ຫວ່າງແລ້ວນີ້, ເນື່ອງໃນໂອກາດການຢ້ຽມຢາມ ແລະ ເຮັດວຽກຂອງຄະນະຜູ້ແທນແຂວງ ເຊີນລາ ຢູ່ແຂວງຊຽງຂວາງ (ລາວ), ສອງແຂວງ ໄດ້ຈັດພິທີລົງນາມໃນບົດບັນທຶກຊ່ວຍຈຳການຮ່ວມມືຮອບດ້ານລະຫວ່າງແຂວງຊຽງຂວາງ (ລາວ) ແລະ ແຂວງ ເຊີນລາ ໄລຍະ 2022 – 2024.
 |
| ແຂວງຊຽງຂວາງ (ລາວ) ແລະ ເຊີນລາ ລົງນາມໃນບົດບັນທຶກຊ່ວຍຈຳການຮ່ວມມືຮອບດ້ານ. ພາບ: tapchilaoviet.org |
ຕາງໜ້າທີ່ພິທີລົງນາມໃນບົດບັນທຶກຊ່ວຍຈໍາການຮ່ວມມືຮອບດ້ານ ໄລຍະ 2022 – 2024 ມີ ທ່ານ ສີວິໄລ ແສງຈະເລີນ - ຮອງເຈົ້າແຂວງຊຽງຂວາງ ແລະ ທ່ານ ດັ້ງງອກເຮົ້າ - ຮອງປະທານຄະນະກໍາມະການປະຊາຊົນແຂວງ ເຊີນລາ.
ຕາມເນື້ອໃນຂອງບົດບັນທຶກຊ່ວຍຈຳ, ສອງແຂວງໄດ້ເຫັນດີເປັນເອກະສັນກັນຜັນຂະຫຍາຍບັນດາວຽກງານຕົ້ນຕໍ ຄື: ສອງຝ່າຍສືບຕໍ່ສົມທົບກັນຢ່າງແໜ້ນແຟ້ນໃນການເພີ່ມທະວີການໂຄສະນາເຜີຍແຜ່ສຶກສາອົບຮົມຖັນແຖວ ພະນັກງານ, ນັກຮົບ ແລະ ປະຊາຊົນບັນດາເຜົ່າກ່ຽວກັບມູນເຊື້ອສາມັກຄີ, ມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ ແລະ ແຂວງຊຽງຂວາງ-ເຊີນລາ; ສືບຕໍ່ສົມທົບກັນ, ແລກປ່ຽນຂໍ້ມູນຂ່າວສານກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ, ປະຕິບັດຫຼັກການວຽກງານພົວພັນຕ່າງປະເທດ, ຮັບປະກັນຄວາມເປັນລະບຽບ ຮຽບຮ້ອຍທາງສັງຄົມ, ສະກັດກັ້ນ, ຕ້ານອາດຊະຍາກຳຢູ່ທ້ອງຖິ່ນ...
ກ່ຽວກັບການອຸປະຖໍາພັດທະນາພື້ນຖານໂຄງລ່າງ, ແຂວງ ເຊີນລາ ຈະໜູນຊ່ວຍແຂວງ ຊຽງຂວາງ 1 ໂຄງການ ດ້ວຍຍອດມູນຄ່າ 5 ຕື້ດົ່ງ, ໃນໄລຍະ 2022 – 2024 ແຂວງ ເຊີນລາ ຈະຈັດຕັ້ງ 2 ຊຸດຝຶກອົບຮົມການພັດທະນາແຫຼ່ງຊັບພະຍາກອນມະນຸດໃຫ້ແຂວງຊຽງຂວາງ ດ້ວຍທຶນສຶກສາ 90 ທຶນຈາກງົບປະມານຂອງແຂວງ. ແຂວງເຊີນລາ ກໍ່ເຫັນດີເປັນເອກະພາບສ້າງເງື່ອນໄຂໃຫ້ພະນັກງານ ແລະ ປະຊາຊົນແຂວງ ຊຽງຂວາງ ໄປກວດ, ປິ່ນປົວພະຍາດຢູ່ໂຮງໝໍ, ສູນການແພດຂອງແຂວງ ເຊີນລາ.
ເນື່ອງໃນໂອກາດນີ້, ແຂວງ ເຊີນລາ ໄດ້ມອບເງິນ 200 ລ້ານດົ່ງໃຫ້ແຂວງ ຊຽງຂວາງ ເພື່ອຮັບໃຊ້ວຽກງານຂອງອໍານາດການປົກຄອງ. ສອງແຂວງກໍ່ເຫັນດີເປັນເອກະພາບສົມທົບກັນຈັດຕັ້ງການເຄື່ອນໄຫວສະເຫຼີມສະຫຼອງປີມິດຕະພາບລາວ-ຫວຽດນາມ, ພົບປະແລກປ່ຽນວັດທະນະທຳ, ສິລະປະ, ກິລາ ແລະ ທ່ອງທ່ຽວ...
ບູນມີ
