ໃນວັນທີ 2 ມີນາ, ກອງປະຊຸມລັດຖະມົນຕີການຕ່າງປະເທດ ກຸ່ມບັນດາພື້ນຖານເສດຖະກິດພັດທະນາ ແລະ ຫາກໍ່ພົ້ນເດັ່ນຂຶ້ນແຖວໜ້າໂລກ (G20) ໄດ້ໄຂຂຶ້ນຢູ່ນະຄອນຫຼວງ New Delhi ຂອງ ອິນເດຍ. ເຂົ້າຮ່ວມກອງປະຊຸມຄັ້ງນີ້, ນອກຈາກ 40 ກວ່າ ນັກການທູດແຖວໜ້າໂລກ ທີ່ມາຈາກປະເທດຕ່າງໆແລ້ວ, ຍັງມີການປະກອບສ່ວນຂອງຜູ້ຕາງໜ້າ 13 ອົງການຈັດຕັ້ງສາກົນອີກດ້ວຍ.
 |
ນາຍົກລັດຖະມົນຕີອິນເດຍ Narendra Modi ກ່າວຄຳປາໄສ. (ພາບ: TTXVN) |
ໃນບົດກ່າວປາໄສແບບທາງໄກ ສົ່ງໄປຍັງພິທີໄຂກອງປະຊຸມ, ທ່ານນາຍົກລັດຖະມົນຕີປະເທດເຈົ້າພາບ ອິນເດຍ Narendra Modi ໄດ້ເນັ້ນໜັກວ່າ ຫົວຂໍ້ຂອງປີປະທານ G20 ອິນເດຍ ແມ່ນ: “ໜ່ວຍໂລກດຽວ. ຄອບຄົວດຽວ ເພື່ອອະນາຄົດ”. ທ່ານນາຍົກລັດຖະມົນຕີ ອິນເດຍ ຖືວ່າ “ການຄຸ້ມຄອງທົ່ວໂລກຖືກປະລາໄຊ” ເມື່ອບັນດາກົນໄກຫຼາຍຝ່າຍ ບໍ່ຮັບມືໄດ້ກັບສິ່ງທ້າທາຍຮີບດ່ວນທີ່ສຸດໃນໂລກ, ເປັນຕົ້ນແມ່ນ: ວິກິດການດ້ານການເງິນ, ການປ່ຽນແປງຂອງດິນຟ້າອາກາດ, ໂລກລະບາດໂຄວິດ - 19, ການກໍ່ການຮ້າຍ ແລະ ການປະທະກັນ.
ທ່ານນາຍົກລັດຖະມົນຕີ ອິນເດຍ ກໍໄດ້ເວົ້າເຖິງຄວາມສ່ຽງຖືກຊຸດໂຊມໃນການປະຕິບັດບັນດາເປົ້າໝາຍພັດທະນາແບບຍືນຍົງຂອງ ສປຊ ແລະ ເລື່ອງບັນດາປະເທດຮັ່ງມີໄດ້ສົ່ງຜົນກະທົບຫຼາຍພໍສົມຄວນເຂົ້າໃນການປ່ຽນແປງຂອງດິນຟ້າອາກາດ. ທ່ານນາຍົກລັດຖະມົນຕີ Narendra Modi ຮຽກຮ້ອງໃຫ້ການນຳບັນດາປະເທດໃນໂລກ ຊອກຫາສຽງເວົ້າລວມ ໃນບັນຫາຕ່າງໆທີ່ຍັງມີທັດສະນະແຕກໂຕນກັນ ເມື່ອການປະທະກັນລະຫວ່າງ ລັດເຊຍ - ຢູແກຼນ ພວມຮ້ອນເຮັ່ງທີ່ສຸດ.
