ຂໍ້ມູນຈາກສະຖານທູດເຢຍລະມັນ ປະຈຳຫວຽດນາມ ໃຫ້ຮູ້ວ່າ ການເຈລະຈາລະຫວ່າງລັດຖະບານເຢຍລະມັນ - ຫວຽດນາມ ກ່ຽວກັບການຮ່ວມມືພັດທະນາ ໄດ້ດຳເນີນໄປແຕ່ວັນທີ 7-9 ພະຈິກ ຢູ່ນະຄອນ Bonn (ເຢຍລະມັນ). ສອງປະເທດໄດ້ຢືນຢັນຄືນໃໝ່ເຖິງຄວາມປາດຖະໜາຢາກສືບຕໍ່ຮ່ວມມືພັດທະນາຢ່າງເລິກເຊິ່ງກວ້າງຂວາງ.
ຈຸດສຸມຂອງການຮ່ວມມືແມ່ນຂົງເຂດທີ່ຕ່າງຝ່າຍຕ່າງມີຄວາມສົນໃຈເປັນພິເສດ ຫຼືເພື່ອແນໃສ່ຮັກສາແຫຼ່ງຊັບພະຍາກອນລວມທົ່ວໂລກ. ໃນອະນາຄົດ, ເຢຍລະມັນ ແລະຫວຽດນາມ ໄດ້ເຫັນດີເປັນເອກະພາບສຸມໃສ່ຂົງເຂດຮ່ວມມືຄື: ປົກປັກຮັກສາປ່າ, ພະລັງງານ ແລະບຳລຸງສ້າງວິຊາຊີບ. ລັດຖະບານເຢຍລະມັນ ຈະສະໜອງທຶນຈຳນວນ 61 ລ້ານເອີໂຣ ໃຫ້ຂົງເຂດເຫຼົ່ານີ້ໃນໄລຍະ 2024-2025.
ຝ່າຍເຢຍລະມັນ ໄດ້ເນັ້ນໜັກເປັນພິເສດເຖິງບົດບາດນຳໜ້າ ແລະຄວາມມານະພະຍາຍາມຂອງຝ່າຍຫວຽດນາມ ໃນການຫັນບັນດາໂຄງການດໍາເນີນງານ ແລະເປົ້າໝາຍສາກົນໃຫ້ປະກົດຜົນເປັນຈິງ ຄື: ເປົ້າໝາຍກ່ຽວກັບດິນຟ້າອາກາດ ແລະໂຄງການດໍາເນີນງານທົ່ວໂລກກ່ຽວກັບການພັດທະນາ.
 |
| ບັນດາຜູ້ແທນເຂົ້າຮ່ວມການເຈລະຈາ. qdnd.vn |
ນອກຈາກການປຶກສາຫາລືດ້ານວິຊາສະເພາະກ່ຽວກັບຈຸດສຸມໃນອະນາຄົດແລ້ວ, ສອງຝ່າຍຍັງໄດ້ແລກປ່ຽນທັດສະນະກ່ຽວກັບບັນຫາດ້ານການເມືອງ ແລະວິກິດການສາກົນໃນປະຈຸບັນ ກໍ່ຄືເງື່ອນໄຂຂອບເຂດການຮ່ວມມືກັບຝ່າຍ ຫວຽດນາມ. ຄະນະຜູ້ແທນເຢຍລະມັນ ໄດ້ເນັ້ນໜັກເຖິງຄວາມປາດຖະໜາຢາກຊຸກຍູ້ ແລະປະສົບຜົນສຳເລັດໃນການພົວພັນຄູ່ຮ່ວມມືຫັນປ່ຽນພະລັງງານຢ່າງຍຸຕິທໍາ ທີ່ໄດ້ຮັບການຜັນຂະຫຍາຍ. ເຖິງຢ່າງໃດກໍ່ຕາມ, ຕາມທັດສະນະຂອງຝ່າຍເຢຍລະມັນແລ້ວ, ສິ່ງສໍາຄັນແມ່ນເງື່ອນໄຂຂອງກອບນິຕິກໍາທີ່ກ່ຽວຂ້ອງເຖິງການສະໜອງການໜູນຊ່ວຍດ້ານການເງິນ ຕ້ອງໄດ້ຮັບການປັບປຸງ.
ທີ່ພິທີລົງນາມໃນບົດບັນທຶກກອງປະຊຸມ, ທ່ານນາງ Gisela Hammerschmidt, ຮອງຫົວໜ້າກົມອາຊີ, ຂ້າຫຼວງໃຫຍ່ຮັບຜິດຊອບພາກພື້ນອາຊີ ຂອງກະຊວງການຮ່ວມມືດ້ານເສດຖະກິດ ແລະພັດທະນາ ເຢຍລະມັນ (BMZ) ອີກຄັ້ງໜຶ່ງໄດ້ເນັ້ນໜັກເຖິງຜົນສຳເລັດຂອງການເຈລະຈາ ແລະຖືວ່າ ສິ່ງດັ່ງກ່າວນີ້ໄດ້ສະແດງໃຫ້ເຫັນສາຍພົວພັນສອງຝ່າຍທີ່ຮອບດ້ານ ແລະມີຄວາມໄວ້ເນື້ອເຊື່ອໃຈລະຫວ່າງສອງປະເທດ.
ບູນມີ
