| ນັກຮຽນ ຫວຽດນາມ ຢູ່ອາເມລິກາ ຂົວເຊື່ອມຕໍ່ສຳຄັນລະຫວ່າງປະຊາຊົນ ຫວຽດນາມ - ອາເມລິກາ | |
| EuroCham ສະເໜີ ຫວຽດນາມ ປັບປຸງນະໂຍບາຍຍົກເວັ້ນວີຊາ ເພື່ອດຶງດູດແຂກທ່ອງທ່ຽວສາກົນ |
ທ່ານຮອງລັດຖະມົນຕີກະຊວງການຕ່າງປະເທດ ຫວຽດນາມ ຮ່າກິມງອກ, ປະທານຄະນະກຳມະການແຫ່ງຊາດ UNESCO ຫວຽດນາມ ເປັນປະທານກອງປະຊຸມ. ເຂົ້າຮ່ວມກອງປະຊຸມມີຜູ້ຕາງໜ້າການນຳບັນດາກະຊວງ, ຂະແໜງການ, ການນຳບາງແຂວງ, ນະຄອນ, ຫົວໜ້າຜູ້ຕາງໜ້າຫ້ອງວ່າການ UNESCO ປະຈຳ ຮ່າໂນ້ຍ, ຜູ້ຕາງໜ້າຄະນະຄຸ້ມຄອງບັນດານາມມະຍົດ UNESCO ປະຈຳ ຫວຽດນາມ ແລະ ນັກຊ່ຽວຊານໃນບັນດາຂົງເຂດຂອງ UNESCO.
ກ່າວຄຳເຫັນໄຂກອງປະຊຸມ, ທ່ານປະທານຄະນະກຳມະການແຫ່ງຊາດ UNESCO ຫວຽດນາມ ໄດ້ຕີລາຄາສູງບັນດາຜົນງານທີ່ບັນລຸໄດ້ໃນປີ 2022 ຂອງຄະນະກຳມະການໃນບັນດາຂົງເຂດຮ່ວມມືກັບ UNESCO. ຫວຽດນາມໄດ້ຮັບການເລືອກຕັ້ງດ້ວຍຄະແນນສຽງສູງສຸດເຂົ້າເປັນສະມາຊິກຂອງຄະນະກຳມະການລະຫວ່າງລັດຖະບານເພື່ອປົກປັກຮັກສາມໍລະດົກວັດທະນະທຳນາມມະທຳ ໄລຍະ 2022-2026.
 |
| ທ່ານຮອງລັດຖະມົນຕີກະຊວງການຕ່າງປະເທດ ຫວຽດນາມ ຮ່າກິມງອກ ກ່າວຄຳເຫັນທີ່ກອງປະຊຸມ (ພາບ: TTXVN) |
ຫວຽດນາມ ໄດ້ຮັບການຮັບຮອງຈາກ UNESCO ດ້ວຍ 4 ນາມມະຍົດ, ໃນນັ້ນມີ: ເຄື່ອງປັ້ນດິນເຜົາຂອງຊາວເຜົ່າຈຳ - ມໍລະດົກວັດທະນະທຳນາມມະທຳ; 2 ມໍລະດົກເອກະສານຢູ່ພາກພື້ນ ອາຊີ - ປາຊີຟິກ ຄື ແຜ່ນສີລາລຶກ ມາຍາຍ ຢູ່ທັດສະນີຍະພາບ ງູແຮັງເຊີນ ແລະ ເອກະສານໜັງສືຫວຽດເດີມ ຢູ່ໝູ່ບ້ານ ເຈື່ອງລຶວ; ນະຄອນ ກາວແລ້ງ ເຂົ້າຮ່ວມຕາໜ່າງນະຄອນຮຽນຮູ້ທົ່ວໂລກຂອງ UNESCO. ທ່ານຜູ້ອຳນວຍການໃຫຍ່ UNESCO ສະແດງຄວາມປະທັບໃຈຕໍ່ບັນດາຜົນງານພັດທະນາເສດຖະກິດ-ສັງຄົມຂອງຫວຽດນາມ ໃນໄລຍະທີ່ທ່ານມາຢ້ຽມຢາມຫວຽດນາມ ໃນເດືອນ 9/2022.
ສິ່ງທີ່ເປັນໜ້າສົນໃຈນັ້ນແມ່ນ ປະຈຸບັນ ຫວຽດນາມ ແມ່ນສະມາຊິກຂອງ 3 ກົນໄກບໍລິຫານ ແລະ ວິຊາສະເພາະສຳຄັນຂອງ UNESCO, ລວມມີ: ສະພາບໍລິຫານ ໄລຍະ 2021 – 2025; ຄະນະກຳມະການລະຫວ່າງລັດຖະບານກ່ຽວກັບການປົກປັກຮັກສາ, ເສີມຂະຫຍາຍຄວາມຫຼາກຫຼາຍຂອງເອກະສານດ້ານວັດທະນະທຳ ໄລຍະ 2021 - 2025, ຄະນະກຳມະການລະຫວ່າງລັດຖະບານກ່ຽວກັບການປົກປັກຮັກສາມໍລະດົກວັດທະນະທຳນາມມະທຳ ໄລຍະ 2022 - 2026. ບົດບາດ ແລະ ທີ່ຕັ້ງຂອງ ຫວຽດນາມ ຢູ່ເວທີປາໄສຫຼາຍຝ່າຍທີ່ນັບມື້ນັບໄດ້ຮັບການຍົກສູງຂຶ້ນ.
ທີ່ກອງປະຊຸມ, ບັນດາຜູ້ແທນໄດ້ສະແດງຄວາມຂອບອົກຂອບໃຈຕໍ່ການໜູນຊ່ວຍ, ສົມທົບຢ່າງແໜ້ນແຟ້ນ ແລະ ມີປະສິດທິຜົນຂອງຄະນະເລຂາ, ເຫັນດີເປັນເອກະພາບຕໍ່ການຕີລາຄາບັນດາການເຄື່ອນໄຫວຂອງຄະນະກຳມະການແຫ່ງຊາດ UNESCO ຫວຽດນາມ ໃນປີ 2022.
ທ່ານ Christian Manhart, ຫົວໜ້າຜູ້ຕາງໜ້າອົງການ UNESCO ປະຈຳ ຫວຽດນາມ ໃຫ້ຮູ້ວ່າ: ປີ 2023, UNESCO ຈະສືບຕໍ່ໜູນຊ່ວຍເຄືອຂ່າຍບັນດານະຄອນທີ່ມີຫົວຄິດປະດິດສ້າງ, ການທ່ອງທ່ຽວແບບຍືນຍົງ, ຂະແໜງຫັດຖະກຳທ້ອງຖິ່ນ, ບັນດາເຄື່ອງໝາຍມໍລະດົກ, ການໂອ້ລົມສົນທະນາສຳຄັນກ່ຽວກັບອຸດສາຫະກຳວັດທະນະທຳ (ຮູບເງົາ) ຢູ່ ຫວຽດນາມ. ນອກຈາກນັ້ນ, ຫ້ອງການ UNESCO ປະຈຳ ຫວຽດນາມ ຈະສົມທົບກັນຈັດຕັ້ງກອງປະຊຸມສົນທິສັນຍາປົກປັກຮັກສາມໍລະດົກວັດທະນະທຳນາມມະທຳ ປີ 2003.
ທ່ານ Christian Manhart ໃຫ້ຮູ້ວ່າ: “ເປົ້າໝາຍຈຸດສຸມໃນປີ 2023 ແມ່ນພວກຂ້າພະເຈົ້າຈະຊຸກຍູ້ບັນດາຂໍ້ລິເລີ່ມສຳລັບຊາວໜຸ່ມ, ຜູ້ມີຫົວຄິດປະດິດສ້າງ ແລະ ຍູ້ແຮງບັນດາເວທີປາໄສ ແລະ ເຄືອຂ່າຍສາກົນເຊື່ອມຕໍ່ ຮ່າໂນ້ຍ ກັບ ອາຊີ ແລະ ເອີລົບ”.
ບຸນຄົງ
