ໂຮງຮຽນ ມສ ຫງວຽນຢູ ສອງພາສາລາວ-ຫວຽດນາມ ເປີດສົກຮຽນໃໝ່

	ມອບເງິນຊ່ວຍເຫຼືອຄູອາຈານໂຮງຮຽນສອງພາສາລາວ-ຫວຽດນາມ ຫງວຽນຢູ
	ປະທານຄະນະກໍາມະການສູນກາງແນວໂຮມປະເທດຊາດຫວຽດນາມ ໂດ້ວັນຈຽນ ຢ້ຽມຢາມໂຮງຮຽນສອງພາສາລາວ-ຫວຽດນາມ ຫງວຽນຢູ

ຕອນເຊົ້າວັນທີ 6 ກັນຍາ, ຄູອາຈານ ແລະນັກຮຽນຂອງໂຮງຮຽນສອງພາສາ ລາວ-ຫວຽດ ຫງວຽນຢູ ຢູ່ນະຄອນຫຼວງວຽງຈັນ, ປະເທດລາວ ໄດ້ຈັດພິທີເປີດສົກຮຽນໃໝ່ 2023-2024.

ກ່າວຄຳເຫັນທີ່ພິທີ, ສະຫາຍນາງ ສີວັນເຮືອງ ເພັງຄໍາໄມ ຜູ້ອໍານວຍການໂຮງຮຽນສອງພາສາ ລາວ-ຫວຽດນາມ ຫງວຽນຢູ ໃຫ້ຮູ້ວ່າ ໃນສົກຮຽນ 2022-2023 ຜ່ານມາ, ເຖິງວ່າຈະປະສົບກັບຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງກໍ່ຕາມ, ແຕ່ການເຄື່ອນໄຫວດ້ານການສຶກສາ ກໍ່ຄືການເຄື່ອນໄຫວອື່ນ ໆຂອງໂຮງຮຽນບັນລຸໄດ້ຮັບຜົນງານທີ່ເປັນໜ້າສົ່ງເສີມ.

ສະຫາຍນາງ ສີວັນເຮືອງ ເພັງຄໍາໄມ ຢັງຢືນວ່າ, ໃນສົກຮຽນໃໝ່, ພະນັກງານ, ຄູອາຈານ ແລະນັກຮຽນຂອງໂຮງຮຽນ ຈະມານະພະຍາຍາມໃຫ້ຫຼາຍກວ່າອີກ ເພື່ອໃຫ້ໂຮງຮຽນສອງພາສາລາວ-ຫວຽດນາມ ຫງວຽນຢູ ກາຍເປັນໂຮງຮຽນທີ່ມີຄວາມໄວ້ເນື້ອເຊື່ອໃຈ, ເປັນບ່ອນບຳລຸງກໍ່ສ້າງ ແລະເພີ່ມພູນຄູນສ້າງ ໃຫ້ແກ່ນໍ້າໃຈສາມັກຄີແບບພິເສດຫວຽດນາມ - ລາວ.

ໃນພິທີ, ໂຮງຮຽນໄດ້ມອບໃບຍ້ອງຍໍ ແລະລາງວັນໃຫ້ແກ່ຄູອາຈານ ແລະນັກຮຽນທີ່ບັນລຸໄດ້ຜົນງານດີເດັ່ນໃນການຮຽນ-ການສອນ ໃນສົກຮຽນຜ່ານມາ ແລະມອບໃບປະກາສະນີຍະບັດໃຫ້ແກ່ນັກຮຽນທີ່ຮຽນຈົບ.

ເນື່ອງໃນໂອກາດນີ້, ສະຫາຍນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດຫວຽດນາມ, ຫົວໜ້າຄະນະກໍາມະການກ່ຽວກັບຊາວຫວຽດນາມ ອາໄສຢູ່ຕ່າງປະເທດ ໄດ້ມອບເງິນຈໍານວນ 24 ລ້ານດົ່ງ ພ້ອມກັບປຶ້ມ ແລະ ອຸປະກອນການຮຽນໃຫ້ແກ່ພວກນ້ອງນັກຮຽນ.

ໃນຂອບເຂດເຫດການດັ່ງກ່າວ, ສະຫາຍ ຟານມິງຈ໊ຽນ ທີ່ປຶກສາສະຖານທູດຫວຽດນາມ ປະຈຳລາວ ໄດ້ປຸກລະດົມສັບປະດາເຊີດຊູພາສາຫວຽດ ໃນປະຊາຄົມຊາວຫວຽດນາມ ອາໄສຢູ່ລາວ; ມອບລາງວັນ, ໃບຍ້ອງຍໍໃຫ້ແກ່ຊາວຫວຽດນາມອາໄສຢູ່ຕ່າງປະເທດ ທີ່ໄດ້ເຂົ້າຮ່ວມການສອບເສັງ, ຄົ້ນຫາທູດພາສາຫວຽດ 2023 ໂດຍກະຊວງການຕ່າງປະເທດຫວຽດນາມ ຈັດຕັ້ງ.

ເນື່ອງໃນໂອກາດນີ້, ສະຫາຍນາງ ກ່ຽວທິຮັ່ງຟຸກ ຫົວໜ້າກົງສູນໃຫຍ່ຫວຽດນາມ ປະຈໍາ ແຂວງຫຼວງພະບາງ ໄດ້ມອບປື້ມຂຽນ 600 ຫົວ, ມອບຂອງຂວັນຂອງກະຊວງປ້ອງກັນປະເທດຫວຽດນາມ ແລະສະຖານກົງສູນໃຫຍ່ ໃຫ້ພວກນ້ອງນັກຮຽນທີ່ແມ່ນລູກຫຼານ ໃນປະຊາຄົມຊາວຫວຽດນາມ ແລະຊາວລາວຢູ່ແຂວງ ທີ່ປະສົບກັບຄວາມຫຍຸ້ງຍາກ ເນື່ອງໃນໂອກາດເປີດສົກຮຽນໃໝ່.