ຫວ່າງແລ້ວນີ້, ຢູ່ນະຄອນຫຼວງ Moscow, ລັດເຊຍ, ສະມາຄົມປິງປັອງຫວຽດນາມ ປະຈຳ ລັດເຊຍ ໄດ້ຈັດຕັ້ງງານແຂ່ງຂັນລະດູໜາວ 2022, ເຊິ່ງໄດ້ເຕົ້າໂຮມນັກກິລາຫຼາຍສິບຄົນທີ່ມາຈາກສະໂມສອນປິງປັອງຢູ່ Moscow ເຂົ້າຮ່ວມການແຂ່ງຂັນ.
ກ່າວຄຳເຫັນທີ່ພິທີໄຂງານແຂ່ງຂັນ, ທ່ານປະທານສະມາຄົມປິງປັອງຫວຽດນາມ ປະຈຳ ລັດເຊຍ ໂດວັນຕ໊ຽວ ເນັ້ນໜັກວ່າ: ກິລາມີບົດບາດສຳຄັນທີ່ສຸດໃນການຮັກສາ ແລະ ຍົກສູງສຸຂະພາບ, ປະກອບສ່ວນຊ່ວຍໃຫ້ມະນຸດພັດທະນາຮອບດ້ານທັງດ້ານສະຕິປັນຍາ ແລະ ຮ່າງກາຍ, ຮັບໃຊ້ແຮງງານ, ປະຕິບັດງານ ແລະ ຮໍ່າຮຽນໄດ້ດີ.
ຊາວຫວຽດນາມ ອາໄສຢູ່ລັດເຊຍ ແຂ່ງຂັນປິງປັອງເພື່ອຕ້ອນຮັບປີໃໝ່. ພາບ: nhandan
ໂດຍຕອບສະໜອງບັນດາຂະບວນການແຂ່ງຂັນຮັກຊາດ ມຸ່ງໄປເຖິງປະເທດຊາດ ກໍ່ຄືບັນຍາກາດອັນຟົດຟື້ນຂອງການຕ້ອນຮັບປີໃໝ່ທີ່ໃກ້ຈະມາເຖິງ, ການແຂ່ງຂັນປິງປັອງລະດູໜາວ 2022 ສືບຕໍ່ສ້າງກໍາລັງໜູນຍົກສູງຄຸນນະພາບຊີວິດ ດ້ານຈິດໃຈ, ກໍ່ຄືຂະບວນການອອກກໍາລັງກາຍຂອງປະຊາຄົມຊາວ ຫວຽດນາມ ຢູ່ລັດເຊຍ.
ຕາງໜ້າສະຖານທູດຫວຽດນາມ ປະຈໍາ ລັດເຊຍ, ຫົວໜ້າວຽກງານປະຊາຄົມ ທ່ານ ຫງວຽນຕຸ່ງເລີມ ຢືນຢັນວ່າ ສະມາຄົມ ປິງປັອງ ຫວຽດນາມ ຢູ່ ລັດເຊຍ ຫາກໍ່ໄດ້ຮັບການສ້າງຕັ້ງ, ແຕ່ກໍ່ມີຫຼາຍການເຄື່ອນໄຫວກິດຈະກໍາທີ່ໂດດເດັ່ນ. ທ່ານ ຫງວຽນຕຸ່ງເລີມ ປາດຖະໜາວ່າ ສະມາຄົມຈະສືບຕໍ່ຈັດຕັ້ງການແຂ່ງຂັນຫຼາຍຄັ້ງໃນໄລຍະຈະມາເຖິງ, ເພື່ອຍົກສູງລະດັບນັກກິລາ, ຊຸກຍູ້ການເຄື່ອນໄຫວຝຶກຊ້ອມກິລາໃນປະຊາຄົມ.
ບູນມີ
