ຄະນະພະນັກງານກອງທັບປະຊາຊົນລາວ ຢ້ຽມຢາມກອງບັນຊາການທະຫານແຂວງ ໄຕນິງ
	ຄະນະນັກຂ່າວແຫ່ງ ສປປ ລາວ ມາຢ້ຽມຢາມ ແລະເຮັດວຽກຢູ່ໜັງສືພິມກອງທັບປະຊາຊົນຫວຽດນາມ

ຕ້ອນຮັບຄະນະ, ໜັງສືພິມກອງທັບປະຊາຊົນມີສະຫາຍພັນເອກພິເສດ ຫງວຽນຮົ່ງຫາຍ, ຮອງຫົວໜ້າບັນນາທິການ; ບັນດາສະຫາຍໃນຄະນະພັກ, ຄະນະບັນນາທິການ ພ້ອມດ້ວຍຫົວໜ້າ, ຮອງຫົວໜ້າບັນດາພະແນກ ແລະຂະແໜງການຂອງໜັງສືພິມກອງທັບປະຊາຊົນ.

ສະຫາຍພັນເອກພິເສດ ຫງວຽນຮົ່ງຫາຍ, ຮອງຫົວໜ້າບັນນາທິການໜັງສືພິມກອງທັບປະຊາຊົນຫວຽດນາມ ກ່າວຄໍາເຫັນທີ່ການເຮັດວຽກ. ພາບ: qdnd.vn

ຕາງໜ້າຄະນະພັກ, ຄະນະບັນນາທິການ ພ້ອມດ້ວຍຖັນແຖວນັກຂ່າວ, ນັກບັນນາທິການ, ພະນັກງານ, ນັກຮົບໜັງສືພິມກອງທັບປະຊາຊົນຫວຽດນາມ, ສະຫາຍພັນເອກພິເສດ ຫງວຽນຮົ່ງຫາຍ ສະແດງຄວາມປິຕິຊົມຊື່ນຍິນດີທີ່ໄດ້ຕ້ອນຮັບຄະນະພະນັກງານກອງທັບປະຊາຊົນລາວ ແລະອວຍພອນໃຫ້ຄະນະເກັບກຳໄດ້ຄວາມຮູ້, ບົດຮຽນທີ່ມີຜົນປະໂຫຍດຫຼາຍຢ່າງ, ມີຄວາມປະທັບໃຈ ແລະຄວາມຊົງຈໍາອັນດີງາມໃນໄລຍະຝຶກອົບຮົມຢູ່ຫວຽດນາມ. ສະຫາຍພັນເອກພິເສດ ຫງວຽນຮົ່ງຫາຍ ເນັ້ນໜັກວ່າ: ປີ 2022 ແມ່ນປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ, ເພື່ອສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ (5-9-1962 / 5-9-2022) ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມືຫວຽດນາມ-ລາວ (18-7-1977 / 18-7-2022), ພິທີສະເຫຼີມສະຫຼອງໄດ້ຈັດຂຶ້ນຢ່າງສົມກຽດຢູ່ນະຄອນຫຼວງວຽງຈັນ ແລະນະຄອນຫຼວງຮ່າໂນ້ຍ. ການຢ້ຽມຢາມຂອງຄະນະພະນັກງານກອງທັບປະຊາຊົນລາວ ໄດ້ປະກອບສ່ວນຮັດແໜ້ນນ້ຳໃຈສາມັກຄີ, ມິດຕະພາບ ແລະສະໜິດຕິດພັນລະຫວ່າງກອງທັບສອງປະເທດ ຫວຽດນາມ - ລາວ.

ບັນດາຜູ້ແທນເຂົ້າຮ່ວມການເຮັດວຽກ. ພາບ: qdnd.vn

ໃນຂອບເຂດການເຮັດວຽກ, ສະຫາຍພັນເອກພິເສດ ຫງວຽນຮົ່ງຫາຍ ໄດ້ສະເໜີໂດຍຫຍໍ້ກ່ຽວກັບການກຳເນີດ, ພັດທະນາ ແລະການເຕີບໃຫຍ່ຂອງໜັງສືພິມກອງທັບປະຊາຊົນ ໃນເວລາກວ່າ 70 ປີຜ່ານມາ. ໂດຍເປັນອົງການຂອງຄະນະພັກການທະຫານສູນກາງ ແລະກະຊວງປ້ອງກັນປະເທດ, ສຽງຂອງກໍາລັງປະກອບອາວຸດ ແລະປະຊາຊົນຫວຽດນາມ, ໜັງສືພິມກອງທັບປະຊາຊົນແມ່ນໜຶ່ງໃນບັນດາໜັງສືພິມການເມືອງທີ່ມີອິດທິພົນຊື່ສຽງແຖວໜ້າໃນລະບົບສື່ມວນຊົນປະຕິວັດຫວຽດນາມ, ໂດຍປະຕິບັດໜ້າທີ່ໂຄສະນາເຜີຍແຜ່ກ່ຽວກັບສອງໜ້າທີ່ຍຸດທະສາດຂອງປະເທດນັ້ນແມ່ນສ້າງສາ ແລະປົກປັກຮັກສາປະເທດຊາດສັງຄົມນິຍົມຫວຽດນາມ. ໜັງສືພິມກອງທັບປະຊາຊົນ ໄດ້ຮັບຄວາມເອົາໃຈໃສ່ ແລະໄວ້ເນື້ອເຊື່ອໃຈຈາກການນໍາພັກ, ລັດ ແລະກອງທັບ; ມີອິດທິພົນຊື່ສຽງ ແລະມີຜົນສະທ້ອນຢ່າງເລິກເຊິ່ງກວ້າງຂວາງໃນກອງທັບ ແລະສັງຄົມ; ປະກອບສ່ວນຢ່າງຕັ້ງໜ້າເຂົ້າໃນການຕໍ່ສູ້ປົດປ່ອຍປະເທດຊາດ, ປົກປັກຮັກສາປະເທດ ກໍ່ຄືພາລະກິດສ້າງສາ ແລະປົກປັກຮັກສາປະເທດຊາດໃນປະຈຸບັນ.

ໂດຍປະຕິບັດນະໂຍບາຍພົວພັນການຕ່າງປະເທດທີ່ກວ້າງໃຫຍ່ຂອງພັກ ແລະລັດຫວຽດນາມ, ໜັງສືພິມກອງທັບປະຊາຊົນ ໄດ້ສຸມໃສ່ໂຄສະນາກ່ຽວກັບສະພາບການໂລກ, ພິເສດແມ່ນໂຄສະນາເຜີຍແຜ່ກ່ຽວກັບປະເທດ, ປະຊາຊົນ ແລະບັນດາຜົນງານດີເດັ່ນຂອງປະເທດລາວ ແລະການພົວພັນແບບພິເສດລະຫວ່າງ ຫວຽດນາມ ແລະ ລາວ.

ສະຫາຍພັນໂທ ອາໄພ ອະໄພຍະວົງ, ຮອງຫົວໜ້າບັນນາທິການໜັງສືພິມກອງທັບປະຊາຊົນລາວ ກ່າວຄໍາເຫັນທີ່ການເຮັດວຽກ. ພາບ: qdnd.vn

ກ່າວຄຳເຫັນທີ່ການເຮັດວຽກ, ສະຫາຍພັນໂທ ອາໄພ ອະໄພຍະວົງ ໄດ້ສະແດງຄວາມຂອບອົກຂອບໃຈໜັງສືພິມກອງທັບປະຊາຊົນຫວຽດນາມ ທີ່ໄດ້ໃຫ້ການຕ້ອນຮັບອັນອົບອຸ່ນ, ສ້າງເງື່ອນໄຂສະດວກໃຫ້ຄະນະພະນັກງານກອງທັບປະຊາຊົນລາວ ໄດ້ຊອກຮູ້ ແລະແລກປ່ຽນວຽກງານສື່ມວນຊົນ; ພ້ອມກັນນັ້ນ, ຢືນຢັນວ່າ ຜ່ານການຢ້ຽມຢາມຄັ້ງນີ້, ໄດ້ປະກອບສ່ວນເພີ່ມທະວີຄວາມສາມັກຄີ, ການແບ່ງປັນ ແລະແລກປ່ຽນວຽກງານສື່ມວນຊົນ; ພ້ອມກັນນັ້ນສະຫາຍ ອາໄພ ອະໄພຍະວົງ ຢັ້ງຢືນວ່າ ຜ່ານການຢ້ຽມຢາມ, ເຮັດວຽກຄັ້ງນີ້ໄດ້ປະກອບສ່ວນເພີ່ມທະວີວິຊາສະເພາະດ້ານສື່ມວນຊົນລະຫວ່າງສື່ມວນຊົນກອງທັບສອງປະເທດ, ແລະເປັນພື້ນຖານສະເໜີຕໍ່ການນຳກະຊວງປ້ອງກັນປະເທດ, ກົມໃຫຍ່ການເມືອງກອງທັບປະຊາຊົນສອງປະເທດ ບັນດາມາດຕະການຊຸກຍູ້ການຮ່ວມມືວຽກງານສື່ມວນຊົນໃນຊຸມປີຕໍ່ໄປ.

ສະຫາຍພັນເອກພິເສດ ຫງວຽນຮົ່ງຫາຍ, ຮອງຫົວໜ້າບັນນາທິການໜັງສືພິມກອງທັບປະຊາຊົນຫວຽດນາມ ມອບຂອງຂວັນທີ່ລະນຶກ ໃຫ້ສະມາຊິກໃນຄະນະ. ພາບ: qdnd.vn

ໃນໄລຍະຈະມາເຖິງ, ສະຫາຍພັນໂທ ອາໄພ ອະໄພຍະວົງ ໄດ້ສະເໜີໃຫ້ໜັງສືພິມກອງທັບປະຊາຊົນຫວຽດນາມ ແລະບັນດາອົງການສື່ມວນຊົນກອງທັບປະຊາຊົນລາວ ຄວນເພີ່ມທະວີການຮ່ວມມືໃນຂົງເຂດກໍ່ສ້າງ ແລະບຳລຸງນັກຂ່າວ, ນັກບັນນາທິການ, ແບ່ງປັນຂໍ້ມູນຂ່າວສານ ແລະແລກປ່ຽນວິຊາສະເພາະ ເພື່ອປະຕິບັດໜ້າທີ່ໂຄສະນາຂອງອົງການສື່ມວນຊົນກອງທັບຂອງສອງປະເທດໃຫ້ດີກວ່າອີກ, ເພື່ອແນໃສ່ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຕີແບບພິເສດ ແລະການຮ່ວມມືຮອບດ້ານຫວຽດນາມ - ລາວ ໃຫ້ຂຽວສົດງົດງາມ ໝັ້ນຄົງທະນົງແກ່ນໄປຊຊົ່ວກາລະນານ.