| ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ເຂົ້າກອງປະຊຸມ ບັນດາຜູ້ນໍາອາຊຽນ | |
| ກະຊວງການຕ່າງປະເທດ ໃຫ້ຖະແຫຼງຂ່າວກ່ຽວກັບແຜນການສັກຢາວັກຊີນປ້ອງກັນ COVID-19 ຂອງຫວຽດນາມ |
 |
| ໜັງສືຜ່ານແດນທໍາມະດາແບບໃໝ່ຂອງ ຫວຽດນາມ ( ພາບ: TTXVN) |
ຫວ່າງແລ້ວນີ້, ທີ່ກອງປະຊຸມຂ່າວເປັນປະຈຳ ກະຊວງການຕ່າງປະເທດ, ໄດ້ອັບເດດສະພາບການທີ່ບາງປະເທດບໍ່ຮັບຮອງໜັງສືຜ່ານແດນແບບໃໝ່ຂອງຫວຽດນາມ ຍ້ອນບໍ່ມີຂໍ້ມູນກ່ຽວກັບທີ່ເກີດ, ໂຄສົກກະຊວງການຕ່າງປະເທດ ທ່ານນາງ ເລທິທູຮັ່ງ ໃຫ້ຮູ້ວ່າ ໂດຍປະຕິບັດຕາມການຊີ້ນຳຂອງທ່ານນາຍົກລັດຖະມົນຕີ, ໃນວັນທີ 9 ສິງຫາ, ກົມກົງສຸນ (ກະຊວງການຕ່າງປະເທດ) ແລະ ກົມຄຸ້ມຄອງເຂົ້າອອກເມືອງ (ກະຊວງຕຳຫຼວດ) ໄດ້ມີການເຮັດວຽກກັບສະຖານທູດເຢຍລະມັນ, ເຊັກໂກ ແລະ ສະເປນ ຢູ່ຮ່າໂນ້ຍ, ປຶກສາຫາລືກ່ຽວກັບ ບັນຫາທີ່ບັນດາປະເທດເຫຼົ່ານີ້ໄດ້ໂຈະການອອກວີຊາໃຫ້ໜັງສືຜ່ານແດນທໍາມະດາຂອງ ຫວຽດນາມ ແບບໃໝ່ ເພາະວ່າໜ້າຂອງໜັງສືຜ່ານແດນບໍ່ມີຂໍ້ມູນກ່ຽວກັບທີ່ເກີດ.
ທີ່ການພົບປະ, ຜູ້ຕາງໜ້າກົມກົງສຸນ ແລະ ຜູ້ຕາງໜ້າກົມຄຸ້ມຄອງເຂົ້າອອກເມືອງໄດ້ຍົກທັດສະນະ ແລະ ທິດທາງຂອງ ຫວຽດນາມ ໃນການແກ້ໄຂບັນຫານີ້. ຕາມນັ້ນແລ້ວ, ບັນດາອົງການຮັບຜິດຊອບຂອງ ຫວຽດນາມ ໄດ້ເຫັນດີເປັນເອກະພາບ, ໃນເບື້ອງຕົ້ນ ຈະໄດ້ຂຽນໄວ້ເຂົ້າໃນພາກໝາຍເຫດຂອງໜັງສືຜ່ານແດນແບບໃໝ່ເມື່ອພົນລະເມືອງສະເໜີ. ກະຊວງການຕ່າງປະເທດ ແລະ ກະຊວງຕຳຫຼວດ ຫວຽດນາມ ສະເໜີບັນດາປະເທດສົມທົບກັບ ຫວຽດນາມ ໃນການແກ້ໄຂຄວາມຫຍຸ້ງຍາກ, ອອກວີຊາໃຫ້ໜັງສືຜ່ານແດນທໍາມະດາແບບໃໝ່ຂອງ ຫວຽດນາມ ໂດຍໄວ.
ທ່ານນາງ ເລທິທູຮັ່ງ ເນັ້ນໜັກວ່າ ສະຖານທູດ ເຢຍລະມັນ, ເຊັກໂກ ແລະ ສະເປນ ໄດ້ຢືນຢັນວ່າ ພ້ອມທີ່ຈະສົມທົບກັບອົງການຮັບຜິດຊອບ ຫວຽດນາມ ເພື່ອແກ້ໄຂບັນດາຂໍ້ຄົງຄ້າງໃນການອອກວີຊາໃຫ້ໜັງສືຜ່ານແດນທໍາມະດາແບບໃໝ່ຂອງ ຫວຽດນາມ ດ້ວຍເງື່ອນໄຂພົນລະເມືອງຕ້ອງສະໜອງຂໍ້ມູນຢັ້ງຢືນທີ່ເກີດເພື່ອເຮັດໃຫ້ ສໍາເນົາເອກະສານທີ່ຂໍວີຊາໄປບັນດາປະເທດ ດັ່ງກ່າວໄດ້ສົມບູນແບບ.
ໂດຍກໍຕາມທ່ານນາງ ເລທິທູຮັ່ງ ແລ້ວ, ໃນໄລຍະຈະມາເຖິງ, ກະຊວງການຕ່າງປະເທດ ແລະ ບັນດາອົງການຕາງໜ້າ ຫວຽດນາມ ຢູ່ຕ່າງປະເທດ ຈະສືບຕໍ່ຕິດຕາມບັນຫານີ້, ສົມທົບກັນຢ່າງແໜ້ນແຟ້ນກັບກະຊວງຕຳຫຼວດ ແລະ ອົງການຮັບຜິດຊອບຢູ່ປະເທດປະຈໍາຖິ່ນ ໃນການແກ້ໄຂບັນຫາທີ່ຍັງຄົງຄ້າງ ແລະ ສ້າງເງື່ອນໄຂສະດວກໃຫ້ແກ່ການເດີນທາງໄປມາສາກົນຂອງພົນລະເມືອງ ຫວຽດນາມ.
ຫອມມາລາ
