 |
| ພິທີມອບຮັບວັດຖຸອຸປະກອນການແພດ (ພາບ: IOM) |
ຍີ່ປຸ່ນ ແລະ ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານ (IOM) ໜູນຊ່ວຍແຂວງກວາງຈິ້ເປີດປະຕູຊາຍແດນຢ່າງປອດໄພ
ວັນທີ 31 ມັງກອນ, ສະຖານກົງສູນໃຫຍ່ ຍີ່ປຸ່ນ ປະຈຳດ່ານັ້ງ ແລະ ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານ (IOM) ໄດ້ມອບບັນດາວັດຖຸອຸປະກອນການແພດທີ່ຈຳເປັນໃຫ້ແກ່ແຂວງກ໋ວາງຈິ ເພື່ອແນໃສ່ໜູນຊ່ວຍບັນດາພະນັກງານແນວໜ້າເຂດຊາຍແດນ, ຮັບປະກັນວິວັດການເປີດປະຕູຊາຍແດນສາກົນຂອງຫວຽດນາມ ໃຫ້ມີການດຳເນີນຢ່າງປອດໄພ.
ບ້ວງໜູນຊ່ວຍຂອງລັດຖະບານ ຍີ່ປຸ່ນ ແລະ IOM ໃຫ້ແກ່ແຂວງ ກ໋ວາງຈິ ລວມມີບັນດາວັດຖຸອຸປະກອນການອະນາໄມຄື: ສະບູ, ນ້ຳຢາລ້າງມືຂ້າເຊື້ອ ແລະ ວັດຖຸອຸປະກອນການແພດຄື ເຄື່ອງວັດແທກອຸນຫະພູມຮ່າງກາຍ ແລະ ເຄື່ອງບັັນຈຸນ້ຳຢາລ້າງມືຂ້າເຊື້ອ.
ກ່າວຄຳເຫັນທີ່ເຫດການ, ທ່ານຫົວໜ້າກົງສູນໃຫຍ່ ຍີ່ປຸ່ນ ປະຈຳ ດ່ານັ້ງ Yakabe Yoshinori ໄດ້ສະແດງຄວາມຊົມເຊີນຕໍ່ບັ້ນການສົ່ງມອບມໍ່ໆມານີ້, ພ້ອມທັງເນັ້ນໜັກເຖິງຄຳໝັ້ນສັນຍາຂອງ ລັດຖະບານ ຍີ່ປຸ່ນ ເພື່ອແນໃສ່ໜູນຊ່ວຍວິວັດການເປີດປະຕູຊາຍແດນສາກົນຢ່າງປອດໄພຂອງ ຫວຽດນາມ. ທ່ານ Yakabe Yoshinori ໃຫ້ຮູ້ວ່າ:
ພວກຂ້າພະເຈົ້າສະໜັບສະໜູນບັນດາຄວາມມານະພະຍາຍາມຂອງ IOM ເພື່ອແນໃສ່ເພີ່ມທະວີວິຊາການເຕັກນິກໃຫ້ແກ່ພະນັກງານແນວໜ້າດ່ານຊາຍແດນ, ພ້ອມທັງໜູນຊ່ວຍວັດຖຸອຸປະກອນປົກປ້ອງສ່ວນບຸກຄົນ ແລະ ວັດຖຸທີ່ຈຳເປັນໃຫ້ແກ່ເຂດຊາຍແດນ.
ດ້ວຍບ້ວງເງິນໜູນຊ່ວຍຂຶ້ນເຖິງ 1,6 ລ້ານ USD ຈາກລັດຖະບານ ຍີ່ປຸ່ນ, IOM ໄດ້ໜູນຊ່ວຍວິວັດການເປີດປະຕູຊາຍແດນສາກົນຄືນໃໝ່ຢ່າງປອດໄພຂອງລັດຖະບານ ຫວຽດນາມ ຜ່ານການຍົກສູງຄວາມສາມາດທາງການແພດສາທາລະນະຢູ່ 6 ດ່ານຊາຍແດນສາກົນ ແລະ 5 ສະໜາມບິນສາກົນ (ສະໜາມບິນ ໂນ້ຍບາຍ, ສະໜາມບິນ ດ່ານັ້ງ, ກາມແຣງ, ເຕິນເຊີນເຍິດ ແລະ ຝຸກວັກ) ໃນທົ່ວຫວຽດນາມ. ຄາດວ່າຈະມີພະນັກງານແນວໜ້າ 400 ຄົນ, ພະນັກງານລັດ 50 ຄົນ ແລະ ປະຊາຊົນ 3000 ຄົນຢູ່ບັນດາແຂວງເຂດຊາຍແດນຈະໄດ້ຮັບຜົນປະໂຫຍດຈາກໂຄງການດັ່ງກ່າວ.
ສ່ວນທ່ານນາງຫົວໜ້າຄະນະ IOM Park Mihyung ກໍ່ເຊື່ອໝັ້ນວ່າ ບັນດາວັດຖຸອຸປະກອນທີ່ໄດ້ຮັບການໜູນຊ່ວຍຈາກລັດຖະບານ ຍີ່ປຸ່ນ ແມ່ນການປະກອບສ່ວນທີ່ແທດຈິງ ເພື່ອແນໃສ່ເພີ່ມທະວີການຍົກລະດັບໃຫ້ແກ່ເຂດຊາຍແດນຫວຽດນາມ ຫຼັງພະຍາດໂຄວິດ - 19.
ຕາມທ່ານນາງ Park Mihyung ແລ້ວ, ພະຍາດໄດ້ເຮັດໃຫ້ເຫັນບົດບາດຂອງແຮງງານທີ່ເຄື່ອນຍ້າຍຖິ່ນຖານໃນສັງຄົມ ແລະ ຄວາມຈຳເປັນທີ່ຈະຕ້ອງມີກົນໄກທີ່ມີປະສິດທິຜົນກ່ວາອີກ ເພື່ອທັງປົກປ້ອງ ທັງມອບສິດໃຫ້ແກ່ຜູ້ເຄື່ອນຍ້າຍຖິ່ນຖານ ດ້ວຍຖານະເປັນສະມາຊິກທີ່ສຳຄັນຂອງປະຊາຄົມພວກເຮົາ.
ໃນສະພາບການຫວຽດນາມ ໄດ້ປະສົບຜົນສຳເລັດໃນການເປີດປະຕູສາກົນຄືນໃໝ່, ສິ່ງທ້າທາຍສຳລັບພວກເຮົາແມ່ນ ສືບຕໍ່ໜູນຊ່ວຍຜູ້ອອກແຮງງານທີ່ເຄື່ອນຍ້າຍຖິ່ນຖານ, ພິເສດແມ່ນກຳລັງແຮງງານທີ່ເຄື່ອນຍ້າຍຖິ່ນຖານຢູ່ຕ່າງປະເທດ, ຮັບປະກັນວ່າເຂົາເຈົ້າໄດ້ສຳຜັດກັບຂໍ້ມູນທີ່ຖືກຕ້ອງ, ໄດ້ມອບສິດເພື່ອມີການຕັດສິນໃຈຢ່າງຖືກຕ້ອງ ແລະ ປົກປ້ອງຕົນເອງຈາກຄວາມສ່ຽງເມື່ອໄປປະຕິບັດງານຢູ່ຕ່າງປະເທດ. ທ່ານນາງ Park Mihyung ໃຫ້ຮູ້.
ບຸນຄົງ
