| ຫວຽດນາມ - Uzbekistan ຍັງມີຄວາມສາມາດບົ່ມຊ້ອນຫຼາຍຢ່າງໃນການຮ່ວມມືສອງຝ່າຍ | |
| ປຶກສາຫາລືກ່ຽວກັບຄວາມສາມາດບົ່ມຊ້ອນ ແລະ ກາລະໂອກາດຮ່ວມມືດ້ານການທ່ອງທ່ຽວ ລະຫວ່າງ ຫວຽດນາມ ແລະ ອີຣານ |
 |
| ທ່ານ Ali Akbar Nazari, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດອິດສະລາມ ອີຣານ ປະຈຳ ຫວຽດນາມ ກັບແຂກຖືກເຊີນ (ພາບ: ຫາຍອານ) |
ຄວາມສາມາດບົ່ມຊ້ອນໃນການຮ່ວມມື ແລະ ການພົບປະແລກປ່ຽນປະຊາຊົນລະຫວ່າງ ຫວຽດນາມ ແລະ ອີຣານ ຍັງຄົງມີຫຼາຍຄວາມໝັ້ນໝາຍ
ຕອນຄ່ຳວັນທີ 9 ກຸມພາ, ຢູ່ຮ່າໂນ້ຍ, ສະຖານທູດສາທາລະນະລັດອິດສະລາມ ອີຣານ ປະຈຳຫວຽດນາມ ໄດ້ຈັດຕັ້ງພິທີສະເຫຼີມສະຫຼອງ 44 ປີແຫ່ງວັນຊາດອີຣານ (11/2/1979-11/2/2023) ແລະ ຄົບຮອບ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງອີຣານ ແລະ ຫວຽດນາມ (4/8/1973 – 4/8/2023).
ກ່າວຄຳເຫັນທີ່ພິທີ, ທ່ານ Ali Akbar Nazari, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດອິດສະລາມ ອີຣານ ປະຈຳ ຫວຽດນາມ ໃຫ້ຮູ້ວ່າ: ຫວຽດນາມ ແລະ ອີຣານ ມີປະຫວັດສາດການພົບປະແລກປ່ຽນທີ່ມີມາແຕ່ດົນນານ ແລະ ມີຫຼາຍຈຸດທີ່ຄ້າຍຄືກັນໃນດ້ານວັດທະນະທຳ; ແຕ່ລະຝ່າຍລ້ວນແຕ່ມີທ່າແຮງສະເພາະຂອງຕົນເພື່ອຊ່ວຍເຫຼືອກັນຢ່າງມີປະສິດທິຜົນໃນການພັດທະນາເສດຖະກິດ - ສັງຄົມ.
50 ປີທີ່ຜ່ານມາ, ສອງປະເທດໄດ້ມີການຮ່ວມມືຢ່າງແໜ້ນແຟ້ນ ແລະ ມີມິດຕະພາບທີ່ເປັນມູນເຊື້ອບົນພື້ນຖານເຄົາລົບ ແລະ ມີຄວາມເຂົ້າໃຈເຊິ່ງກັນ ແລະ ກັນ, ມີການພົວພັນໂດຍອີງຕາມ 3 ປັດໄຈນັ້ນແມ່ນ ເຄົາລົບ, ພັດທະນາການພົວພັນສອງຝ່າຍ ໃນບັນດາຂົງເຂດຄື: ການເມືອງ, ເສດຖະກິດ ແລະ ວັດທະນະທຳ ແລະ ການຮ່ວມມືທີ່ມີລັກສະນະຕ່າງຝ່າຍຕ່າງໃີຜົນປະໂຫຍດໃນລັດທິຫຼາຍຝ່າຍ. ໃນຊຸມມື້ທີ່ປະສົບກັບຄວາມຫຍຸ້ງຍາກ ແລະ ສິ່ງທ້າທາຍຈາກການແຜ່ລະບາດຂອງພະຍາດໂຄວິດ-19, ສອງປະເທດໄດ້ມີການເຊື່ອມໂຍງກັນຢ່າງແໜ້ນແຟ້ນ ແລະ ມີການປຶກສາຫາລືກັນໃນຂັ້ນຕ່າງໆ. ທ່ານເອກອັກຄະລັດຖະທູດ Ali Akbar Nazari ຕີລາຄາວ່າ:
“ຂ້າພະເຈົ້າເຊື່ອໝັ້ນວ່າ ຍັງມີຄວາມສາມາດບົ່ມຊ້ອນໃນການຮ່ວມມືດ້ານເສດຖະກິດ, ການຄ້າ, ການລົງທຶນ, ວັດທະນະທຳ, ທ່ອງທ່ຽວ… ລະຫວ່າງ 2 ປະເທດ. ການພົວພັນລະຫວ່າງອີຣານ - ຫວຽດນາມ ຈະນັບມື້ນັບເປີດກ້ວາງ, ແຕກດອກອອກຜົນ ໃນໄລຍະຈະມາເຖິງ.
ກ່າວຄຳເຫັນທີ່ພິທີ, ທ່ານນາງ ເລທິທູຮັ່ງ, ຮອງລັດຖະມົນຕີກະຊວງການຕ່າງປະເທດ ສາທາລະນະລັດ ສັງຄົມນິຍົມ ຫວຽດນາມ ໃຫ້ຮູ້ວ່າ: ໄລຍະຜ່ານມາ, ການພົວພັນດ້ານການເມືອງ - ການຕ່າງປະເທດລະຫວ່າງ ຫວຽດນາມ - ອີຣານ ບັນບຸໄດ້ບາດກ້າວພັດທະນາຢ່າງຕັ້ງໜ້າ. ພາຍຫຼັງການຄວບຄຸມພະຍາດໂຄວິດ-19 ໄດ້, ສອງຝ່າຍໄດ້ຟື້ນຟູກົນໄກຮ່ວມມືຢ່າງວ່ອງໄວ, ໄດ້ແລກປ່ຽນຄະນະຜູ້ແທນບັນດາຂັ້ນ. ໃນນັ້ນແມ່ນການຢ້ຽມຢາມ ອີຣານ ໃນເດືອນທັນວາ ປີ 2022 ຂອງທ່ານຮອງປະທານສະພາແຫ່ງຊາດ ຫວຽດນາມ ເຈີ່ນກວາງເຟືອງ. ການຢ້ຽມຢາມໄດ້ຊ່ວຍເພີ່ມທະວີການພົວພັນຮ່ວມມືລະຫວ່າງສະພາແຫ່ງຊາດ ແລະ ສະມາຊິກສະພາແຫ່ງຊາດ 2 ປະເທດ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ເປີດຫຼາຍທິດທາງໃໝ່ໃນການຮ່ວມມືລະຫວ່າງ 2 ປະເທດ.
ໄປຄຽງຄູ່ກັບການພົວພັນດ້ານການເມືອງ ແລະ ການທູດແລ້ວ, ການຮ່ວມມືດ້ານເສດຖະກິດການຄ້າລະຫວ່າງ ຫວຽດນາມ ແລະ ອີຣານ ຍັງໄດ້ຮັບການຊຸກຍູ້ຢ່າງບໍ່ຢຸດຢັ້ງ ແລະ ບັນລຸໄດ້ບັນດາໝາກຜົນທີ່ຕັ້ງໜ້າ. ວົງເງິນການຄ້າສອງຝ່າຍສືບຕໍ່ຟື້ນຕົວ ແລະ ມີເຕີບໂຕຢ່າງບໍ່ຢຸດຢັ້ງ. ນັບມື້ນັບມີວິສາຫະກິດຫວຽດນາມ ແລະ ອີຣານ ມີຄວາມສົນໃຈຕໍ່ການຊອກຫາກາລະໂອກາດຮ່ວມມືດຳເນີນທຸລະກິດກັບບັນດາຄູ່ຮ່ວມມືຢູ່ແຕ່ລະປະເທດ.
ບັນດາຂົງເຂດການຮ່ວມມືອື່ນໆ ກໍ່ໄດ້ ແລະ ພວມບັນລຸໝາກຜົນທີ່ຕັ້ງໜ້າ. ອີຣານ ມີທ່າແຮງດ້ານວິທະຍາສາດເຕັກໂນໂລຢີ, ໂດຍສະເພາະແມ່ນ ນາໂນເຕັກ, ດາວທຽມ, ອາວະກາດ ແລະ ການເຫັນເປັນດີຈີຕອນ. ນີ້ກໍ່ແມ່ນບັນດາຂົງເຂດຮ່ວມມືທີ່ມີຄວາມສາມາດບົ່ມຊ້ອນໃນການຮ່ວມມືລະຫວ່າງ 2 ປະເທດໃນໄລຍະຈະມາເຖິງ, ພິເສດແມ່ນໃນສະພາບການທີ່ລັດຖະບານ ຫວຽດນາມ ພວມໃຫ້ບຸລິມະສິດຫຼາຍຢ່າງໃນການຊຸກຍູ້ການພັດທະນາວິທະຍາສາດ ເຕັກໂນໂລຢີ ແລະ ການປ່ຽນແປງໃໝ່ປະດິດຄິດສ້າງ. ໃນຂົງເຂດການທ່ອງທ່ຽວ, ດ້ວຍທິວທັດທຳມະຊາດທີ່ສວຍງາມ ແລະ ຮ່ອງຮອຍປະຫວັດສາດ ຫຼາຍແຫ່ງ ທັງອີຣານ ແລະ ຫວຽດນາມ ນັບມື້ນັບກາຍເປັນສະຖານທີ່ທ່ອງທ່ຽວທີ່ມີຄວາມນິຍົມຊົມຊອບຈາກແຂກທ່ອງທ່ຽວທີ່ມີຄວາມມັກຮັກໃນການຄົ້ນຫາປະຫວັດສາດ, ວັດທະນະທຳ ແລະ ພັກຜ່ອນຢ່ອນອາລົມ.
ບຸນຄົງ
