ຫວຽດນາມ ຍາມໃດກໍຈົດຈຳຄວາມສາມັກຄີສາກົນອັນໃຫຍ່ຫລວງ | |
ສະຖານທູດ ຫວຽດນາມ ປະຈໍາ ປາຣີ ສົມທົບສະເຫຼີມສະຫຼອງ 50 ປີ ແຫ່ງວັນເຊັນສັນຍາປາຣີ |
ໂດຍໄດ້ໄປປະເທດຝລັ່ງ ແຕ່ປີ 1964, ຂ້າພະເຈົ້າ ໄດ້ຖືກອ້າຍເອື້ອຍນ້ອງຂອງຂ້າພະເຈົ້າພາໄປເຂົ້າຮ່ວມໃນການເຄື່ອນໄຫວຮັກຊາດຢູ່ປະເທດຝລັ່ງ, ເມື່ອນັ້ນຂ້າພະເຈົ້າ ຍັງເປັນສະມາຊິກຂອງສະມາຄົມນັກສຶກສາຫວຽດນາມ ຢູ່ປະເທດຝລັ່ງ.
ຫຼັງຈາກນັ້ນ, ໃນຂະນະທີ່ເລີ່ມຕົ້ນການເຈລະຈາສັນຍາປາຣີ, ສະມາຄົມໄດ້ມີຄວາມຄິດ ແລະ ກະກຽມກອງປະຊຸມໃຫຍ່ຊາວຫວຽດນາມ ອາໄສຢູ່ຝລັ່ງ ສາມັກຄີຊາດ ແລະ ໃຫ້ຖືກຕ້ອງຕາມກົດໝາຍກັບອຳນາດການປົກຄອງຝລັ່ງ ເພື່ອຫັນເປັນກອງປະຊຸມໃຫຍ່ສະຫະພັນຊາວຫວຽດນາມ ອາໄສຢູ່ຝລັ່ງ ໃນປີ 1969. ດ້ວຍຄຳຂວັນ: "ຄວາມສາມັກຄີ ແລະ ປອງດອງຊາດ, ຮັກຫອມສັນຕິພາບ ແລະ ເອກະພາບພາກເໜືອ ແລະ ພາກໃຕ້ຂອງປະເທດເປັນຊາຍຄາດຽວກັນ".
ໃນປີ 1978, ກອງປະຊຸມໄດ້ປ່ຽນຊື່ສະມາຄົມຊາວຫວຽດນາມຢູ່ຕ່າງປະເທດ ເປັນສະມາຄົມຊາວຫວຽດນາມຢູ່ຝລັ່ງ ຈົນຮອດປັດຈຸບັນ. ເມື່ອເບິ່ງຄືນເມື່ອກ່ອນ, ຂ້າພະເຈົ້າເປັນກຽດທີ່ໄດ້ເຂົ້າຮ່ວມບັນດາການເຄື່ອນໄຫວໜູນຊ່ວຍການຕໍ່ສູ້ຂອງປະເທດຊາດ.
ຂະບວນການເຄື່ອນໄຫວຮັກຊາດຂອງຊາວຫວຽດນາມຢູ່ຝລັ່ງ ໄດ້ມີຄວາມມານະພະຍາຍາມ ພ້ອມກັບສະມາຄົມມິດຕະພາບຝລັ່ງ - ຫວຽດນາມ ແລະ ພັກກອມມູນິດຝລັ່ງ ໃນຊຸມປີທີ່ດຳເນີນການເຈລະຈາສັນຍາປາຣີ, ໜູນຊ່ວຍຢ່າງຕັ້ງໜ້າດ້ານພະລາທິການໃຫ້ແກ່ຄະນະຜູ້ແທນສອງປະເທດ. ເກືອບ 5 ປີແມ່ນການເດີນທາງທີ່ຫຍຸ້ງຍາກ ແລະ ເປັນໜ້າຈົດຈຳຂອງປະຊາຊົນຫວຽດນາມ ແລະ ຊາວຫວຽດນາມ ອາໄສຢູ່ ຝລັ່ງ.
ຢູ່ປາຣີ, ນະຄອນຫຼວງຂອງຝລັ່ງ, ຂະບວນການຊາວຫວຽດນາມ ຢູ່ຝລັ່ງ ໄດ້ໜູນຊ່ວຍຄະນະຜູ້ແທນທັງພາກເໜືອ ແລະ ພາກໃຕ້ຄືກັນ. ຫວຽດນາມເຮົາເປັນຈິດໜຶ່ງໃຈດຽວ. ເຖິງວ່າຄະນະຜູ້ແທນສອງຝ່າຍຈະຢູ່ສອງບ່ອນທີ່ແຕກຕ່າງກັນ, ແຕ່ໃນການເຈລະຈາ ມີຈຸດໝາຍດຽວກັນເຊິ່ງແມ່ນ ເພື່ອຟື້ນຟູສັນຕິພາບໃຫ້ແກ່ປະເທດຊາດ.
ໄຊຊະນະຂອງສັນຍາປາຣີ ແມ່ນຍ້ອນການປະກອບສ່ວນຂອງຊາວຫວຽດນາມ ທີໄປຮ່ຳຮຽນ ແລະ ເຮັດວຽກຢູ່ ຝລັ່ງ - ບັນດາຜູ້ທີ່ໄດ້ໜູນຊ່ວຍອັນງຽບໆ, ປົກປັກຮັກສາ ແລະ ສະໜັບສະໜູນໃຫ້ຄະນະຜູ້ແທນຫວຽດນາມ 2 ຄະນະເພື່ອປະຕິບັດພາລະກິດຢ່າງສຳເລັດຜົນ.
ໃນໃຈຂອງລູກຫຼານຊາວຫວຽດນາມ ຢູ່ຝລັ່ງ, ຖ້າປະເທດຊາດຕ້ອງການ, ຖ້າສາມາດເຮັດຫຍັງໄດ້, ພວກເຂົາກໍ່ກຽມພ້ອມ ບໍ່ວ່າຈະຫຍຸ້ງຍາກປານໃດ, ເພາະວ່າເຂົາເຈົ້າຮູ້ວ່າ ຄວາມຫຍຸ້ງຍາກເຫຼົ່ານີ້ບໍ່ມີຫຍັງເມື່ອທຽບໃສ່ກັບຄວາມທຸກຍາກຂອງພີ່ນ້ອງຮ່ວມຊາດໃນທົ່ວປະເທດ ໄດ້ຮັບຄວາມເສຍຫາຍໃນຄາວນັ້ນ. ບ້ານເກີດເມືອງນອນ ໝາຍເຖິງຄວາມຮັກແພງອັນໜັກແນ້ນຢູ່ໃນໃຈຂອງຊາວຫວຽດນາມທຸກຄົນ. ຊາວຫວຽດນາມຢູ່ຕ່າງປະເທດ ບໍ່ສາມາດຕັດແຍກອອກຈາກປະເທດຊາດຫວຽດນາມໄດ້.
ມີບັນດາສະມາຊິກສະຫະພັນຊາວຫວຽດນາມ ອາໄສຢູ່ຝລັ່ງ ເຂົ້າຮ່ວມຄະນະເຈລະຈາສັນຍາປາ ກໍ່ມີບັນດາສະມາຊິກຂອງສະມາຄົມ ໄດ້ເຂົ້າຮ່ວມບັນດາກຳລັງຂົນສົ່ງແບບງຽບໆ ຄື: ການບໍລິຫານ, ສາທາລະນະສຸກ, ປ້ອງກັນຄວາມສະຫງົບໃຫ້ແກ່ຄະນະ, ປຸງແຕ່ງ ແລະ ພິມເອກະສານ; ຫຼື ຮ່ວມມືກັບສະມາຄົມມິດຕະພາບ ຝລັ່ງ - ຫວຽດນາມ ແລະ ພັກກອມມູນິດ ຝລັ່ງ ເພື່ອປຸກລະດົມການມິດຕິງ...
ໃນໄລຍະການເດີນທາງເກືອບ 5 ປີ, ຊາວຫວຽດນາມ ອາໄສຢູ່ຕ່າງປະເທດ ຍາມໃດກໍ່ສະໜິດສະໜົມກັບ 2 ຄະນະ ແລະ ກໍ່ສະໜິດແໜ້ນຄືກັບສະມາຊິກໃນຄອບຄົວ. ບຸນປີໃໝ່ແຕ່ລະຄັ້ງ, ໃນໂອກາດພົບປະກັບຊາວຫວຽດນາມ ອາໄສຢູ່ຝລັ່ງ ທີ່ຢູ່ສຳນັກຂອງສະມາຄົມຊາວຫວຽດນາມ ອາໄສຢູ່ ຝລັ່ງ ຫຼື ເຂົ້າຮ່ວມງານບຸນຊາວຫວຽດນາມ ອາໄສຢູ່ຕ່າງປະເທດ ເພື່ອສະເຫຼີມສະຫຼອງບຸນເຕັດ ຢູ່ Maubert, ຄະນະຜູ້ແທນກໍ່ຖາມຂ່າວຄາວຢ່າງສະໜິດສະໜົມ ແລະ ໄດ້ມີການພົບປະແລກປ່ຽນຂໍ້ມູນກ່ຽວກັບສະພາບການຂອງປະເທດຊາດ ແລະ ຄວາມຄືບໜ້າຂອງການເຈລະຈາ.
ວັນທີ 27 ມັງກອນ 1973 ແມ່ນຂີດໝາຍປະຫວັດສາດ. ຂ້າພະເຈົ້າຕື້ນຕັນໃຈຈົນກັ້ນນ້ຳຕາບໍ່ຢູ່, ເມື່ອທຸງສີແດງດາວເຫຼືອງ ພ້ອມກັບທຸງຂຽວແດງດາວເຫຼືອງປິວສະບັດຢູ່ໃຕ້ທ້ອງຟ້າລະດູໜາວທີ່ໜາວຈັດ. ຂ້າພະເຈົ້າຮູ້ສຶກອຸ່ນໃຈ ແລະ ເອກອ້າງທະນົງໃຈ ຍ້ອນເປັນຄົນຫວຽດນາມ. ຕອນເຊົ້າວັນທີ 27 ມັງກອນ 1973, ພໍ່ອມ່ພີ່ນ້ອງຊາວຫວຽດນາມ ອາໄສຢູ່ຕ່າງປະເທດ ໄດ້ນັດກັນຢູ່ບັນດາສະຖານີລົດໄຟໃຕ້ດິນ, ບັນດາຮ້ານກາເຟທີ່ຢູ່ໃກ້ກັບບ່ອນດຳເນີນກອງປະຊຸມ, ທຸງສີແດງດາວເຫຼືອງ ພ້ອມກັບທຸງຂຽວແດງດາວເຫຼືອງ ໄດ້ມີພ້ອມໃນຕົວເຂົາເຈົ້າແລ້ວ.
ຄຳຮຸ່ງ