້ນສູ່ລະດັບໃໝ່, ແທດຈິງ ແລະ ມີປະສິດທິຜົນ.
 |
| ທ່ານຮອງລັດຖະມົນຕີ ຮ່າກິ່ມຫງອກ ໄດ້ສະແດງຄວາມຊົມເຊີຍທ່ານ Jonathan Wallace Baker ທີ່ໄດ້ຮັບການແຕ່ງຕັ້ງເປັນຫົວໜ້າຜູ້ຕາງໜ້າ UNESCO ປະຈຳ ຫວຽດນາມ |
ທ່ານຮອງລັດຖະມົນຕີ ໄດ້ຕີລາຄາສູງບົດບາດສຳຄັນຂອງຫ້ອງການຜູ້ຕາງໜ້າ UNESCO ຮ່າໂນ້ຍ, ນັບແຕ່ໄດ້ຮັບການສ້າງຕັ້ງເມື່ອປີ 1999 ມາຮອດປະຈຸບັນໄດ້ປະກອບສ່ວນຊຸກຍູ້ການພົວພັນຮ່ວມມືຮອບດ້ານ ຫວຽດນາມ - UNESCO ໃນທຸກຂົງເຂດພາຍໃຕ້ສິດອຳນາດຂອງອົງການ; ພ້ອມກັນນັ້ນ, ທ່ານກໍ່ໄດ້ໃຫ້ຂໍ້ສັງເກດວ່າ: ການລົງນາມໃນບົດບັນທຶກຊ່ວຍຈຳ ແລະ ການກໍ່ສ້າງ, ຜັນຂະຫຍາຍແຜນການເຄື່ອນໄຫວລະຫວ່າງ ຫວຽດນາມ ແລະ UNESCO (ໄລຍະ 2021 – 2025), ກໍຄືບັນດາການເຄື່ອນໄຫວຮ່ວມມືຂອງ UNESCO ຢູ່ ຫວຽດນາມ ໄດ້ນຳມາເຊິ່ງປະສິດທິຜົນຕົວຈິງ, ປະກອບສ່ວນ ແລະ ຊ່ວຍສ້າງສຳເລັດບັນດານະໂຍບາຍການສຶກສາ, ວິທະຍາສາດ ແລະ ວັດທະນະທຳ, ຮັບໃຊ້ໃຫ້ແກ່ການພັດທະນາເສດຖະກິດ - ສັງຄົມຂອງປະເທດ.
ທ່ານຮອງລັດຖະມົນຕີໄດ້ແບ່ງປັນ ແລະ ຖືວ່າ: ໃນປີ 2024 ແລະ ຊຸມປີຕໍ່ໜ້າ, ຫວຽດນາມ ໃຫ້ຄຳໝັ້ນສັນຍາຈະສືບຕໍ່ເຂົ້າຮ່ວມຢ່າງຕັ້ງໜ້າ ແລະ ແທດຈິງໃນທຸກກົນໄກຂອງ UNESCO ທີ່ ຫວຽດນາມ ເຂົ້າເປັນສະມາຊິກ; ພ້ອມກັນນັ້ນ, ທ່ານຍັງໄດ້ສະແດງຄວາມປາດຖະໜາຢາກສືບຕໍ່ໄດ້ຮັບການສະໜັບສະໜູນ ແລະ ການຊ່ວຍເຫຼືອຈາກ UNESCO ໃນການຜັນຂະຫຍາຍຮອບດ້ານ 17 ເປົ້າໝາຍພັດທະນາແບບຍືນຍົງຂອງສະຫະປະຊາຊາດ, ໂດຍສະເພາະແມ່ນເປົ້າໝາຍ SDG-4 (ຄຸນນະພາບການສຶກສາ) ແລະ SDG 13 (ການເຄື່ອນໄຫວກ່ຽວກັບການປ່ຽນແປງຂອງດິນຟ້າອາກາດ) ແລະ 14 (ການປົກປັກຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມ) ກໍ່ຄືການປະຕິບັດຄໍາຫມັ້ນສັນຍາ COP-26.
ທ່ານ Jonathan Wallace Baker, ຫົວໜ້າຜູ້ຕາງໜ້າອົງການ UNESCO ປະຈຳ ຫວຽດນາມ ໄດ້ສະແດງຄວາມຂອບອົກຂອບໃຈຕໍ່ການຕ້ອນຮັບອັນສະໜິດສະໜົມ, ອົບອຸ່ນຂອງທ່ານຮອງລັດຖະມົນຕີ ແລະ ສົ່ງຄຳຂອບໃຈ, ຕີລາຄາສູງຕໍ່ທ່ານນາງ Audrey Azoulay, ຜູ້ອຳນວຍການໃຫຍ່ UNESCO ກ່ຽວກັບການປະກອບສ່ວນຢ່າງແທດຈິງ, ມີປະສິດທິຜົນຂອງ ຫວຽດນາມ ໃຫ້ສຳລັບ UNESCO ໃນບັນດາບັນຫາສຳຄັນຂອງອົງການໃນໄລຍະທີ່ຜ່ານມາ.
ທ່ານຢ້ຳຄືນຄຳເຫັນຂອງຜູ້ອຳນວຍການໃຫຍ່ທີ່ວ່າ: “ຫວຽດນາມ ແມ່ນຕົວແບບການຮ່ວມມືກັບ UNESCO ຢ່າງມີປະສິດທິຜົນ”.
ໂດຍວະແດງຄວາມຊົມເຊີຍ ຫວຽດນາມ ທີ່ໄດ້ຮັບການຈັດຕັ້ງ ແລະ ບັນດາປະເທດສະມາຊິກມີຄວາມເຊື່ອຖືເລືອກຕັ້ງເຂົ້າໃນບັນດາກົນໄກສຳຄັນຂອງ UNESCO ຄື: ສະມາຊິກສະພາບໍລິຫານ UNESCO ອາຍຸການ 2021-2025; ສະມາຊິກຄະນະກຳມະການລະຫວ່າງລັດຖະບານ ສົນທິສັນຍາກ່ຽວກັບການປົກປັກຮັກສາ ແລະ ສົ່ງເສີມຄວາມຫຼາກຫຼາຍຂອງການສະແດງອອກທາງວັດທະນະທຳ (ສົນທິສັນຍາປີ 2005) ອາຍຸການ 2021-2025; ສະມາຊິກຄະນະກຳມະການລະຫວ່າງລັດຖະບານກ່ຽວກັບການປົກປັກຮັກສາມໍລະດົກວັດທະນະທຳບໍ່ເປັນວັດຖຸ (ສົນທິສັນຍາປີ 2003) ອາຍຸການ 2022-2026; ສະມາຊິກສະພາທີ່ປຶກສາກ່ຽວກັບສວນສາທາລະນະທໍລະນີທົ່ວໂລກຂອງອົງການ UNESCO ອາຍຸການ 2020-2024; ສະມາຊິກຄະນະກຳມະການມໍລະດົກໂລກ ອາຍຸການ 2023-2027. ພ້ອມກັນນັ້ນ, ຫວຽດນາມ ກໍ່ໄດ້ ແລະ ພວມເສີມຂະຫຍາຍບົດບາດເປັນຮອງປະທານກອງປະຊຸມໃຫຍ່ UNESCO ຄັ້ງທີ 42, ຮອງປະທານຄະນະກຳມະການລະຫວ່າງລັດຖະບານສົນທິສັນຍາປີ 2005 ແລະ 2003, ປະກອບສ່ວນເຂົ້າໃນວຽກງານລວມຂອງອົງການ.
ທ່ານກໍສະແດງຄວາມປະທັບໃຈ ແລະ ຊົມເຊີຍຕໍ່ບັນດາຜົນງານທີ່ຫວຽດນາມ ບັນລຸໄດ້ໃນປີ 2023 ດ້ວຍ 4 ນາມມະຍົດ (ອ່າວຮ່າລອງ - ໝູ່ເກາະ ກາດບ່າ ໄດ້ຈົດທະບຽນເປັນມໍລະດົກໂລກ, 2 ນະຄອນ ດ່າລາດ ແລະ ໂຮ້ຍອານ ໄດ້ຮັບການຮັບຮອງເຂົ້າເປັນນະຄອນສ້າງສັນຂອງອົງການ UNESCO ແລະ UNESCO ໄດ້ອອກມະຕິກ່ຽວກັບການເຂົ້າຮ່ວມພິທີລຳລຶກ 300 ປີແຫ່ງວັນເສຍຊີວິດຂອງທ່ານໝໍ ຫາຍເຕື່ອງລ້ານອົງເລຫິວຈາກ, ພິເສດແມ່ນ ຫວຽດນາມ ໄດ້ຮັບຄວາມໄວ້ເນື້ອເຊື່ອໃຈ ແລະ ຖືກເລືອກຕັ້ງເຂົ້າເປັນສະມາຊິກຂອງຄະນະກຳມະການມໍລະດົກໂລກ ອາຍຸການ 2023 - 2027 ດ້ວຍຈໍານວນຄະແນນສຽງສູງຫຼາຍ.
ທ່ານຫົວໜ້າຜູ້ຕາງໜ້າ UNESCO ປະຈຳ ຫວຽດນາມ ໄດ້ຕີລາຄາສູງບັນດາຜົນງານເຊິ່ງ ຫວຽດນາມ ບັນລຸໄດ້ ແລະ ເນັ້ນໜັກເຖິງຮູບແບບການຮ່ວມມືຢ່າງມີປະສິດທິຜົນລະຫວ່າງອົງການຜູ້ຕາງໜ້າ UNESCO ປະຈຳ ຫວຽດນາມ ກັບຄະນະກຳມະການແຫ່ງຊາດ UNESCO ຫວຽດນາມ ແລະ ບັນດາກະຊວງ, ຂະແໜງການ, ທ້ອງຖິ່ນໃນການຜັນຂະຫຍາຍບັນດາການເຄື່ອນໄຫວວິຊາສະເພາະຂອງ UNESCO ຢູ່ ຫວຽດນາມ.
ພ້ອມກັນນັ້ນ, ທ່ານກໍ່ຍັງເນັ້ນໜັກເຖິງການຮ່ວມມື ແລະ ບົດບາດຂອງຫວຽດນາມ ແມ່ນໜຶ່ງໃນບັນດາປະເທດນຳໜ້າໃນການກໍ່ສ້າງ ແລະ ຕັ້ງໜ້າຜັນຂະຫຍາຍທັງໝົດ 17 ເປົ້າໝາຍພັດທະນາແບບຍືນຍົງຂອງສະຫະປະຊາຊາດ ແລະ ເຂົ້າຮ່ວມຢ່າງຕັ້ງໜ້າໃນບັນດາຂໍ້ລິເລີ່ມທົ່ວໂລກ, ມີຂໍ້ລິເລີ່ມຫຼາຍຂໍ້ ແລະ ການປະກອບສ່ວນສຳຄັນເຂົ້າໃນບັນດາຄວາມມານະພະຍາຍາມຂອງສາກົນເພື່ອປົກປັກຮັກສາສັນຕິພາບ, ຄວາມໝັ້ນຄົງສາກົນ, ການຮັບມືການປ່ຽນແປງຂອງດິນຟ້າອາກາດ, ຮັບປະກັນສິດທິມະນຸດ...
ທ່ານ Jonathan Wallace Baker ຢືນຢັນຈະສືບຕໍ່ສະໜັບສະໜູນບັນດາຄວາມມານະພະຍາຍາມຂອງ ຫວຽດນາມ ໃນການຜັນຂະຫຍາຍບັນດາເປົ້າໝາຍພັດທະນາແບບຍືນຍົງຂອງສະຫະປະຊາຊາດ, ພິເສດແມ່ນຂໍ້ລິເລີ່ມຂອງ ຫວຽດນາມ ໃນບັນດາການເຄື່ອນໄຫວວິຊາສະເພາະຕາມສິດອຳນາດຂອງ UNESCO. ພ້ອມກັນນັ້ນ, ພວກເຮົາກໍ່ໃຫ້ຄຳໝັ້ນສັນຍາຈະສົມທົບກັນຢ່າງແໜ້ນແຟ້ນກັບຄະນະກຳມະການແຫ່ງຊາດ UNESCO ຫວຽດນາມ ແລະ ບັນດາກະຊວງ, ຂະແໜງການ ແລະ ທ້ອງຖິ່ນຂອງຫວຽດນາມ ໃນບັນດາການເຄື່ອນໄຫວປົກປັກຮັກສາ ແລະ ເຊີດຊູບັນດາຄຸນຄ່າມໍລະດົກ, ການພັດທະນາແບບຍືນຍົງຂອງເຂດສະຫງວນຊີວະພາບ, ສວນສາທາລະນະທໍລະນີສາດທົ່ວໂລກຢູ່ ຫວຽດນາມ ໃນໄລຍະຈະມາເຖິງ.
ມິງດຶກ
