| ອົງການ UNICEF ໄດ້ຕີລາຄາຫວຽດນາມ ບັນລຸຄວາມຄືບໜ້າອັນໃຫຍ່ຫຼວງໃນການເບິ່ງແຍງ, ປົກປ້ອງເດັກ | |
| ອົດສະຕາລີ ແລະ UNICEF ສືບຕໍ່ໜູນຊ່ວຍວັກຊິນກັນໂຄວິດ-19 ຈຳນວນ 4,2 ລ້ານໂດສ ໃຫ້ແກ່ ຫວຽດນາມ |
ຕາມຂໍ້ມູນຂ່າວສານຈາກກອງທຶນເພື່ອເດັກ ສະຫະປະຊາຊາດ (UNICEF) ປະຈຳ ຫວຽດນາມ, ຫວ່າງແລ້ວນີ້, ທ່ານນາງ Catherine Russell ຜູ້ອຳນວຍການໃຫຍ່ UNICEF ໄດ້ສິ້ນສຸດການຢ້ຽມຢາມຫວຽດນາມ ເປັນເວລາ 3 ວັນ, ໃນນັ້ນ ທ່ານນາງ Catherine Russell ໄດ້ຕີລາຄາສູງບັນດາຜົນງານທີ່ຕັ້ງໜ້າໃນການປົກປ້ອງ ແລະ ດູແລເດັກຂອງສະຫະປະຊາຊາດ, ພ້ອມກັນນັ້ນ ກໍຮຽກຮ້ອງໃຫ້ມີການດຳເນີນການຢ່າງຮີບດ່ວນ ເພື່ອແກ້ໄຂສິ່ງທ້າທາຍຕ່າງໆ ເຊັ່ນ: ການຂາດສານອາຫານ ແລະ ຄວາມບໍ່ສະເໝີພາບ, ເຊິ່ງບັນຫາເຫຼົ່ານີ້ຍິ່ງໜັກໜ່ວງຫຼາຍຂຶ້ນ ຍ້ອນພະຍາດໂຄວິດ-19 ແລະ ການປ່ຽນແປງຂອງດິນຟ້າອາກາດ.
 |
ທ່ານນາງ Catherine Russell ກ່າວວ່າ “ໃນໄລຍະສອງສາມທົດສະວັດຜ່ານມາ, ຫວຽດນາມ ໄດ້ມີຄວາມຄືບໜ້າຢ່າງໃຫຍ່ຫຼວງ ໃນການຮັບປະກັນໃຫ້ເດັກນ້ອຍໃນທົ່ວປະເທດມີສຸຂະພາບແຂງແຮງ, ປອດໄພ, ໄດ້ຮັບການສຶກສາ ແລະ ສ້າງເງື່ອນໄຂສະດວກເພື່ອເສີມຂະຫຍາຍກຳລັງບົ່ມຊ້ອນຂອງຕົນໄດ້ຢ່າງເຕັມທີ່”.
ຜູ້ອຳນວຍການໃຫຍ່ UNICEF ຢືນຢັນວ່າ ອົງການນີ້ ຈະສືບຕໍ່ສົມທົບກັບລັດຖະບານ ຫວຽດນາມ ແລະ ບັນດາຄູ່ຮ່ວມມື ເພື່ອໃຫ້ເດັກນ້ອຍທຸກຄົນ, ພິເສດແມ່ນຜູ້ທີ່ມີຄວາມສ່ຽງສູງ ໄດ້ຮັບການບໍລິການ ແລະ ໜູນຊ່ວຍທີ່ຈຳເປັນ.
ຄຽງຂ້າງບັນດາຜົນງານທີ່ບັນລຸໄດ້, ທ່ານນາງ Catherine Russell ຜູ້ອຳນວຍການບໍລິຫານ UNICEF ໃຫ້ຮູ້ວ່າ: ການປົກປ້ອງ ແລະ ດູແລເດັກຢູ່ ຫວຽດນາມ ຍັງປະເຊີນໜ້າກັບຄວາມສິ່ງທ້າທາຍຫຼາຍຢ່າງ.
 |
| UNICEF: ຫວຽດນາມ ໄດ້ມີຄວາມຄືບໜ້າຢ່າງໃຫຍ່ຫຼວງໃນການດູແລ ແລະ ປົກປ້ອງເດັກ |
ຍັງມີເດັກນ້ອຍສ່ວນໜຶ່ງທີ່ປະເຊີນກັບຄວາມທຸກຍາກ ແລະ ບໍ່ໄດ້ເຂົ້າເຖິງການບໍລິການປົກປ້ອງ, ກໍ່ຄື ການບໍລິການພື້ນຖານ, ພິເສດແມ່ນເດັກນ້ອຍຊົນເຜົ່າສ່ວນໜ້ອຍ, ເດັກນ້ອຍທີ່ພໍ່ແມ່ໄປເຮັດວຽກຫ່າງໄກຈາກບ້ານ ແລະ ເດັກນ້ອຍພິການ. ສະພາບການນີ້ ໄດ້ຮັບຜົນສະທ້ອນຕື່ມອີກຈາກຜົນກະທົບຂອງໂລກລະບາດ COVID-19. ພ້ອມກັນນັ້ນ, ກໍຍັງມີສະພາບເດັກຂາດສານອາຫານຢ່າງໜັກໜ່ວງ.
ອີງຕາມອົງການ UNICEF, ເດັກນ້ອຍທີ່ຂາດສານອາຫານຮ້າຍແຮງ, ບໍ່ໄດ້ຮັບການປິ່ນປົວ, ມີຄວາມສ່ຽງສູງຕໍ່ການເສຍຊີວິດ ຫຼື ມີຜົນກະທົບຕໍ່ຮ່າງກາຍ ແລະ ສະຕິຕະຫຼອດຊີວິດ.
ໃນຂອບເຂດການຢ້ຽມຢາມ, ທ່ານນາງ Catherine Russell ຜູ້ອຳນວຍການບໍລິຫານ UNICEF ມີບັນດາການເຄື່ອນໄຫວຕົວຈິງຢູ່ແຂວງຢາລາຍ. ຢູ່ທີ່ນັ້ນ, ທ່ານນາງ Catherine Russell ໄດ້ໄປຢ້ຽມຢາມສູນການແພດ ແລະ ໂຮງຫມໍ, ບ່ອນທີ່ເດັກນ້ອຍໄດ້ກວດ ແລະ ປິ່ນປົວສໍາລັບອາການຂາດສານອາຫານທີ່ຮ້າຍແຮງ.
ຕາມທ່ານຜູ້ອຳນວຍການໃຫຍ່ UNICEF ແລ້ວ, ອົງການນີ້ພວມຂົນຂວາຍ ໃນເອົາການປິ່ນປົວພະຍາດຂາດສານອາຫານຢ່າງຮ້າຍແຮງ ແລະ ຊຳເຮື້ອ ເຂົ້າໃນໂຄງການປະກັນສຸຂະພາບແຫ່ງຊາດ ຫວຽດນາມ ແລະ ເພີ່ມທະວີການໜູນຊ່ວຍສັງຄົມ ເພື່ອສະກັດກັ້ນສະພາບຂາດສານອາຫານໃນເດັກ.
 |
ກໍ່ຢູ່ແຂວງຢາລາຍ, ທ່ານນາງ Russell ໄດ້ໄປຢ້ຽມຢາມໂຮງຮຽນອະນຸບານ ແລະ ພົບປະກັບເດັກນ້ອຍ, ພໍ່ແມ່ ແລະ ສະມາຊິກອື່ນໆຂອງຊຸມຊົນ. UNICEF ສະໜັບສະໜູນການສຶກສາໃນໄວເດັກເຍົາວະຊົນຢ່າງແຮງ, ເປັນພື້ນຖານອັນສຳຄັນໃນການພັດທະນາສະຕິປັນຍາຂອງເດັກ.
ໂດຍເນັ້ນໜັກເຖິງຄວາມສ່ຽງທີ່ເດັກຈະຕ້ອງປະເຊີນໜ້າ ແມ່ນຜົນສະທ້ອນຈາກການປ່ຽນແປງຂອງດິນຟ້າອາກາດ ແລະ ຫວຽດນາມ ແມ່ນປະເທດທີ່ມີຄວາມສ່ຽງຕໍ່ໄພທຳມະຊາດຫຼາຍທີ່ສຸດໃນໂລກ, ໃນນັ້ນ ມີໄພນ້ຳຖ້ວມ ແລະ ດິນເຈື່ອນ, ທ່ານນາງ Catherine Russell ຜູ້ອຳນວຍການບໍລິຫານ UNICEF ຕີລາຄາສູງຄຳໝັ້ນສັນຍາຂອງລັດຖະບານ ຫວຽດນາມ ໃນການແກ້ໄຂວິກິດການດິນຟ້າອາກາດ ແລະ ຄວາມສ່ຽງທີ່ການປ່ຽນແປງດິນຟ້າອາກາດສ້າງໃຫ້ເດັກນ້ອຍ.
ທ່ານນາງ Russel ກ່າວວ່າ “ຜົນກະທົບຈາກການປ່ຽນແປງຂອງດິນຟ້າອາກາດ ເປັນໄພຂົ່ມຂູ່ທີ່ບໍ່ເຄີຍມີມາກ່ອນຕໍ່ກັບສຸຂະພາບ, ໂພຊະນາການ, ການດຳລົງຊີວິດ ແລະ ການພັດທະນາຂອງເດັກນ້ອຍໃນທົ່ວໂລກ.
"ການລົງທຶນໃນການຍົກສູງການປັບຕົວ ແລະ ຄວາມອາດສາມາດໃນການຟື້ນຟູ ແມ່ນສິ່ງຕົ້ນຕໍເພື່ອແກ້ໄຂບັນຫາທີ່ກ່ຽວຂ້ອງກັບການປ່ຽນແປງຂອງດິນຟ້າອາກາດ ກໍ່ຄືຄວາມບໍ່ສະເຫມີພາບທີ່ການປ່ຽນແປງດິນຟ້າອາກາດສ້າງຂຶ້ນໃນອະນາຄົດ."
 |
ຢູ່ ຫວຽດນາມ, ອົງການ UNICEF ໄດ້ໜູນຊ່ວຍລັດຖະບານໃນການບຳລຸງສ້າງຄູອາຈານ ແລະ ປະຕິຮູບຫຼັກສູດການສິດສອນ. ຄວາມພະຍາຍາມເຫຼົ່ານີ້ ຈະຊ່ວຍໃຫ້ເດັກນ້ອຍປັບຕົວເຂົ້າກັບການປ່ຽນແປງຂອງດິນຟ້າອາກາດ ແລະ ເສີມຂະຫຍາຍຄວາມສາມາດໃນການສ້າງວິທີແກ້ໄຂຂອງເດັກນ້ອຍ.
ກໍ່ໃນຂອບເຂດການຢ້ຽມຢາມ, ຜູ້ອຳນວຍການບໍລິຫານ UNICEF ໄດ້ມີການພົບປະ ແລະ ເຮັດວຽກກັບບັນດາການນຳຂັ້ນສູງຂອງລັດຖະບານ ແລະ ສະພາແຫ່ງຊາດ; ບັນດາການນຳບັນດາກະຊວງ, ຂະແໜງການປຶກສາຫາລືກ່ຽວກັບວຽກງານປົກປ້ອງ, ດູແລ ແລະ ການສຶກສາສຳລັບເດັກ...
ການຢ້ຽມຢາມຂອງທ່ານນາງ Russell ມີຂຶ້ນໃນຈຸດເວລາທີ່ຫວຽດນາມ ພວມມີການເຄື່ອນໄຫວຫຼາຍຢ່າງເພື່ອສະເຫຼີມສະຫຼອງ 45 ປີແຫ່ງການເຂົ້າເປັນສະມາຊິກສະຫະປະຊາຊາດ.
ຄຳຮຸ່ງ
