ຫວ່າງແລ້ວນີ້, ຢູ່ຮ່າໂນ້ຍ, ທ່ານຮອງລັດຖະມົນຕີການຕ່າງປະເທດຫວຽດນາມ ຟ້າມກວາງຮ້ຽວ ໄດ້ມີການເຈລະຈາກັບທ່ານ Domingos Vieira Lopes ຮອງລັດຖະມົນຕີກະຊວງການຕ່າງປະເທດອັງໂກລາ ເນື່ອງໃນໂອກາດມາຢ້ຽມຢາມ ຫວຽດນາມ ຢ່າງເປັນທາງການ.
ທີ່ການເຈລະຈາ, ສອງຝ່າຍໄດ້ຕີລາຄາສູງການສົມທົບກັນຢ່າງຕັ້ງໜ້າ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສສາກົນໃນໄລຍະຜ່ານມາ.
 |
| ຊຸກຍູ້ການພົວພັນຮ່ວມມືທີ່ເປັນມູນເຊື້ອລະຫວ່າງຫວຽດນາມ ແລະ ອັງໂກລາ. ພາບ: thoidai.com.vn |
ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການເສດຖະກິດ-ສັງຄົມຂອງ ແຕ່ລະປະເທດ; ປຶກສາຫາລືບັນດາມາດຕະການ ແລະ ທິດທາງຍູ້ແຮງການຮ່ວມມືໃນຂົງເຂດການເມືອງ - ການທູດ, ເສດຖະກິດ, ການຄ້າ, ສາທາລະນະສຸກ - ການສຶກສາ ໃຫ້ຫຼາຍກວ່າອີກ.
ສອງຝ່າຍເຫັນດີເປັນເອກະພາບຖືວ່າ ຄວາມສາມາດບົ່ມຊ້ອນການຮ່ວມມືລະຫວ່າງສອງປະເທດຍັງໃຫຍ່ຫຼວງຢູ່; ຕ້ອງຊຸກຍູ້ການແລກປ່ຽນຄະນະຜູ້ແທນ, ພິເສດແມ່ນຄະນະຜູ້ແທນຂັ້ນສູງ; ຍູ້ແຮງການແລກປ່ຽນການຄ້າ, ສູ້ຊົນຍົກວົງເງິນການຄ້າສອງຝ່າຍໃຫ້ບັນລຸກວ່າ 100 ລ້ານ USD ໃນຊຸມປີຕໍ່ໜ້າ; ຄົ້ນຄວ້າກົນໄກການຮ່ວມມື ພ້ອມທັງສ້າງກອບນິຕິກໍາໃຫ້ສົມບູນແບບ ເພື່ອອໍານວຍຄວາມສະດວກໃຫ້ແກ່ການຮ່ວມມືສອງຝ່າຍ; ເຫັນດີເປັນເອກະພາບຈະຈັດຕັ້ງກອງປະຊຸມຄັ້ງທີ 7 ຂອງຄະນະກຳມະການລະຫວ່າງລັດຖະບານຫວຽດນາມ - ອັງໂກລາ ຢູ່ Luanda ໂດຍໄວ.
ພາຍຫຼັງການເຈລະຈາ, ທ່ານຮອງລັດຖະມົນຕີກະຊວງການຕ່າງປະເທດ ຟ້າມກວາງຮ້ຽວ ແລະ ທ່ານຮອງລັດຖະມົນຕີ Domingos Vieira Lopes ໄດ້ຮ່ວມກັນເປີດງານວາງສະແດງຮູບພາບທີ່ມີຮູບພາບກ່ວາ 30 ແຜ່ນກ່ຽວກັບວັດທະນະທຳ, ປະເທດຊາດ ແລະ ປະຊາຊົນ ອັງໂກລາ ຢູ່ສຳນັກງານກະຊວງການຕ່າງປະເທດ.
ບູນມີ
