ການພົວພັນມິດຕະພາບຫວຽດນາມ-ມາເລເຊຍ ພັດທະນາຢ່າງຮອບດ້ານ ແລະ ເລິກເຊິ່ງໃນທຸກເສົາຄ້ຳ

11:03 | 31/03/2023

ຍສໝ - ທ່ານນາງອຸປະທູດຫວຽດນາມ ປະຈຳມາເລເຊຍ ຫງວຽນທິຫງອກແອງ ໄດ້ມີການແລກປ່ຽນກັບນັກຂ່າວສຳນັກຂ່າວສານ ຫວຽດນາມ ປະຈຳ ມາເລເຊຍ ກ່ຽວກັບຄວາມໝາຍຂອງເຫດການ.

	ຊຸກຍູ້ການພົວພັນທາງການທູດເສດຖະກິດລະຫວ່າງຫວຽດນາມ ແລະ ທ້ອງຖິ່ນຂອງອາຟຼິກາໃຕ້
	ສະມາຄົມມິດຕະພາບຫວຽດນາມ - ໄທ: ເພີ່ມທະວີການເຊື່ອມຕໍ່ວິສາຫະກິດ, ການພົບປະແລກປ່ຽນປະຊາຊົນ

ທ່ານນາງຕີລາຄາແນວໃດກ່ຽວກັບການພັດທະນາຂອງການພົວພັນຫວຽດນາມ - ມາເລເຊຍ ໃນໄລຍະຜ່ານມານີ້, ພິເສດແມ່ນພາຍຫຼັງສອງປະເທດຍົກລະດັບການພົວພັນສອງຝ່າຍຂຶ້ນເປັນການພົວພັນຄູ່ຮ່ວມມືຍຸດທະສາດ ນັບແຕ່ເດືອນ ສິງຫາ ປີ 2015?

ນັບແຕ່ວັນສ້າງຕັ້ງການພົວພັນທາງການທູດໃນວັນທີ 30 ມີນາ 1973, ການພົວພັນລະຫວ່າງ ຫວຽດນາມ ແລະ ມາເລເຊຍ ໄດ້ຜ່ານຜ່າໄລຍະ 50 ປີແຫ່ງການກໍ່ສ້າງ ແລະ ພັດທະນາຢ່າງບໍ່ຢຸດຢັ້ງ ດ້ວຍບັນດາຂີດໝາຍສຳຄັນແມ່ນການລົງນາມໃນຖະແຫຼງການຮ່ວມກ່ຽວກັບກອບຄູ່ຮ່ວມມືຍຸດທະສາດໃນວັນທີ 7 ສິງຫາ 2015, ພິເສດແມ່ນເມື່ອຫວຽດນາມ ແມ່ນຄູ່ຮ່ວມມືຍຸດທະສາດອັນໜຶ່ງດຽວຂອງມາເລເຊຍ ໃນ ອາຊຽນ. ການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດໄດ້ພັດທະນາຢ່າງຮອບດ້ານ ແລະ ເລິກເຊິ່ງໃນທຸກເສົາຄ້ຳຂອງການພົວພັນຕ່າງປະເທດຂອງພັກ, ການທູດແຫ່ງລັດ, ການທູດປະຊາຊົນ. ການຍົກລະດັບການພົວພັນຄູ່ຮ່ວມມືຍຸດທະສາດດ້ານໜຶ່ງ ໄດ້ສະແດງໃຫ້ເຫັນການພັດທະນາຢ່າງເລິກເຊິ່ງກ້ວາງຂວາງຂອງການພົວພັນລະຫວ່າງສອງປະເທດ ແລະ ຄວາມໄວ້ເນື້ອເຊື່ອໃຈດ້ານການເມືອງສູງ; ຄຽງຄູ່ກັນນັ້ນ, ກໍ່ເປີດໜ້າໃໝ່ໃຫ້ແກ່ການຮ່ວມມືຮອບດ້ານໃນຫຼາຍຂົງເຂດຄື: ການເມືອງ, ການທູດ, ເສດຖະກິດ, ການຄ້າ, ວັດທະນະທຳ, ການປ້ອງກັນຊາດ - ປ້ອງກັນຄວາມສະຫງົບ, ວິທະຍາສາດ - ເຕັກໂນໂລຢີ ແລະ ການພັດທະນາແບບຍືນຍົງ...

ການພົວພັນມິດຕະພາບຫວຽດນາມ-ມາເລເຊຍ ພັດທະນາຢ່າງຮອບດ້ານ ແລະ ເລິກເຊິ່ງໃນທຸກເສົາຄ້ຳ

ທ່ານນາງອຸປະທູດຫວຽດນາມ ປະຈຳ ມາເລເຊຍ ຫງວຽນທິຫງອກແອງ (ພາບ: TTXVN)

ປະຈຸບັນ, ສອງປະເທດໄດ້ ແລະ ພວມ ສົມທົບກັນຢ່າງແໜ້ນແຟ້ນ ເພື່ອປະຕິບັດການຜັນຂະຫຍາຍໂຄງການກະທຳຜັນຂະຫາຍການພົວພັນຄູ່ຮ່ວມມືຍຸດທະສາດ ໄລຍະ 2021-2025 ຢ່າງມີປະສິດທິຜົນ. ຖືນີ້ແມ່ນປະຖົມປັດໄຈສຳຄັນເພື່ອແນໃສ່ປັບປຸງການພົວພັນຄູ່ຮ່ວມມືສອງຝ່າຍໃນຊຸມປີຈະມາເຖິງໃຫ້ຫຼາຍກ່ວາອີກ. ຂ້າພະເຈົ້າດີໃຈເມື່ອໄດ້ແບ່ງປັນວ່າ ໃນຫຼາຍປີມານີ້, ມາເລເຊຍ ສືບຕໍ່ແມ່ນໜຶ່ງໃນບັນດາຄູ່ຮ່ວມມືການຄ້າ ແລະ ການລົງທຶນແຖວໜ້າຂອງ ຫວຽດນາມ ໃນ ອາຊຽນ.

ຮຽນທ່ານນາງ, ທ່ານນາງສາມາດເຜີຍໃຫ້ຮູ້ກ່ຽວກັບຈຸດສຸມຂອງການຮ່ວມມືລະຫວ່າງສອງປະເທດໃນປີ 2023 ກໍ່ຄືປີຕໍ່ໄປແມ່ນຫຍັງ? ສອງປະເທດຄວນເຮັດແນວໃດເພື່ອຊຸກຍູ້ການພົວພັນສອງປະເທດ, ພິເສດແມ່ນໃນຂົງເຂດຮ່ວມມືໃໝ່?

ຂ້າພະເຈົ້າຖືວ່າ ຈຸດສຸມຂອງການຮ່ວມມືລະຫວ່າງ 2 ປະເທດໃນໄລຍະຈະມາເຖິງແມ່ນສົມທົບກັນຊຸກຍູ້, ຕິດຕາມກວດກາ ເພື່ອປະຕິບັດບັນດາໂຄງການກະທຳຜັນຂະຫຍາຍການພົວພັນຄູ່ຮ່ວມມືຍຸດທະສາດ ໄລຍະ 2021 – 2025 ຢ່າງມີປະສິດທິຜົນ.

ໄປຄຽງຄູ່ກັນນັ້ນ, ສອງຝ່າຍຕ້ອງຮັກສາ ແລະ ພ້ອມທັງຊຸກຍູ້ບັນດາກົນໄກຮ່ວມມືສອງຝ່າຍຢ່າງສະໝ່ຳສະເໝີ ແລະ ມີປະສິດທິຜົນຄື: ຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດ, ວິທະຍາສາດ ແລະ ເຕັກນິກຂັ້ນລັດຖະມົນຕີການຕ່າງປະເທດ, ຄະນະກຳມະການປະສົມດ້ານການຄ້າ ຂັ້ນລັດຖະມົນຕີກະຊວງອຸດສາຫະກຳ ແລະ ການຄ້າ… ເພື່ອແນໃສ່ປະຕິບັດບັນດາຂໍ້ຕົກລົງຂັ້ນສູງໃນການສົມທົບກັນປະຕິບັດບັນດາເປົ້າໝາຍພັດທະນາໃນແຕ່ລະຂົງເຂດສະເພາະໃຫ້ປະກົດຜົນເປັນຈິງ.

ກ່ຽວກັບການຮ່ວມມືດ້ານເສດຖະກິດ, ການນຳຂັ້ນສູງຂອງສອງປະເທດໄດ້ເຫັນດີວາງຄາດໝາຍນຳວົງເງິນການຄ້າສອງຝ່າຍໃຫ້ບັນລຸ 18 ຕື້ USD ໃນປີ 2025. ທິດການເຕີບໂຕດ້ານການຄ້າມີຄວາມເປັນໄປໄດ້ສູງ, ແຕ່ເພື່ອບັນລຸໄດ້ເປົ້າໝາຍດັ່ງກ່າວ, 2 ຝ່າຍຕ້ອງຍູ້ແຮງການເຄື່ອນໄຫວສົ່ງເສີມການຄ້າ, ເຊື່ອມຕໍ່ວິສາຫະກິດ, ຕັ້ງໜ້າຈັດຕັ້ງ ແລະ ເຂົ້າຮ່ວມງານວາງສະແດງສິນຄ້າມຫ້ຫຼາຍກວ່າອີກ ເພື່ອແນໃສ່ໂຄສະນາຜະລິດຕະພັນຂອງກັນ, ພ້ອມທັງບັນດາວິສາຫະກິດ ກໍ່ຕ້ອງຊອກຫາທິດຮ່ວມມືແລກປ່ຽນການຄ້າ, ບັນດາຜະລິດຕະພັນເຊິ່ງອາດຈະເປັນທ່າແຮງຂອງສອງປະເທດຢ່າງບໍ່ຢຸດຢັ້ງຄື: ຜະລິດຕະພັນກະເສດ ແລະ ສິນໃນນ້ຳ, ຜະລິດຕະພັນ Halal, ອຸດສາຫະກໍາສະບຽງອາຫານ, ເຄື່ອງອາໄຫຼ່ເອເລກໂຕນິກ… ນອກຈາກນັ້ນ, ໃນສະພາບການຂອງສອງປະເທດໄດ້ເປີດປະຕູຄືນໃຫມ່ຄືໃນປັດຈຸບັນ ການເຊື່ອມຕໍ່ການທ່ອງທ່ຽວ, ການແລກປ່ຽນປະຊາຊົນ, ການສຶກສາ ແລະ ແຮງງານແມ່ນຄວາມຕ້ອງການທີ່ຈໍາເປັນ ແລະ ກໍ່ຄວນໄດ້ຮັບການຜັນຂະຫຍາຍໂດຍດ່ວນ. ປະຈຸບັນ, ຕະຫຼາດມາເລເຊຍພວມມີຄວາມຕ້ອງການກຳລັງແຮງງານເປັນຈຳນວນຫຼວງຫຼາຍ, ກໍ່ຄືມີຄວາມສາມາດບົ່ມຊ້ອນໃນການຮ່ວມມືດ້ານການທ່ອງທ່ຽວ ແລະ ການລົງທຶນ, ດັ່ງນັ້ນຂ້າພະເຈົ້າຄິດວ່າ ຈະມີໂອກາດການຮ່ວມມືຫຼາຍຢ່າງໃນອະນາຄົດມີ່ຈະມາເຖິງ.

ບຸນຄົງ