| ລັດຖະມົນຕີກະຊວງປ້ອງກັນປະເທດ ອິນເດຍ ມາຢ້ຽມຢາມ ຫວຽດນາມ | |
| ປຶກສາຫາລືດ້ານການເມືອງຂັ້ນຮອງລັດຖະມົນຕີການຕ່າງປະເທດ ຫວຽດນາມ - ອານເຊຣີ |
 |
| ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດ ຫວຽດນາມ ແລະ ທ່ານລັດຖະມົນຕີກະຊວງປ້ອງກັນປະເທດ ອິນເດຍ Rajnath Singh (ພາບ: tienphong.vn) |
ຕອນເຊົ້າວັນທີ 8 ມິຖຸນາ, ຢູ່ຮ່າໂນ້ຍ, ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດ ຫວຽດນາມ ໄດ້ເປັນປະທານພິທີຕ້ອນຮັບທ່ານລັດຖະມົນຕີກະຊວງປ້ອງກັນປະເທດ ອິນເດຍ Rajnath Singh ເນື່ອງໃນໂອກາດທ່ານມາຢ້ຽມຢາມ ຫວຽດນາມ ແລະ ເຂົ້າຮ່ວມກອງປະຊຸມການທະຫານຂັ້ນສູງລະຫວ່າງສອງປະເທດ.
ກ່າວຄຳເຫັນທີ່ກອງປະຊຸມ, ທ່ານພົນເອກ ຟານວັນຢາງ ໄດ້ເນັ້ນໜັກວ່າ, ການຢ້ຽມຢາມຂອງທ່ານລັດຖະມົນຕີ Rajnath Singh ມີຄວາມໝາຍສຳຄັນ, ພິເສດແມ່ນເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ອິນເດຍ; ປະກອບສ່ວນຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດເວົ້າລວມ, ລະຫວ່າງສອງກະຊວງປ້ອງກັນປະເທດ ແລະ ສອງກອງທັບເວົ້າສະເພາະ ເພື່ອສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ.
ທ່ານລັດຖະມົນຕີ Rajnath Singh ຢືນຢັນວ່າ: ການຮ່ວມມືດ້ານປ້ອງກັນປະເທດແມ່ນໜຶ່ງໃນບັນດາເສົາຄ້ຳສຳຄັນປະກອບສ່ວນຊຸກຍູ້ການຮ່ວມມືລະຫວ່າງ 2 ປະເທດ.
ທ່ານລັດຖະມົນຕີກະຊວງປ້ອງກັນປະເທດ ອິນເດຍ ປາດຖະໜາວ່າ ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດ ຈະສືບຕໍ່ພັດທະນາ, ໄດ້ສະແດງໃຫ້ເຫັນຜ່ານການເພີ່ມທະວີການພົວພັນ 2 ຝ່າຍໃນຫຼາຍຂົງເຂດ, ຈາກການແລກປ່ຽນດ້ານການເມືອງ, ຄວາມໝັ້ນຄົງ, ການຄ້າ, ວັດທະນະທຳ, ການແລກປ່ຽນປະຊາຊົນ. ..
2 ຝ່າຍໄດ້ເຫັນດີຕີລາຄາວ່າ ການພົວພັນຫວຽດນາມ - ອິນເດຍ ພວມພັດທະນາຢ່າງບໍ່ຢຸດຢັ້ງ, ບັນລຸໄດ້ໝາກຜົນຕົວຈິງຫຼາຍຢ່າງ. ການຮ່ວມມືດ້ານການປ້ອງກັນຊາດສອງປະເທດນັບມື້ນັບໄດ້ຮັບການຜັນຂະຫຍາຍ ແລະ ພັດທະນາໃນຫຼາຍຮູບຫຼາຍແບບ, ນັບມື້ນັບມີຄວາມໝາຍສຳຄັນ, ເປັນເສົາຄ້ຳສຳຄັນໃນການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດ.
ບົນພື້ນຖານຖະແຫຼງການ “ວິໄສທັດຮ່ວມຫວຽດນາມ - ອິນເດຍ ເພື່ອສັນຕິພາບ, ຄວາມວັດທະນາຖາວອນ ແລະ ປະຊາຊົນ” ທີ່ໄດ້ຮັບຮອງເອົາໃນເດືອນ ທັນວາ 2020, 2 ຝ່າຍເຫັນດີເພີ່ມທະວີການຮ່ວມມື, ປະຕິບັດບັນດາໝາກຜົນຂອງບັນດາເອກະສານ ແລະ ສັນຍາທີ່ໄດ້ລົງນາມຢ່າງຄົບຖ້ວນ ແລະ ມີປະສິດທິຜົນ.
ໃນນັ້ນ, ສຸມໃສ່ເພີ່ມທະວີການພົບປະ ແລະ ແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຄະນະຜູ້ແທນຂັ້ນສູງ; ຮັກສາ ແລະ ປັບປຸງປະສິດທິຜົນຂອງການເຈລະຈາ, ປຶກສາຫາລື ແລະ ແລກປ່ຽນກົນໄກ, ພິເສດແມ່ນການເຈລະຈານະໂຍບາຍປ້ອງກັນປະເທດຂັ້ນຮອງລັດຖະມົນຕີ; ການຝຶກອົບຮົມບຳລຸງສ້າງ; ການຮ່ວມມືດ້ານການທະຫານ; ເຂົ້າຮ່ວມໃນການຮັກສາສັນຕິພາບຂອງສະຫະປະຊາຊາດ; ເພີ່ມທະວີການປະສານງານ ແລະ ປຶກສາຫາລືໃນບັນດາເວທີປາໄສຫຼາຍຝ່າຍ...
2 ຝ່າຍໄດ້ແບ່ງປັນທັດສະນະກ່ຽວກັບຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນເຮືອ ແລະ ການບິນຢູ່ທະເລຕາເວັນອອກ; ແກ້ໄຂການຂັດແຍ້ງກັນໂດຍສັນຕິວິທີ ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982; ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ຊຸກຍູ້ການເຈລະຈາ ເພື່ອບັນລຸ ກົດແຫ່ງການປະພຶດຢູ່ທະເລຕາເວັນອອກ (COC) ຢ່າງມີປະສິດທິຜົນ, ແທ້ຈິງ ແລະ ສອດຄ່ອງກັບກົດໝາຍສາກົນ.
ເນື່ອງໃນໂອກາດນີ້, ທ່ານພົນເອກ ຟານວັນຢາງ ໄດ້ຝາກຄຳເຊີນການນຳກະຊວງປ້ອງກັນປະເທດ ແລະ ບັນດາວິສາຫະກິດອຸດສາຫະກຳປ້ອງກັນປະເທດ ອິນເດຍ ສະໜັບສະໜູນ ແລະ ເຂົ້າຮ່ວມງານວາງສະແດງສາກົນການປ້ອງກັນຊາດ ໂດຍ ຫວຽດນາມ ຈັດຕັ້ງໃນທ້າຍປີ 2022.
ບຸນຄົງ
