| 50 ປີແຫ່ງການພົວພັນທາງການທູດລະຫວ່າງ ຫວຽດນາມ ແລະ ຍີ່ປຸ່ນ: ມຸ່ງໄປເຖິງອະນາຄົດ, ຕົວຂຶ້ນອອກສູ່ໂລກ | |
| ການສົນທະນາ''ສ້າງພື້ນຖານການທູດ ຫວຽດນາມ ນຳໜ້າ, ຮອບດ້ານ, ທັນສະໄໝ, ຮັບໃຊ້ປະເທດຊາດ'' |
ສີສັນ “ການທູດແບບຕົ້ນໄມ້ໄຜ່”: ເປີດສະຖານະການໃໝ່ເພື່ອສ້າງສາ, ປົກປັກຮັກສາ ແລະ ພັດທະນາປະເທດ ຫວຽດນາມ
ຄະນະຝ່າຍການທູດ “ຕົ້ນໄມ້ໄຜ່ ຫວຽດນາມ” ແມ່ນແນວທາງການຕ່າງປະເທດທີ່ອ່ອນໂຍນ, ຄ່ອງແຄ້ວ ແຕ່ບໍ່ອ່ອນແອ, ຢຶດໝັ້ນຕາມແບບ “ຕອກອ່ອນມັດແໜ້ນ”; ເດັດດ່ຽວ, ຂ້ຽວຂາດແຕ່ບໍ່ແຂງກະດ້າງ; ເປັນໜຶ່ງແນວທາງການທູດທີ່ບໍ່ພຽງແຕ່ຖືກຕ້ອງ ແລະ ສະຫຼາດສ່ອງໃສເທົ່ານັ້ນ, ແຕ່ຍັງມີລັກສະນະທີ່ເຂັ້ມຂຸ້ນໄປດ້ວຍສີສັນຂອງຫວຽດນາມ.
 |
| ປະທານສະມາຄົມມິດຕະພາບ ລາວ-ຫວຽດນາມ, ທ່ານ ບໍ່ວຽງຄຳ ວົງດາລາ. (ພາບ: ຟ້າມກຽນ/VNA ທີ່ ລາວ) |
ນັ້ນແມ່ນຂໍ້ສັງເກດຂອງ ປະທານສະມາຄົມມິດຕະພາບ ລາວ-ຫວຽດນາມ, ລັດຖະມົນຕີກະຊວງເຕັກໂນໂລຊີ ແລະ ການສື່ສານລາວ, ທ່ານ ບັນດິດ.ສຈ.ປອ. ບໍ່ວຽງຄຳ ວົງດາລາ ໃຫ້ສຳພາດຕໍ່ນັກຂ່າວ ຢູ່ນະຄອນຫຼວງວຽງຈັນ.
ໂດຍຕີລາຄາກ່ຽວກັບແນວຄິດທິດສະດີ , ທັດສະນະ ແລະ ແນວທາງການຕ່າງປະເທດຂອງ ຫວຽດນາມ ນັບແຕ່ສ້າງຕັ້ງປະເທດຫວຽດນາມ ປະຊາທິປະໄຕ ສາທາລະນະລັດ ມາຮອດປະຈຸບັນ, ທ່ານ ບໍ່ວຽງຄຳ ວົງດາລາ ໄດ້ເນັ້ນໜັກເຖິງແນວທາງການຕ່າງປະເທດ ແລະ ການທູດຂອງ ຫວຽດນາມ ແມ່ນໄດ້ປະຕິບັດຕາມແນວຄິດ ແລະ ອຸດົມຄະຕິອັນສູງສົ່ງຂອງປະທານ ໂຮ່ຈີມິນ, ລັດຖະມົນຕີການຕ່າງປະເທດຜູ້ທຳອິດຂອງ ປະເທດຫວຽດນາມ ປະຊາທິປະໄຕ ສາທາລະນະລັດ ບົນຫຼັກການ “ເອົາສິ່ງທີ່ບໍ່ປ່ຽນແປງ ດັດປັບທຸກການປ່ຽນແປງ”.
ທ່ານ ບໍ່ວຽງຄຳ ໃຫ້ຮູ້ວ່າ: ຂ້າພະເຈົ້າເຫັນວ່າ ນັບແຕ່ ປະເທດຫວຽດນາມ ປະຊາທິປະໄຕ ສາທາລະນະລັດ ໄດ້ຮັບການສ້າງຕັ້ງມາຮອດປະຈຸບັນ, ພັກ ແລະ ລັດ ຫວຽດນາມ ຍາມໃດກໍ່ຍຶດໝັ້ນໃນແນວທາງການທູດທີ່ກ່າວມາຂ້າງເທິງ, ບໍ່ພຽງແຕ່ຊ່ວຍພາປະເທດຫວຽດນາມ ໃຫ້ຫຼຸດພົ້ນຈາກສະພາບການຖືກປິດລ້ອມທາງດ້ານເສດຖະກິດ, ການເມືອງ, ຊ່ວຍໃຫ້ຫວຽດນາມ ກາຍເປັນເພື່ອນມິດກັບບັນດາປະເທດໃນໂລກ, ແຕ່ຍັງເປີດກວ້າງສະພາບການໃໝ່ໃຫ້ແກ່ພາລະກິດແຫ່ງການປ່ຽນແປງໃໝ່, ເຊື່ອມໂຍງ, ສ້າງສາ, ປົກປັກຮັກສາ ແລະ ພັດທະນາປະເທດຫວຽດນາມ”.
ທ່ານ ສຈ.ປອ ບໍ່ວຽງຄຳ ວົງດາລາ ໃຫ້ຮູ້ວ່າ: ຕັ້ງແຕ່ສະໄໝກ່ອນ, ພາບຂອງຕົ້ນໄມ້ໄຜ່ທີ່ອ່ອນໂຍນ, ຈ່ອຍ ແຕ່ມີຄວາມຍືດຫຍຸ່ນ ແລະ ແຂງແກ່ນທີ່ສຸດ ໄດ້ກາຍເປັນທີ່ຄຸ້ນເຄີຍ ແລະ ຕິດພັນກັບຊີວິດການເປັນຢູ່ຂອງຊາວ ຫວຽດນາມ ທຸກຄົນ. ຖ້າໄປເຖິງເຂດຊົນນະບົດຂອງຫວຽດນາມ, ຢູ່ໃສກໍ່ຈະເຫັນຕົ້ນໄມ້ໄຜ່ປູກເປັນຈຳນວນຫຼາຍ, ປູກຢູ່ອ້ອມເຮືອນ, ຕາມຖະໜົນຫົນທາງ, ອ້ອມບ້ານ. ໄມ້ໄຜ່ບໍ່ພຽງແຕ່ເອົາໜໍ່ໄມ້ມາເປັນອາຫານ, ເປັນວັດສະດຸປຸກສ້າງເຮືອນ, ເຮັດເປັນເຄື່ອງມື ແລະ ເຄື່ອງໃຊ້ປະຈຳວັນເທົ່ານັ້ນ, ຫາກຍັງເຮັດໜ້າທີ່ເປັນທາງຍ່າງເພື່ອປ້ອງກັນໝູ່ບ້ານຈາກພະຍຸລົມແຮງ ແລະ ຜູ້ເຂົ້າມາຮຸກຮານອີກດ້ວຍ.
ຕາມທ່ານປະທານສະມາຄົມມິດຕະພາບ ລາວ-ຫວຽດນາມແລ້ວ, ກຸ່ມ “ການທູດແບບຕົ້ນໄມ້ໄຜ່” ໄດ້ສະແດງໃຫ້ເຫັນມາດຖານວ່າ ອັນໃດເປັນຫຼັກການ ແມ່ນບໍ່ສາມາດປ່ຽນແປງໄດ້, ສ່ວນອັນໃດທີ່ເປັນຍຸດທະສາດ ແມ່ນສາມາດປ່ຽນແປງໄດ້ຢ່າງມີໄຫວພິບ. ຫຼັກການຢູ່ທີ່ນີ້ ອາດຈະເຂົ້າໃຈໄດ້ຄື ຮາກໄມ້ໄຜ່, ບໍ່ວ່າຈະເປັນແນວໃດກໍ່ຕາມ ແຕ່ຍັງໝັ້ນຄົງຢູ່ກັບທີ່ສະເໝີ, ລຳຕົ້ນແຂງແຮງ ແລະ ອອ່ນໂຍນ, ສ່ວນປາຍ ແລະ ກິ່ງໃບໄມ້ໄຜ່ ແມ່ນຄືກັນກັບຍຸດທະສາດ, ສາມາດຢືດຢຸ່ນໄດ້ ແລະ ປ່ຽນແປງໄດ້ຢ່າງມີໄຫວພິບ.
ທ່ານ ບໍ່ວຽງຄຳ ວົງດາລາ ກ່າວວ່າ: ໃນໄລຍະທີ່ຕົນເຮັດວຽກຢູ່ຫ້ອງວ່າການລັດຖະບານ; ເປັນລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ຫຼື ກະຊວງເຕັກໂນໂລຊີ ແລະ ສື່ສານ ໃນປະຈຸບັນ, ທ່ານໄດ້ພ້ອມດ້ວຍຄະນະມາຢ້ຽມຢາມ ແລະ ເຮັດວຽກຢູ່ ຫວຽດນາມ ຫຼາຍຄັ້ງ ແລະ ມີໂອກາດໄດ້ພົບປະກັບ ທ່ານເລຂາທິການໃຫຍ່ ຫງວຽນຟຸຈ້ອງ. ທ່ານໄດ້ຈື່ຄໍາເວົ້າຂອງ ທ່ານເລຂາທິການໃຫຍ່ ຫງວຽນຟູ໋ຈ້ອງ ວ່າ : ຢາກພັດທະນາ, ສິ່ງສຳຄັນແມນ່ຕ້ອງຊອກໄດ້ທິດທາງຍຸດທະສາດທີ່ຖືກຕ້ອງ, ເມື່ອມີຍຸດທະສາດທີ່ຖືກຕ້ອງແລ້ວ ຕ້ອງຄັດເລືອກເອົາຜູ້ທີ່ເໝາະສົມເພື່ອຜັນຂະຫຍາຍຍຸດທະສາດນັ້ນ. ທ່ານປະທານສະມາຄົມມິດຕະພາບ ລາວ-ຫວຽດນາມ ກໍ່ມີຄວາມປະທັບໃຈຫຼາຍຕໍ່ຮູບແບບນະໂຍບາຍການຕ່າງປະເທດຂອງ ທ່ານເລຂາທິການໃຫຍ່ ຫງວຽນຟູ໋ຈ້ອງ, ເຊິ່ງຕາມແບບທີ່ທ່ານເວົ້າ ແມ່ນມີຄວາມຄ່ອງແຄ້ວ, ມີໄຫວພິບ ແຕ່ກໍ່ມີຄວາມເດັດດ່ຽວ ແລະ ເປັນຫຼັກການທີ່ສຸດ.
ຕາມທ່ານ ບໍວຽງຄໍາ ແລ້ວ, ສິ່ງໜຶ່ງທີ່ໄດ້ຮັບຮູ້ໄດ້ຈາກການພົບປະເປັນຫຼາຍຄັ້ງນັ້ນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ມີຄວາມເອົາໃຈໃສ່ເປັນພິເສດເຖິງການພົວພັນຮ່ວມມື ລາວ-ຫວຽດນາມ; ພາມໃດກໍ່ສົນໃຈເຖິວປະເທດລາວ ແລະ ຢາກໃຫ້ປະເທດລາວພັດທະນາ. ທ່ານເລຂາທິການໃຫຍ່ ຫງວຽນຟູ໋ຈ້ອງ ກໍ່ມີຄວາມເອົາໃຈໃສ່ເຖິງຮຸ່ນໜຸ່ມ, ຍາມໃດກໍ່ຕັກເຕືອນ ຕ້ອງສຶກສາໃຫ້ຄົນຮຸ່ນໜຸ່ມ ກ່ຽວກັບສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ - ຫວຽດນາມ, ສືບຕໍ່ຮັກສາ ແລະ ເພີ່ມພູນຄູນສ້າງສາຍພົວພັນນີ້ໃຫ້ຍືນຍົງຄົງຕົວຊົ່ວກາລະນານ.
ອານຸໄຊ ສະຫວັດ
