ໃນຊຸມວັນທ້າຍເດືອນ ສິງຫາ 2022, ຫຼາຍກິດຈະກຳເພື່ອສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງ ຫວຽດນາມ - ລາວ ໄດ້ຈັດຂຶ້ນຢ່າງສົມກຽດຢູ່ຫຼາຍທ້ອງຖິ່ນໃນທົ່ວປະເທດ. ນີ້ກໍ່ແມ່ນກາລະໂອກາດເພື່ອໃຫ້ບັນດາທ້ອງຖິ່ນຫວນຄືນມູນເຊື້ອປະຫວັດສາດແຫ່ງການຕໍ່ສູ້ປົດປ່ອຍຊາດ ແລະ ສ້າງສາປະເທດຊາດທີ່ໄດ້ຕິດພັນກັບຊາຕາກຳຂອງສອງປະເທດ ແລະ ສອງຊາດຄືອ້າຍນ້ອງໃນຄອບຄົວດຽວກັນ ແລະ ຂະບວນການຮ່ວມມືກັບບັນດາແຂວງ, ນະຄອນຂອງປະເທດເພື່ອນລາວ.
ນະຄອນໂຮ່ຈີມິນ: ຊຸກຍູ້ການພົວພັນຢ່າງເລິກເຊິ່ງກັບບັນດາທ້ອງຖິ່ນຂອງລາວ
ກ່າວຄຳເຫັນທີ່ພິທີສະເຫຼີມສະຫຼອງທີ່ຈັດຂຶ້ນຢ່າງສົມກຽດໃນວັນທີ 30 ສິງຫາ 2022, ທ່ານເລຂາຄະນະພັກນະຄອນໂຮ່ຈີມິນ ຫງວຽນວັນເນນ ໃຫ້ຮູ້ວ່າ: ອົງຄະນະພັກ, ອຳນາດການປົກຄອງ ແລະ ປະຊາຊົນນະຄອນໂຮ່ຈີມິນ ຍາມໃດກໍ່ມີຄວາມຮັບຮູ້ຢ່າງເລິກເຊິ່ງໃນການຊຸກຍູ້ການພົວພັນຮ່ວມມືກັບບັນດາທ້ອງຖິ່ນຂອງລາວ.
ທ່ານ ຫງວຽນວັນເນນ ກ່າວວ່າ “ນະຄອນຈະສືບຕໍ່ເພີ່ມທະວີການໂຄສະນາສຶກສາ ເພື່ອໃຫ້ປະຊາຊົນທຸກຊັ້ນວັນນະ ໂດຍສະເພາະແມ່ນລຸ້ນໜຸ່ມ ໄດ້ເຂົ້າໃຈກ່ຽວກັບສາຍພົວພັນບໍລິສຸດຜຸດຜ່ອງ ແລະ ໂປ່ງໃສຂອງສອງພັກ ແລະ ສອງລັດຢ່າງເລິກເຊິ່ງກວ່າອີກ, ປະກອບສ່ວນຊຸກຍູ້ການພົວພັນຮ່ວມມືທີ່ໝັ້ນຄົງ, ເພື່ອເປົ້າໝາຍການພັດທະນາ ແລະ ການເຊື່ອມໂຍງເຂົ້າກັບສາກົນຂອງແຕ່ລະປະເທດ”.
ໃນໄລຍະຜ່ານມາ, ທຸກອົງການ, ອົງການຈັດຕັ້ງມະຫາຊົນຂອງນະຄອນໂຮ່ຈີມິນ ມີການພົວພັນທາງກົງ ຫຼື ທາງອ້ອມກັບບັນດາອົງການຂອງລາວ. ນັ້ນບໍ່ພຽງແຕ່ແມ່ນສາຍພົວພັນດ້ານການວຽກງານ, ນໍ້າໃຈມິດຕະພາບ, ເພື່ອນມິດສະຫາຍ, ບ້ານໃກ້ເຮືອງຄຽງເທົ່ານັ້ນ ຫາກຍັງແມ່ນຄວາມຮັກແພງອ້າຍນ້ອງໃນຄອບຄົວ ດຽວກັນ, ຄວາມຮັກແພງອັນພິເສດ. ການຮ່ວມມືລະຫວ່າງນະຄອນໂຮ່ຈີມິນ ແລະ ບັນດາທ້ອງຖິ່ນຂອງລາວ ບັນລຸໄດ້ບັນດາໝາກຜົນທີ່ຕັ້ງໜ້າ. ນະຄອນໄດ້ສ້າງການພົວພັນມິດຕະພາບ ກັບນະຄອນຫຼວງວຽງຈັນ, ພ້ອມກັນນັ້ນ ກໍໄດ້ປະຕິບັດຫຼາຍກິດຈະກຳຮ່ວມມືກັບຫຼາຍແຂວງຂອງລາວໃນຂົງເຂດກະສິກຳ, ການຄ້າ, ສາທາລະນະສຸກ, ການສຶກສາ, ການແລກປ່ຽນວັດທະນະທຳ, ກິລາ ແລະ ອື່ນໆ...
ຮ່າຕິ້ງ: ກໍ່ສ້າງເສັ້ນຊາຍແດນສັນຕິພາບ, ມິດຕະພາບ, ການຮ່ວມມື ແລະ ພັດທະນາ
ທີ່ພິທີສະເຫຼີມສະຫຼອງທີ່ຈັດຂຶ້ນໃນວັນທີ 30 ສິງຫາ, ທ່ານເລຂາຄະນະພັກແຂວງ ຮ່າຕິ້ງ ຮວ່າງຈຸງຢຸງ ຢືນຢັນວ່າ: ຢູ່ສະພາບໃດກໍ່ຕາມ ອົງຄະນະພັກ, ອໍານາດການປົກຄອງ ແລະ ປະຊາຊົນ ຮ່າຕິ້ງ ຍາມໃດກໍ່ສະຫງວນຄວາມຮັກແພງເປັນພິເສດ ແລະ ການຮ່ວມມືຢ່າງແໜ້ນແຟ້ນກັບບັນດາແຂວງຂອງລາວ.
ໃນຂົງເຂດສຶກສາ - ບຳລຸງສ້າງ, ຮ່າຕິ້ງ ໜູນຊ່ວຍ 17 ແຂວງຂອງລາວ ບຳລຸງສ້າງແຫຼ່ງຊັບພະຍາກອນມະນຸດ. ແຕ່ລະປີ, ແຂວງໄດ້ຫັກງົບປະມານໜູນຊ່ວຍບັນດາແຂວງເຂດຊາຍແດນກໍ່ສ້າງສະຖານທີ່ສຶກສາ, ການແພດ, ຊົນລະປະທານ, ປະກອບສ່ວນພັດທະນາເສດຖະກິດ - ສັງຄົມ, ເພີ່ມທະວີການປ້ອງກັນຊາດ - ປ້ອງກັນຄວາມສະຫງົບ.
ຜ່ານບັນດາການເຄື່ອນໄຫວສົ່ງເສີມການຄ້າ ແລະ ການລົງທຶນ, ບັນດາວິສາຫະກິດ ຮ່າຕິ້ງ ລົງທຶນຢູ່ລາວ ແລະ ບັນດາວິສາຫະກິດລາວ ຮ່ວມມືລົງທຶນຢູ່ ຮ່າຕິ້ງ ໄດ້ເສີມຂະຫຍາຍປະສິດທິຜົນ, ປະກອບສ່ວນສ້າງວຽກເຮັດງານທຳ, ປະກອບງົບປະມານ, ເພີ່ມທະວີວົງເງິນການນຳເຂົ້າ ແລະ ສົ່ງອອກຂອງສອງປະເທດ.
ວຽກງານສະກັດກັ້ນ, ຕ້ານອາດຊະຍາກຳ, ຢາເສບຕິດ, ຕ້ານຜູ້ອົບພະຍົບຂ້າມຊາຍແດນຢ່າງເສລີແມ່ນໄດ້ຮັບການແກ້ໄຂຢ່າງມີປະສິດທິຜົນໂດຍກຳລັງເຈົ້າໜ້າທີ່ຂອງສອງຝ່າຍ. ບັນດາການເຄື່ອນໄຫວຄູ່ແຮກສ່ຽວລະຫວ່າງບັນດາໝູ່ບ້ານ ແລະ ບັນດາກຳລັງເຈົ້າໜ້າທີ່ຢູ່ເຂດຊາຍແດນແມ່ນໄດ້ຮັບຄວາມເອົາໃຈໃສ່. ບັນດາແຂວງຂອງລາວ ໄດ້ສົມທົບກັບແຂວງ ຮ່າຕິ້ງ ຢ່າງແໜ້ນແຟ້ນເພື່ອຊອກຄົ້ນ ແລະ ທ້ອນໂຮມອັດຖິທະຫານອາສະສະໝັກ, ນັກຊ່ຽວຊານຫວຽດນາມ ທີ່ເສຍຊີວິດໃນປາງສົງຄາມຢູ່ລາວ ກັບຄືນເມືອບ້ານເກີດເມືອງນອນ.
ຕາມທ່ານ ຮວ່າງຈຸງຢຸງ ແລ້ວ: ຮ່າຕິ້ງ ແລະ ບັນດາແຂວງຂອງສາທາລະນະລັດ ປະຊາທິປະໄຕ ປະຊາຊົນລາວ ຈະໂຄສະນາຢ່າງກ້ວາງຂວາງໃນປະຊາຊົນ ທຸກຊັ້ນວັນນະກ່ຽວກັບມູນເຊື້ອສະໜິດຕິດພັນ ເຊິ່ງຮຸ້ນພໍ່ຮຸ້ນອ້າຍ ໄດ້ເພີ່ມພູນຄູນສ້າງ. ຈາກນັ້ນ, ກໍ່ຂົນຂວາຍປະຊາຊົນຢູ່ເຂດຊາຍແດນ ແລະ ປະຊາຊົນແຂວງຕ່າງໆຕັ້ງໜ້າກໍ່ສ້າງເສັ້ນຊາຍແດນສັນຕິພາບ, ມິດຕະພາບ, ການຮ່ວມມື ແລະ ພັດທະນາ; ນຳເອົາຂົງເຂດການສຶກສາ, ສາທາລະນະສຸກ, ວິທະຍາສາດ, ເຕັກໂນໂລຊີ, ວັດທະນະທຳ, ການທ່ອງທ່ຽວ, ການຮ່ວມມືດ້ານເສດຖະກິດ - ການຄ້າເຂົ້າສູ່ລວງເລິກ.
ຮ່າຕິ້ງ ແລະ ບັນດາທ້ອງຖິ່ນຂອງລາວ ກໍ່ສົ່ງເສີມບັນດາວິສາຫະກິດຂອງ 2 ຝ່າຍລົງທຶນຜະລິດ ແລະ ພັດທະນາທຸລະກິດ; ສ້າງເງື່ອນໄຂສະດວກໃຫ້ວິສາຫະກິດຂົນສົ່ງຂອງສອງປະເທດຮ່ວມມືຂົນສົ່ງສິນຄ້າຜ່ານເສັ້ນທາງ ເລກທີ 8, ເສັ້ນທາງ ເລກທີ 12 ໄປເຂດເສດຖະກິດຫວູງອ໋າງ ແລະ ປະເທດອື່ນໆ.
ບັນດາທ້ອງຖິ່ນ, ກົມກອງກຳລັງປະກອບອາວຸດ ຮ່າຕິ້ງ ແລະ ບັນດາແຂວງຂອງລາວ ສືບຕໍ່ແລກປ່ຽນບົດຮຽນໃນການແກ້ໄຂສິ່ງທ້າທາຍກ່ຽວກັບຄວາມໝັ້ນຄົງຢ່າງມີປະສິດທິຜົນ, ກໍ່ສ້າງ ແລະ ປັບປຸງທ່ວງທ່າທົ່ວປວງຊົນປ້ອງກັນຊາດ, ຄວາມໝັ້ນຄົງຂອງປະຊາຊົນ, ປົກປັກຮັກສາພັກ, ປົກປັກຮັກສາລະບອບ, ຢຶດໝັ້ນເດີນຕາມເສັ້ນທາງທີ່ພັກ ແລະ ຜູ້ນຳຂອງສອງປະເທດໄດ້ເລືອກເຟັ້ນ; ນຳເອົາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດຂຶ້ນສູ່ລະດັບສູງໃໝ່.
ທ່ານ ກອງແກ້ວ ໄຊສົງຄາມ, ເລຂາພັກແຂວງ, ເຈົ້າແຂວງບໍລິຄໍາໄຊ ເນັ້ນໜັກວ່າ: ຈະເພີ່ມທະວີວຽກງານການໂຄສະນາເຜີຍແຜ່ໃຫ້ແກ່ ປະຊາຊົນທຸກຊັ້ນວັນນະໃນແຂວງໂດຍສະເພາະລຸ້ນໜຸ່ມ ໃຫ້ມີຄວາມເຂົ້າ ໃຈເລິກເຊິ່ງກວ່າອີກ, ສືບຕໍ່ເສີມຂະຫຍາຍ ແລະ ເພີ່ມທະວີມູນເຊື້ອອັນດີງາມ ລະຫວ່າງສອງແຂວງ ຮ່າຕິ້ງ ແລະ ບໍລິຄຳໄຊ ເວົ້າສະເພາະ, ການພົວພັນມິດ ຕະພາບແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ເວົ້າລວມ.
ເຊີນລາ: ການຮ່ວມມືຮອບດ້ານກັບ 9 ແຂວງຂອງລາວ
ກ່ອນໜ້ານັ້ນ, ວັນທີ 29 ສິງຫາ, ຢູ່ເຂດປູສະນີຍະສະຖານປະຫວັດສາດການປະຕິວັດຫວຽດນາມ - ລາວ (ບ້ານລາວໂຄ I, ຕາແສງພຽງຄວ່າຍ, ເມືອງອຽນເຈົາ), ແຂວງ ເຊີນລາ ກໍ່ໄດ້ຈັດຕັ້ງພິທີສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ, 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງຫວຽດນາມ - ລາວ ແລະ ຕ້ອນຮັບໃບຢັ້ງຢືນການຈັດອັນດັບເຂດປູສະນີຍະສະຖານແຫ່ງຊາດພິເສດເຂດປູສະນີຍະສະຖານປະຫວັດສາດການປະຕິວັດຫວຽດນາມ - ລາວ.
 |
| ເຂດປູສະນີຍະສະຖານປະຫວັດສາດການປະຕິວັດຫວຽດນາມ - ລາວ ໄດ້ຈັດອັນດັບເປັນມໍລະດົກແຫ່ງຊາດພິເສດ. ພາບ: ກວກແຄ໊ງ |
ທ່ານເລຂາພັກແຂວງ ເຊີນລາ ຫງວຽນຫື໊ວດົງ ໃຫ້ຮູ້ວ່າ: ແຂວງ ເຊີນລາ ໄດ້ສ້າງການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານກັບ 9 ແຂວງຂອງລາວ ຄື: ຫົວພັນ, ຫຼວງພະບາງ, ບໍ່ແກ້ວ, ອຸດົມໄຊ, ຫລວງນ້ຳທາ, ຜົ້ງສາລີ, ໄລຍະບູລີ, ຊຽງຂວາງ, ໄຊສົມບູນ.
ເສີມຂະຫຍາຍມູນເຊື້ອ, ຈິດໃຈສາມັກຄີມິດຕະພາບ ແລະ ການຮ່ວມມືຮອບດ້ານ ຫວຽດນາມ - ລາວ, ລາວ - ຫວຽດນາມ, ເຊີນລາ ໄດ້ເພີ່ມທະວີການຮ່ວມມືໃນຂົງເຂດການເມືອງ, ເສດຖະກິດ, ວັດທະນະທຳ - ສັງຄົມ, ປ້ອງກັນຊາດ-ປ້ອງກັນຄວາມສະຫງົບ ແລະ ບັນລຸໄດ້ບັນດາໝາກຜົນອັນດີງາມ. ແຂວງຍາມໃດກໍ່ຮັກສາການພົບປະແລກປ່ຽນອັນດີງາມລະຫວ່າງຄະນະຜູ້ແທນຂັ້ນສູງ, ການນຳຂອງພະແນກ, ຂະແໜງການ, ອົງການຈັດຕັ້ງມະຫາຊົນຂອງແຂວງ, ເມືອງ, ນະຄອນ ເພື່ອມາຢ້ຽມຢາມ ແລະ ແລກປ່ຽນບົດຮຽນ. ທ້ອງຖິ່ນໄດ້ສະໜັບສະໜູນການລົງທຶນໃຫ້ 9 ແຂວງຂອງລາວ ເພື່ອກໍ່ສ້າງພື້ນຖານໂຄງລ່າງ, ຕົ້ນຕໍແມ່ນກິດຈະກໍາສາທາລະນະສຸກ, ວັດທະນະທຳ, ການສຶກສາ, ສ້ອມແປງ ແລະ ກໍ່ສ້າງສຳນັກງານໃໝ່.
ແຂວງໄດ້ຜັນຂະຫຍາຍບັນດາໂຄງການໜູນຊ່ວຍການພັດທະນາເສດຖະກິດ, ຫັນປ່ຽນໂຄງປະກອບປູກພືດ, ລ້ຽງສັດຢູ່ບາງແຂວງຂອງລາວ; ໜູນຊ່ວຍການບໍາລຸງສ້າງໃຫ້ນັກສຶກສາລາວນັບພັນຄົນ; ບໍາລຸງພາສາຫວຽດນາມໃຫ້ບັນດາພະນັກງານອົງການພັກ, ອົງການຈັດຕັ້ງມະຫາຊົນ, ອຳນາດການປົກຄອງ, ພະນັກງານ, ນັກຮົບບັນດາກຳລັງປະກອບອາວຸດຂອງລາວ ຢູ່ແຂວງ ເຊີນລາ.
ຄຽງຄູ່ກັບການສະໜັບສະໜູນເຊິ່ງກັນ ແລະ ກັນໃນການປ້ອງກັນ ແລະ ຕ້ານພະຍາດໂຄວິດ-19, ເຊີນລາ ແລະ ຫຼາຍແຂວງຂອງລາວ ໄດ້ຈັດຕັ້ງການພົບປະແລກປ່ຽນວັດທະນະທຳ, ສິລະປະ ແລະ ກິລາໃນຫຼາຍຮູບຫຼາຍແບບທີ່ອຸດົມສົມບູນ.
ໃນຂົງເຂດປ້ອງກັນຊາດ-ປ້ອງກັນຄວາມສະຫງົບ, ກໍາລັງຕຳຫຼວດ ແລະ ທະຫານສອງປະເທດ ຍາມໃດກໍ່ປະຕິບັດວຽກງານສົມທົບກັນ ແລະ ແລກປ່ຽນຂໍ້ມູນຂ່າວສານ, ຕໍ່ສູ້ສະກັດກັ້ນ, ຕ້ານອາດຊະຍາກຳ, ພິເສດແມ່ນອາດຊະຍາກຳຢາເສບຕິດຢູ່ເຂດຊາຍແດນ.
ທ່ານເລຂາພັກແຂວງ ເຊີນລາ ຢືນຢັນວ່າ: ອົງຄະນະພັກ, ອຳນາດການປົກຄອງ ແລະ ປະຊາຊົນບັນດາເຜົ່າໃນແຂວງ ຍາມໃດກໍ່ຖືເປັນສຳຄັນ ແລະ ໃຫ້ບຸລິມະສິດສູງຕໍ່ການພັດທະນາສາຍພົວພັນສາມັກຄີມິດຕະພາບແບບພິເສດ ແລະ ການຮ່ວມມືຮອບດ້ານກັບບັນດາແຂວງຂອງປະເທດເພື່ອນລາວ.
ພ້ອມກັບນະຄອນໂຮ່ຈິີມິນ, ຮ່າຕິ້ງ, ເຊີນລາ, ຫຼາຍແຂວງ, ນະຄອນໃນທົ່ວປະເທດກໍ່ສະເຫຼີມສະຫຼອງວັນສໍາຄັນຂອງສອງຊາດຫວຽດນາມ - ລາວ ດ້ວຍບັນດາການເຄື່ອນໄຫວທີ່ແທດຈິງ. ການຮ່ວມມືລະຫວ່າງບັນດາທ້ອງຖິ່ນຂອງຫວຽດນາມ ແລະ ລາວ ໄດ້ປະກອບສ່ວນຮັດແໜ້ນ, ເພີ່ມພູນຄູນສ້າງ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ.
ບູນມີ
