ເຂົ້າຮ່ວມໃນພິທີດັ່ງກ່າວ ມີທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ບັນດາລັດຖະມົນຕີ ຮອງລັດຖະມົນຕີ ພາກສ່ວນກ່ຽວຂ້ອງ ແຂກຖືກເຊີນ ແລະ ປະຊາຊົນເຂົ້າຮ່ວມ.
ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ໄດ້ຂຶ້ນລາຍງານການກະກຽມຈັດງານ ແລະ ຫວນຄືນມູນເຊື້ອວັນສ້າງຕັ້ງແນວລາວສ້າງຊາດວ່າ: ການຈັດງານຄັ້ງນີ້ເພື່ອເປັນການສ້າງບັນຍາກາດມ່ວນຊື່ນ ສົ່ງເສີມມູນເຊື້ອຄວາມສາມັກຄີ, ອະນຸຮັກ, ຮັກສາວັດທະນະທຳຮີດຄອງປະເພນີອັນດີງາມຂອງຊາດ, ມູນເຊື້ອດຸໝັັ່ນອອກແຮງງານສ້າງຜະລິດຕະພັນ, ທີ່ເປັນເອກະລັກສີສັນຂອງແຕ່ລະຊົນເຜົ່າ ສົ່ງເສີມການທ່ອງທ່ຽວ ແລະ ສ້າງວຽກງານກອງທຶນຊົນເຜົ່າ ແລະ ເປັນການສ້າງຂະບວນການ ຄຳນັບຮັບຕ້ອນວັນສ້າງຕັ້ງແນວລາວສ້າງຊາດ ຄົບຮອບ 70 ປີ (13/8/1950-13/8/2020).
 |
ບັນດາຜູ້ນຳປະເທດລາວ ໃນງານສະແດງສິລະປະວັນນະຄະດີ ແລະ ຜະລິດຕະພັນຂອງບັນດາຊົນເຜົ່າ ຄັ້ງທີ 1. (ພາບ: vientianemai)
ພາຍໃນງານຈັດໃຫ້ມີຫຼາຍກິດຈະກຳການສະແດງສິລະປະວັນນະຄະດີຂອງບັນດາເຜົ່າ ເປັນຕົ້ນ ຮ້ອງເພງ ຂັບລຳ ຟ້ອນຂອງເຜົ່າລາວ, ເຜົ່າກຶມມຸ, ເຜົ່າມົ້ງ, ເຜົ່າບຣູ, ເຜົ່າໄຕດຳ, ເຜົ່າໄຕແດງ, ເຜົ່າຜູ້ນ້ອຍ, ເຜົ່າຜູ້ໄທ ແລະ ຊົນເຜົ່າອື່ນໆ ທ່ຽວຊົມການວາງ ສະແດງຜະລິດຕະພັນຂອງບັນດາເຜົ່າ ທ່ຽວຊົມສວນພຶກສາເປັນການທ່ອງທ່ຽວທຳມະຊາດ ໃນນັ້ນ ປະກອບມີ: ຫໍວາງສະແດງວັດທະນະທຳຂອງບັນດາເຜົ່າ ເຮືອນຊົນເຜົ່າຕ່າງໆ ມີດອກໄມ້ນາໆຊະນິດທີ່ສວຍງາມ ແລະ ສະຖານທີ່ພັກຜ່ອນທີ່ເຢັນສະ ບາຍ ເດີນແບບຊຸດຊົນເຜົ່າຕ່າງໆໃນແຕ່ວັນ ແລະ ມີການຄົບງັນທັງເວັນ ແລະ ຄືນ ອັນໄດ້ເຮັດໃຫ້ພາຍໃນງານມີຄວາມເບີກ ບານມ່ວນຊື່ນ ເຊິ່ງມີຄົນເຂົ້າທ່ຽວຊົມງານດັ່ງກ່າວເປັນຈຳນວນຫຼວງຫຼາຍ.
ນອກນີ້ ພາຍໃນງານຍັງໄດ້ຈັດພິທີປະດັບຫຼຽນກາພັດທະນາໃຫ້ທ່ານ ພູວົງ ພະມີສິດ ກຳມະການສູນກາງແນວລາວສ້າງຊາດ ຄະນະທີ່ປຶກສາວຽກງານຊົນເຜົ່າ ປະທານສວນພຶກສາ ແລະ ທ່ານ ຄຳຫຼ້າ ດວງພະສຸກ ປະທານດວງພະສຸກກໍ່ສ້າງສ້ອມແປງ ຂົວທາງ-ເຄຫາສະຖານ ແລະ ຊົນລະປະທານ ຄະນະທີ່ປຶກສາວຽກງານຊົນເຜົ່າ ທີ່ມີຜົນງານປະກອບສ່ວນຊຸກຍູ້ວຽກງານຂອງສູນກາງແນວລາວສ້າງຊາດໃນໄລຍະຜ່ານມາ ມູນຄ່າ 198,3 ລ້ານກີບ ໃຫ້ກຽດປະດັບໂດຍທ່ານ ໄຊສົມພອນ ພົມວິຫານ ມອບໃບຍ້ອງຍໍໃຫ້ທ່ານ ພອນເທບ ພົນເສນາ ທ່ານ ເພັດສະໝອນ ເທບພະວົງ ທ່ານ ຢາຕ່ອຍ ຢາເມັ່ງຮູ້ ແລະ ທ່ານ ນາງ ດວງຕາ ມາດມະນີສອນ ທີ່ມີຜົນງານໃນການອຸປະຖຳເປັນເງິນສົດ ເຂົ້າເປັນກອງທຶນເພື່ອເຄື່ອນໄຫວວຽກງານຊົນ ເຜົ່າ ໃຫ້ກຽດມອບໂດຍທ່ານ ຄຳໃບ ດຳລັດ ຮອງປະທານສູນກາງແນວລາວສ້າງຊາດ.
ໂອກາດນີ້ ຄະນະຈັດງານຮ່ວມກັບເຈົ້າຂອງສວນພຶກສາ ຍັງໄດ້ຈັດພິທີບາສີສູ່ຂວັນໃຫ້ການນຳ ແລະ ຜູ້ທີ່ເຂົ້າຮ່ວມງານ ຊົມການສະແດງສິລະປະ ທ່ຽວຊົມຜະລິດຕະພັນສິນຄ້າໂອດ໋ອບ ຜະລິດຕະພັນບັນດາເຜົ່າຕ່າງໆ ທີ່ມາຈາກນະຄອນຫຼວງວຽງຈັນ ແຂວງສະຫວັນນະເຂດ ແລະ ທ່ຽວຊົມສວນພຶກສາດ້ວຍບັນຍາກາດທີ່ທຸກຄົນໃຫ້ຄວາມສົນໃຈ.
（ແຫຼ່ງຂໍ້ມູນ： https://www.vientianemai.net）
