ຂຸດຄົ້ນຄວາມສາມາດບົ່ມຊ້ອນການຮ່ວມມືດ້ານການຄ້າ ແລະ ການລົງທຶນລະຫວ່າງ ຫວຽດນາມ ແລະ EU
ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ໄດ້ໃຫ້ການຕ້ອນຮັບຄະນະຜູ້ແທນ EU - ອາຊຽນ ແລະ ສະມາຄົມວິສາຫະກິດ ເອີລົບ ປະຈຳຫວຽດນາມ.
ທີ່ການພົບປະ, ບັນດາຜູ້ແທນໄດ້ສະແດງຄວາມປິຕິຊົມຊື່ນທີ່ EU ໄດ້ກາຍເປັນຄູ່ຮ່ວມມືການຄ້າໃຫຍ່ອັນດັບ 5 ແລະ ຕະຫຼາດສົ່ງອອກໃຫຍ່ອັນດັບ 3 ຂອງ ຫວຽດນາມ; ສ່ວນ ຫວຽດນາມ ແມ່ນຄູ່ຮ່ວມມືການຄ້າໃຫຍ່ທີ່ສຸດໃນກຸ່ມ ອາຊຽນ ຂອງ EU. ພິເສດ, ດ້ວຍສັນຍາການຄ້າເສລີ ອີຢູ - ຫວຽດນາມ (EVFTA) ແມ່ນກຳລັງໜູນສຳຄັນ ຊ່ວຍຊຸກຍູ້ການຄ້າສອງສົ້ນລະຫວ່າງ ຫວຽດນາມ ແລະ ອີຢູ ເພີ່ມຂຶ້ນຢ່າງບໍ່ຢຸດຢັ້ງ, ປີ 2022, ວົງເງິນການຄ້າບັນລຸ 62,4 ຕື້ USD, ເພີ່ມຂຶ້ນ 9,8% ເມື່ອທຽບໃສ່ກັບ 2021.
2 ຝ່າຍເຊື່ອໝັ້ນວ່າ ການຮ່ວມມືດ້ານການຄ້າ ແລະ ການລົງທຶນລະຫວ່າງສອງປະເທດມີຄວາມສາມາດບົ່ມຊ້ອນຫຼາຍຢ່າງເພື່ອຂຸດຄົ້ນພາຍຫຼັງສັນຍາອາລັກຂາການລົງທຶນ (EVIPA) ມີຜົນສັກສິດ. ປະຈຸບັນ, 12/27 ປະເທດສະມາຊິກ EU ໄດ້ໃຫ້ສັດຕະຍາບັນສັນຍາ EVIPA.
ກ່າວຄຳເຫັນທີ່ການເຮັດວຽກ, ທ່ານນາຍົກລັດຖະມົນຕີ ຟ້າມມິງຈິງ ຊີ້ແຈ້ງວ່າ: ພາຍຫຼັງ 36 ປີແຫ່ງການປ່ຽນແປງໃໝ່, ຫວຽດນາມ ບັນລຸໄດ້ຜົນງານສຳຄັນຫລາຍຢ່າງ. ຮອດທ້າຍປີ 2022, ຂອບຂະໜາດເສດຖະກິດຫວຽດນາມ ຄາດວ່າຈະບັນລຸ 409 ຕື້ USD, ລາຍຮັບຕໍ່ຫົວຄົນປະມານ 4.100 USD; ຂອບຂະຫນາດການຄ້າຂຶ້ນກັບກຸ່ມ 30 ພື້ນຖານເສດຖະກິດແຖວໜ້າກ່ຽວກັບການຄ້າສາກົນ. ມາຮອດປະຈຸບັນ, ຫວຽດນາມ ໄດ້ລົງນາມໃນສັນຍາການຄ້າເສລີ 15 ສະບັບກັບ 60 ກວ່າປະເທດ ແລະ ເຂດແຄ້ວນ, ໃນນັ້ນມີ EU ແລະ ນັບມື້ນັບຫັນບັນດາຕະຫຼາດ, ຜະລິດຕະພັນ ແລະ ລະບົບສະໜອງເປັນຫຼາຍຮູບແບບ.
ໃນປີ 2022, ເສດຖະກິດມະຫາພາກໄດ້ຮັບການຮັກສາເປັນປົກກະຕິ; ອັດຕາເງິນເຟີ້ໄດ້ຮັບການຄວບຄຸມ, ຄວາມດຸ່ນດ່ຽງສໍາຄັນໄດ້ຮັບປະກັນ; ການເຕີບໂຕ GDP ໃນປີ 2022 ບັນລຸກວ່າ 8%; ວົງເງິນການນຳເຂົ້າ ແລະ ສົ່ງອອກສິນຄ້າບັນລຸກວ່າ 732 ຕື້ USD, ເພີ່ມຂຶ້ນ 9,5%, ວົງເງິນການສົ່ງອອກເກີນດຸນບັນລຸກວ່າ 11 ຕື້ USD; ທຶນ FDI ບັນລຸປະມານ 22,4 ຕື້ USD, ສູງທີ່ສຸດໃນ 5 ປີຜ່ານມາ. ມາຮອດປະຈຸບັນ, ຫວຽດນາມ ມີນັກລົງທຶນທີ່ມາຈາກ 142 ປະເທດ ແລະ ເຂດແຄ້ວນ, ດ້ວຍ 36.400 ກວ່າໂຄງການ, ດ້ວຍຍອດຈຳນວນທຶນຈົດທະບຽນກວ່າ 440 ຕື້ USD.
ທ່ານນາຍົກລັດຖະມົນຕີ ເນັ້ນໜັກວ່າ: ຫວຽດນາມ ແມ່ນປະເທດພວມພັດທະນາ, ພື້ນຖານເສດຖະກິດພວມຢູ່ໃນໄລຍະຫັນປ່ຽນ, ພາຍຫຼັງສົງຄາມຫຼາຍປີ, ຫວຽດນາມ ຍັງປະສົບກັບຄວາມຫຍຸ້ງຍາກຫຼາຍຢ່າງ, ສະນັ້ນ ໃນຂະບວນການຮ່ວມມື, 2 ຝ່າຍຕ້ອງມີຄວາມຈິງໃຈ ແລະ ອົດທົນ, ຮັບຟັງ, ມີການແລກປ່ຽນນຳກັນ, ຊອກຫາວິທີການແກ້ໄຂຄວາມຫຍຸ້ງຍາກ ແລະ ສິ່ງກີດຂວາງ, ສ້າງສະພາບແວດລ້ອມທີ່ເປີດກວ້າງ, ເປັນມິດ ແລະ ມີຄວາມຮັບຜິດຊອບນຳກັນ ເພື່ອເຮັດໃຫ້ດີກ່ວາອີກ ບົນຈິດໃຈ “ຜົນປະໂຫຍດທີ່ກົມກຽວ, ແບ່ງປັນຄວາມສ່ຽງ”, “ເວົ້າແທ້ເຮັດຈິງ, ໄດ້ໃຫ້ຄຳໝັ້ນສັນຍາແລ້ວຕ້ອງປະຕິບັດ, ໄດ້ປະຕິບັດແລ້ວຕ້ອງບັນລຸໄດ້ໝາກຜົນ”.
ທ່ານ Jens Ruebbert, ຮອງປະທານສະພາບໍລິຫານຂອງສະພາວິສາຫະກິດ EU - ອາຊຽນ ໃຫ້ຮູ້ວ່າ ມີການເຂົ້າຮ່ວມຂອງການນຳວິສາຫະກິດ 50 ກວ່າທ່ານ. ນີ້ແມ່ນຄະນະປະຕິບັດງານທຳອິດໃນປີ 2023 ຂອງສະພາວິສາຫະກິດ EU - ອາຊຽນ, ເຊິ່ງສະແດງໃຫ້ເຫັນຄວາມສຳຄັນຂອງຫວຽດນາມ.
 |
| ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ໃຫ້ການຕ້ອນຮັບຄະນະຜູ້ແທນ EU - ອາຊຽນ ແລະ ສະມາຄົມວິສາຫະກິດ ເອີລົບ ປະຈຳຫວຽດນາມ (ພາບ: TTXVN) |
ທ່ານກໍ່ສະແດງຄວາມຊົມເຊີຍຕໍ່ບັນດາຜົນສຳເລັດເຊິ່ງ ຫວຽດນາມ ບັນລຸໄດ້ໃນໄລຍະຜ່ານມາ ໃນການຄວບຄຸມພະຍາດ, ຟື້ນຟູ ແລະ ພັດທະນາເສດຖະກິດ - ສັງຄົມ, ນຳຫວຽດນາມ ກາຍເປັນປະກົດການໜຶ່ງໃນໂລກ, ເປັນຈຸດໝາຍດຶງດູດນັກທຸລະກິດ. ຫວຽດນາມ ພວມ ແລະ ຈະສວມບົດບາດສຳຄັນຕໍ່ກັບ EU ໃນດ້ານການຄ້າ ແລະ ການລົງທຶນກວ່າອີກ, ເປັນຕົ້ນແມ່ນໃນໂລກທີ່ມີການຜັນແປຫຼາຍຢ່າງໃນປະຈຸບັນ.
ທ່ານ Alain Cany, ປະທານ EuroCham ປະຈຳ ຫວຽດນາມ ໄດ້ສະແດງຄວາມເຊື່ອໝັ້ນຕໍ່ບັນດາຜົນງານ ແລະໝາກຜົນໃໝ່ໃນການຜັນຂະຫຍາຍສັນຍາ EVFTA ໃນໄລຍະຈະມາເຖິງ ແລະ ຢືນຢັນວ່າ ບັນດາວິສາຫະກິດຈະຕັ້ງໜ້າຊຸກຍູ້ການຮັບຮອງເອົາສັນຍາ EVIPA. ທ່ານ Jens Ruebbert ແລະ ທ່ານ Alain Cany ໄດ້ຍົກອອກບາງຄຳຖາມ ແລະ ຂໍ້ສະເໜີແນະກ່ຽວກັບນະໂຍບາຍພະລັງງານແຮງລົມນອກຊາຍຝັ່ງ; ການວາງແຜນຜັງພື້ນທີ່ທາງທະເລແຫ່ງຊາດ; ການວາງແຜນຜັງພັດທະນາໄຟຟ້າ VIII; ແຜນທີ່ການປະຕິຮູບຂະແຫນງສາທາລະນະສຸກ ແລະ ບັນຊີລາຍຊື່ຢຸກຢາທີ່ປະກັນໄພຈ່າຍ; ການຕໍ່ອາຍຸໜັງສືອະນຸຍາດອອກແຮງງານໃຫ້ແກ່ຊາວຕ່າງປະເທດ…
ພາຍຫຼັງຮັບຟັງຄຳເຫັນ ແລະ ຄຳຕອບຂອງບັນດາກະຊວງ, ຂະແໜງການ, ທ່ານນາຍົກລັດຖະມົນຕີ ຟ້າມມິງຈິງ ຢືນຢັນວ່າ ຍາມໃດຫວຽດນາມ ກໍ່ຖືເປັນສຳຄັນການພົວພັນຄູ່ຮ່ວມມືຮອບດ້ານ ຫວຽດນາມ - ອີຢູ ກໍ່ຄືການພົວພັນກັບບັນດາປະເທດສະມາຊິກ; ສະໜັບສະໜູນການເພີ່ມທະວີການພົວພັນຄູ່ຮ່ວມມືຍຸດທະສາດອາຊຽນ - ອີຢູ ໃຫ້ນັບມື້ນັບເລິກເຊິ່ງກ່ວາອີກ.
ທ່ານນາຍົກລັດຖະມົນຕີ ໄດ້ຂອບໃຈບັນດາຄຳເຫັນທີ່ໄດ້ຍົກອອກມາຢູ່ກອງປະຊຸມ ໂດຍສະແດງໃຫ້ເຫັນຄວາມຮັບຜິດຊອບ, ການແບ່ງປັນ, ການຮ່ວມເດີນທາງ, ການສະໜັບສະໜູນຂອງບັນດາຄູ່ຮ່ວມມື, ວິສາຫະກິດ, ນັກລົງທຶນໃນໄລຍະທີ່ຜ່ານມາກັບຫວຽດນາມ, ພິເສດແມ່ນໃນໄລຍະການລະບາດຂອງພະຍາດໂຄວິດ-19; ສິ່ງດັ່ງກ່າວເຮັດໃຫ້ບັນດາອົງການຂອງຫວຽດນາມ ຍິ່ງເຫັນໄດ້ເຖິງຄວາມຮັບຜິດຊອບຂອງຕົນໃນການແກ້ໄຂຄວາມຫຍຸ້ງຍາກ.
ທ່ານນາຍົກລັດຖະມົນຕີ ກໍ່ຢືນຢັນວ່າ ຫວຽດນາມຢຶດໝັ້ນນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ, ຫັນການພົວພັນຕ່າງປະເທດເປັນຫຼາຍຮູບຫຼາຍແບບ, ເປັນເພື່ອນມິດ, ຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ, ເປັນສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບໃນການພົວພັນຕ່າງປະເທດ, ຕັດສິນໃຈສ້າງພື້ນຖານເສດຖະກິດເປັນເອກະລາດ ແລະ ເປັນເຈົ້າຕົນເອງ ໄປຄຽງຄູ່ກັບຄວາມຕັ້ງໜ້າ, ເປັນເຈົ້າການໃນການເຊື່ອມໂຍງເຂົ້າກັບສາກົນຢ່າງເລິກເຊິ່ງ, ຮອບດ້ານ, ແທດຈິງ ແລະ ມີປະສິດທິຜົນ; ຖືກຳລັງພາຍໃນເປັນພື້ນຖານ, ຍຸດທະສາດ, ການຕັດສິນໃຈ, ໄລຍະຍາວ, ກຳລັງພາຍນອກເປັນສຳຄັນ, ບຸກທະລຸ.
ຫວຽດນາມ ກໍ່ພວມຍູ້ແຮງການສ້າງໂຄງປະກອບເສດຖະກິດຄືນໃໝ່, ປ່ຽນແປງຮູບແບບການເຕີບໂຕ, ດຳເນີນການຫັນເປັນອຸດສາຫະກຳ ແລະ ທັນສະໄໝ ບົນພື້ນຖານວິທະຍາສາດ, ເຕັກໂນໂລຢີ ແລະ ການປ່ຽນແປງໃໝ່ປະດິດຄິດສ້າງ, ໃນນັ້ນໃຫ້ບຸລິມະສິດຊຸກຍູ້ການເຕີບໂຕແບບຍືນຍົງຄື: ເສດຖະກິດດີຈີຕອນ, ຫັນເປັນດີຈີຕອນ, ການເຕີບໂຕສີຂຽວ, ເສດຖະກິດໝູນວຽນ. , ອຸດສາຫະກໍາເຕັກໂນໂລຢີສູງ, ກະສິກໍາລະບົບນິເວດ; ປະຕິບັດຄຳໝັ້ນສັນຍາຕ້ານການປ່ຽນແປງຂອງດິນຟ້າອາກາດຢ່າງມີຄວາມຮັບຜິດຊອບ.
ທ່ານນາຍົກລັດຖະມົນຕີ ຢືນຢັນວ່າ: ຂະແໜງເສດຖະກິດທີ່ມີເງິນລົງທຶນຈາກຕ່າງປະເທດແມ່ນພາກສ່ວນທີ່ສຳຄັນຂອງພື້ນຖານເສດຖະກິດຫວຽດນາມ, ລັດຖະບານ ຫວຽດນາມ ຍາມໃດກໍ່ປົກປັກຮັກສາສິດ ແລະ ຜົນປະໂຫຍດອັນຊອບທຳຂອງບັນດານັກລົງທຶນ; ເຄົາລົບ, ຊຸກຍູ້ ແລະ ພ້ອມແລ້ວທີ່ຈະສ້າງເງື່ອນໄຂໃຫ້ເຂດນີ້ພັດທະນາໃນໄລຍະຍາວ, ມີການຮ່ວມມື ແລະ ແຂ່ງຂັນກັນຢ່າງປອດໄສໃນພາກພື້ນກັບບັນດາເຂດເສດຖະກິດຕ່າງໆ.
ບຸນຄົງ
