ວັນທີ 19 ທັນວາ, ຕາມຂໍ້ມູນຈາກກອງບັນຊາການທະຫານຊາຍແດນແຂວງ ກອນຕູມ ໃຫ້ຮູ້ວ່າ ທາງກົມກອງໄດ້ຈັດຕັ້ງພິທີມອບ-ຮັບໂຄງການກໍ່ສ້າງຫໍວັດທະນະທໍາມິດຕະພາບ ຫວຽດນາມ-ລາວ-ກຳປູເຈຍ ໃຫ້ແກ່ຄະນະກໍາມະການປະຊາຊົນຕາແສງ ເບີ່ອີ (ເມືອງ ງອກໂຮ່ຍ, ແຂວງ ກອນຕູມ) ຄຸ້ມຄອງ ແລະນຳໃຊ້ຕາມສັບພະຄຸນ ແລະຮີດຄອງປະເພນີຂອງທ້ອງຖິ່ນ.
 |
| ຜູ້ຕາງໜ້າກອງບັນຊາການທະຫານຊາຍແດນແຂວງກອນຕູມ ມອບໂຄງການກໍ່ສ້າງຫໍວັດທະນະທໍາມິດຕະພາບ ໃຫ້ແກ່ການນໍາຄະນະກໍາມະການປະຊາຊົນຕາແສງ ເບີ່ອີ. ພາບ: qdnd.vn |
ໂຄງການດັ່ງກ່າວແມ່ນຂອງຂວັນຈາກກະຊວງປ້ອງກັນປະເທດຫວຽດນາມ ເນື່ອງໃນໂອກາດການພົບປະແລກປ່ຽນມິດຕະພາບປ້ອງກັນຊາດຢູ່ເຂດຊາຍແດນ ຫວຽດນາມ - ລາວ - ກໍາປູເຈຍ ຄັ້ງທຳອິດ; ກອງບັນຊາການທະຫານຊາຍແດນແຂວງກອນຕູມ ເປັນເຈົ້າຂອງໂຄງການ.
ໂຄງການກໍ່ສ້າງຫໍວັດທະນະທຳມິດຕະພາບ ຫວຽດນາມ - ລາວ - ກໍາປູເຈຍ ໄດ້ຮັບການກໍ່ສ້າງຢູ່ບໍລິເວນບ້ານ ຕາກາ, ຕາແສງ ເບີ່ອີ, ເມືອງ ງອກໂຮ່ຍ ດ້ວຍມູນຄ່າການກໍ່ສ້າງທັງໝົດ 20 ຕື້ດົ່ງ. ໂຄງການນີ້ມີເນື້ອທີ່ທັງໝົດ 2.440 ຕາແມັດ, ໃນນັ້ນ ເນື້ອທີ່ກໍ່ສ້າງແມ່ນ 1.000 ກວ່າຕາແມັດ, ລວມມີ 8 ກິດຈະກໍາຍ່ອຍ ແລະໄດ້ອອກແບບກໍ່ສ້າງຕາມສະຖາປັດຕະຍະກຳ ເຮືອນຣົງ (ເຮືອນມູນເຊື້ອ) ຂອງຊາວເຜົ່າສ່ວນໜ້ອຍ ຢູ່ແຂວງກອນຕູມ.
ເມື່ອຫໍວັດທະນະທຳໄດ້ນຳເຂົ້ານຳໃຊ້ ກໍ່ຈະປະກອບສ່ວນຍົກສູງຄຸນນະພາບການເຄື່ອນໄຫວວັດທະນະທຳທາງດ້ານຈິດໃຈ ໃຫ້ແກ່ປະຊາຊົນທ້ອງຖິ່ນ ແລະ ການພົບປະແລກປ່ຽນມິດຕະພາບລະຫວ່າງອຳນາດການປົກຄອງ ແລະ ປະຊາຊົນຢູ່ເຂດຊາຍແດນ 3 ປະເທດ; ແມ່ນສັນຍາລັກແຫ່ງຄວາມສາມັກຄີ, ມິດຕະພາບ ແລະ ການຮ່ວມມືລະຫວ່າງກອງທັບ ແລະ ປະຊາຊົນ 3 ປະເທດ ຫວຽດນາມ - ລາວ - ກຳປູເຈຍ.
ບູນມີ
