ກ່າວຄຳເຫັນທີ່ພິທີອັດ, ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ໄດ້ເນັ້ນໜັກວ່າ ໃນກອງປະຊຸມສະໄໝສາມັນເທື່ອທີ 5 ນີ້ ໄດ້ປຶກສາຫາລື ແລະ ຮັບຮອງເອົາແຜນການພັດທະນາເສດຖະກິດ - ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ 6 ເດືອນຕົ້ນປີ ກໍຄື ແຜນການ 6 ເດືອນທ້າຍປີ 2023. ທ່ານປະທານສະພາແຫ່ງຊາດ ກໍຕີລາຄາສູງຕໍ່ເລື່ອງ ລັດຖະບານລາວ ຮັບຮອງເອົາຫຼາຍມາດຕະການບໍລິຫານ, ປະຕິບັດແຜນການພັດທະນາເສດຖະກິດ - ສັງຄົມ ຊ່ວຍໃຫ້ພື້ນຖານເສດຖະກິດບັນລຸໄດ້ລະດັບການເຕີບໂຕ 4,8% ໃນ 6 ເດືອນຕົ້ນປີ 2023, ຊຸກຍູ້ການຜະລິດ ເພື່ອແນໃສ່ຮັບໃຊ້ການບໍລິໂພກພາຍໃນປະເທດ ແລະ ສົ່ງອອກ, ເພີ່ມການເກັບງົບປະມານ.
 |
| ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດລາວ ຊຸດທີ IX ອັດລົງ ໃນຕອນບ່າຍວັນທີ 18 ກໍລະກົດ (ພາບ:Lao News Agency) |
ໃນກອງປະຊຸມ, ບັນດາຜູ້ແທນສະພາແຫ່ງຊາດ ໄດ້ສະເໜີໃຫ້ລັດຖະບານລາວ ເພີ່ມທະວີການແກ້ໄຂບັນຫາຕ່າງໆ ເຊັ່ນ: ໄພເງິນເຟີ້, ອັດຕາແລກປ່ຽນເງິນຕາທີ່ຜັນແປ ແລະ ລາຄາຄ່າຄອງຊີບທີ່ເພີ່ມຂຶ້ນ ເຊິ່ງສົ່ງຜົນກະທົບເຖິງຊີວິດການເປັນຢູ່ຂອງປະຊາຊົນໂດຍກົງ. ບັນດານັກນິຕິບັນຍັດໃຫ້ຂໍ້ສັງເກດວ່າ ຍ້ອນມີຄວາມຂ້ຽວຂາດ ແລະ ບຸກບືນຂອງລັດຖະບານລາວ, ວຽກງານການປະຕິບັດສອງໂຄງການດຳເນີນງານແຫ່ງຊາດກ່ຽວກັບແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ຈິ່ງໄດ້ຮັບໝາກຜົນຫຼາຍດ້ານ.
ຕາມສຳນັກຂ່າວສານຫວຽດນາມ, ກອງປະຊຸມໄດ້ພິຈາລະນາ ແລະ ຮັບຮອງເອົາຍຸດທະສາດກ່ຽວກັບການພັດທະນາແຮ່ທາດຮອດປີ 2030 ແລະ ວິໄສທັດຮອດປີ 2040, ຍຸດທະສາດແຫ່ງຊາດກ່ຽວກັບການຄຸ້ມຄອງນ້ຳ ແລະ ຊັບພະຍາກອນນ້ຳຮອດປີ 2030, ຍຸດທະສາດໜູນຊ່ວຍສັງຄົມ. ກອງປະຊຸມຍັງໄດ້ພິຈາລະນາ ແລະ ຮັບຮອງເອົາກົດໝາຍໃໝ່ 4 ສະບັບກ່ຽວກັບສາທາລະນະສຸກ, ວຽກເຮັດງານທຳ, ອາກອນທີ່ດິນ, ຊາວໜຸ່ມ ແລະ ປັບປຸງ 6 ກົດໝາຍກ່ຽວກັບທະນາຄານການຄ້າ, ສິນໃນນ້ຳ, ປົກປັກຮັກສາສັດປ່າ, ການພິມຈຳໜ່າຍ, ການປົກປັກຮັກສາສິດຜົນປະໂຫຍດຂອງເດັກ ແລະ ສານທະຫານ.
ດີງເລື້ອງ
