ທ່ານ ຫວໍວັນເຖືອງ ຜູ້ປະຈຳການຄະນະເລຂາທິການ ໄປຢ້ຽມຢາມ ແລະ ເຮັດວຽກຢູ່ລາວ

23:16 | 19/07/2022

ຍສໝ - ທີ່ການຕ້ອນຮັບຄະນະຜູ້ແທນຫວຽດນາມ, ບັນດາການນຳຂັ້ນສູງລາວໄດ້ສະແດງຄວາມຍິນດີຕໍ່ການພົວພັນລາວ ຫວຽດນາມ ທີ່ນັບມື້ນັບພັດທະນາຢ່າງເລິກເຊິ່ງກ້ວາງຂວາງໃນຫຼາຍຂົງເຂດ, ນຳມາເຊິ່ງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນແຕ່ລະປະເທດ.

	ຫວຽດນາມ ແລະ ລາວສືບຕໍ່ຮັກສາບັນດາການຢ້ຽມຢາມ, ພົບປະຂັ້ນສູງ
	ວິສາຫະກິດ ຫວຽດນາມ ສ້າງວຽກເຮັດງານທຳໃຫ້ແກ່ປະຊາຊົນລາວ ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ຍົກສູງຊີວິດການເປັນຢູ່

ທ່ານ ຫວໍວັນເຖືອງ ຜູ້ປະຈຳການຄະນະເລຂາທິການ ໄປຢ້ຽມຢາມ ແລະ ເຮັດວຽກຢູ່ລາວ

ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ໃຫ້ການຕ້ອນຮັບທ່ານ ຫວໍວັນເຖືອງ, ກຳມະການກົມການເມືອງ, ຜູ້ປະຈຳການ ຄະນະເລຂາທິການ (ພາບ: TTXVN)

ໂດຍໄດ້ຮັບຄຳເຊື້ອເຊີນຂອງພັກ, ລັດລາວ, ຄະນະຜູ້ແທນຂັ້ນສູງພັກ ແລະ ລັດຫວຽດນາມ ໂດຍທ່ານ ຫວໍວັນເຖືອງ, ກຳມະການກົມການເມືອງ, ຜູ້ປະຈຳການຄະນະເລຂາທິການ ໄດ້ນຳໜ້າຄະນະໄປຢ້ຽມຢາມລາວ ແລະ ເຂົ້າຮ່ວມພິທີສະເຫຼີມສະຫຼອງ 60 ປີແຫ່ງວັນສ້າງຕັ້ງສາຍພົວພັນທາງການທູດ (5/9/1962 – 5/9/2022) ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື (18/7/1977 -18/7/2022) ຢູ່ລາວ.

ຕອນບ່າຍວັນທີ 17 ກໍລະກົດນີ້, ຢູ່ນະຄອນຫຼວງວຽງຈັນ, ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ, ທ່ານນາຍົກລັດຖະມົນຕີ ລາວ ພັນຄຳ ວິພາວັນ, ທ່ານປະທານສະພາແຫ່ງຊາດ ໄຊສົມພອນ ພົມວິຫານ ໄດ້ໃຫ້ການຕ້ອນຮັບຄະນະ.

ທີ່ການພົບປະ, ທ່ານ ຫວໍວັນເຖືອງ ໄດ້ສະແດງຄວາມດີໃຈທີ່ໄດ້ນຳໜ້າຄະນະຜູ້ແທນຂັ້ນສູງພັກ ແລະ ລັດ ຫວຽດນາມ ໄປຢ້ຽມຢາມລາວ ແລະ ເຂົ້າຮ່ວມພິທີສະເຫຼີມສະຫຼອງໃນຖານະໃໝ່, ທ່ານກໍ່ຂອບໃຈບັນດາການນຳຂັ້ນສູງຂອງພັກ ແລະ ລັດລາວ ທີ່ໄດ້ໃຫ້ການຕ້ອນຮັບຄະນະຜູ້ແທນ ແລະ ໄດ້ສົ່ງຄຳອວຍພອນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ, ທ່ານປະທານປະເທດ ຫງວຽນຊວນຟຸກ, ທ່ານນາຍົກລັດຖະມົນຕີ ຟ້າມມິງຈິງ ແລະ ທ່ານປະທານສະພາແຫ່ງຊາດ ເວືອງດິ່ງເຫ້ວ ເຖິງການນຳຂັ້ນສູງຂອງລາວ.

ທ່ານ ຫວໍວັນເຖືອງ ເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ, ການບໍລິຫານຂອງລັດຖະບານ ແລະ ການຊີ້ນຳຂອງສະພາແຫ່ງຊາດ, ປະຊາຄົມຊາວລາວຈະສືບຕໍ່ບັນລຸໄດ້ບັນດາຜົນງານໃໝ່ອັນໃຫຍ່ຫຼວງກວ່າອີກ, ປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກຢ່າງມີໄຊ, ສ້າງສາປະເທດລາວໃຫ້ມີສັນຕິພາບ, ເປັນເອກະລາດ ແລະ ຈະເລີນຮຸ່ງເຮືອງຕາມເປົ້າໝາຍສັງຄົມນິຍົມ.

ສ່ວນທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ, ນາຍົກລັດຖະມົນຕີ ລາວ ພັນຄຳ ວິພາວັນ, ປະທານສະພາແຫ່ງຊາດ ໄຊສົມພອນ ພົມວິຫານ ກໍ່ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງພັກ ແລະ ລັດ ຫວຽດນາມ ໂດຍທ່ານ ຫວໍວັນເຖືອງ ນຳໜ້າໄປຢ້ຽມຢາມ ແລະ ເຂົ້າຮ່ວມບັນດາການເຄື່ອນໄຫວສະເຫຼີມສະຫຼອງ, ເຊິ່ງໄດ້ສະແດງໃຫ້ເຫັນສາຍພົວພັນສາມັກຄີແບບພິເສດ ລາວ-ຫວຽດນາມ ແລະ ໄດ້ຕີລາຄາສູງຄວາມໝາຍ ແລະ ຄວາມສຳຄັນຂອງສອງຝ່າຍທີ່ຈັດຕັ້ງໃນໂອກາດປີມິດຕະພາບລາວ-ຫວຽດນາມ.

ການນຳຂັ້ນສູງລາວ ໄດ້ສະແດງຄວາມຊົມເຊີຍຕໍ່ບັນດາຜົນງານອັນໃຫຍ່ຫຼວງ ແລະ ສຳຄັນທີ່ຫວຽດນາມ ຍາດມາໄດ້ໃນຊຸມປີມໍ່ໆມານີ້, ຮັກສາສະຖຽນລະພາບດ້ານການເມືອງ, ພັດທະນາເສດຖະກິດ - ສັງຄົມ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງຢ່າງຈະແຈ້ງ, ທີ່ຕັ້ງ ແລະ ບົດບາດຂອງຫວຽດນາມ ໄດ້ຮັບການຍົກສູງຂຶ້ນໃນເວທີສາກົນ.

ບຸນຄົງ