ໃນໄລຍະຢ້ຽມຢາມຫວຽດນາມ ໃນຕົ້ນເດືອນສິີງຫາ 2022, ຄະນະ ປະຕິບັດງານກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານລາວ (DESM) ຂຶ້ນກັບກະຊວງພະລັງງານ ແລະ ບໍ່ແຮ່ (ລາວ) ໄດ້ໄປຢ້ຽມຢາມເຂື່ອນໄຟຟ້ານ້ຳຕົກເຊີນລາ, ຮວ່າບິ່ງ ຖອດຖອນບົດຮຽນໃນວຽກງານ ຄຸ້ມຄອງດ້ານເຕັກນິກການດຳເນີນການເຄື່ອນໄຫວເຂື່ອນຢ່າງປອດໄພ, ຂົງເຂດທີ່ພວມໄດ້ຮັບ ຄວາມສົນໃຈໃນລາວ.
ຢ້ຽມຢາມເຂື່ອນໄຟຟ້າເຊີນລາ - ກິດຈະກໍາປະຈຳປີສະໜອງໄຟຟ້າກວ່າ 10 ຕື້ kWh ໃຫ້ຕາໜ່າງໄຟຟ້າແຫ່ງຊາດຫວຽດນາມ, ທ່ານ ພູໂຂງ ແສງວິໄລ ຮອງຫົວໜ້າກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານລາວ, ຫົວໜ້າຄະນະປະຕິບັດງານໄດ້ສະແດງຄວາມປະທັບໃຈຕໍ່ກິດຈະກໍາໄຟຟ້ານ້ຳຕົກໃຫຍ່ທີ່ສຸດອາຊີຕາເວັນອອກສ່ຽງໃຕ້. ທ່ານ ພູໂຂງ ແສງວິໄລ ໃຫ້ຮູ້ວ່າ: “ຂະບວນການດໍາເນີນງານ, ກໍ່ສ້າງ, ປຶກສາການ ອອກແບບລ້ວນແຕ່ໂດຍນັກວິສະວະກອນຫວຽດນາມດຳເນີນການ ເຊິ່ງສະແດງໃຫ້ເຫັນວ່າ ຫວຽດນາມເປັນເຈົ້າການເຕັກໂນໂລຢີ ການກໍ່ສ້າງເຂື່ອນໄຟຟ້ານ້ຳຕົກໃຫຍ່ຢ່າງສິ້ນເຊີງ”.
ທ່ານ ພູໂຂງ ແສງວິໄລ ຮອງຫົວໜ້າກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານລາວ ກໍ່ໄດ້ສະແດງຄວາມສົນໃຈຕໍ່ການຄຸ້ມຄອງການດຳເນີນການເຄື່ອນໄຫວອ່າງເກັບນ້ຳເຂື່ອນໄຟຟ້ານໍ້າຕົກເຊີນລາ. ໂດຍໄດ້ຮູ້ວ່າ, ບໍລິສັດໄຟຟ້ານ້ຳຕົກ ເຊີນລາ (ຂຶ້ນກັບກຸ່ມບໍລິສັດໄຟຟ້າຫວຽດນາມ) ໄດ້ທົດລອງກໍ່ສ້າງສູນຄວບຄຸມຄວາມປອດໄພໃນຂັ້ນໄດເຂື່ອນໄຟຟ້າແມ່ນໍ້າດາ ແລະ ໄດ້ນຳເຂົ້າເຄື່ອນໄຫວມາເປັນເວລາ 1 ປີກວ່າ. ຫນຶ່ງໃນເປົ້າຫມາຍທີ່ ສໍາຄັນທີ່ສຸດຂອງສູນແມ່ນການຄຸ້ມຄອງລວມສູນຂໍ້ມູນການຄວບຄຸມຄວາມປອດໄພສໍາລັບບັນດາກິດຈະກໍາບົນພື້ນຖານຂອງການເຊື່ອມຕໍ່ສັນຍານຂອງອຸປະກອນກວດກາ ແລະ ວັດແທກ, ຕິດຕາມກິດຈະກໍາ; ເກັບກຳ, ວິເຄາະ, ປະເມີນຜົນ ແລະ ແກ້ໄຂຂໍ້ມູນຕົວເລກຢ່າງເປັນມືອາຊີບ, ຮັບປະກັນລັກສະນະພາວະວິໄສ ແລະ ຊື່ສັດ. ຜ່ານນັ້ນ, ຊ່ວຍໃຫ້ EVN ແລະ ຄະນະຊີ້ນຳແຫ່ງຊາດ ກ່ຽວກັບການປ້ອງກັນ ແລະ ຕ້ານໄພພິບັດທຳມະຊາດ ອອກຂໍ້ຕົກລົງວ່າດ້ວຍການດຳເນີນການເຄື່ອນໄຫວອ່າງເກັບນ້ຳ ໃນລະດູນ້ຳຖ້ວມ ຢ່າງໄຫວພິບ, ສອດຄ່ອງກັບພະຍາກອນອຸຕຸນິຍົມ ແລະ ອຸທົກກະສາດ ຕາມເວລາຕົວຈິງ; ນຳມາເຊິ່ງຜົນປະໂຫຍດລວມສູງກວ່າໃຫ້ແກ່ລະບົບໄຟຟ້ານ້ຳຕົກຢູ່ແມ່ນ້ຳດາ, ປະກອບສ່ວນສຳຄັນເຂົ້າໃນລະບົບໄຟຟ້າແຫ່ງຊາດ ແລະ ສະໜອງນ້ຳໃຫ້ແກ່ເຂດລຸ່ມນ້ຳໃນລະດູແລ້ງ.
ຕາມທ່ານ ພູໂຂງ ແສງວິໄລ ຮອງຫົວໜ້າກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານລາວ ແລ້ວ, ສູນຄວບຄຸມຄວາມປອດໄພ ວຽກງານກໍ່ສ້າງຂັ້ນໄດໄຟຟ້າແມ່ນ້ຳດາ ແມ່ນເປັນແບບຢ່າງທີ່ດີ, ທັນສະໄໝ, ສອດຄ່ອງກັບທ່າອ່ຽງຂອງໂລກ. ຢູ່ລາວກໍ່ມີຫຼາຍລະບົບຂັ້ນໄດເຂື່ອນໄຟຟ້າຄືກັບຢູ່ຫວຽດນາມ, ສະນັ້ນ, ຜ່ານການຢ້ຽມຢາມ, ຮຽນຮູ້ ແລະ ແລກປ່ຽນປະສົບການ, ຄະນະຜູ້ແທນກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານລາວຈະເຂົ້າໃຈຕື່ມອີກກ່ຽວກັບການດຳເນີນການເຄື່ອນໄຫວຂອງອ່າງເກັບນ້ຳເຂື່ອນໄຟຟ້າແບບຂັ້ນໄດ, ຄວາມໝາຍຄວາມສຳຄັນຂອງຄວາມປອດໄພຂອງເຂື່ອນເພື່ອຮັບປະກັນຄວາມປອດໄພໃຫ້ແກ່ເຂດລຸ່ມນ້ຳ.
ທ່ານ ພູໂຂງ ແສງວິໄລ ຮອງຫົວໜ້າກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານລາວຫວັງວ່າ ບັນດານັກຊ່ຽວຊານ ຫວຽດນາມທີ່ມີປະສົບການຫຼາຍປີໃນການເຄື່ອນໄຫວ ແລະ ການຄວບຄຸມຄວາມ ປອດໄພຂອງເຂື່ອນໄຟຟ້ານໍ້າຕົກ ຈະສືບຕໍ່ແບ່ງປັນປະສົບການ, ຊ່ວຍເຫຼືອໃຫ້ວຽກງານການດຳເນີນການເຄື່ອນໄຫວບັນດາເຂື່ອນໄຟຟ້າຂອງລາວ ໃນປະຈຸບັນ. ພ້ອມກັນນັ້ນ, ກໍ່ຊ່ວຍເຫຼືອລາວສ້າງລະບຽບການກ່ຽວກັບຄວາມປອດໄພຂອງເຂື່ອນ ແລະ ການເຄື່ອນໄຫວອ່າງເກັບນ້ຳ, ພ້ອມທັງ ຮັດແໜ້ນອາລົມຈິດແບບພິເສດຂອງການພົວພັນຮ່ວມມືລະຫວ່າງ ຫວຽດນາມ ແລະ ລາວ.
ພ້ອມແລ້ວທີ່ຈະແບ່ງປັນປະສົບການກັບປະເທດລາວ
ທີ່ການເຮັດວຽກກັບຄະນະປະຕິບັດງານຂອງປະເທດເພື່ອນມິດລາວ, ບັນດານັກຊ່ຽວຊານດ້ານໄຟຟ້ານ້ຳຕົກຢູ່ທີ່ນີ້ໄດ້ແກ້ໄຂຢ່າງລະອຽດບັນດາບັນຫາທີ່ຄະນະປະຕິບັດງານຂອງກົມຄຸ້ມຄອງຄວາມປອດໄພດ້າອຸດສາຫະກຳພະລັງງານລາວ ວາງອອກ ເຊັ່ນ: ບັນດາບັນຫາທີ່ກ່ຽວຂ້ອງເຖິງຄວາມປອດໄພຂອງເຂື່ອນ ແລະ ອ່າງເກັບນ້ຳເຂື່ອນໄຟຟ້າ, ການເຄື່ອນໄຫວອ່າງເກັບນ້ຳໃນລະດູຝົນ, ລຳດັບບຸລິມະສິດເມື່ອການດຳເນີນເຄື່ອນໄຫວອ່າງເກັບນ້ຳ.
 |
| ຄະນະປະຕິບັດງານກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານ (ລາວ) ໄດ້ຮັບຟັງການແນະນຳກ່ຽວກັບຂະບວນການເຄື່ອນໄຫວຂອງໂຮງງານໄຟຟ້ານ້ຳຕົກ ຮວ່າບິ່ງ. ພາບ: ຊວນຕຽນ |
ທ່ານ ເຄືອງເຖ໊ແອງ, ຜູ້ອຳນວຍການໃຫຍ່ບໍລິສັດໄຟຟ້ານ້ຳຕົກ ເຊີນລາ ໃຫ້ຮູ້ວ່າ: ໜ່ວຍງານພ້ອມແລ້ວທີ່ຈະແບ່ງປັນປະສົບການໃນການດຳເນີນການເຄື່ອນໄຫວ ຂອງອ່າງເກັບນ້ຳ, ການກວດກາ ແລະ ຕີລາຄາຄວາມປອດໄພຂອງກິດຈະກໍາ, ແລະ ປະສົບການການດຳເນີນການເຄື່ອນໄຫວເຂື່ອນໄຟຟ້ານ້ຳຕົກຂະໜາດໃຫຍ່ ທີ່ມີເຕັກໂນໂລຢີທັນສະໄໝ ແລະ ອັດຕະໂນມັດສູງ... ຕາມທ່ານ ເຄືອງເຖ໊ແອງ, ຜູ້ອຳນວຍການໃຫຍ່ບໍລິສັດໄຟຟ້ານ້ຳຕົກເຊີນລາ ແລ້ວ ນີ້ແມ່ນບາດກ້າວຫັນຖະແຫຼງການຮ່ວມຂອງລັດຖະບານ ຫວຽດນາມ ເນື່ອງໃນໂອກາດສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ - ລາວ (ວັນທີ 5 ກັນຍາ 1962 – ວັນທີ 5 ກັນຍາ 2022) ໃຫ້ປະກົດຜົນເປັນຈິງ.
ທ່ານ ຫງວຽນກວັກຈິງ, ຮອງຫົວໜ້າພະແນກເຕັກນິກ - ຜະລິດ ກຸ່ມບໍລິສັດໄຟຟ້າຫວຽດນາມ (EVN) ໃຫ້ຮູ້ວ່າ: ພ້ອມແລ້ວທີ່ຈະແບ່ງປັນປະສົບການກັບກົມຄຸ້ມຄອງຄວາມປອດໄພດ້ານອຸດສາຫະກຳພະລັງງານລາວ ກ່ຽວກັບບັນດາເນື້ອໃນຄື: ຄຸ້ມຄອງກໍ່ສ້າງ, ຄຸ້ມຄອງບັນດາກິດຈະກໍາເຂື່ອນໄຟຟ້ານ້ຳຕົກຢ່າງປອດໄພ ແລະ ມີປະສິດທິຜົນ; ຕີລາຄາ ແລະ ກວດກາບັນດາກິດຈະກໍາເຂື່ອນໄຟຟ້ານ້ຳຕົກ; ສ້າງຖານຂໍ້ມູນກ່ຽວກັບການຄຸ້ມ ຄອງຄວາມປອດໄພຂອງເຂື່ອນ ແລະ ອ່າງເກັບນໍ້າ; ການສ້າງຕັ້ງ ແລະ ສ້າງ ຂັ້ນຕອນການດຳເນີນການເຄື່ອນໄຫວອ່າງເກັບນ້ຳ ແລະ ລະບົບບັນດາອ່າງເກັບນໍ້າ; ສ້າງແຜນທີ່ໄພນ້ຳຖ້ວມເຂດລຸ່ມນ້ຳ ແລະ ແຜນການຮັບມື; ບໍາລຸງສ້າງແຫຼ່ງຊັບພະຍາກອນມະນຸດ ເພື່ອການດຳເນີນການເຄື່ອນໄຫວເຂື່ອນ, ອ່າງເກັບນ້ຳ...
ໃນຂະນະນັ້ນ, ບໍລິສັດຫຸ້ນສ່ວນທີ່ປຶກສາກໍ່ສ້າງໄຟຟ້າ 1 (EVNPECC1) - ວິສາຫະກິດໄດ້ຜັນຂະຫຍາຍຫຼາຍໂຄງການເຂື່ອນໄຟຟ້ານໍ້າຕົກຢູ່ລາວ, ມີຫຼາຍປະສົບການໃນວຽກງານທີ່ປຶກສາ, ອອກແບບກໍ່ສ້າງບັນດາກິດກະກໍາ ເຂື່ອນໄຟຟ້າ ແລະ ທີ່ປຶກສາກໍ່ສ້າງແຜນທີ່ໄພນໍ້າຖ້ວນເຂດລຸ່ມນໍ້າ. ທ່ານ ຫງວຽນຮື໊ວຈີ້ງ, ຜູ້ອຳນວຍການໃຫຍ່ EVNPECC1 ໃຫ້ຮູ້ວ່າ: ບໍລິສັດ ພ້ອມແລ້ວທີ່ຈະໜູນຊ່ວຍ ແລະ ໃຫ້ຄາປຶກສາວິທີການທີ່ດີທີ່ສຸດໃຫ້ແກ່ DESM ແລະ ລັດຖະບານລາວ ກ່ຽວກັບຂົງເຂດດັ່ງກ່າວ.
ບູນມີ
