 |
| ທ່ານນາຍົກລັດຖະມົນຕີ ຟ້າມມິງຈີ໊ງ ທີ່ການສົນທະນາທາງໄກ. ພາບ: ສໍານັກຂ່າວສານຫວຽດນາມ |
ທີ່ການສົນທະນາ, ທ່ານນາຍົກລັດຖະມົນຕີ ຟ້າມມິງຈີ໊ງ ຢັ້ງຢືນວ່າ ຫວຽດນາມ ສະເໝີຕົ້ນສະເໝີປາຍຕໍ່ການປະຕິບັດແນວທາງນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ, ຫັນການພົວພັນເປັນຫຼາຍຮູບຫຼາຍແບບ ແລະຫຼາຍຝ່າຍ; ເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບຂອງປະຊາຄົມສາກົນ. ໃນນັ້ນ, ຫວຽດນາມ ຍາມໃດກໍຖື ສ.ເກົາຫຼີ ເປັນຄູ່ຮ່ວມມືຍຸດທະສາດທີ່ສໍາຄັນ ແລະຍາວນານ; ປາດຖະໜາຢາກພ້ອມກັບ ສ.ເກົາຫຼີ ເຮັດໃຫ້ການພົວພັນສອງປະເທດເລິກເຊິ່ງຂຶ້ນຕື່ມ, ເພື່ອຜົນປະໂຫຍດລວມຂອງປະຊາຊົນສອງປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ຮ່ວມມື ແລະພັດທະນາຢູ່ພາກພື້ນ ແລະໃນໂລກ.
ສ່ວນທ່ານ Han Duck-soo ນາຍົກລັດຖະມົນຕີ ສ.ເກົາຫຼີ ຢັ້ງຢືນວ່າ ສ.ເກົາຫຼີ ຖື ຫວຽດນາມ ແມ່ນໜຶ່ງໃນບັນດາຄູ່ຮ່ວມມືສໍາຄັນແຖວໜ້າ; ປາດຖະໜາຢາກພ້ອມກັບຫວຽດນາມ ສືບຕໍ່ພັດທະນາການພົວພັນທີ່ໝັ້ນຄົງໃນໄລຍະຈະມາເຖິງ; ຂອບໃຈລັດຖະບານຫວຽດນາມ ທີ່ໄດ້ໜູນຊ່ວຍບັນດາວິສາຫະກິດ ແລະພົນລະເມືອງ ສ.ເກົາຫຼີ ເຂົ້າເມືອງຢ່າງສະດວກ, ມີມາດຕະການໜູນຊ່ວຍຢ່າງມີປະສິດທິຜົນຊ່ວຍໃຫ້ວິສາຫະກິດ ສ.ເກົາຫຼີ ຮັກສາການຜະລິດຢູ່ຫວຽດນາມ ເປັນປົກກະຕິ, ໂດຍສະເພາະແມ່ນໃນໄລຍະການແຜ່ລະບາດຂອງພະຍາດໂຄວິດ-19 ທີ່ຜ່ານມາ.
ນາຍົກລັດຖະມົນຕີສອງທ່ານ ເຫັນດີຕໍ່ບາງມາດຕະການລະອຽດເພື່ອຊຸກຍູ້ພັດທະນາການພົວພັນສອງປະເທດໃນໄລຍະຈະມາເຖິງ, ລວມມີ: ຜັນຂະຫຍາຍຜົນການພົບປະເຈລະຈາທາງໄກລະຫວ່າງທ່ານເລຂາທິການໃຫຍ່ ຫງວຽນຝູຈ້ອງ ແລະທ່ານປະທານາທິບໍດີ Yoon Suk-yeol ໃນວັນທີ 8 ມິຖຸນາ ທີ່ຜ່ານມາ; ສືບຕໍ່ຮ່ວມມືກັນຢ່າງແໜ້ນແຟ້ນ ເພື່ອຈັດຕັ້ງການເຄື່ອນໄຫວສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດຢ່າງມີປະສິດທິຜົນ; ຜັນຂະຫຍາຍກົນໄກຮ່ວມມືສອງຝ່າຍ ແລະຫຼາຍຝ່າຍ ຄື ສັນຍາການຄ້າເສລີສອງຝ່າຍຫວຽດນາມ-ສ.ເກົາຫຼີ (VKFTA), ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ຢ່າງມີປະສິດທິຜົນແນໃສ່ບັນລຸເປົ້າໝາຍຍົກວົງເງິນການຄ້າສອງຝ່າຍຂຶ້ນເປັນ 100 ຕື້ໂດລາສະຫະລັດ ໃນປີ 2023 ແລະ 150 ຕື້ໂດລາສະຫະລັດ ໃນປີ 2030 ໂດຍໄວ; ສົ່ງເສີມບັນດາວິສາຫະກິດ ສ.ເກົາຫຼີ ເປີດກວ້າງການລົງທຶນເຂົ້າຫວຽດນາມ...
ກ່ຽວກັບບັນຫາທະເລຕາເວັນອອກ, ສອງຝ່າຍໄດ້ແບ່ງປັນວິໄສທັດລວມກ່ຽວກັບການຮັກສາສັນຕິພາບໃຫ້ມີສະຖຽນລະພາບ, ຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລຢູ່ທະເລຕາເວັນອອກ, ແກ້ໄຂການຂັດແຍ້ງກັນຢູ່ທະເລໂດຍສັນຕິວິທີ, ຮັບປະກັນສິດ, ຜົນປະໂຫຍດອັນຊອບທໍາຂອງບັນດາປະເທດໃຫ້ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982.
ກອງທັບ
