 |
| ທ່ານປະທານປະເທດຫວຽດນາມ ພົບປະກັບ ບັນດາວິສາຫະກິດ ຫວຽດນາມ ທີ່ດຳເນີນທຸລະກິດຢູ່ ລາວ (ພາບ: TTXVN) |
ຕອນບ່າຍວັນທີ 11 ເມສາ, ທ່ານປະທານປະເທດ ຫວຽດນາມ ຫວໍວັນເຖືອງ ໄດ້ມີການໂອ້ລົມເຈລະຈາກັບຜູ້ຕາງໜ້າວິສາຫະກິດ, ປະຊາຄົມຊາວຫວຽດນາມ ທີ່ດຳລົງຊີວິດ ແລະ ເຮັດວຽກຢູ່ ລາວ ໃນໄລຍະທີ່ທ່ານມາຢ້ຽມຢາມປະເທດລາວ ຢ່າງເປັນທາງການ.
ທ່ານປະທານປະເທດ ໄດ້ຕີລາຄາສູງນ້ຳໃຈຮັກຊາດ ແລະ ການປະກອບສ່ວນຂອງຊາວຫວຽດນາມ ທີ່ອາໄສຢູ່ຕ່າງປະເທດ ແລະ ປະຊາຄົມວິສາຫະກິດ ໃນການສ້າງສາປະເທດຊາດ ແລະ ການພົວພັນລະຫວ່າງ 2 ປະເທດ. ທ່ານສະແດງຄວາມປາດຖະໜາວ່າ ປະຊາຄົມວິສາຫະກິດຫວຽດນາມ ຢູ່ລາວ ຈະມານະພະຍາຍາມກວ່າອີກ ເພື່ອຜ່ານຜ່າຄວາມຫຍຸ້ງຍາກ, ມຸ່ງໄປເຖິງການດຳເນີນທຸລະກິດແບບຍືນຍົງ ແລະ ຍາວນານ, ປະຕິບັດຕາມນະໂຍບາຍການຮ່ວມມືດ້ານເສດຖະກິດ ແລະ ການລົງທຶນລະຫວ່າງສອງປະເທດ.
ທ່ານປະທານປະເທດ ຫວໍວັນເຖືອງ ຢືນຢັນວ່າ ຍາມໃດລັດຖະບານ ກໍ່ຈະເອົາໃຈໃສ່ ແລະ ຊຸກຍູ້ການພົວພັນຮ່ວມມືດ້ານທຸລະກິດລະຫວ່າງ 2 ປະເທດ, ແກ້ໄຂຄວາມຫຍຸ້ງຍາກໃຫ້ບັນດາຊາວຫວຽດນາມ ທີ່ອາໄສຢູ່ລາວ, ວິສາຫະກິດ ຫວຽດນາມ ຜ່ານການພົບປະ ແລະ ເຮັດວຽກກັບການນຳລາວຢ່າງທັນການ.
ສ່ວນຜູ້ຕາງໜ້າບັນດາວິສາຫະກິດ ຫວຽດນາມ ປະຈຳ ລາວ ມີຂໍ້ສະເໜີແນະຢາກໃຫ້ມີບັນດາມາດຕະການໜູນຊ່ວຍການລົງທຶນຕື່ມອີກ, ພິເສດແມ່ນດ້ານທຶນຮອນ ເພື່ອຍົກສູງກຳລັງຄວາມສາມາດແກ່ງແຍ້ງ, ເປີດກວ້າງຂອບເຂດການລົງທຶນ. ທ່ານປະທານປະເທດ ໄດ້ຮັບຮູ້ ແລະ ສະເໜີບັນດາອົງການທີ່ກ່ຽວຂ້ອງຈົ່ງຄົ້ນຄວ້າ ເພື່ອແກ້ໄຂຢ່າງເໝາະສົມ, ທັນການ ແລະ ຮອບດ້ານໂດຍໄວ.
ບຸນຄົງ
